 |
ລັດຖະບານ ລາວ ພິຈາລະນາຮັບຮອງເອົາ 9 ເອກະສານສຳຄັນໃນເດືອນສິງຫາ
ກອງປະຊຸມຄັ້ງນີ້ ໄດ້ປຶກສາຫາລືປະກອບຄຳຄິດເຫັນ ແລະ ພິຈາລະນາຮັບຮອງເອົາ 9 ເອກະສານສຳຄັນ ຄື: ຮ່າງກົດໝາຍວ່າດ້ວຍການຊົດເຊີຍຄ່າເສຍຫາຍຈາກລັດ (ສ້າງໃໝ່) ຮ່າງກົດໝາຍວ່າດ້ວຍການລົ້ມລະລາຍຂອງວິສາຫະກິດ (ສະບັບປັບປຸງ) ຮ່າງກົດໝາຍວ່າດ້ວຍຮູບເງົາ (ສ້າງໃໝ່) ຮ່າງກົດໝາຍວ່າດ້ວຍຫຼັກຊັບ (ສະບັບປັບປຸງ) ຮ່າງກົດໝາຍວ່າດ້ວຍຄວາມສະເໝີພາບ ຍິງ-ຊາຍ (ສ້າງໃໝ່) ຮ່າງດຳລັດວ່າດ້ວຍການປິດບໍ່ແຮ່ ພາຍຫຼັງການຂຸດຄົ້ນ ຮ່າງດຳລັດວ່າດ້ວຍການຄຸ້ມຄອງທຸລະກິດຍານພາຫະນະທາງບົກ ແຜນພັດທະນາແບບກວມລວມເຂດພູພຽງບໍລະເວນ ບົດລາຍງານກ່ຽວກັບສະພາບພົ້ນເດັ່ນ ດ້ານເສດຖະກິດ-ການເງິນ ເງິນຕາ ແລະ ມາດຕະການແກ້ໄຂ ທິດທາງແຜນງົບປະມານປີ 2020.
ສະເພາະຮ່າງກົດໝາຍວ່າດ້ວຍການລົ້ມລະລາຍຂອງວິສາຫະກິດ ຮ່າງກົດໝາຍວ່າດ້ວຍຮູບເງົາ ຮ່າງກົດໝາຍວ່າດ້ວຍຫຼັກຊັບ ຮ່າງກົດໝາຍວ່າດ້ວຍຄວາມສະເໝີພາບ ຍິງ-ຊາຍ ໄດ້ຊີ້ນຳໃຫ້ກະຊວງກ່ຽວຂ້ອງນຳໄປປັບປຸງຕື່ມ ຕາມການປະກອບຄຳເຫັນຂອງສະມາຊິກລັດຖະບານ ເປັນຕົ້ນ ຊື່ກົດໝາຍ ບາງເນື້ອໃນ ປະໂຫຍກ ຄຳສັບຕ່າງໆ ພາຍຫຼັງປັບປຸງແລ້ວໃຫ້ນຳສະເໜີໃຫ້ສະພາແຫ່ງຊາດ ພິຈາລະນານຳເຂົ້າຜ່ານກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ເດືອນພະຈິກ 2019 ຮ່າງກົດໝາຍວ່າດ້ວຍການຊົດເຊີຍຄວາມເສຍຫາຍຈາກລັດ ໄດ້ຊີ້ນຳໃຫ້ກະຊວງຍຸຕິທຳ ສົມທົບກັບກະຊວງກ່ຽວຂ້ອງ ນຳໄປປັບປຸງຕື່ມ ຕາມການປະກອບຄຳເຫັນຂອງສະມາຊິກລັດຖະບານ ໂດຍສະເພາະຊື່ກົດໝາຍ ເນື້ອໃນ ຈາກນັ້ນ ໃຫ້ນຳໄປທາບທາມຄຳຄິດເຫັນຈາກບັນດາຂະແໜງການ ອົງການຂັ້ນສູນກາງ ແລະ ທ້ອງຖິ່ນຕື່ມອີກ ຈຶ່ງນຳສະເໜີຜ່ານກອງປະຊຸມລັດຖະບານຄັ້ງຕໍ່ໄປ.
ຮ່າງດຳລັດວ່າດ້ວຍການປິດບໍ່ແຮ່ ພາຍຫຼັງສິ້ນສຸດການຂຸດຄົ້ນ ໄດ້ຊີ້ນຳໃຫ້ກະຊວງພະລັງງານ ແລະ ບໍ່ແຮ່ ສົມທົບກັບພາກສ່ວນກ່ຽວຂ້ອງ ປັບປຸງຕື່ມຕາມການປະກອບຄຳເຫັນຂອງສະມາຊິກລັດຖະບານ ເປັນຕົ້ນ ເນື້ອໃນບາງມາດຕາໃຫ້ຄົບຖ້ວນ ໂດຍສະເພາະແຜນການປິດບໍ່ແຮ່ ມາດຕະຖານການປິດບໍ່ແຮ່ ການຟື້ນຟູທາງກາຍະພາບ ແລະ ເຄມີ ການບູລະນະຟື້ນຟູສິ່ງແວດລ້ອມທຳມະຊາດ ແລະ ສັງຄົມ ການຄ້ຳປະກັນການປິດບໍ່ແຮ່ ແລະ ອື່ນໆ ພາຍຫຼັງປັບປຸງແລ້ວໃຫ້ສົມທົບກັບຫ້ອງວ່າການສຳນັກງານນາຍົກ ລັດຖະມົນຕີກວດກາຮຽບຮຽງ ແລ້ວສະເໜີທ່ານນາຍົກລັດຖະມົນຕີລົງລາຍເຊັນປະກາດໃຊ້ເປັນທາງການ.
ຮ່າງດຳລັດວ່າດ້ວຍການຄຸ້ມຄອງທຸລະກິດຍານພາຫະນະທາງບົກ ໄດ້ຊີ້ນຳໃຫ້ກະຊວງອຸດສາຫະກຳ ແລະ ການຄ້າ ນຳໄປປັບປຸງຕື່ມຕາມການປະກອບຄຳເຫັນຂອງສະມາຊິກລັດຖະບານ ເປັນຕົ້ນ ບາງເນື້ອໃນໃຫ້ຄົບຖ້ວນ ໂດຍສະເພາະການກຳນົດ ຈຳນວນ ປະເພດ ມາດຖານ ເຕັກນິກ ແລະ ສິ້ນສ່ວນຍານພາຫະນະທາງບົກທີ່ສາມາດນຳເຂົ້າ ແລະ ຊົມໃຊ້ໄດ້ ການສ້າງຕັ້ງ ແລະ ການດຳເນີນທຸລະກິດຍານພາຫະນະທາງບົກ ແລະ ອື່ນໆ ພາຍຫຼັງປັບປຸງສຳເລັດ ໃຫ້ສົມທົບກັບຫ້ອງວ່າການສຳນັກງານນາຍົກລັດຖະມົນຕີ ກວດກາຮຽບຮຽງຄືນ ແລ້ວສະເໜີຂໍທິດຊີ້ນຳຈາກບັນດາທ່ານຮອງນາຍົກລັດຖະມົນຕີ ກ່ອນຈະນຳສົ່ງໃຫ້ທ່ານນາຍົກລັດຖະມົນຕີ ລົງລາຍເຊັນປະກາດໃຊ້.
ບົດລາຍງານກ່ຽວກັບການປັບປຸງແຜນພັດທະນາແບບກວມລວມເຂດພູພຽງບໍລະເວນ ໄດ້ຊີ້ນຳໃຫ້ສະຖາບັນຄົ້ນຄວ້າເສດຖະກິດແຫ່ງຊາດ ປັບປຸງຕື່ມຕາມການປະກອບຄຳຄິດເຫັນຂອງສະມາຊິກລັດຖະບານ ເປັນຕົ້ນ ແຜນພັດທະນາດັ່ງກ່າວ ຕ້ອງໃຫ້ກົມກືນກັບທຳມະຊາດຂອງເຂດພູພຽງບໍລິເວນ ແລະ ຮັບປະກັນບໍ່ໃຫ້ທຳລາຍທຳມະຊາດ ການພັດທະນາໃຫ້ເນັ້ນໃສ່ກະສິກຳແບບນິເວດ ປູກພືດປອດສານພິດ ອຸດສາຫະກຳປຸງແຕ່ງ ກະສິກຳປອດສານພິດ ການທ່ອງທ່ຽວຕິດພັນກັບການເຮັດກະສິກຳ ແລະ ອື່ນໆ ຫຼັງຈາກປັບປຸງແລ້ວໃຫ້ນຳມາຜ່ານນາຍົກ-ຮອງນາຍົກ ກ່ອນສະເໜີກົມການເມືອງພິຈາລະນາອີກເທື່ອໜຶ່ງ ສຳລັບບົດລາຍງານກ່ຽວກັບສະພາບພົ້ນເດັ່ນດ້ານເສດຖະກິດ ການເງິນ-ເງິນຕາ ແລະ ມາດຕະການແກ້ໄຂ ໄດ້ຊີ້ນຳໃຫ້ກະຊວງການເງິນ ສົມທົບກັບກະຊວງ ແລະ ອົງການປັບປຸງຕື່ມ.
（ແຫຼ່ງຂໍ້ມູນ： www.vientianemai.net）
