ທ່ານເອກອັກຄະລັດຖະທູດ Julien Guerrier ກໍ່ໄດ້ເຂົ້າຮ່ວມການເຈລະຈາການເຂົ້າຮ່ວມ WTO ຂອງ ຫວຽດນາມ ໃນໄລຍະ 2004-2005 ໃນບົດບາດເປັນເຈົ້າໜ້າທີ່ເອີລົບ.
ໃນໄລຍະເກືອບ 30 ປີຂອງການເດີນທາງ, ທ່ານ Guerrier ສະແດງຄວາມປະທັບໃຈທີ່ໄດ້ຕິດຕາມການພັດທະນາຂອງຫວຽດນາມ, ສ່ວນໜຶ່ງຂອງຜົນສຳເລັດ ແມ່ນຍ້ອນຄວາມເປັນເຈົ້າການເປີດປະຕູນະໂຍບາຍກັບໂລກ. ທ່ານເອກອັກຄະລັດຖະທູດກໍ່ສະແດງຄວາມເປັນກຽດທີ່ໄດ້ເຂົ້າຮ່ວມການເຈລະຈາດ້ານການຄ້າ - ເຊິ່ງທ່ານກ່າວວ່າ ໄດ້ສະໜັບສະໜູນຫວຽດນາມ ໃນການຫັນປ່ຽນຢ່າງວ່ອງໄວ.
ໂດຍແບ່ງປັນເພີ່ມເຕີມກ່ຽວກັບຂະບວນການເຈລະຈາ WTO - ເຫດການສໍາຄັນໃນຂະບວນການຮ່ວມມື ແລະການເຊື່ອມໂຍງຂອງຫວຽດນາມ, ທ່ານເອກອັກຄະລັດຖະທູດ ໃຫ້ຮູ້ວ່າ: ໃນເວລານັ້ນ, ຫວຽດນາມ ມີຫຼາຍຂົງເຂດທີ່ຕ້ອງເປີດກວ້າງ, ຄວາມຫຍຸ້ງຍາກທີ່ສຸດແມ່ນການປ່ຽນແປງບັນດາຂໍ້ກຳນົດກົດໝາຍ, ກອບນິຕິກໍາ, ພິເສດແມ່ນໃນຂົງເຂດໂທລະຄົມ, ການບໍລິການ ແລະ ການທະນາຄານ.
ເຖິງຢ່າງໃດກໍ່ຕາມ, ຂະບວນການເຈລະຈາ ແລະ ການປະຕິບັດຂອງ ຫວຽດນາມ ໄດ້ສ້າງຄວາມປະທັບໃຈໃຫ້ຝ່າຍ EU, ປະກອບສ່ວນນຳມາເຊິ່ງຜົນປະໂຫຍດຫລາຍຢ່າງໃຫ້ບັນດາວິສາຫະກິດເສດຖະກິດ ຫວຽດນາມ, ດຶງດູດການລົງທຶນຈາກຕ່າງປະເທດ, ເປີດກວ້າງຕະຫຼາດ... ນຳມາເຊິ່ງເສັ້ນທາງແຫ່ງບັນດາຜົນງານດ້ານເສດຖະກິດໃນປະຈຸບັນ, ນັກການທູດ ເອີລົບ ກ່າວ.
 |
| ທ່ານເອກອັກຄະລັດຖະທູດຂອງສະຫະພາບເອີລົບ (EU) ປະຈຳ ຫວຽດນາມ Julien Guerrier. ພາບ: ລຽນຮ່າ |
ໃນສະພາບທີ່ພາກພື້ນມະຫາສະຫມຸດອິນເດຍ - ປາຊີຟິກ ນັບມື້ນັບກາຍເປັນໃຈກາງຂອງໂລກ, EU ໄດ້ພັດທະນາຍຸດທະສາດເພື່ອເຂົ້າຮ່ວມພາກພື້ນນີ້ຫຼາຍກວ່າເກົ່າ - ເຊິ່ງເປັນບ່ອນທີ່ ຫວຽດນາມ ມີອິດທິພົນຜົນສະທ້ອນພິເສດກ່ຽວກັບດ້ານເສດຖະກິດ, ປະຊາກອນວິທະຍາ ແລະ ພູມສາດການເມືອງ, ຕາມທ່ານເອກອັກຄະລັດຖະທູດກ່າວ.
ທ່ານເອກອັກຄະລັດຖະທູດໃຫ້ຮູ້ວ່າ “ເປັນເວລາຫຼາຍທົດສະວັດແລ້ວ, ສະຫະພາບເອີລົບ ແລະ ບັນດາປະເທດສະມາຊິກໄດ້ສະໜັບສະໜູນການພັດທະນາທີ່ຈະເລີນຮຸ່ງເຮືອງຂອງຫວຽດນາມ ແລະ ສຳລັບພວກຂ້າພະເຈົ້າ, ສິ່ງດັ່ງກ່າວ ແມ່ນນັບມື້ນັບມີຄວາມສຳຄັນ”.
ທ່ານເອກອັກຄະລັດຖະທູດກໍ່ແບ່ງປັນຕື່ມວ່າ: “ສິ່ງທີ່ຂ້າພະເຈົ້າຢາກເຮັດໃນວາລະປະຈຳການໄລຍະສອງສາມປີຈະມາເຖິງ ແມ່ນສືບຕໍ່ ແລະ ສະໜັບສະໜູນໃຫ້ຄວາມມຸ່ງຫວັງຂອງຫວຽດນາມ ເພື່ອກາຍເປັນພື້ນຖານເສດຖະກິດທີ່ກ້າວໜ້າໃນປີ 2045 ແລະ ເພື່ອເປົ້າໝາຍການປ່ອຍອາຍພິດລົງເປັນ 0 ໃນປີ 2050.
ຕາມທ່ານແລ້ວ, EU ສາມາດໜູນຊ່ວຍ ຫວຽດນາມ ຕາມວິທີທີ່ເປັນ “ເອກະລັກສະເພາະທີ່ສຸດ”, ຜ່ານ 5 ເຄື່ອງມືສະເພາະ.
ທີໜຶ່ງແມ່ນສັນຍາການຄ້າເສລີຫວຽດນາມ - ສະຫະພາບເອີລົບ (EVFTA). ມາຮອດປະຈຸບັນ, ນີ້ຍັງແມ່ນເຄື່ອງມື, ຊ່ວຍເພີ່ມທະວີການເຄື່ອນໄຫວການຄ້າລະຫວ່າງ EU ແລະ ຫວຽດນາມ. ຍ້ອນມີການປະຕິບັດສັນຍາດັ່ງກ່າວ, ການຄ້າສອງຝ່າຍໄດ້ເພີ່ມຂຶ້ນ 32%, ໃນນັ້ນ, ການສົ່ງອອກຂອງຫວຽດນາມ ແມ່ນສູງກວ່າການສົ່ງອອກຂອງ EU 4 ເທົ່າ.
ເຄື່ອງມືທີສອງແມ່ນ Global Gateway - ກອງທຶນ 300 ຕື້ເອີໂຣ ສໍາລັບເຕັກໂນໂລຢີກໍ່ສ້າງພື້ນຖານໂຄງລ່າງ. ກອງທຶນໜູນຊ່ວຍບັນດາປະເທດໃນແບບຍືນຍົງ, ພິຈາລະນາຜົນກະທົບຂອງບັນດາໂຄງການທີ່ກ່ຽວຂ້ອງຕໍ່ປະຊາຊົນ ແລະ ສິ່ງແວດລ້ອມ.
ທ່ານເອກອັກຄະລັດຖະທູດຍັງກ່າວເຖິງໂຄງການສາຍພົວພັນຄູ່ຮ່ວມມືກ່ຽວກັບການຫັນປ່ຽນພະລັງງານທີ່ຍຸດຕິທຳ (JETP), ລະດົມທຶນ 15,5 ຕື້ ໂດລາສະຫະລັດ ຈາກແຫຼ່ງການເງິນທັງພາກລັດ ແລະ ເອກະຊົນ, ໜູນຊ່ວຍຂະບວນການຫັນປ່ຽນພະລັງງານຈາກຖ່ານຫີນເປັນພະລັງງານທົດແທນໃຫ້ຫວຽດນາມ. ທ່ານເອກອັກຄະລັດຖະທູດ ເນັ້ນໜັກວ່າ: “ພວກຂ້າພະເຈົ້າມີຄວາມຮັບຜິດຊອບພິເສດໃນການໜູນຊ່ວຍ ຫວຽດນາມ ບັນລຸໄດ້ເປົ້າໝາຍປ່ອຍອາຍພິດລົງເປັນ 0 ໃນປີ 2050.
ທ່ານເອກອັກຄະລັດຖະທູດຍັງກ່າວວ່າ ເຄື່ອງມືຕໍ່ໄປແມ່ນໂຄງການອຸປະຖຳສາທາລະນະໃຫ້ແກ່ການຄົ້ນຄ້ວາ ແລະ ປ່ຽນແປງໃໝ່ທີ່ມີຊື່ວ່າ Horizon Europe, ຕາມນັ້ນແລ້ວກໍ່ເປັນການສ້າງສະໜາມ ໂດຍມີການເຂົ້າຮ່ວມຂອງບັນດາສະຖາບັນຄົ້ນຄວ້າ ຫວຽດນາມ, ຊຸກຍູ້ໃຫ້ເຂົາເຈົ້າເຂົ້າຮ່ວມວິໄສທັດເ ອີລົບ, ແລກປ່ຽນ ແລະ ແບ່ງປັນຄວາມຮູ້, ທັກສະ ແລະ ເຕັກໂນໂລຊີ.
ສຸດທ້າຍແມ່ນໃນຂົງເຂດການຮ່ວມມືດ້ານປ້ອງກັນຊາດ ແລະ ປ້ອງກັນຄວາມສະຫງົບ. ສອງຝ່າຍໄດ້ມີສັນຍາແມ່ກ່ຽວກັບການຮ່ວມມືດ້ານປ້ອງກັນຊາດ ແລະ ປ້ອງກັນຄວາມສະຫງົບ (FPA), ນອກຈາກນັ້ນ ແມ່ນໂຄງການເພີ່ມທະວີການຮ່ວມມືດ້ານປ້ອງກັນຄວາມສະຫງົບຢູ່ ອາຊີ ຂອງ EU. ຕາມທ່ານເອກອັກຄະລັດຖະທູດແລ້ວ, ນີ້ແມ່ນກົນໄກເພື່ອໃຫ້ 2 ຝ່າຍສາມາດເປີດກວ້າງຂອບຂະໜາດການຮ່ວມມືໃນບັນດາເຄື່ອນໄຫວຮັກສາສັນຕິພາບ, ຄວາມສະຫງົບທາງເຄືອຂ່າຍອິນເຕີເນັດ, ກໍ່ສ້າງກຳລັງການເດີນທະເລ, ແບ່ງປັນບັນດາເປົ້າໝາຍສັນຕິພາບ ແລະ ສະຖຽນລະພາບໃນພາກພື້ນ.
 |
| ທ່ານເອກອັກຄະລັດຖະທູດຂອງສະຫະພາບເອີລົບ (EU) ປະຈຳ ຫວຽດນາມ Julien Guerrier ທີ່ຢູ່ກອງປະຊຸມຂ່າວໃນວັນທີ 27 ກັນຍາ. ພາບ: ລຽນຮ່າ |
ທ່ານເອກອັກຄະລັດຖະທູດ Guerrier ຖືວ່າ: ປະຊາຊົນ ຫວຽດນາມ ແລະ EU ມີຄວາມປາຖະໜາລວມ: “ພວກຂ້າພະເຈົ້າໄດ້ເວົ້າເຖິງທິດນຳຂອງຫວຽດນາມ: ເອກະລາດ - ເສລີະພາບ - ຄວາມຜາສຸກ, ນັ້ນແມ່ນກຸ່ມຄຳທີ່ຂ້າພະເຈົ້າເຫັນໄດ້ເຖິງຄວາມສວຍງາມ ແລະ ມີຄວາມໝາຍໃນແຕ່ລະນິຍາມ ເຊິ່ວາ່ອງແສງເຖິງຄວາມປາຖະໜາຂອງປະຊາຊົນທັງສອງປະເທດ ຫວຽດນາມ ແລະ EU".
ທ່ານເອກອັກຄະລັດຖະທູດ Guerrier ຫວັງວ່າ 2 ຝ່າຍຈະຊຸກຍູ້ການພົບປະແລກປ່ຽນມະນຸດ ເພື່ອເພື່ອຫັນເປົ້າໝາຍ ເອກະລາດ - ເສລີພາບ - ຄວາມຜາສຸກ ໃຫ້ປະກົດຜົນເປັນຈິງ, ພິເສດແມ່ນການພົບປະແລກປ່ຽນດ້ານການສຶກສາ ແລະ ການຢ້ຽມຢາມຖາມຂ່າວເຊິ່ງກັນ ແລະ ກັນ , ໃນນັ້ນ ອາດອາດເສົ້າເຖິງງານວາງສະແດງການສຶກສາຂອງ EU ຢູ່ນະຄອນ ໂຮ່ຈີມິນ ແລະ ຮ່າໂນ້ຍ ໃນໄລຍະທີ່ຈະມາເຖິງ.
ກ່ຽວກັບເປົ້າໝາຍພັດທະນາ ແລະ ສີຂຽວຂອງຫວຽດນາມ, ຕາມທ່ານເອກອັກຄະລັດຖະທູດແລ້ວ, ເອີລົບ ມີປະສົບການຢ່າງເລິກເຊິ່ງກວ້າງຂວາງ. ມາຮອດປະຈຸບັນ, ເອີລົບ ບັນລຸເປົ້າໝາຍເພີ່ມທະວີ GDP ແລະ ຫຼຸດການອາຍພິດໄປພ້ອມກັນ.
ທ່ານເອກອັກຄະລັດຖະທູດກ່າວວ່າ “ຫວຽດນາມ ມີທ່າໄດ້ປຽບ ແລະ ກາລະໂອກາດຫຼາຍຢ່າງໃນທິດທາງນີ້".
ທ່ານເອກອັກຄະລັດຖະທູດ Guerrier ໄດ້ຍົກໃຫ້ເຫັນຄວາມຕັດສິນໃຈໃນການຫັນປ່ຽນການຜະລິດລົດໄຟຟ້າຂອງ Vinfast ເປັນຕົວຢ່າງຂອງວິສາຫະກິດ ຫວຽດນາມ ແລະ ຢືນຢັນວ່າ Vinfast ຈະບັນລຸທ່າໄດ້ປຽບຂອງຄົນປະຈັນບານ “first-movers advantages”.
ທ່ານເອກອັກຄະລັດຖະທູດ Guerrier ໃຫ້ຮູ້ວ່າ: “ຂະບວນການຫັນປ່ຽນສີຂຽວມີຄ່າໃຊ້ຈ່າຍ ແຕ່ກໍ່ນຳມາເຊິ່ງກາລະໂອກາດອັນໃຫຍ່ຫຼວງ, ພິເສດແມ່ນໃນສະພາບທີ່ ຫວຽດນາມ ມີເງື່ອນໄຂສະດວກສະເພາະໃຫ້ແກ່ຂະບວນການນີ້ ດ້ວຍແຫຼ່ງນ້ຳ, ລົມ, ແສງຕາເວັນ, ພູ...ທີ່ອຸດົມສົມບູນ''.
ດີງເລື້ອງ
