 |
ບັນຍາກາດກອງປະຊຸມເຈລະຈາ ລະຫວ່າງ ຫວຽດນາມ ແລະ ສປປ ເກົາຫຼີ.
ທີ່ກອງປະຊຸມພົບປະກັບ ລັດຖະມົນຕີກະຊວງການຕ່າງປະເທດເກົາຫຼີເໜືອ Ri Yong Ho, ທ່ານ ຟ້າມ ບິ່ງມິງ ສະແດງຄວາມຍິນດີ ແລະ ດີອົກດີໃຈໃນການມາຢ້ຽມຢາມ ສປປ ເກົາຫຼີຄັ້ງນີ້; ທ່ານຢືນຢັນວ່າ ຈະພະຍາຍາມຢ່າງສຸດຄວາມສາມາດຮ່ວມກັບ ສປປ ເກົາຫຼີ ຊຸກຍູ້ ການແລກປ່ຽນ, ຮ່ວມມືໃນທຸກໆຂົງເຂດທີ່ສອດຄ່ອງກັບທ່າແຮງ ແລະ ຜົນປະໂຫຍດຂອງແຕ່ລະປະເທດ, ຕາມຂໍ້ກຳນົດຂອງແຕ່ລະປະເທດ ກໍ່ຄືສາກົນ ເພື່ອສັນຕິພາບ, ພັດທະນາຂອງພູມມິພາກ ແລະ ຂອງໂລກ. ຫວຽດນາມ ກຽມພ້ອມທີ່ຈະແບ່ງປັນກັບ ສປປ ເກົາຫຼີ ບັນດາບົດຮຽນໃນການສ້າງສາປະເທດ, ພັດທະນາເສດຖະກິດ-ສັງຄົມ ແລະ ເຊື່ອມໂຍງສາກົນບົນພື້ນຖານການສະເໜີຂອງ ສປປ ເກົາຫຼີ.
ກ່ຽວກັບບັນຫາ ແຫຼມເກົາຫຼີ ທ່ານຮອງນາຍົກລັດຖະມົນຕີ ຟ້າມ ບິ່ງມິງ ຢືນຢັນເຖິງອຸດົມການຂອງຫວຽດນາມ ແມ່ນສະໜັບສະໜູນການເຈລະຈາ ເພື່ອຮັກສາສັນຕິພາບ, ຄວາມສະຫົງບ, ສະຖຽນລະພາບ ຂອງແຫຼມເກົາຫຼີ ແລະ ກຽມພ້ອມທີ່ຈະປະກອບສ່ວນເຂົ້າໃນຂວນບວນການເຈລະຈາດັ່ງກ່າວ.
ທ່ານ Ri Yong Ho ລັດຖະມົນຕີກະຊວງການຕ່າງປະເທດ ສປປ ເກົາຫຼີ ສະແດງຄວາມຍິນດີທີ່ໄດ້ພົບກັບ ທ່ານ ຟ້າມ ບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ຢູ່ ທີ່ປຽງຢາງຄັ້ງນີ້; ເນັ້ນໜັກເຖິງຄວາມມຸ້ງຫວັງຢາກຊຸກຍູ້ສາຍພົວພັນຂອງສອງປະເທດ ພັດທະນາຢ່າງເຂັ້ມແຂງຂື້ນຕື່ມ, ໂດຍສະເພາະແມ່ນ ປີ 2020, ຄົບຮອບ 70 ປີຂອງການສ້າງສາຍພົວພັນການທູດ; ເຫັນດີເປັນເອກກະພາບໃນການແລກປ່ຽນບັນດາມາດຕະການຂອງການເພີ່ມທະວີສາຍພົວພັນສອງຝ່າຍ ສອດຄ່ອງກັບສະພາບການປ່ຽນແປງໃໝ່; ຂອບໃຈຕໍ່ອຸດົມການ ແລະ ຄວາມມານະພະຍາຍາມ ຂອງຫວຽດນາມ ໃນການຊຸກຍູ້ຂະບວນການເຈລະຈາເພື່ອສັນຕິພາບ, ຄວາມສະຫົງບ, ຮ່ວມມື ແລະ ພັດທະນາຂອງແຫຼມເກົາຫຼີ.
ທີ່ກອງປະຊຸມທັງສອງຝ່າຍໄດ້ລາຍງານຕໍ່ກັນຝັງກ່ຽວກັບສະພາບການພັດທະນາເສດຖະກິດ-ສັງຄົມ ຂອງແຕ່ລະປະເທດ; ໂດຍສະເພາະແມ່ນການສືບຕໍ່ປະສານສົບທົບກັນ ຢູ່ບົນເວທີສາກົນ ແລະ ພູມມິພາກ ເປັນຕົ້ນແມ່ນ ອົງການສະຫະປະຊາຊາດ, ກອງປະຊຸມ ຂະບວນການບໍ່ເຊື່ອມຕໍ່, ກອງປະຊຸມພູມມິພາກ ARF, ບັນດາກອງປະຊຸມ, ເວທີສາກົນ ລະຫວ່າງ ບັນດາພັກການເມືອງ..., ເພີ່ມທະວີການແລກປ່ຽນກ່ຽວກັບບັນຫາທີ່ທັງສອງຝ່າຍມີຄວາມສົນໃຈ ເປັນຕົ້ນແມ່ນຮັກສາສັນຕິພາບ ແລະ ສະຖຽນລະພາບຢູ່ໃນພູມມິພາກ.
（ຫັດທະບູນ）
