 |
ສົ່ງເສີມການພົວພັນດ້ານການປ້ອງກັນຊາດລະຫວ່າງ ຫວຽດນາມ ແລະ ການາດາ
ໃນຕອນບ່າຍຂອງວັນທີ 24 ມັງກອນນີ້, ທີ່ສໍານັກງານກະຊວງປ້ອງກັນຊາດ, ທ່ານ ພົນໂທ ຫງວຽນ ຈີ ວີ້ງ, ກໍາມະການສູງກາງພັກ, ລັດຖະມົນຕີຊ່ວຍວ່າການກະຊວງປ້ອງກັນຊາດໄດ້ຕ້ອນຮັບ ທ່ານ ພົນຕີ ແດແລກ ຈອຍກີ ຫົວໜ້າກົມນະໂຍບາຍດ້ານຄວາມປອດໄພສາກົນ, ກະຊວງປ້ອງກັນຊາດການາດາໃນໂອກາດມາຢ້ຽມຢາມ ແລະ ເຮັດວຽກຢູ່ຫວຽດນາມ. ໃນກອງປະຊຸມ, ທ່ານ ພົນໂທ ຫງວຽນ ຈີ ວີ້ງ ໄດ້ຢືນຢັນວ່າຫວຽດນາມພ້ອມແລ້ວທີ່ຈະສ້າງກົນໄກການປຶກສາຫາລືນະໂຍບາຍດ້ານປ້ອງກັນຊາດລະດັບລັດຖະມົນຕີຊ່ວຍວ່າການກັບການາດາໃນເວລາຕໍ່ໜ້ານີ້.
ທ່ານ ພົນໂທ ຫງວຽນ ຈີ ວີ້ງ ກ່າວວ່າ, ສອງຝ່າຍຄວນເພີ່ມທະວີການຮ່ວມມືດ້ານປ້ອງກັນຊາດໃນຂົງເຂດຕ່າງໆເຊັ່ນ: ການກໍ່ສ້າງ, ຟື້ນຟູຄວາມເສຍຫາຍຂອງສົງຄາມ, ກິດຈະກໍາການຮັກສາຄວາມສະຫງົບຂອງສະຫະປະຊາຊາດ, ອຸດສາຫະກໍາປ້ອງກັນຊາດ; ປະກອບສ່ວນໃນການສ້າງຄວາມເຂັ້ມແຂງໃຫ້ແກ່ການປ້ອງກັນຊາດຂອງແຕ່ລະປະເທດເວົ້າສະເພາະ, ພ້ອມກັນນັ້ນກໍ່ປະກອບສ່ວນເຂົ້າໃນການຮັກສາຄວາມປອດໄພຂອງພາກພື້ນອາຊີປາຊີຟິກເວົ້າລວມ. ທ່ານ ພົນໂທ ຫງວຽນ ຈີ ວີ້ງ ໄດ້ຢືນຢັນວ່າຫວຽດນາມສະຫນັບສະຫນູນການາດາເຂົ້າຮ່ວມໃນກອງປະຊຸມລັດຖະມົນຕີປ້ອງກັນຊາດບັນດາປະເທດອາຊຽນເປີດກວ້າງ (ADMM+).
ທ່ານ ພົນຕີ ແດແລກ ຈອຍກີ ມີຄວາມຫວັງວ່າການຮ່ວມມືດ້ານປ້ອງກັນຊາດລະຫວ່າງການາດາ ແລະ ຫວຽດນາມໃນເວລາຕໍ່ໜ້າຈະສືບຕໍ່ພັດທະນາຢ່າງຕັ້ງໜ້າ ແລະ ມີປະສິດທິຜົນເປັນຮູບປະທໍາ. ທ່ານ ພົນຕີ ແດແລກ ຈອຍກີ ຢືນຢັນວ່າ, ໃນສະຖານະການຂອງຕົນເອງ, ທ່ານຈະພະຍາຍາມຢ່າງເຕັ່ມທີ່ເພື່ອການພົວພັນດ້ານປ້ອງກັນຊາດຂອງການາດາ ແລະ ຫວຽດນາມ ໄດ້ຮັບການພັດທະນາຢ່າງຕໍ່ເນື່ອງ.
（ໄຊພອນ）
