ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມພວມຮັບເອົາຄຳເຫັນປະກອບໃຫ້ແກ່ຮ່າງຂໍ້ກຳນົດຂອງທ່ານນາຍົກລັດຖະມົນຕີ ທີ່ອະນຸມັດຜ່ານ “ຍຸດທະສາດແຫ່ງຊາດກ່ຽວກັບຊີວະນາໆພັນຊີວະສາດຮອດປີ 2030, ວິໄສທັດຮອດປີ 2050” ໃນນັ້ນໄດ້ຕັ້ງເປົ້າໝາຍຮອດປີ 2030, ຫວຽດນາມ ຈະມີເຂດອະນຸລັກທຳມະຊາດຢ່າງໜ້ອຍສຸດ 10 ແຫ່ງໄດ້ນຳເຂົ້າບັນຊີລາຍຊື່ສີຂຽວທົ່ວໂລກ.
 |
ຮ່າງຍຸດທະສາດໄດ້ຕັ້ງເປົ້າໝາຍຮອດປີ 2030 ບັນດາລະບົບນິເວດທຳມະຊາດສຳຄັນທີ່ຈະໄດ້ຮັບການປົກປ້ອງ ແລະ ຟື້ນຟູ, ເພີ່ມເນື້ອທີ່ບັນດາເຂດອະນຸລັກທຳມະຊາດໃນດິນຕໍ່ແຜ່ນ ບັນລຸໄດ້ຢ່າງໜ້ອຍສຸດ 9% ເນື້ອທີ່ຜືນແຜ່ນດິນຂອງ ຫວຽດນາມ, ມີເຂດອະນຸລັກທະເລຕື່ມອີກ 12 ແຫ່ງ.
ຮ່າງດັ່ງກ່າວ ກໍ່ມຸ່ງໄປເຖິງເປົ້າໝາຍຟື້ນຟູ 20% ເນື້ອທີ່ລະບົບນິເວດທຳມະຊາດທີ່ຖືກຊຸດໂຊມ, ບຸລິມະສິດຟື້ນຟູໃຫ້ແກ່ບັນດາລະບົບນິເວດຢູ່ບັນດາເຂດອະນຸລັກທຳມະຊາດ, ປ່າສະຫງວນ, ຟື້ນຟູເຂດປະກາລັງ...
ເພື່ອບັນລຸໄດ້ບັນດາເປົ້າໝາຍດັ່ງກ່າວ, ຮ່າງສະບັບນີ້ໄດ້ຍົກອອກບັນດາມາດຕະການປະຕິບັດສຳເລັດນະໂຍບາຍ, ກົດໝາຍ, ລະບອບລະບຽບການຄຸ້ມຄອງ, ຊຸກຍູ້ການຄົ້ນຄ້ວາວິທະຍາສາດ, ພັດທະນາ, ຖ່າຍທອດ ແລະ ນຳໃຊ້ເຕັກໂນໂລຢີທີ່ກ້າວໜ້າເຂົ້າໃນການອະນຸລັກ ແລະ ນຳໃຊ້ຊີວະນາໆພັນແບບຍືນຍົງ, ຮັບປະກັນແຫຼ່ງການເງິນ ແລະ ເພີ່ມທະວີການເຊື່ອມໂຍງ, ການຮ່ວມມືສາກົນ ກ່ຽວກັບການອະນຸລັກ, ນຳໃຊ້ຊີວະນາໆພັນແບບຍືນຍົງ.
ຄຳຮຸ່ງ
