ອາຊຽນ - ນອກແວ: ຊຸກຍູ້ການຮ່ວມມື

ທີ່ກອງປະຊຸມ, ບັນດາເຈົ້າໜ້າທີ່ ອາຊຽນ ແລະ ນອກແວ ໄດ້ແລກປ່ຽນກ່ຽວກັບສະພາບການຂອງບັນດາຝ່າຍ, ສໍາຫຼວດກວດຄືນການຮ່ວມມືໃນຂອບເຂດການພົວພັນຄູ່ຮ່ວມມືເຈລະຈາ ຕາມຂົງເຂດ ລະຫວ່າງ ອາຊຽນ - ນອກແວ ໃນໄລຍະຜ່ານມາ, ພິເສດ ແມ່ນສະພາບການຜັນຂະຫຍາຍ ແຜນການໃຫ້ບຸລິມະສິດຄູ່ຮ່ວມມືເຈລະຈາຕາມຂົງເຂດ ລະຫວ່າງ ອາຊຽນ - ນອກແວ.

ອາຊຽນຕີລາຄາສູງການພົວພັນຮ່ວມມືສອງຝ່າຍ, ເນັ້ນເຖິງເລື່ອງເພີ່ມທະວີການຮ່ວມມືກັບນອກແວໃນບັນດາຂົງເຂດເປັນຕົ້ນຄື: ການຄ້າ ແລະ ພັດທະນາບັນດາວິສາຫະກິດຂະໜາດໜ້ອຍທີ່ສຸດ, ຂະໜາດໜ້ອຍ ແລະ ຂະໜາດກາງ ແລະ ອື່ນໆ.

ທີ່ກອງປະຊຸມ, ນອກແວ ໄດ້ຢັ້ງຢືນວ່າຖືເປັນສໍາຄັນການຮ່ວມມືກັບອາຊຽນ, ພ້ອມກັນນັ້ນສືບຕໍ່ໜູນຊ່ວຍ ອາຊຽນ ກໍ່ສ້າງປະຊາຄົມ ອາຊຽນ ແລະ ປະຕິບັດ ວິໄສທັດ ອາຊຽນ ຮອດປີ 2025, ຮັດແຄບຄວາມແຕກໂຕນກັນໃນການພັດທະນາ ແລະ ຜັນຂະຫຍາຍຂໍ້ລິເລີ່ມ ເຊື່ອມໂຍງ ອາຊຽນ, ຊຸກຍູ້ການຮ່ວມມືຢ່າງແທດຈິງໃນບັນດາຂົງເຂດ ເຊິ່ງຕ່າງຝ່າຍຕ່າງມີຜົນປະໂຫຍດ.

（ໄຊພອນ）