 |
ພິີທີຕັດແຖບຜ້າເປີດງານ ວາງສະແດງຜົນງານາ ກ່ຽວກັບການຖ່າຍທອດເຕັກໂນໂລຊີ ລາວ-ຫວຽດນາມ 2018.
ໂດຍການເຂົ້າຮ່ວມຂອງ ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ ເຈີນວັນຕຸງ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ສສ ຫວຽດນາມ, ທ່ານ ຟານວັນກ້ຽມ ຮອງປະທານສະພາບັນດິດ ວິທະຍາສາດ ສສ ຫວຽດນາມ, ມີບັນດາຕາງໜ້າຈາກ ສະຖາບັນຄົ້ນຄວ້າ ແລະ ພັດທະນາ, ມະຫາວິທະຍາໄລ, ພາກສ່ວນທຸລະກິດ ຈາກພາຍໃນ ສປປ ລາວ ແລະ ສສ ຫວຽດນາມ ເຂົ້າຮ່ວມ ຫລາຍກວ່າ 300 ທ່ານ.
ຈຸດປະສົງຂອງງານຄັ້ງນີ້, ເພື່ອສົ່ງເສີມການຖ່າຍທອດ, ການຄົ້ນຄວ້າ, ການປະດິດສ້າງ ແລະ ການນຳໃຊ້ເຕັກໂນໂລຊີ ພາຍໃຕ້ເປົ້າໝາຍຍຸດທະສາດ ການພັດທະນາວິທະຍາສາດ ແລະ ເຕັກໂນໂລຊີ ເຂົ້າໃນ ການພັດ ທະນາເສດຖະກິດ-ສັງຄົມ ໃຫ້ມີປະສິດທິຜົນ ແລະ ທັງເປັນການ ເພີ່ມທະວີການຮ່ວມມື ເພື່ອສົ່ງເສີມການຖ່າຍທອດເຕັກໂນໂລຊີ ຂອງສອງຊາດ ລາວ-ຫວຽດນາມ ພາຍໃຕ້ຂອບການຮ່ວມມື ໃນການຜັນ ຂະຫຍາຍ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ດ້ານເຕັກໂນໂລຊີ ແລະ ນະວັດຕະກຳທີ່ໄດ້ລົງນາມໃນປີຜ່ານມາ ທີ່ ສສ ຫວຽດນາມ. ງານດັ່ງກ່າວ, ຍັງເປັນການເພີ່ມທະວີ ການຮັດແໜ້ນ ຄວາມສາ ມັກຄີແບບ ພິເສດ ມິດຕະ ພາບອັນຍິ່ງໃຫຍ່ ແລະ ການຮ່ວມມືຮອບດ້ານ ທີ່ມີມູນເຊື້ອຍາວນານ ຂອງທັງສອງປະເທດລາວ ແລະ ຫວຽດນາມ ໃຫ້ໝັ້ນຄົງຂະນົງແກ່ນຕະຫລອດໄປ.
ໃນງານດັ່ງກ່າວ, ໄດ້ມີບັນດາສະຖາບັນຄົ້ນຄວ້າ ແລະ ພັດທະນາ, ມະຫາວິທະຍາໄລ, ພາກ ສ່ວນທຸລະກິດ ຈາກພາຍໃນ ສປປ ລາວ ແລະ ສສ ຫວຽດນາມ ໄດ້ນໍາເອົາຜະລິດຕະພັນ ແລະ ຜົນ ງານເຕັກໂນໂລຊີ ໃນຂົງເຂດເຕັກໂນໂລຊີ ຂະບວນການຜະລິດ ແລະ ເກັບຮັກສາຜົນຜະລິດກະສິກຳ, ພະລັງງານທົດແທນ, ການຮັກສາສິ່ງແວດລ້ອມ, ຂໍ້ມູນຂ່າວສານ-ສື່ສານ ແລະ ການບໍລິການ, ການເພາະລ້ຽງສັດນໍ້າ ແລະ ການປະມົງ ແລະ ອື່ນໆ. ໃນໂອກາດດຽວກັນ, ສສ ຫວຽດນາມ ໄດ້ມອບເຄື່ອງຊ່ວຍເຫລືອຜູ້ປະສົບໄພ ຢູ່ເມືອງສະໜາມໄຊ ແຂວງ ອັດຕະປື ລວມມູນຄ່າ 50 ກວ່າລ້ານກີບ (150 ລ້ານດົງ).
ນອກຈາກນີ້, ຍັງມີພິທີເຊັນບົດບັນທຶກຄວາມເຂົ້າໃຈ ຈຳນວນ 9 ສະບັບ ເປັນຕົ້ນ ບົດບັນທຶກຄວາມເຂົ້າໃຈ ວ່າດ້ວຍການສະໜັບສະໜູນໂຄງການຄົ້ນຄວ້າ ແລະ ພັດທະນາ HDPEສຳລັບການລ້ຽງປາກະຊັງ ຢູ່ ສປປ ລາວ ທີ່ມີຄ່າໃຊ້ຈ່າຍຕ່ຳ; ການກໍ່ສ້າງຊັບພະຍາກອນມະນຸດ ໃຫ້ແກ່ ສປປ ລາວ, ຈັດຕັ້ງກອງປະຊຸມສຳມະນາ, ຈັດຕັ້ງແລກປ່ຽນວັດທະນະທຳ, ການສຶກສາ ແລະ ເຕັກນິກ; ເຕັກໂນໂລຊີການຜະລິດບັນດາ ຜະລິດຕະ ພັນເພີ່ມ ມູນຄ່າ (ທາດໜຽວ ແລະ ປະສົມ ເພື່ອເຮັດໃຫ້ປາສຕິກ, ຢາງພາລາຄົງຕົວ); ເຕັກໂນໂລຊີ ຂໍ້ມູນຂ່າວສານ ແລະ ການກະຈ່າຍຂ່າວຮັບໃຊ້ການພັດທະນາຕົວເມືອງ ແບບອັດຊະລິຍະ ຢູ່ ສປປ ລາວ; ຄົ້ນຄວ້າ ຄວາມຫລາກ ຫລາຍຊີວະສາດ ໃນເຂດຊີວະນາໆພັນທີ່ແຕກຕ່າງກັບຂອງລາວ ແລະ ການພັດທະນາການນຳໃຊ້ໃນກະສິກຳສະອາດ ແລະ ການແກ້ໄຂມົນລະພິດສິ່ງແວດລ້ອມ; ຜັນຂະຫຍາຍສັນຍາການຮ່ວມມື ການຄົ້ນຄວ້ານຳໃຊ້ເຕັກໂນໂລຊີ ຝຸ່ນຊີວະພາບ ໃນຮູບແບບເປັນເມັດທີ່ລະລາຍຊ້າ ເພື່ອນຳໃຊ້ການປູກພືດ ຢູ່ ຊຽງຂວາງ; ເຕັກໂນໂລຊີ ເພື່ອຈັດການສິ່ງເສດເຫລືອອົງຄະທາດ ຢູ່ຄົວເຮືອນ ແລະ ບັນດາເຂດທ່ອງທ່ຽວ; ແຜນງານຮ່ວມມື ພັດທະນາ ການນຳ ໃຊ້ຈຸລິນຊີ ໃນການຜະລິດຝຸ່ນອົງຄະທາດ ຢູ່ ສປປ ລາວ; ແລະ ລະບົບຈັດການ ເລື່ອງການຂົນສົ່ງ (ເຕັກໂນໂລຊີ ອັດສະລິຍະ).
（ຫັດທະບູນ）
