ໃນຊຸມປີມໍ່ໆມານີ້, ຫວຽດນາມ ແລະ ລາວ ໄດ້ເອົາໃຈໃສ່ເຖິງການລົງທຶນພັດທະນາການທ່ອງທ່ຽວ. ສອງປະເທດໄດ້ຜັນຂະຫຍາຍຫຼາຍໂຄງການຮ່ວມມືພ້ອມທັງຊຸກຍູ້ຄວາມຕ້ອງການການທ່ອງທ່ຽວ, ພິເສດແມ່ນພາຍຫຼັງໂລກລະບາດໂຄວິດ-19.
ພາຍຫຼັງ 2 ປີແຫ່ງການປິດລ້ອມເປັນເວລາຍາວນານ, ຫວຽດນາມ ແລະ ລາວ ໄດ້ເປີດກ້ວາງການທ່ອງທ່ຽວສາກົນຢູ່ບັນດາດ່ານຊາຍແດນທາງອາກາດ ແລະ ທາງບົກ (ຫວຽດນາມ ແຕ່ວັນທີ 15/3/2022, ລາວ ແຕ່ວັນທີ 9/5/2022). ຕົວເລກນັກທ່ອງທ່ຽວລາວໄປຫວຽດນາມ ເພີ່ມຂຶ້ນສູງໃນ 6 ເດືອນຕົ້ນປີ 2023 ດ້ວຍອັດຕາການເຕີບໂຕເຖິງ 117%, ອັນດັບທີ 3 ຂອງຈຳນວນນັກທ່ອງທ່ຽວທົ່ວໂລກທີ່ເຂົ້າມາຫວຽດນາມ ແລະ ຖັດຈາກກຳປູເຈຍ (338%) ແລະ ອິນເດຍ (236%).
ບັນດາຈຸດທົ່ວໄປທີ່ສຸດຂອງນັກທ່ອງທ່ຽວຕ່າງປະເທດຢູ່ທ່ຽວຫວຽດນາມ ມາຮອດເດືອນມິຖຸນາແມ່ນນະຄອນທະເລພາກກາງດ່ານັງ, ເມືອງເກົ່າໂຮ້ຍອານ, ດາລາດ, ຮ່າຢາງ, ຫວູງເຕົ່າ, ແລະ “ເກາະເພັດພອຍສະຫວັນ” ພູກວກ.
 |
| ຫວຽດນາມ ຍາມໃດກໍ່ແມ່ນຈຸດໝາຍດຶງດູດນັກທ່ອງທ່ຽວລາວ. |
ການເພີ່ມຂຶ້ນຢ່າງກະທັນຫັນຂອງນັກທ່ອງທ່ຽວສາກົນແມ່ນສະແດງໃຫ້ເຫັນວ່າຂະແໜງການທ່ອງທ່ຽວຂອງຫວຽດນາມພວມຟື້ນຟູພາຍຫຼັງໂລກລະບາດ. ນອກຈາກການທ່ອງທ່ຽວແລ້ວ, ຊາວລາວແລະກຳປູເຈຍຈຳນວນຫຼາຍຍັງມາຫວຽດນາມເພື່ອປິ່ນປົວພະຍາດ.
ໃນທາງກົງກັນຂ້າມ, ໃນ 4 ເດືອນຕົ້ນປີ 2023, ສປປ ລາວ ໄດ້ຕ້ອນຮັບນັກທ່ອງທ່ຽວຕ່າງປະເທດຫຼາຍກວ່າ 1 ລ້ານເທື່ອຄົນ, ເພີ່ມຂຶ້ນຢ່າງໜ້າປະທັບໃຈ ເມື່ອທຽບໃສ່ປີ 2022 ມີນັກທ່ອງທ່ຽວບັນລຸ 1,3 ລ້ານຄົນ.
ໃນນັ້ນ, ນັກທ່ອງທ່ຽວຈາກຫວຽດນາມ ຢືນອັນດັບທີ 2 ດ້ວຍຈຳນວນ 224.461 ຄົນ, ເປັນອັນດັບທີ 2 ຮອງຈາກນັກທ່ອງທ່ຽວຈາກໄທ.
ແຂວງຫຼວງພະບາງ ເປັນເມືອງມໍລະດົກໂລກ ແລະ ເປັນສະຖານທີ່ທ່ອງທ່ຽວທີ່ນິຍົມຂອງລາວ ໄດ້ດຶງດູດນັກທ່ອງທ່ຽວສາກົນເກືອບ 4 ແສນເທື່ອຄົນໃນ 5 ເດືອນຕົ້ນປີ 2023.
ເຖິງວ່າຍັງມີຂໍ້ຈຳກັດເຊັ່ນ: ພື້ນຖານໂຄງລ່າງທາງຄົມມະນາຄົມ ເມື່ອເດີນທາງໃຊ້ເວລາດົນ, ແຕ່ພື້ນຖານໂຄງລ່າງທາງອາກາດສາມາດຮອງຮັບເຮືອບິນຂະໜາດນ້ອຍເທົ່ານັ້ນ; ແຫຼ່ງກຳລັງຄົນການທ່ອງທ່ຽວຍັງຂາດແຄນ ແລະ ອ່ອນດ້ອຍ; ກຳນົດ ແລະ ລະບຽບການຂຶ້ນທະບຽນການເດີນທາງເຂົ້າອອກເຂດຊາຍແດນ ແລະ ຜ່ານດ່ານທ່ອງທ່ຽວເພື່ອເດີນທາງດ້ວຍລົດດ້ວຍຕົນເອງ; ພື້ນຖານໂຄງລ່າງເຊື່ອມຕໍ່ດ່ານຊາຍແດນ ແລະ ພື້ນຖານໂຄງລ່າງຢູ່ດ່ານຊາຍແດນ; ການນຳໃຊ້ເຕັກໂນໂລຊີຂໍ້ມູນຂ່າວສານໃນການຄຸ້ມຄອງນັກທ່ອງທ່ຽວຜ່ານດ່ານຊາຍແດນທາງບົກຍັງຖືກຈຳກັດ ແລະ ຍັງບໍ່ທັນໄດ້ຮັບການລົງທຶນຢ່າງເໝາະສົມ...
ເພື່ອຊຸກຍູ້ຂະແໜງການທ່ອງທ່ຽວຂອງລາວ, ສ້າງວຽກເຮັດງານທຳໃຫ້ແກ່ສັງຄົມ, ສ້າງແຫຼ່ງເກັບເງິນຕາຕ່າງປະເທດໃຫ້ແກ່ປະເທດ, ລາວໄດ້ເລືອກເອົາປີ 2024 ເປັນປີທ່ອງທ່ຽວແຫ່ງຊາດ. ປະຈຸບັນ, ບັນດາສະຖານທີ່ທ່ອງທ່ຽວທີ່ໄດ້ມາດຕະຖານແຫ່ງຊາດໄດ້ຮັບການດັດແປງ, ຍົກລະດັບ, ຕິດຕັ້ງປ້າຍຊີ້ບອກຕາມເສັ້ນທາງເຊື່ອມຕໍ່ລະຫວ່າງບັນດາເຂດ ແລະ ບັນດາປະເທດບ້ານໃກ້ເຮືອນຄຽງ ເພື່ອສ້າງເງື່ອນໄຂສະດວກໃຫ້ນັກທ່ອງທ່ຽວ. ນອກນີ້, ເຈົ້າໜ້າທີ່ຍັງໄດ້ອອກໃບຢັ້ງຢືນດ້ານເຕັກນິກ ແລະ ຄວາມປອດໄພໃຫ້ແກ່ການເຄື່ອນໄຫວທ່ອງທ່ຽວພະຈົນໄພເຊັ່ນ: ການປີນພູ, ໜ່ວຍບາລູນ, ຍົນນ້ອຍ ແລະ ພາຍເຮືອ...
ນັບແຕ່ຕົ້ນປີມາ, ຫວຽດນາມ ກໍ່ໄດ້ຜັນຂະຫຍາຍບັນດາການເຄື່ອນໄຫວຊຸກຍູ້ການທ່ອງທ່ຽວຕິດພັນກັບບັນດາການເຄື່ອນໄຫວສຳຄັນຂອງທົ່ວປະເທດ ກໍ່ຄືຂອງແຕ່ລະທ້ອງຖິ່ນ. ຫວັງວ່ານີ້ຈະແມ່ນໄມ້ງັດ ແລະ ເປັນເຄື່ອນໄຫວຊຸກຍູ້ສຳຄັນເພື່ອໃຫ້ການທ່ອງທ່ຽວຫວຽດນາມ ແລະ ລາວ ຈະສ້າງບາດກ້າວບຸກທະລຸໃນຊຸມປີຕໍ່ໜ້າ.
ດີງເລື້ອງ
