 |
ອາຊຽນ ລາຍງານຄວາມຄືບໜ້າການບໍລິການດ້ານການເງິນ
ກອງປະຊຸມຄັ້ງນີ້ ໄດ້ປຶກສາຫາລື ແລະ ລາຍງານຄວາມຄືບໜ້າ ການຈັດຕັ້ງປະຕິບັດແຜນງານການເຂົ້າເຖິງການບໍລິການດ້ານການເງິນ ຂອງປະເທດສະມາຊິກອາຊຽນ ການແລກປ່ຽນປະສົບການຮ່ວມກັນໃນຂົງເຂດອາຊຽນ.
ທ່ານນາງ ວັດທະນາ ດາລາລອຍ ກ່າວວ່າ: ການເຂົ້າເຖິງການບໍລິການທາງດ້ານການເງິນ ແມ່ນປັດໄຈສຳຄັນໃນການພັດທະນາເສດຖະກິດ-ສັງຄົມ ນອກນີ້ ຍັງເປັນປັດໄຈສຳຄັນໃນການສົ່ງເສີມ 9 ໃນ 17 ເປົ້າໝາຍການພັດທະນາແບບຍືນຍົງ (SDGs) ລັດຖະບານແຫ່ງ ສປປ ລາວ ໄດ້ກຳນົດ SDG 17+1 ໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມຂອງ ສປປ ລາວ ແລະ ໄດ້ສ້າງແຜນງານການຮ່ວມມືລະຫວ່າງລັດຖະບານ ເພື່ອກຳນົດໜ້າວຽກວັດແທກຄວາມຄືບໜ້າ ໃນການບັນລຸເປົ້າໝາຍດັ່ງກ່າວ ທະນາຄານແຫ່ງ ສປປ ລາວ ມີບົດບາດສຳຄັນໃນການຈັດຕັ້ງປະຕິບັດ SDG ຂໍ້ທີ 1 8 9 10 ແລະ 17 ນອກນີ້ ຍັງໄດ້ເປັນເຈົ້າການສ້າງແຜນດຳເນີນງານການເຂົ້າເຖິງການບໍລິການດ້ານການເງິນຂອງ ສປປ ລາວ ສົກປີ 2018-2025 ເຊິ່ງຄາດວ່າຈະຖືກຮັບຮອງໂດຍທ່ານຜູ້ວ່າການທະນາຄານແຫ່ງ ສປປ ລາວ ໃນໄຕມາດທີ 3 ແຜນດຳເນີນງານສະບັບນີ້ໄດ້ກຳນົດບັນດາໜ້າວຽກບຸລິ ມະສິດທີ່ຈຳເປັນໃນການສົ່ງເສີມສະພາບແວດລ້ອມການເຂົ້າເຖິງການບໍລິການດ້ານການເງິນໃນ ສປປ ລາວ ໂດຍໄດ້ກຳນົດວິໄສທັດ ເພື່ອປັບປຸງຊີວິດການເປັນຢູ່ຂອງຄົວເຮືອນໃຫ້ດີຂຶ້ນ ສົ່ງເສີມການຂະຫຍາຍຕົວຂອງເສດຖະກິດແຫ່ງຊາດ ຫຼຸດຈຳນວນຜູ້ບໍ່ເຂົ້າເຖິງການບໍລິການດ້ານການເງິນ ແລະ ເພີ່ມຄວາມເລິກເຊິ່ງໃນການເຂົ້າເຖິງການບໍລິການດ້ານການເງິນ.
ຄະນະກຳມະການສົ່ງເສີມການເຂົ້າເຖິງການບໍລິການດ້ານການເງິນອາຊຽນ ສ້າງຕັ້ງຂຶ້ນໃນກອງປະຊຸມລັດຖະມົນຕີກະຊວງການເງິນ ແລະ ຜູ້ວ່າການທະນາຄານກາງອາຊຽນ ໃນເດືອນ ເມສາ 2016 ຢູ່ນະຄອນຫຼວງວຽງຈັນ ໂດຍມີເປົ້າໝາຍສົ່ງເສີມການລິເລີ່ມພັດທະນາການເຂົ້າເຖິງການບໍລິການດ້ານການເງິນໃນອາຊຽນ ແຜນງານຂອງຄະນະດັ່ງກ່າວໄດ້ຮັບການຮັບຮອງປີ 2016 ໂດຍປະກອບມີ 4 ເປົ້າໝາຍສຳຄັນຄື: ຫຼຸດຈຳນວນການບໍ່ເຂົ້າເຖິງການບໍລິການດ້ານການເງິນ ສະເລ່ຍຈາກ 44% ເປັນ 30% ເພີ່ມລະດັບໂຄງລ່າງພື້ນຖານດ້ານການເງິນຂອງອາຊຽນຈາກ 70% ເປັນ 85% ເພີ່ມຊ່ອງທາງການເຂົ້າເຖິງການບໍລິການດ້ານການເງິນ ແລະ ຄຸນນະພາບການບໍລິການໃຫ້ເທົ່າທຽມທຸກຂະແໜງ ການ ສົ່ງເສີມການໃຫ້ຄວາມຮູ້ພື້ນຖານດ້ານການເງິນ ແລະ ການປົກປ້ອງຜູ້ຊົມໃຊ້ທາງການເງິນ.
（ແຫຼ່ງຂໍ້ມູນ： vientianemai.net）
