 |
| ທ່ານ ຫງວຽນແທ່ງຈີ ປະທານສະຫະພັນບັນດາອົງການຈັດຕັ້ງມິດຕະພາບແຂວງ ດົ່ງນາຍ ກ່າວຄຳເຫັນທີ່ກອງປະຊຸມ |
ບົດລາຍງານທີ່ກອງປະຊຸມ, ທ່ານ ຫງວຽນແທ່ງຈີ ປະທານສະຫະພັນບັນດາອົງການຈັດຕັ້ງມິດຕະພາບແຂວງ ດົ່ງນາຍໃຫ້ຮູ້ວ່າ: ໃນ 6 ເດືອນຕົ້ນປີ 2022, ໜ່ວຍງານຈັດຕັ້ງປະຕິບັດລາຍການພົບປະມິດຕະພາບລະດູບານໃໝ່ປີ 2022 ຢູ່ແຂວງ ດົ່ງນາຍ ຢ່າງສຳເລັດຜົນ ໂດຍການເຂົ້າຮ່ວມຂອງການນຳແຂວງ, ການນໍາບັນດາພະແນກ, ຄະນະ, ຂະແໜງການ, ອົງການການເມືອງ-ສັງຄົມ, ສະມາຄົມມິດຕະພາບ ແລະ ຄະນະຜູ້ແທນ 250 ທ່ານທີ່ເປັນບັນດາວິສາຫະກິດ, ນັກທຸລະກິດ, ນັກປັນຍາຊົນ, ນັກລົງທຶນເຊິ່ງແມ່ນຊາວຫວຽດນາມ ອາໄສຢູ່ຕ່າງປະເທດຢູ່ແຂວງ ດົ່ງນາຍ, ນະຄອນໂຮ່ຈິມິນ; ຈັດຕັ້ງໂຄງການແລກປ່ຽນວັດທະນະທໍາ ຫວຽດນາມ - ອິນໂດເນເຊຍ ຢູ່ ດົ່ງນາຍ; ສົມທົບກັບສະມາຄົມມິດຕະພາບຫວຽດນາມ - ຝະລັ່ງ ປະຈຳແຂວງ ຈັດຕັ້ງບັນດາໂຄງການແລກປ່ຽນມິດຕະພາບ ຫວຽດນາມ - ຝະລັ່ງ, ເພື່ອສະເຫຼີມສະຫຼອງວັນພາສາຝະລັ່ງສາກົນ ແລະ 49 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ຝລັ່ງ.
ແຂວງ ດົ່ງນາຍ ສົມທົບກັບ 8 ອົງການບໍ່ຂຶ້ນກັບລັດຖະບານຕ່າງປະເທດ ຜັນຂະຫຍາຍ 11 ບ້ວງທຶນຊ່ວຍເຫຼືອ ດ້ວຍມູນຄ່າຄໍາໝັ້ນສັນຍາທັງໝົດກວ່າ 27,70 ຕື້ດົ່ງ. ປີ 2022, ມີ 5 ອົງການຈັດຕັ້ງຜັນຂະຫຍາຍ 8 ບ້ວງທຶນຊ່ວຍເຫຼືອລ້າ ດ້ວຍມູນຄ່າກວ່າ 15.538 ຕື້ດົ່ງ; 3 ອົງການຈັດຕັ້ງປະຕິບັດ 3 ໂຄງການ ດ້ວຍຍອດມູນຄ່າກວ່າ 11,5 ຕື້ດົ່ງ. ເມື່ອທຽບໃສ່ໄລຍະດຽວກັນຂອງປີ 2021, ຈຳນວນໂຄງການໃໝ່ເພີ່ມຂຶ້ນ 4 ໂຄງການ, ເພີ່ມຂຶ້ນ 7,6 ຕື້ດົ່ງ. ສະຫະພັນມິດຕະພາບແຂວງ ດົ່ງນາຍ ໄດ້ລະດົມ 03 ວິສາຫະກິດລົງທຶນຕ່າງປະເທດເຂົ້າຮ່ວມການຮັບຜິດຊອບສັງຄົມ ດ້ວຍຍອດຈຳນວນທຶນກວ່າ 770 ລ້ານດົ່ງ.
ກ່າວຄຳເຫັນທີ່ກອງປະຊຸມ, ທ່ານ ຫວໍເຕີນດຶກ, ຮອງປະທານຄະນະກຳມະການປະຊາຊົນແຂວງ ດົ່ງນາຍ ໃຫ້ຮູ້ວ່າ: ຄະນະບໍລິຫານງານສະຫະພັນມິດຕະພາບແຂວງ ໄດ້ມີການປະກອບສ່ວນຢ່າງຕັ້ງໜ້າ, ສ້າງບັນດາໝາກຜົນຢ່າງຈະແຈ້ງໃນການພົວພັນທາງການທູດປະຊາຊົນ, ຕອບສະໜອງຕາມຄວາມຮຽກຮ້ອງຕົວຈິງ, ເປີດກວ້າງ ແລະ ສ້າງຕັ້ງການພົວພັນກັບປະຊາຊົນບັນດາປະເທດ, ປະກອບສ່ວນພັດທະນາເສດຖະກິດ - ສັງຄົມຂອງແຂວງ. ໃນຊຸມປີມໍ່ໆມານີ້, ແຂວງ ດົ່ງນາຍ ຍາມໃດກໍ່ໄດ້ຮັບທຸງແຂ່ງຂັນດີເດັ່ນ, ແມ່ນຫົວໜ່ວຍນຳໜ້າໃນວຽກງານການພົວພັນຕ່າງປະເທດຂອງປະເທດຊາດ. ທ່ານ ດຶກ ສະເໜີໃຫ້ຄະນະບໍລິຫານງານສະຫະພັນມິດຕະພາບແຂວງ ດົ່ງນາຍ ສືບຕໍ່ສາມັກຄີ, ຮ່ວມມືປະຕິບັດການທູດປະຊາຊົນຢ່າງເປັນເອກະພາບ, ຄົບຊຸດແລະ ມີປະສິດທິຜົນ; ສົມທົບກັນຢ່າງແໜ້ນແຟ້ນລະຫວ່າງການຕ່າງປະເທດປະຊາຊົນ, ການຕ່າງປະເທດຂອງພັກ ແລະ ການທູດແຫ່ງລັດ; ລະຫວ່າງທຸກຂັ້ນ, ຂະແໜງການກັບຄະນະກຳມະການແນວໂຮມປະເທດຊາດ ແລະ ສະຫະພັນມິດຕະພາບແຂວງ ດົ່ງນາຍ, ສ້າງເປັນກຳລັງແຮງການສົມທົບກັນຂອງແນວໂຮມການພົວພັນຕ່າງປະເທດຂອງແຂວງ.
ຄະນະບໍລິຫານງານສະຫະພັນມິດຕະພາບແຂວງ ດົ່ງນາຍ ຄວນຜັນຂະຫຍາຍແຜນການ ແລະ ໂຄງການປັບປຸງປະສິດທິຜົນການພົວພັນທາງການທູດປະຊາຊົນ ໂດຍໄວ, ສືບຕໍ່ປະດິດສ້າງ, ຊຸກຍູ້ບົດບາດ, ຍົກສູງຄຸນນະພາບ ແລະ ປະສິດທິຜົນການເຄື່ອນໄຫວຂອງອົງການຈັດຕັ້ງມິດຕະພາບຫວຽດນາມ ໃນສະຖານະການໃຫມ່.
ຄະນະກຳມະການປະຊາຊົນແຂວງ ສືບຕໍ່ເອົາໃຈໃສ່ ແລະ ຊີ້ນຳບັນດາການເຄື່ອນໄຫວຂອງສະຫະພັນມິດຕະພາບແຂວງ ດົ່ງນາຍ ຢ່າງທັນການ, ພ້ອມກັນນັ້ນ, ກໍຊີ້ນຳບັນດາພະແນກ, ຄະນະ, ຂະແໜງການ, ໝູ່ຄະນະ ເພີ່ມທະວີວຽກງານປະສານສົມທົບ ແລະ ສ້າງເງື່ອນໄຂໃຫ້ຄະນະບໍລິຫານງານສູນກາງ. ຄະນະກຳມະການສະຫະພັນມິດຕະພາບ ດົ່ງນາຍ ປະຕິບັດວຽກງານທີ່ໄດ້ຮັບມອບໝາຍໃຫ້ເປັນຢ່າງດີ.
ບຸນຄົງ
