 |
ໄຂ້ຍຸງລາຍໃນປັດຈຸບັນແມ່ນໄດ້ມີການລະບາດໃນຫຼາຍແຂວງ ໃນນັ້ນ ແຂວງທີ່ມີຈຳນວນຄົນເຈັບສູງກວ່າໝູ່ ແມ່ນນະຄອນຫຼວງວຽງຈັນ ຈຳປາສັກ ສະຫວັນນະເຂດ ສາລະວັນ ແລະ ຄຳມ່ວນ.(ພາບ:vientianemai.net)
ອີງຕາມການລາຍງານຂອງກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ວັນທີ 18 ກໍລະກົດ 2019 ໃຫ້ຮູ້ວ່າ: ສະພາບການເກີດຂຶ້ນຂອງພະຍາດໄຂ້ຍຸງລາຍໃນປັດຈຸບັນຍັງພົບກໍລະນີເກີດຂຶ້ນໃໝ່ ແລະ ກໍລະນີເສຍຊີວິດເພີ່ມຕື່ມ ຄື: ໃນວັນທີ 18 ກໍລະກົດ 2019 ໄດ້ມີກໍລະນີພະຍາດດັ່ງກ່າວເກີດຂຶ້ນໃໝ່ ທັງໝົດ 374 ກໍລະນີ ແລະ ເສຍຊີວິດຈຳນວນ 1 ຄົນ ກໍລະນີເສຍຊີວິດນີ້ໄດ້ເກີດຂຶ້ນຢູ່ແຂວງຄຳມ່ວນ ມາຮອດປັດຈຸບັນທົ່ວປະເທດມີຄົນເຈັບພະຍາດດັ່ງກ່າວສະສົມ 15.107 ກໍລະນີ ເສຍຊີວິດ 33 ກໍລະນີ ໃນນັ້ນ ນວ ມີ 3.095 ກໍລະນີ ເສຍຊີວິດ 7 ຄົນ ຈຳປາສັກ 2.287 ກໍລະນີ ເສຍຊີວິດ 5 ຄົນ ສະຫວັນນະເຂດ 2.518 ກໍລະນີ ເສຍຊີວິດ 10 ຄົນ ສາລະວັນ 2.002 ກໍລະນີ ເສຍຊີວິດ 3 ຄົນ ຄຳມ່ວນ 1.613 ກໍລະນີ ເສຍຊີວິດ 4 ຄົນ ອັດຕະປື 854 ກໍລະນີ ເສຍຊີວິດ 1 ຄົນ ບໍລິຄຳໄຊ 634 ກໍລະນີ ເສຍຊີວິດ 2 ຄົນ ຫຼວງນ້ຳທາ 400 ກໍລະນີ ແຂວງວຽງຈັນ 359 ກໍລະນີ ເຊກອງ 268 ກໍລະນີ ໄຊຍະບູລີ 277 ກໍລະນີ ເສຍຊີວິດ 1 ຄົນ ຫຼວງພະບາງ 162 ກໍລະນີ ໄຊສົມບູນ 181 ກໍລະນີ ອຸດົມໄຊ 26 ກໍລະນີ ບໍ່ແກ້ວ 15 ກໍລະນີ ຊຽງຂວາງ 15 ກໍລະນີ ຜົ້ງສາລີ 1 ກໍລະນີ ສ່ວນແຂວງຫົວພັນຍັງບໍ່ພົບກໍລະນີ.
 |
ເພີ່ມທະວີ ທໍາລາຍແຫລ່ງເພາະພັນຍຸງລາຍ ປ້ອງກັນໄຂ້ເລືອດອອກ.(ພາບ:ຂປລ)
ການກຳຈັດ ແລະ ທຳລາຍ ແຫລ່ງເພາະພັນ ໜອນນ້ຳຍຸງລາຍ ທີ່ເປັນພາຫະນຳເຊື້ອ ພາໃຫ້ເກີດ ເປັນພະຍາດ ໄຂ້ເລືອດອອກ ຫລື ໄຂຍຸງລາຍ ເປັນວຽກງານໜຶ່ງທີ່ສຳຄັນ ທີ່ຈະຕ້ອງໄດ້ຈັດຕັ້ງປະຕິບັດ ໃຫ້ເປັນປະຈຳທຸກອາທິດ ແນໃສ່ເຮັດໃຫ້ ການລະບາດຂອງພະຍາດໄຂ້ຍຸງລາຍໃຫ້ຫລຸດລົງ ເທື່ອລະກ້າວ. ການທຳລາຍແຫລ່ງ ເພາະພັນ ໜອນນ້ຳຍຸງລາຍ ບໍ່ພຽງແຕ່ ແມ່ນໜ້າທີ່ ຂອງສຳນັກງານ, ອົງການໃດໜຶ່ງເທົ່ານັ້ນ, ແຕ່ຍັງເປັນໜ້າທີ່ ຂອງໝົດທຸກຄົນໃນທົ່ວສັງຄົມ ທີ່ຈະຕ້ອງໄດ້ພ້ອມກັນເອົາໃຈໃສ່ ກຳຈັດ ແລະ ທຳລາຍໃຫ້ໝົດໄປ ໂດຍການອະນາໄມສິ່ງແວດລ້ອມອ້ອມເຮືອນ ບໍ່ໃຫ້ມີນ້ຳຂັງຢູ່ຕາມກະໂປະ, ກະປອງ, ຢາງຕີນລົດ ແລະ ອື່ນໆ ກໍຄື ເພີ່ມທະວີຈັດຕັ້ງປະຕິບັດຫລັກການ 5 ປ ຂອງກະ ຊວງສາທາລະນະສຸກ ວາງອອກຢ່າງເຄັ່ງຄັດ ຄື: ປ ປິດ (ປົກປິດພາສະນະທີ່ກັກເກັບນ້ຳທັງໃນ ແລະ ນອກເຮືອນບໍ່ໃຫ້ຍຸງລາຍມາໄຂ່ໃສ່), ປ ປ່ຽນ (ປ່ຽນນ້ຳໃນພາສະນະທີ່ກັກເກັບນ້ຳ ເຊັ່ນເຕົ້າດອກໄມ້, ນ້ຳຮອງຕີນຕູ້ ແລະ ອື່ນໆ), ປ ປ່ອຍ (ປ່ອຍປາຫາງຍົກຍຸງກິນໜອນນ້ຳ), ປ ປັບປຸງ (ປັບປຸງສິ່ງແວດລ້ອມອ້ອມ ເຮືອນໃຫ້ສະອາດເປັນປະຈຳທຸກອາທິດ) ແລະ ປ ປະຕິບັດ ໃຫ້ເປັນນິໃສທຸກອາທິດ.
（ໄຊພອນ）
