 |
ພາບປະກອບ
ເມື່ອທຽບໃສ່ຄວາມຕ້ອງການຂອງໜ້າທີ່ການເມືອງແລ້ວ ກະຊວງແຜນການ ແລະ ການລົງທຶນ (ຜທ) ຍັງມີຂໍ້ຄົງຄ້າງຫຼາຍດ້ານທີ່ຍັງບໍ່ບັນລຸ ເຊິ່ງຕ້ອງໄດ້ເລັ່ງການແກ້ໄຂເພື່ອໃຫ້ແທດເໝາະກັບການເລັ່ງທວງຂອງການພັດ ທະນາໃນໄລຍະໃໝ່ ເຊິ່ງຕ້ອງໄດ້ເອົາໃຈໃສ່ແກ້ໄຂຢ່າງວ່ອງໄວ ແລະ ໃຫ້ໄດ້ຮັບປະສິດທິຜົນດີຂຶ້ນກວ່າເກົ່າ. ສະຫາຍ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງ ຜທ ໄດ້ກ່າວໃນກອງປະຊຸມຄົບຄະນະບໍລິຫານງານພັກກະຊວງ ຜທ ຄັ້ງທີ 4 ສະໄໝທີ III ວັນທີ 31 ທັນວາ ຜ່ານມາວ່າ: ບັນຫາທີ່ຍັງຄົງຄ້າງບໍ່ທັນບັນລຸໄດ້ຕາມຄວາມຕ້ອງການ ແລະ ການເລັ່ງທວງຂອງການພັດທະນາໃນໄລຍະໃໝ່ທີ່ຕ້ອງໄດ້ແກ້ໄຂ ປະກອບມີການເຜີຍແຜ່ແນວທາງນະໂຍບາຍຂອງພັກໃຫ້ສະມາຊິກພັກ-ພະນັກງານ ເຖິງວ່າໄດ້ດຳເນີນຫຼາຍຄັ້ງ ແຕ່ຄວາມຮັບຮູ້-ເຂົ້າໃຈ ແລະ ການເຊື່ອມຊຶມຂອງສະມາຊິກ ຍັງບໍ່ທັນເລິກເຊິ່ງ ບໍ່ທັນບຸກທະລຸດ້ານຈິນຕະນາການ ຄວາມເປັນເຈົ້າການຕື່ນຕົວ ແລະ ຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍຍັງບໍ່ສູງເທົ່າທີ່ຄວນ ການຂະຫຍາຍສະມາຊິກພັກຢູ່ແຕ່ລະໜ່ວຍພັກມີຈຳນວນເພີ່ມຂຶ້ນ ແຕ່ຄຸນນະພາບຂອງສະມາຊິກພັກບໍ່ທັນສົມຄູ່ກັບຈຳນວນທີ່ມີ ຍ້ອນການຄັດເລືອກເອົາມະຫາຊົນເຂົ້າພັກ ບໍ່ມີການເລືອກເຟັ້ນທີ່ດີ ການຂະຫຍາຍພັກຍັງເບິ່ງແຕ່ຜູ້ເຂົ້າການກ່ອນ ມີອາຍຸການຫຼາຍປີ ຍັງບໍ່ເຍືອງໃສ່ມາດຖານເງື່ອນໄຂທີ່ກຳນົດໄວ້ໃນກົດລະບຽບຂອງພັກຢ່າງເຂັ້ມງວດ ກົງຈັກໜ່ວຍພັກມີຄົບຖ້ວນ ແຕ່ຍັງອ່ອນໃນການນຳພາປະຕິບັດໜ້າທີ່ການເມືອງທີ່ໄດ້ຮັບມອບໝາຍ ການປະຕິບັດກົດລະບຽບຂອງພັກຫຼ້າຫຼັງ ບໍ່ເຂັ້ມງວດເທົ່າທີ່ຄວນ ໂດຍສະເພາະ ການຮ່ວມຊີວິດພັກປະຈຳເດືອນຍັງດຳເນີນບໍ່ປົກກະຕິ ເຖິງວ່າໄດ້ມີການຮ່ວມຊີວິດພັກ ແຕ່ເນື້ອໃນບໍ່ເລິກເຊິ່ງ ບໍ່ກ້າຫານຕິຊົມຕົນເອງ ເພື່ອນສະຫາຍເພື່ອກໍ່ສ້າງກັນ ການປະຕິບັດລະບອບປະຊຸມ 3 ເດືອນຕໍ່ຄັ້ງ ເຮັດບໍ່ໄດ້ຕໍ່ເນື່ອງ ການກໍ່ສ້າງໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ ຍັງມີລັກສະນະຮູບການຫຼາຍກວ່າ ບໍ່ມີແຜນການ ແລະ ໜ້າທີ່ຈຸດສຸມຈັດຕັ້ງປະຕິບັດລະອຽດແຕ່ລະດ້ານ ຂອດການປະເມີນຍັງຕີລາຄາແບບຜິວເຜີນ ເຮັດໃຫ້ຄຸນນະພາບບໍ່ສູງ.
ຄາດໝາຍຕົ້ນຕໍດ້ານເສດຖະກິດ ສູ້ຊົນພັດທະນາຂະແໜງປູກຝັງໃຫ້ຂະຫຍາຍຕົວລະດັບ 2,6% ໃນນີ້ ການຜະລິດເຂົ້າເປືອກລວມໃຫ້ໄດ້ 3,5 ລ້ານໂຕນ ລ້ຽງສັດບໍ່ຫຼຸດ 3,5% ການປະມົງບໍ່ຫຼຸດ 3% ສູ້ຊົນໃຫ້ມູນຄ່າການຜະລິດອຸດສາຫະກຳປຸງແຕ່ງ ແລະ ຫັດຖະກຳບັນລຸ 14.919 ຕື້ກີບ ມູນຄ່າການສົ່ງອອກ ໃຫ້ບັນລຸ 6.422 ລ້ານໂດລາສະຫະລັດ ມູນຄ່າການນຳເຂົ້າ 6.615 ລ້ານໂດລາສະຫະລັດ ມູນຄ່າຈໍລະຈອນສິນຄ້າ (ຂາຍຍົກ-ຂາຍຍ່ອຍ ແລະ ບໍລິການ) ໃຫ້ໄດ້ 72.374 ຕື້ກີບ ການຜະລິດກະແສໄຟຟ້າໃຫ້ໄດ້ 44.148 ລ້ານກິໂລວັດໂມງ ມູນຄ່າ 22.812 ຕື້ກີບ ໃນນີ້ ສົ່ງອອກຕ່າງປະເທດ 36.656 ລ້ານກິໂລວັດໂມງ ມູນຄ່າ 16.547 ຕື້ກີບ ຜະລິດແຮ່ທາດສົ່ງອອກໃຫ້ໄດ້ 9.588 ຕື້ກີບ.ດ້ານລາຍຮັບ ຄາດຄະເນລາຍຮັບງົບປະມານລວມໃຫ້ໄດ້ 28.997 ຕື້ກີບ ເທົ່າກັບ 16,3% ຂອງ GDP ໃນນີ້ ລາຍຮັບພາສີ ແລະ ອາກອນ 22.133,5 ຕື້ກີບ ລາຍຮັບບໍ່ແມ່ນພາສີ ແລະ ອາກອນ 4.576,5 ຕື້ກີບ ລາຍຮັບຈາກການຊ່ວຍເຫຼືອລ້າ 2.287 ຕື້ກີບ ສ່ວນລາຍຈ່າຍແມ່ນອີງໃສ່ລາຍຮັບເປັນຫຼັກ ເພື່ອຫຼຸດຜ່ອນການຂາດດຸນງົບປະມານ ເຊິ່ງຄາດຄະເນວ່າລາຍຈ່າຍຈະຢູ່ລະດັບ 35.693 ຕື້ກີບ ເທົ່າກັບ 20,07% ຂອງ GDP ເພີ່ມຂຶ້ນ 5,8% ຫຼື ເທົ່າກັບ 1.957,45 ຕື້ກີບ.
（ໄຊພອນ）
