 |
ທ່ານຫົວໜ້າຄະນະເສດຖະກິດສູນກາງ ຫງວຽນວັນບິງ ຕ້ອນຮັບທ່ານ Simon Milner ຮອງປະທານຮັບຜິດຊອບ ນະໂຍບາຍສາທາລະນະ ພາກພື້ນ ອາຊີ - ປາຊີຟິກ ຂອງ Facebook. (ພາບ: Phuong Hoa/TTXVN)
ເນື່ອງໃນໂອກາດບັນດາວິສາຫະກິດດັ່ງກ່າວ ມາຢ້ຽມຢາມຫວຽດນາມ ເຂົ້າຮ່ວມເວທີປາໄສເສດຖະກິດໂລກ ກ່ຽວກັບອາຊຽນ. ທີ່ການຕ້ອນຮັບ, ທ່ານຫົວໜ້າຄະນະເສດຖະກິດສູນກາງ ຫງວຽນວັນບິງ ໄດ້ເນັ້ນໜັກເຖິງບັນດາກາລະໂອກາດ ແລະ ສິ່ງທ້າທາຍ ເຊິ່ງການປະຕິວັດອຸດສາຫະກໍາ 4.0 ນໍາມາໃຫ້, ພິເສດແມ່ນບັນດາພື້ນຖານເສດຖະກິດພວມພັດທະນາ ຄືຫວຽດນາມ; ທ່ານຖືວ່າ ບັນດາວິສາຫະກິດຂອງ ເອເມລິກາ ມີຄວາມສາມາດບົ່ມຊ້ອນ, ມີກາລະໂອກາດ ທີ່ໃຫຍ່ຫຼວງ ເພື່ອຮ່ວມມືກັບຫວຽດນາມ, ໂດຍສະເພາະແມ່ນໃນບັນດາຂົງເຂດເສດຖະກິດດີຈີຕອນ, ການເຊື່ອມຕໍ່ດີຈີຕອນ, ໜູນຊ່ວຍຫວຽດນາມກໍ່ສ້າງ ລັດຖະບານເອເລັກໂຕນິກ. ທ່ານຫົວໜ້າຄະນະເສດຖະກິດສູນກາງ ຫງວຽນວັນບິງ ຕີລາຄາສູງຕໍ່ການເຄື່ອນໄຫວ ແລະ ການກໍານົດທິດລົງທຶນຂອງບັນດາວິສາຫະກິດດັ່ງກ່າວ ທີ່ຕະຫຼາດຫວຽດນາມ; ພ້ອມທັງຢັ້ງຢືນແຜນນະໂຍບາຍສະເໝີຕົ້ນສະເໝີປາຍຂອງພັກ, ລັດຖະບານ ຫວຽດນາມ ແມ່ນສ້າງທຸກເງື່ອນໄຂສະດວກ ແລະ ສະພາບແວດລ້ອມແຫ່ງການລົງທຶນໃຫ້ບັນດານັກລົງທຶນພັດທະນາແບບຍືນຍົງ, ຍາວນານຢູ່ຫວຽດນາມ ແລະ ພ້ອມແລ້ວທີ່ຈະຮັບຟັງ ການແບ່ງປັນ, ການປະກອບຄໍາຄິດເຫັນ, ຂໍ້ສະເໜີແນະຈາກບັນດາວິສາຫະກິດ.
ຜູ້ຕາງໜ້າບັນດາກຸ່ມບໍລິສັດ ກໍໄດ້ຕີລາຄາສູງ ຄວາມມານະພະຍາຍາມຂອງຫວຽດນາມ ກ່ຽວກັບການປະຕິຮູບການບໍລິຫານ,ປັບປຸງສະພາບແວດລ້ອມແຫ່ງການລົງທຶນ, ດໍາເນີນທຸລະກິດ; ສະແດງຄວາມຕັດສິນ ເປີດກວ້າງການລົງທຶນ, ດໍາເນີນທຸລະກິດຢູ່ຕະຫຼາດຫວຽດນາມ.
（ແຫຼ່ງຂໍ້ມູນ： vov5）
