 |
| ພິທີເຄົາລົບທຸງ (ພາບ: TTXVN) |
ເຂົ້າຮ່ວມພິທີມີສະຫາຍ ເຈືອງຮ່ວາບິ່ງ, ອະດີດກຳມະການກົມການເມືອງ, ອະດີດຮອງນາຍົກລັດຖະມົນຕີ ຜູ້ປະຈຳການລັດຖະບານ, ກັບພະນັກງານ, ນັກຮົບ, ປະຊາຊົນໃນແຂວງ ແລະ ແຂກທ່ອງທ່ຽວເປັນຈຳນວນຫຼາຍ.
ກ່າວຄຳເຫັນທີ່ພິທີ, ທ່ານນາງຮອງປະທານຄະນະກຳມະການປະຊາຊົນແຂວງ ຝຸອຽນ ດ່າວໝີ ເນັ້ນໜັກວ່າ: ພິທີເຄົາລົບທຸງ ຕ້ອນຮັບປີໃໝ່ຢູ່ແຫຼມດ້າຍແລງ ມີຄວາມໝາຍສຳຄັນທີ່ສຸດ ເພື່ອແນໃສ່ສຶກສາຄວາມຮັກປະເທດຊາດ, ນ້ຳໃຈຄວາມເອກອ້າງທະນົງໃຈຂອງພະນັກງານ, ນັກຮົບ, ສະມາຊິກຄະນະຊາວໜຸ່ມ ແລະ ປະຊາຊົນ. ການເຄື່ອນໄຫວນີ້ກໍ່ແນໃສ່ລະດົມກຳລັງໃຈຊາວປະມົງ ສືບຕໍ່ທຳມາຫາກິນຢູ່ທະເລ, ສ້າງກຳລັງໜູນຊ່ວຍໃຫ້ບັນດານ້ອງໆນັກຮຽນຜ່ານຜ່າຄວາມຫຍຸ້ງຍາກ, ບືນຕົວຂຶ້ນໃນການຮ່ຳຮຽນ…
ເຂົ້າຮ່ວມພິທີເຄົາລົບທຸງຕ້ອນປີໃໝ່, ນາງ ຫວໍທິຖຸຍຢຸງ (ຕາແສງ ຮ່ວາຮຽບນາມ, ເທດສະບານ ດົງຮ່ວາ, ແຂວງ ຝຸອຽນ) ໃຫ້ຮູ້ວ່າ ໂດຍເປັນຊາວທ້ອງຖິ່ນ, ລາວມີຄວາມເປັນກຽດ ແລະ ເອກອ້າງທະນົງໃຈເມື່ອບ້ານເກີດເມືອງນອນຂອງຕົນແມ່ນສະຖານທີ່ທ່ອງທ່ຽວຕ້ອນຮັບຮຸ່ງອາລຸນຍາມເຊົ້າແຫ່ງທຳອິດຂອງມື້ຢູ່ ຫວຽດນາມ. ສະຖານທີ່ແຫ່ງນີ້ມີທິວທັດທຳມະຊາດທີ່ສວຍສົດງົດງາມ, ອາກາດປອດໂປ່ງເຢັນສະບາຍ, ມີຄວາມສະດວກໃຫ້ແກ່ການພັດທະນາການທ່ອງທ່ຽວ ດັ່ງນັ້ນ ເອື້ອຍຢຸງ ຫວັງວ່າ ຈະມີຫຼາຍວິສາຫະກິດລົງທຶນພັດທະນາການທ່ອງທ່ຽວ ມາທີ່ນີ້, ນຳມາເຊິ່ງແຫຼ່ງລາຍຮັບໃຫ້ແກ່ຊາວທ້ອງຖິ່ນ.
ທີ່ພິທີ, ສະຫາຍ ເຈືອງຮ່ວາບິ່ງ ໄດ້ມອບທຸງຊາດໃຫ້ແກ່ຊາວປະມົງ ແຂວງຝຸອຽນ, ມອບທຶນການສຶກສາໃຫ້ແກ່ນັກຮຽນທຸກຍາກ ແລະ ຊາວຊົນເຜົ່າສ່ວນໜ້ອຍໃນບໍລິເວນແຂວງຝຸອຽນ.
ພິທີເຄົາລົບທຸງຍາມຕົ້ນປີໃໝ່ໄດ້ຮັບການຈັດຕັ້ງຢູ່ຈຸດຕາເວັນອອກສຸດ ຂອງປະເທດຊາດ ຫຼືຍັງໄດ້ເອີ້ນວ່າແມ່ນການເຄື່ອນໄຫວປະກອບສ່ວນເຂົ້າໃນການໂຄສະນາພາບພົດການທ່ອງທ່ຽວແຂວງຝຸອຽນມາຍັງແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດເປັນຈຳນວນຫຼາຍ.
ໂດຍແມ່ນແຂກທ່ອງທ່ຽວສາກົນຄົນທຳອິດທີ່ມາທ່ຽວແຫຼມດ້າຍແລງ ໃນຊຸມວັນທຳອິດໃນປີ ແລະ ໄດ້ຮັບຊໍ່ດອກໄມ້ອວຍພອນຈາກຄະນະກຳມະການປະຊາຊົນແຂວງ ຝຸອຽນ, ທ່ານ Michael Melzer ແຂກທ່ອງທ່ຽວຊາວເຢຍລະມັນແບ່ງປັນວ່າ ລຸງໄດ້ມາທ່ຽວຫຼາຍແຫ່ງຢູ່ ຫວຽດນາມ ແລ້ວ ແຕ່ນີ້ເປັນຄັ້ງທຳອິດ ມາທ່ຽວຝຸອຽນ. ເຂດດິນແດນແຫ່ງນີ້ມີທິວທັດທຳມະຊາດຫຼາຍແຫ່ງທີ່ສວຍງາມ. ທ່ານ Michael Melzer ເລືອກເອົາແຫຼມດ້າຍແລງ ແມ່ນສະຖານທີ່ມາທ່ອງທ່ຽວໃນຊຸມວັນຕົ້ນປີ ດ້ວຍຄວາມຫວັງຢາກຮັບຊົມຮຸ່ງອາລຸນເຊົ້າຢູ່ແຫ່ງນີ້.
ດ້ວຍທ່າໄດ້ປຽບຫຼາຍຢ່າງ ກ່ຽວກັບທິວທັດທຳມະຊາດ, ຮ່ອງຮອຍປະຫວັດສາດ ແລະ ຊາວທ້ອງຖິ່ນທີ່ມີນ້ຳໃຈຄວາມຮັກແພງແຂກຄົນ ແລະ ໃຈດີ, ຝຸອຽນແມ່ນສະຖານທີ່ທ່ອງທ່ຽວທີ່ດີສຳລັບແຂກທ່ອງທ່ຽວ, ເພື່ອນມິດສາກົນ. ການທ່ອງທ່ຽວຝຸອຽນ ໄດ້ຮັບຄວາມຫວັງວ່າຈະຕ້ອນຮັບແຂກທ່ອງທ່ຽວ 2,4 ລ້ານຄົນ (ໃນນັນມີແຂກທ່ອງທ່ຽວສາກົນ 15.000 ຄົນ) ແລະ ອາດຈະຫຼາຍກ່ວາໃນປີ 2023. ໃນອະນາຄົດ, ທ້ອງຖິ່ນກຳນົດທິດພັດທະນາການທ່ອງທ່ຽວກາຍເປັນໜຶ່ງໃນບັນດາສູນທ່ອງທ່ຽວຜັກຜ່ອນບຳລຸງສຸຂະພາບແຫ່ງຊາດ.
ບຸນຄົງ
