| ທ່ານນາຍົກລັດຖະມົນຕີ ຟ້າມມິງຈິງ ໄປຢ້ຽມຢາມຕະຫຼາດຫຼັກຊັບ ນິວຢອກ | |
| ນາຍົກລັດຖະມົນຕີ ຟ້າມມິງຈິງ ໄປຮອດນະຄອນຫຼວງວໍຊິງຕັນເຂົ້າຮ່ວມກອງປະຊຸມສຸດຍອດພິເສດ ອາຊຽນ - ອາເມລິກາ |
 |
| ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ການພົບປະ (ພາບ: TTXVN) |
ຕອນຄ່ຳວັນທີ 17 ພຶດສະພາ (ຕາມເວລາທ້ອງຖິ່ນ) ຢູ່ San Francisco (California), ທ່ານນາຍົກລັດຖະມົນຕີ ຟ້າມມິງຈິງ ໄດ້ມີການພົບປະກັບຜູ້ຕາງໜ້າປະຊາຄົມຊາວ ຫວຽດນາມ ຢູ່ ອາເມລິກາ. ນີ້ແມ່ນຄັ້ງທີ 3 ທີ່ທ່ານນາຍົກລັດຖະມົນຕີ ໄດ້ພົບປະກັບຊາວຫວຽດນາມ ຢູ່ຕ່າງປະເທດ ໃນການໄປປະຕິບັດງານຄັ້ງນີ້.
ທີ່ການພົບປະ, ຜູ້ຕາງໜ້າຊາວຫວຽດນາມ ອາໄສຢູ່ຕ່າງປະເທດສະແດງຄວາມຊົມເຊີຍຕໍ່ບັນດາໝາກຜົນທີ່ດີໃນການໄປປະຕິບັດງານຂອງທ່ານນາຍົກລັດຖະມົນຕີ ແລະ ຄະນະຜູ້ແທນເພື່ອເຂົ້າຮ່ວມກອງປະຊຸມສຸດຍອດ ອາຊຽນ - ອາເມລິກາ ສະໄໝພິເສດ, ຢ້ຽມຢາມ ແລະ ເຮັດວຽກຢູ່ ອາເມລິກາ ແລະ ສະຫະປະຊາຊາດ.
ພໍ່ແມ່ປະຊາຊົນກໍ່ສະແດງຄວາມປິຕິຊົມຊື່ນຕໍ່ຜົນສຳເລັດຂອງການພັດທະນາເສດຖະກິດ-ສັງຄົມຂອງປະເທດໃນຊຸມປີມໍ່ໆມານີ້, ໂດຍສະເພາະໃນການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19, ມີຄວາມໝັ້ນໃຈໃນການເປີດປະຕູຄືນສູ່ໄລຍະແຫ່ງການຟື້ນຟູ ແລະ ພັດທະນາເສດຖະກິດ-ສັງຄົມ, ສືບຕໍ່ເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ.
ພໍ່ແມ່ປະຊາຊົນໄດ້ແຈ້ງໃຫ້ຊາບກ່ຽວກັບສະພາບການດຳລົງຊີວິດ, ຮ່ຳຮຽນ ແລະ ເຮັດວຽກຢູ່ອາເມລິກາ, ຕາມນັ້ນແລ້ວ ປະຊາຄົມຊາວຫວຽດນາມຢູ່ທີ່ນີ້ແມ່ນປະຊາຄົມໃຫຍ່, ຂະຫຍັນຂັນເຄື່ອນ, ປະສົບຜົນສຳເລັດໃນຫຼາຍຂົງເຂດ. ຊາວຫວຽດນາມຢູ່ອາເມລິກາລ້ວນແຕ່ມີນ້ຳໃຈຮັກແພງບ້ານເກີດເມືອງນອນ, ລວມທັງຫຼາຍຄົນທີ່ເມື່ອກ່ອນມີຄວາມປັກໃຈ, ແຕ່ປະຈຸບັນກໍ່ມີການປ່ຽນແປງ; ປະຊາຊົນຫຼາຍລ້ານຄົນໄດ້ກັບໄປຢ້ຽມຢາມບ້ານເກີດເມືອງນອນຂອງເຂົາເຈົ້າ, ໄດ້ເຫັນປະຈັກຕາເຖິງການພັດທະນາຂອງປະເທດຊາດທີ່ນັບມື້ນັບຈະເລີນຮຸ່ງເຮືອງ ແລະ ສີລິໄລ, ກາຍເປັນແຮງຈູງໃຈທາງດ້ານຈິດໃຈເພື່ອໃຫ້ຜູ້ອື່ນສືບຕໍ່ອວ່າຍໜ້າກັບຄືນ.
ໃນໄລຍະຜ່ານມາ, ຫຼາຍອົງການ ແລະ ບຸກຄົນຂອງຫວຽດນາມທີ່ມາຈາກຫຼາຍປະເທດໃນໂລກ, ໃນນັ້ນມີອາເມລິກາ ໄດ້ປະກອບສ່ວນນັບສິບຕື້ດົ່ງ, ອຸປະກອນການແພດນັບແສນຢ່າງ ແລະ ປະສົບການເພື່ອປ້ອງກັນ ແລະ ຕ້ານການລະບາດຂອງ COVID-19.
ມະຫາພະອາຈານ ທິກດຶກຕວັນ ປະທາສະມາຄົມພຸດທະສາສະໜາ ຫວຽດນາມ ປະຈຳ ອາເມລິກາ ມີຄວາມຕື້ນຕັນໃຈແບ່ງປັນຄືນຄຳເວົ້າຂອງລຸງໂຮ່ທີ່ວ່າ: ປະເທດຫວຽດນາມ ເປັນອັນໜຶ່ງອັນດຽວ, ຊົນຊາດຫວຽດນາມ ເປັນອັນໜຶ່ງອັນດຽວ. ເຖິງວ່າພູຈະຖືກເຊາະເຈື່ອນ, ແມ່ນ້ຳລຳເຊຈະເຫືອດແຫ້ງ ແຕ່ສັດຈະທຳນັ້ນ ບໍ່ມີຍາມໃດປ່ຽນແປງ, ແລະ ສິ່ງນີ້ໄດ້ຮັບຄວາມເຫັນພ້ອມຈາກພໍ່ແມ່ປະຊາຊົນເປັນຈຳນວນຫຼາຍ.
ໂດຍສະແດງຄວາມເຊື່ອໝັ້ນຕໍ່ການພັດທະນາຢ່າງເຂັ້ມແຂງ ແລະ ອະນາຄົດທີ່ດີກວ່າຂອງປະເທດຊາດໃນໄລຍະຈະມາເຖິງ, ບັນດາຜູ້ແທນໄດ້ຍົກອອກຫຼາຍຂໍ້ສະເໜີແນະ, ຂໍ້ສະເໜີຕໍ່ການນຳຂອງພັກ, ລັດ, ບັນດາກະຊວງ, ຂະແໜງການ, ພິເສດແມ່ນການແກ້ໄຂບັນດາບັນຫາກ່ຽວກັບລະບຽບການລົງທຶນ ແລະ ສ້າງເງື່ອນໄຂທີ່ດີໃຫ້ຊາວຫວຽດນາມ ອາໄສຢູ່ຕ່າງປະເທດກັບຄືນສູ່ປະເທດຊາດ, ປະກອບສ່ວນສ້າງສາ ແລະ ພັດທະນາປະເທດຊາດ...
ຕາງໜ້າການນໍາພັກ, ລັດ, ທ່ານນາຍົກລັດຖະມົນຕີ ຟ້າມມິງຈິງ ໄດ້ສົ່ງຄຳຢື້ຢາມຖາມຂ່າວ, ຄຳອວຍພອນອັນປະເສີດເຖິງບັນດາຜູ້ແທນທີ່ເຂົ້າຮ່ວມກອງປະຊຸມ; ຂອບໃຈທີ່ສະຫຼະເວລາ ແລະ ການເຮັດວຽກເພື່ອມາເຂົ້າຮ່ວມງານທີ່ອົບອຸ່ນນີ້; ສະແດງຄວາມເຫັນອົກເຫັນໃຈຕໍ່ຄວາມຫຍຸ້ງຍາກ ແລະ ຄວາມເສຍຫາຍຂອງປະຊາຊົນໃນໄລຍະ 2 ປີທີ່ຜ່ານມາ ເມື່ອພະຍາດໂຄວິດ-19 ລະບາດ.
ທ່ານນາຍົກລັດຖະມົນຕີຊີ້ແຈ້ງວ່າ, ໂລກລະບາດຍິ່ງໄດ້ຢືນຢັນມູນເຊື້ອຂອງຊາວຫວຽດນາມທີ່ວ່າ ຍິ່ງມີຄວາມຫຍຸ້ງຍາກ, ຍິ່ງມີຄວາມທ້າທາຍ ກໍ່ຍິ່ງມີຄວາມຕັດສິນໃຈ, ຄວາມມານະພະຍາຍາມ, ຄວາມສາມັກຄີ, ຄວາມເປັນເອກະພາບ, ດັ່ງຄຳເວົ້າຂອງປະທານ ໂຮ່ຈີມິນ ທີ່ວ່າ “ປະເທດຫວຽດນາມ ເປັນອັນໜຶ່ງອັນດຽວ, ຊົນຊາດຫວຽດນາມ ເປັນອັນໜຶ່ງອັນດຽວ. ເຖິງວ່າພູຈະຖືກເຊາະເຈື່ອນ, ແມ່ນ້ຳລຳເຊຈະເຫືອດແຫ້ງ ແຕ່ສັດຈະທຳນັ້ນ ບໍ່ມີຍາມໃດປ່ຽນແປງ” ແລະ ເໝືອນດັ່ງເຖົ້້າແກ່ອາວຸໂສເຄີຍໄດ້ເວົ້າວ່າ: “... ປະຊາຂົນໃນປະເທດຕ້ອງຮັກແພງກັນ”.
ໂດຍສະຫງວນເວລາສ່ວນຫຼາຍໃຫ້ແກ່ການວິເຄາະສະຖານະການໂລກ, ທ່ານນາຍົກລັດຖະມົນຕີໄດ້ກ່າວຫວນຄືນບັນດາບັນຫາທົ່ວໂລກເຊັ່ນ: ການແຜ່ລະບາດຂອງພະຍາດ, ການປະທະກັນ, ການແກ່ງແຍ່ງຍຸດທະສາດ, ການປ່ຽນແປງຂອງດິນຟ້າອາກາດ, ການເຫືອດແຫ້ງຂອງຊັບພະຍາກອນ, ຄວາມປອດໄພທາງອິນເຕີເນັດ, ປະຊາກອນທີ່ມີອາຍຸສູງເພີ່ມຂຶ້ນຫຼາຍ, ດ້ານລົບຂອງວິວັດການອຸດສາຫະກຳຄັ້ງທີ 4… ໂລກມີການຜັນແປແບບໃຫມ່, ໄວ ແລະ ຍາກທີ່ຈະຄາດຄະເນໄດ້, ແຕ່ມີຜົນກະທົບຢ່າງໃຫຍ່ຫຼວງ. ໃນສະພາບການນັ້ນ, ຕ້ອງມີຈິນຕະນາການທີ່ເໝາະສົມ, ເພາະວ່າຈິນຕະນາການແບບບຸກທະລຸຈະສ້າງແຫຼ່ງຊັບພະຍາກອນໃໝ່.
ທ່ານນາຍົກລັດຖະມົນຕີກ່າວວ່າ: “ອາດເວົ້າໄດ້ວ່າ ທົ່ວໂລກມີສັນຕິພາບ, ສະພາບການບາງເຂດຍັງມີສົງຄາມຢູ່; ໂດຍທົ່ວໄປແລ້ວ ແມ່ນມີການປານີປານອມ ປອງດອງ, ສະພາບການຢູ່ບາງເຂດກໍຍັງມີຄວາມເຄັ່ງຕຶງ; ໂດຍທົ່ວໄປກໍມີຄວາມໝັ້ນຄົງ, ຢູ່ບາງເຂດກໍຍັງມີການປະທະກັນຢູ່". ບັນດາບັນຫາທົ່ວໂລກຮຽກຮ້ອງໃຫ້ມີວິທີການສຳຜັດທົ່ວໂລກ, ການຮ່ວມມືສາກົນ, ຍົກສູງລັດທິຫຼາຍຝ່າຍ. ໃນໄລຍະໂລກລະບາດ, ຫວຽດນາມ ໄດ້ຮັບການສະໜັບສະໜູນ ແລະ ໜູນຊ່ວຍຂອງເພື່ອນມິດ ແລະ ບັນດາຄູ່ຮ່ວມມືສາກົນຄື ອາເມລິກາ, ໃນນັ້ນມີການປະກອບສ່ວນຂອງຊາວ ຫວຽດນາມ ຢູ່ຕ່າງປະເທດ.
ທ່ານນາຍົກລັດຖະມົນຕີ ກໍ່ໄດ້ແບ່ງເວລາຫຼາຍໃຫ້ແກ່ການວິເຄາະບັນດາການກຳນົດທິດ, ເປົ້າໝາຍ, ວິທີການແກ້ໄຂ ແລະ ຜົນງານແຫ່ງການພັດທະນາຂອງປະເທດຊາດພາຍຫຼັງ 35 ປີແຫ່ງການປ່ຽນແປງໃໝ່. ຫວຽດນາມ ບັນລຸໄດ້ບັນດາຜົນງານອັນໃຫຍ່ຫຼວງທີ່ມີຄວາມໝາຍປະຫວັດສາດ, ຄືດັ່ງທ່ານເລຂາທິການໃຫຍ່ ຫງວຽນຟູ໋ຈ້ອງ ກ່າວວ່າ: “ປະເທດຊາດ ບໍ່ມີຍາມໃດ ມີໂອກາດ, ກຳລັງຄວາມສາມາດ, ທີ່ຕັ້ງບົດບາດ ແລະ ອິດທິພົນຊື່ສຽງຄືໃນປັດຈຸບັນ”.
ກ່ຽວກັບການພົວພັນຕ່າງປະເທດ, ທ່ານນາຍົກລັດຖະມົນຕີ ຟ້າມບິ່ງມິງ ຊີ້ແຈ້ງວ່າ: ໃນໂລກທີ່ເຕັມໄປດ້ວຍການຜັນແປ, ການແກ່ງແຍ່ງຍຸດທະສາດ ແລະ ມີຫຼາຍທາງເລືອກ, ຫວຽດນາມ ບໍ່ເລືອກຝ່າຍ ແຕ່ເລືອກເອົາຄວາມຊອບທຳ, ຄວາມຍຸຕິທຳບົນພື້ນຖານບັນດາຫຼັກການຂອງກົດໝາຍສາກົນ, ກົດບັດຂອງສະຫະປະຊາຊາດ; ຄວາມສະເຫມີພາບ, ຕ່າງຝ່າຍຕ່າງມີຜົນປະໂຫຍດ, ພ້ອມກັນຮັບໄຊຊະນະ. ຫວຽດນາມ ກໍ່ໄດ້ກໍ່ສ້າງພື້ນຖານເສດຖະກິດເອກະລາດ ແລະ ເປັນເຈົ້າຕົນເອງ ຕິດພັນກັບຄວາມຕັ້ງໜ້າ, ເປັນເຈົ້າການໃນການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ ແລະ ມີປະສິດທິຜົນ.
ເມື່ອກ່າວກ່ຽວກັບການພົວພັນຫວຽດນາມ - ອາເມລິກາ, ທ່ານນາຍົກລັດຖະມົນຕີ ໄດ້ຫວນຄືນຈົດໝາຍຂອງປະທານ ໂຮ່ຈີມິນ ປີ 1946 ສົ່ງເຖິງປະທານາທິບໍດີ Harry S. Truman ພາຍຫຼັງ ຫວຽດນາມ ໄດ້ຮັບເອກະລາດ ດ້ວຍຄຳສະເໜີສ້າງຕັ້ງການພົວພັນທາງການທູດ, ກຽມພ້ອມທີ່ຈະເປີດປະຕູຮັບການພົວພັນກັບ ອາເມລິກາ, ກັບໂລກ. ການພົວພັນລະຫວ່າງສອງປະເທດໄດ້ຜ່ານໄລຍະຕ່າງໆ ແລະ ບາດກ້າວບຸກທະລຸ, ປີ 1995, ການພົວພັນສອງປະເທດໄດ້ຫັນເປັນປົກກະຕິ; ປີ 2000, ສອງປະເທດໄດ້ເຊັນສັນຍາການຄ້າ; ໃນປີ 2013 ສ້າງຕັ້ງການພົວພັນຄູ່ຮ່ວມມືຮອບດ້ານ.
ຖະແຫຼງການວິໄສທັດຮ່ວມໃນໄລຍະຢ້ຽມຢາມອາເມລິກາຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ໃນປີ 2015 ໄດ້ຢືນຢັນວ່າ 2 ຝ່າຍເຄົາລົບ “ລະບອບລະບຽບການທາງການເມືອງ, ເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ” ອາເມລິກາຍາມໃດສະໜັບສະໜູນຫວຽດນາມຢ່າງແຮງ, ເປັນເອກະລາດ ແລະ ຈະເລີນຮຸ່ງເຮືອງ.
ການຢ້ຽມຢາມຄັ້ງນີ້ຂອງຄະນະຜູ້ແທນຫວຽດນາມ ສືບຕໍ່ໄດ້ຮັບການປັບປຸງ, ນຳການພົວພັນລະຫວ່າງສອງປະເທດໃຫ້ສືບຕໍ່ພັດທະນານັບມື້ນັບແທດຈິງ ແລະ ມີປະສິດທິຜົນກວ່າອີກ, ເພື່ອຜົນປະໂຫຍດຂອງປະຊາຊົນສອງປະເທດ, ປະກອບສ່ວນຮັກສາສັນຕິພາບ, ສະຖຽນລະພາບ, ການຮ່ວມມື, ພັດທະນາ ແລະ ວັດທະນາຖາວອນຢູ່ພາກພື້ນ ແລະ ໃນໂລກ. ຄຽງຂ້າງນັ້ນ, ການພົວພັນອາເມລິກາ - ອາຊຽນ ກໍ່ພັດທະນາຢ່າງດີງາມເມື່ອບັນດາຝ່າຍລ້ວນແຕ່ໃຫ້ຄຳໝັ້ນສັນຍາຍົກສູງການພົວພັນເປັນຄູ່ຮ່ວມມືຍຸດທະສາດຮອບດ້ານ.
ທ່ານນາຍົກລັດຖະມົນຕີ ໄດ້ຮັບຮູ້ ແລະ ຕີລາຄາສູງບັນດາການປະກອບສ່ວນຂອງຊາວຫວຽດນາມຢູ່ຕ່າງປະເທດ ເວົ້າລວມ ແລະ ຊາວຫວຽດນາມ ຢູ່ອາເມລິກາ ເວົ້າສະເພາະ ໃນບັນດາຜົນງານລວມຂອງປະເທດຊາດ ແລະ ການພົວພັນຫວຽດນາມ - ອາເມລິກາ.
ທ່ານນາຍົກລັດຖະມົນຕີ ໄດ້ຕີລາຄາສູງບັນດາປະຊາຄົມວິສາຫະກິດຫວຽດນາມ ຢູ່ຕ່າງປະເທດ ທີ່ນັບມື້ນັບປະກອບສ່ວນຢ່າງຕັ້ງໜ້າເຂົ້າໃນການພັດທະນາພື້ນຖານເສດຖະກິດຂອງຫວຽດນາມ ແລະ ເພີ່ມທະວີການລົງທຶນເຂົ້າຕະຫຼາດ ຫວຽດນາມ. ປະຈຸບັນ, ບັນດາວິສາຫະກິດຫວຽດນາມ ຢູ່ຕ່າງປະເທດພວມລົງທຶນເຂົ້າໃນ 376 ໂຄງການລົງທຶນຈາກຕ່າງປະເທດ (FDI) ດ້ວຍຍອດຈຳນວນທຶນຈົດທະບຽນ 1,72 ຕື້ USD. ສະເລ່ຍແລ້ວ, ການສົ່ງເງິນເຂົ້າຫວຽດນາມໃນແຕ່ລະປີບັນລຸກວ່າ 10 ຕື້ USD, ໃນປີ 2021 ບັນລຸ 12,5 ຕື້ USD. ນີ້ແມ່ນແຫຼ່ງທຶນອັນໃຫຍ່ຫຼວງເພື່ອຮັບໃຊ້ໃຫ້ແກ່ການພັດທະນາເສດຖະກິດ - ສັງຄົມຂອງຫວຽດນາມ.
ທ່ານນາຍົກລັດຖະມົນຕີເນັ້ນໜັກວ່າ ພັກ ແລະ ລັດ ຍາມໃດກໍຖືຊາວຫວຽດນາມຢູ່ຕ່າງປະເທດແມ່ນພາກສ່ວນສຳຄັນ ແລະ ບໍ່ອາດຂາດໄດ້, ເປັນກຳລັງຊຸກຍູ້ການພັດທະນາຂອງປະເທດຊາດ, ສະແດງໃຫ້ເຫັນໃນມະຕິເລກທີ 36, ຄຳສັ່ງເລກທີ 45 ແລະ ຫວ່າງມໍ່ໆມານີ້ແມ່ນຂໍ້ສະຫຼຸບເລກທີ 12 ຂອງກົມການເມືອງກ່ຽວກັບວຽກງານສຳລັບຊາວຫວຽດນາມຢູ່ຕ່າງປະເທດ, ເຊິ່ງໄດ້ຫັນເປັນລະບອບລະບຽບການດ້ວຍບັນດາຂໍ້ກຳນົດຂອງກົດໝາຍ.
ທ່ານນາຍົກລັດຖະມົນຕີ ເນັ້ນໜັກເຖິງຄວາມຕ້ອງການໃນການເສີມຂະຫຍາຍກຳລັງຄວາມສາມາດ, ຄຸນນະທາດ ແລະ ພູມປັນຍາຂອງຊາວຫວຽດນາມຢູ່ລະດັບສູງ, ເສີມຂະຫຍາຍໃຫ້ດີທີ່ສຸດ ເພື່ອສ້າງປະເທດຊາດ, ບໍ່ຈຳແນກປະຊາຊົນຢູ່ພາຍໃນ ຫຼື ຕ່າງປະເທດ.
ທ່ານນາຍົກລັດຖະມົນຕີ ປາດຖະໜາວ່າ ພໍ່ແມ່ປະຊາຊົນຍາມໃດກໍມີສຸຂະພາບເຂັ້ມແຂງ, ມີຊີວິດການເປັນຢູ່, ເຮັດວຽກ, ຮ່ຳຮຽນເປັນປົກກະຕິ, ທຸລະກິດພັດທະນາ, ຍາມໃດກໍມີຄວາມເອກອ້າງທະນົງໃຈ, ປົກປັກຮັກສາ,ເສີມຂະຫຍາຍ ແລະ ພັດທະນາສີສັນວັດທະນະທຳຫວຽດນາມ, ອວ່າຍໜ້າເມືອຫາບ້ານເກີດເມືອງນອນ, ປະເທດຊາດ.
ທ່ານນາຍົກລັດຖະມົນຕີຮຽກຮ້ອງໃຫ້ບັນດາອົງການຜູ້ຕາງໜ້າການທູດສືບຕໍ່ເບິ່ງແຍງຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ; ທ່ານກ່າວວ່າ: ທີ່ການພົບປະກັບການນຳຕ່າງປະເທດທຸກຄັ້ງ, ທ່ານກໍ່ລ້ວນແຕ່ສະເໜີໃຫ້ມີຄວາມເອົາໃຈໃສ່ ແລະ ສ້າງທຸກເງື່ອນໄຂສະດວກໃຫ້ປະຊາຄົມຊາວ ຫວຽດນາມ ດຳລົງຊີວິດ, ຮ່ຳຮຽນ ແລະ ເຮັດວຽກ.
ທ່ານນາຍົກລັດຖະມົນຕີ ມອບໃຫ້ບັນດາອົງການແກ້ໄຂບັນດາຂໍ້ສະເໜີຂອງປະຊາຊົນຕາມຂໍ້ກຳນົດດ້ວຍລະບຽບການບໍລິຫານໂດຍໄວ, ຫຼີກລ້ຽງປະກົດການຫຍໍ້ທໍ້; ຄົ້ນຄວ້າ, ຮັບຟັງ, ຮັບເອົາບັນດາຄວາມຄິດເຫັນທີ່ສົມເຫດສົມຜົນເພື່ອມີການແກ້ໄຂຢ່າງເໝາະສົມ; ໃນເລື່ອງທີ່ນອກເໜືອສິດຂອງຕົນ ແມ່ນຕ້ອງຮວບຮວມ ແລະ ສະເໜີໃຫ້ເຈົ້າໜ້າທີ່ທີ່ມີສິດອຳນາດພິຈາລະນາ ແລະ ຕັດສິນ.
ບຸນຄົງ
