 |
| ການແລກປ່ຽນລະຫວ່າງສອງຝ່າຍ (ພາບ: baoquocte.vn) |
ທ່ານ Sebastian Paust ທີ່ປຶກສາຮັບຜິດຊອບການຮ່ວມມືພັດທະນາ ສະຖານທູດ ເຢຍລະມັນ ປະຈຳ ຮ່າໂນ້ຍ, ທ່ານນາງ Regina Ecker ຜູ້ອຳນວຍການອົງການຮ່ວມມືພັດທະນາເຢຍລະມັນ (GIZ), ທ່ານນາງ Anette Haller ຜູ້ອຳນວຍການຫ້ອງການ ຮ່າໂນ້ຍ ຂອງ ທະນາຄານພັດທະນາຄືນໃໝ່ ເຢຍລະມັນ (KfW). GIY ແລະ KfW ແມ່ນບັນດາອົງການໂດຍລັດຖະບານ ເຢຍລະມັນມອບສິດປະຕິບັດບັນດາໂຄງການຮ່ວມມືພັດທະນາກັບບັນດາປະເທດ, ໃນນັ້ນມີ ຫວຽດນາມ.
ກ່າວຄຳເຫັນທີ່ກອງປະຊຸມ, ທ່ານຮອງລັດຖະມົນຕີ ການຕ່າງປະເທດ ຫວຽດນາມ ຫວູກວາງມິງ ໄດ້ສະແດງຄວາມຂອບອົກຂອບໃຈ ແລະ ຕີລາຄາສູງແຫຼ່ງທຶນ ODA ທີ່ເຢຍລະມັນໜູນຊ່ວຍໃຫ້ ຫວຽດນາມ ໃນຫຼາຍປີຜ່ານມາ, ປະກອບສ່ວນສຳຄັນໃຫ້ແກ່ວິວັດການພັດທະນາເສດຖະກິດ - ສັງຄົມ ແລະ ການເຊື່ອມໂຍງເຂົ້າກັບສາກົນ ຂອງ ຫວຽດນາມ.
ທ່ານຮອງລັດຖະມົນຕີ ຢັ້ງຢືນວ່າ ຝ່າຍ ຫວຽດນາມ ພ້ອມແລ້ວທີ່ຈະຮັບຟັງບັນດາຄຳເຫັນແບ່ງປັນຂອງຝ່າຍເຢຍລະມັນ ແລະ ມີຄວາມປາດຖະໜາວ່າ ຜ່ານກອງປະຊຸມ, ສອງຝ່າຍຈະປຶກສາຫາລືຢ່າງໂດຍກົງ ແລະ ຊອກຫາບັນດມາດຕະການເພື່ອຍົກສູງການນຳໃຊ້ທຶນ ODA ຂອງ ເຢຍລະມັນຢູ່ຫວຽດນາມ ຢ່າງມີປະສິດທິຜົນກ່ວາອີກ.
ຜູ້ຕາງໜ້າຝ່າຍເຢຍລະມັນ ຢັ້ງຢືນ ຫວຽດນາມ ແມ່ນຄູ່ຮ່ວມມືສຳຄັນຂອງ ເຢຍລະມັນໃນຂົງເຂດຮ່ວມມືພັດທະນາ. ພາຍຫຼັງການຮ່ວມມືມາເປັນເວລາ 30 ປີ, ເຢຍລະມັນໄດ້ສະໜອງທຶນເພື່ອໜູນຊ່ວຍພັດທະນາຢ່າງເປັນທາງການ ກ່ວາ 2 ຕື້ USD ໃຫ້ແກ່ ຫວຽດນາມ.
ບົນພື້ນຖານຕີລາຄາ ຫວຽດນາມ ແມ່ນປະເທດນຳໃຊ້ທຶນ ODA ຂອງເຢຍລະມັນຢ່າງມີປະສິດທິຜົນ, ນັບແຕ່ປີ 2020 ໃນຍຸດທະສາດຮ່ວມມພັດທະນາໃໝ່ຂອງຕົນ, ເຢຍລະມັນໄດ້ກຳນົດວ່າ ຫວຽດນາມ ແມ່ນຄູ່ຮ່ວມມືທົ່ວໂລກ ແລະ ແຜນການເພີ່ມທະວີການຮ່ວມມືສອງປະເທດໃນບັນດາຂົງເຂດບຸລິມະສິດຄື: ພະລັງງານ, ການປົກປັກຮັກສາສິ່ງແວດລ້ອມ ແລະ ການບຳລຸງສ້າງອາຊີບ.
ໃນໄລຍະຈະມາເຖິງ, ລັດຖະບານເຢຍລະມັນພ້ອມແລ້ວທີ່ຈະໜູນຊ່ວຍ ຫວຽດນາມ ໃນການນຳໃຊ້ບັນດາຄຳໝັ້ນສັນຍາທີ່ໄດ້ຍົກອອກມາຢູ່ກອງປະຊຸມບັນດາຝ່າຍເຂົ້າຮ່ວມສົນທິສັນຍາແມ່ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດຄັ້ງທີ 26 (COP 26) ແລະ ໄລຍະຟື້ນຟູເສດຖະກິດພາຍຫຼັງໂລກລະບາດໂຄວິດ - 19.
ບຸນຄົງ
