ດ້ວຍຄຳຂວັນ “ເປັນເຈົ້າການ, ມີໄຫວພິບ, ຫົວຄິດປະດິດສ້າງ, ມີປະສິດທິຜົນ”, ໃນຊຸມປີມໍ່ໆມານີ້, ສະມາຄົມມິດຕະພາບຫວຽດນາມ - ລາວ ແຂວງ ແທງຮ໋ວາ ໄດ້ປະຕິບັດວຽກງານໂຄສະນາເຜີຍແຜ່, ສຶກສາອົບຮົມ ແລະ ຮັກສາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດລະຫວ່າງ ຫວຽດນາມ ແລະ ປະເທດລາວ ທຸກຊັ້ນວັນນະເປັນຢ່າງດີ.
 |
| ສະມາຄົມມິດຕະພາບ ຫວຽດນາມ - ລາວ ແຂວງ ແທງຮວ໊າ ມອບຂອງຂວັນໃຫ້ນັກສຶກສາລາວ ຢູ່ ແທງຮວ໊າ ເນື່ອງໃນໂອກາດບຸນປີໃໝ່. ພາບ: ຮວ່າງລານ |
ນັບແຕ່ເມື່ອໄດ້ຮັບການສ້າງຕັ້ງໃນປີ 2009, ສະມາຄົມມິດຕະພາບ ຫວຽດນາມ - ລາວ ແຂວງ ແທງຮວ໊າ ໄດ້ມານະພະຍາຍາມຢ່າງບໍ່ຢຸດຢັ້ງ ແລະມີຫົວຄິດປະດິດສ້າງໃນບັນດາການເຄື່ອນໄຫວ, ກາຍເປັນໜຶ່ງໃນ ບັນດາສະມາຊິກທີ່ຕັ້ງໜ້າຂອງສະມາຄົມມິດຕະພາບ ຫວຽດນາມ - ລາວ. ເພື່ອແນໃສ່ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ຫວຽດນາມ - ລາວ ແລະ ແທງຮວ໊າ - ຫົວພັນ, ສະມາຄົມມິດຕະພາບ ຫວຽດນາມ - ລາວ ແຂວງ ແທງຮວ໊າ ຍາມໃດກໍ່ເປັນເຈົ້າການສົມທົບກັນຢ່າງແໜ້ນແຟ້ນກັບຄະນະກຳມະການແນວໂຮມປະເທດຊາດຫວຽດນາມ ແຂວງ, ຄະນະ, ຂະແໜງການ, ໝູ່ຄະນະ ເພື່ອຈັດຕັ້ງການເຄື່ອນໄຫວແລກປ່ຽນຄະນະຜູ້ແທນ, ໂອ້ລົມສົນທະນາແບ່ງປັນປະສົບການ, ສົມທົບ ແລະຊ່ວຍເຫຼືອໃນການຈັດຕັ້ງປະຕິບັດໂຄງການເຄື່ອນໄຫວຂອງສະມາຄົມ. ຄຽງຂ້າງນັ້ນ, ເນື່ອງໃນໂອກາດບຸນປີໃໝ່ ແລະວັນຊາດ ສປປ ລາວ, ສະມາຄົມໄດ້ສົມທົບກັບຄະນະກໍາມະການແນວໂຮມ ປະເທດຊາດແຂວງ ແລະໂຮງຮຽນ ເພື່ອຈັດຕັ້ງການພົບປະ ແລະ ແລກປ່ຽນ, ມອບຂອງຂວັນໃຫ້ນັກສຶກສາຕ່າງປະເທດທີ່ພວມຄົ້ນຄວ້າ, ຮໍ່າຮຽນຢູ່ມະຫາວິທະຍາໄລ ແລະມະຫາວິທະຍາໄລໃນບໍລິເວນແຂວງ.
ທ່ານ ເລຮົ່ງງວານ, ຮອງປະທານສະມາຄົມມິດຕະພາບຫວຽດນາມ - ລາວ ແຂວງ ແທງຮວ໊າ, ຫົວໜ້າຄະນະສື່ສານທະຫານອາສາສະໝັກ ແລະນັກຊ່ຽວຊານການທະຫານຫວຽດນາມ ຊ່ວຍເຫຼືອ ລາວ ແຂວງ ແທງຮວ໊າ ໃຫ້ຮູ້ວ່າ: ໃນຊຸມປີຜ່ານມາ, ສະມາຄົມມິດຕະພາບຫວຽດນາມ - ລາວແຂວງ ແທງຮວ໊າ ໄດ້ໜູນຊ່ວຍແນວພັນ, ພືດ, ສັດລ້ຽງ ທີ່ເໝາະສົມກັບສະພາບ ແລະດິນຂອງປະເທດເພື່ອນ; ຈັດຕັ້ງການຝຶກອົບຮົມ ແລະຖ່າຍທອດວິທະຍາສາດ-ເຕັກນິກໃນການຜະລິດ; ສົມທົບກັນຈັດຕັ້ງການເຄື່ອນໄຫວກວດ-ປິ່ນປົວພະຍາດ ແລະແຈກຢາຍຢາ ໂດຍບໍ່ເສຍຄ່າໃຫ້ປະຊາຊົນຢູ່ບັນດາເມືອງຊາຍແດນແຂວງຫົວພັນ; ລະດົມສະມາຊິກສະມາຄົມ ໜູນ ຊ່ວຍ ແລະ ຊ່ວຍເຫຼືອຊາວລາວ ກໍ່ສ້າງເຮືອນແຫ່ງມິດຕະພາບ, ບໍລິຈາກໃຫ້ບັນດານັກຮົບເກົ່າ ແລະຄອບຄົວທະຫານລາວປະສົບກັບຄວາມຫຍຸ້ງຍາກ;... ບັນດາການເຄື່ອນໄຫວທີ່ມີຄວາມໝາຍດັ່ງກ່າວໄດ້ຮັດແໜ້ນສາຍພົວພັນລະຫວ່າງສອງປະເທດໃຫ້ນັບມື້ແໜ້ນແຟ້ນກວ່າອີກ.
ເສີມຂະຫຍາຍບົດບາດເປັນຂົວຕໍ່ຊຸກຍູ້ການຮ່ວມມືດ້ານເສດຖະກິດ, ການສຶກສາ, ສາທາລະນະສຸກ, ວັດທະນະທຳ, ກິລາ, ການທ່ອງທ່ຽວ... ລະຫວ່າງສອງປະເທດ, ສະມາຄົມມິດຕະພາບຫວຽດນາມ - ລາວ ແຂວງ ແທງຮວ໊າ ໄດ້ເປັນເຈົ້າການສ້າງສາຍພົວພັນຮ່ວມມືມິດຕະພາບ ໃນຫຼາຍຂົງເຂດລະຫວ່າງທ້ອງຖິ່ນຂອງສອງປະເທດ, ພິເສດແມ່ນລະຫວ່າງ 2 ແຂວງແທງຮວ໊າ - ຫົວພັນ.
ໃນຊຸມປີມໍ່ໆມານີ້, ການພົວພັນຮ່ວມມືຮອບດ້ານລະຫວ່າງສອງແຂວງນັບມື້ນັບເຂົ້າສູ່ລວງເລິກ ແລະ ແທດຈິງກວ່າອີກ. ບັນດາການເຄື່ອນໄຫວແລກປ່ຽນ, ຖອດຖອນບົດຮຽນ ປະສົບການ, ຈັດຕັ້ງການເຈລະຈາ, ລົງນາມໃນຂໍ້ຕົກລົງາຮ່ວມມືໄດ້ຮັບການຮັກສາເປັນປະຈຳ; ການຮ່ວມມືດ້ານເສດຖະກິດສືບຕໍ່ມີບາດກ້າວພັດທະນາ, ວົງເງິນການຄ້າສອງສົ້ນແຕ່ແທງຮວ໊າ - ຫົວພັນ ເຕີບໂຕຢ່າງຕໍ່ເນື່ອງ. ແຂວງແທງຮວ໊າ ໄດ້ອຸປະຖໍາໃຫ້ແຂວງຫົວພັນ ຫຼາຍແຫຼ່ງກຳລັງ ເພື່ອລົງທຶນ, ຍົກລະດັບພື້ນຖານໂຄງລ່າງ, ປະຕິບັດບັນດາໂຄງການພັດທະນາເສດຖະກິດ - ສັງຄົມ. ຫຼາຍໂຄງການທີ່ສະແດງໃຫ້ເຫັນອາລົມຈິດສັດຊື່ບໍລິສຸດ ແລະອົບອຸ່ນຂອງປະຊາຊົນແຂວງ ແທງຮວ໊າ ໃນດິນແດນ ແຂວງຫົວພັນ ວິລະຊົນ ໄດ້ຮັບການກໍ່ສ້າງສຳເລັດ, ເປີດນຳໃຊ້ ແລເສີມຂະຫຍາຍປະສິດທິຜົນ, ນັ້ນແມ່ນ: ສະໜາມຫຼວງມິດຕະພາບລາວຮຸ່ງ ຫົວພັນ - ແທງຮວ໊າ, ສວນສາທາລະນະມິດຕະພາບ ຫົວພັນ-ແທງຮວ໊າ... ທີ່ແຂວງແທງຮວ໊າ, ໂຄງການຫໍພັກນັກສຶກສາຕ່າງປະເທດຢູ່ມະຫາວິທະຍາໄລ ຮົ່ງດຶກ ພ້ອມກັບບັນດາວຽກງານທີ່ມີຄວາມໝາຍອື່ນ, ໄດ້ປະກອບສ່ວນນຳເອົາຮູບພາບທີ່ດີງາມກ່ຽວກັບປະເທດລ້ານຊ້າງມາໃຫ້ປະຊາຊົນ ແທງຮວ໊າ.
ບັນດາການເຄື່ອນໄຫວຮ່ວມມືດ້ານການສຶກສາ ແລະ ບຳລຸງສ້າງໄດ້ຮັບການເພີ່ມທະວີ, ແທງຮວ໊າ ໄດ້ໜູນຊ່ວຍຫົວພັນ ບຳລຸງສ້າງແຫຼ່ງຊັບພະຍາກອນມະນຸດໃນບັນດາຂົງເຂດ: ເສດຖະກິດ, ການເງິນ, ບຳລຸງສ້າງ, ກະສິກຳ, ສາທາລະນະສຸກ, ... ວຽກງານຄຸ້ມຄອງຊາຍແດນ ແລະປະສານສົມທົບການລາດຕະເວນປົກປັກຮັກສາເຂດຊາຍແດນ ແລະຫຼັກໝາຍຊາຍແດນໄດ້ ຮັບການຮັກສາເປັນປະຈຳ; ບັນດາກຳລັງປ້ອງກັນຄວາມສະຫງົບ ແລະ ທະຫານຊາຍແດນຂອງສອງປະເທດ ໄດ້ຈັດຕັ້ງການລາດຕະເວນສອງຝ່າຍ ເປັນປະຈຳ, ປົກປັກຮັກສາເສັ້ນຊາຍແດນ, ຫຼັກໝາຍຊາຍແດນ, ຄວບຄຸມຄົນເຂົ້າ-ອອກເມືອງຜິດກົດໝາຍ. ຂະບວນການແຮກສ່ຽວສອງຟາກຊາຍແດນໄດ້ຮັບການຍູ້ແຮງ; ມາຮອດປະຈຸບັນ, ໄດ້ມີ 17 ຄູ່ໝູ່ບ້ານແຮກສ່ຽວ, ຜ່ານນັ້ນປະກອບສ່ວນປັບປຸງຄວາມສາມັກຄີມິດຕະພາບອັນດີງາມລະຫວ່າງປະຊາຊົນສອງຟາກຊາຍແດນ. ວຽກງານຊອກຫາ, ທ້ອນໂຮມ ແລະສົ່ງອັດຖິນັກຮົບອາສາສະໝັກ ແລະນັກຊ່ຽວຊານຫວຽດນາມ ທີ່ເສຍຊີວິດໃນປາງ ສົງຄາມ ຢູ່ລາວ ກັບເມືອປະເທດໄດ້ຮັບຄວາມເອົາໃຈໃສ່. 5 ປີຜ່ານມາ, ດ້ວຍການໜູນຊ່ວຍຂອງບັນດາກຳລັງເຈົ້າໜ້າທີ່ ແລະປະຊາຊົນແຂວງຫົວພັນ, ແຂວງ ແທງຮວ໊າ ໄດ້ຕ້ອນຮັບອັດຖິນັກຮົບເສຍສະຫຼະຊີວິດເພື່ອຊາດ 120 ຊຸດກັບເມື່ອບ້ານເກີດເມືອງນອນ.
ດ້ວຍຈິດໃຈແບ່ງປັນ, ສາມັກຄີ, ຊ່ວຍເຫຼືອເຊິ່ງກັນ ແລະກັນ ເພື່ອພ້ອມກັນ ພັດທະນາ, ການເຄື່ອນໄຫວຂອງສະມາຄົມມິດຕະພາບ ຫວຽດນາມ - ລາວ ແຂວງ ແທງຮວ໊າ ໃນຊຸມປີຜ່ານມາແມ່ນມີຄວາມໝາຍທີ່ສຸດ, ນຳມາເຊິ່ງ ຜົນປະໂຫຍດຢ່າງແທດຈິງຫຼາຍຢ່າງ. ຜ່ານນັ້ນ, ປະກອບສ່ວນປົກປັກຮັກສາ ແລະເສີມຂະຫຍາຍສາຍພົວພັນມິດຕະພາບອັນດີງາມລະຫວ່າງຫວຽດນາມ - ລາວ, ແທງຮວ໊າ - ຫົວພັນ.
ບູນມີ
