ອີງຕາມການລາຍງານຂອງກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃຫ້ຮູ້ເມື່ອບໍ່ດົນມານີ້ວ່າ: ນັບແຕ່ວັນທີ 29 ທັນວາ 2018 ຫາ ວັນທີ 8 ກໍລະກົດ 2019 ມີຄົນເຈັບທີ່ເປັນໄຂ້ຍຸງລາຍສະສົມ 12.212 ກໍລະນີ ເສຍຊີວິດ 28 ຄົນ ໃນນີ້ ແຂວງຈຳປາສັກ 2.516 ກໍລະນີ ເສຍຊີວິດ 5 ຄົນ ນະຄອນຫຼວງວຽງຈັນ 2.233 ກໍລະນີ ເສຍຊີວິດ 6 ຄົນ ສະຫວັນນະເຂດ 2.078 ກໍລະນີ ເສຍຊີວິດ 10 ຄົນ ສາລະວັນ 1.563 ຄົນ ເສຍຊີວິດ 3 ຄົນ ຄຳມ່ວນ 1.278 ກໍລະນີ ເສຍຊີວິດ 2 ຄົນ ອັດຕະປື 777 ກໍລະນີ ບໍລິຄຳໄຊ 487 ກໍລະນີ ເສຍຊີວິດ 2 ຄົນ ຫຼວງນ້ຳທາ 345 ກໍລະນີ ວຽງຈັນ 327 ກໍລະນີ ເຊກອງ 212 ກໍລະນີ ໄຊຍະບູລີ 211 ກໍລະນີ ຫຼວງພະບາງ 98 ກໍລະນີ ໄຊສົມບູນ 58 ກໍລະນີ ອຸດົມໄຊ 12 ກໍລະນີ ບໍ່ແກ້ວ 9 ກໍລະນີ ຊຽງຂວາງ 8 ກໍລະນີ ສ່ວນຜົ້ງສາລີ ຫົວພັນ ແມ່ນບໍ່ພົບກໍລະນີ.
 |
ແຕ່ຕົ້ນເດືອນມັງກອນເຖິງປັດຈຸບັນ ທົ່ວປະເທດມີຜູ້ເປັນໄຂ້ຍຸງລາຍ 10.778 ກໍລະນີ ເສຍຊີວິດ 25 ກໍລະນີ
ທ່ານນາງ ຄຳຫຼ້າ ຈູມລີວົງ ຮອງອຳນວຍການໂຮງໝໍເສດຖາທິຣາດ ໃຫ້ສຳພາດວັນທີ 4 ກໍລະກົດ 2019 ວ່າ: ພະຍາດໄຂ້ຍຸງລາຍເປັນສາເຫດໜຶ່ງຂອງການເຈັບເປັນ ແລະ ການຕາຍໃນເດັກ ຄົນເຈັບທີ່ເປັນໄຂ້ຍຸງລາຍຮ້າຍແຮງສາມາດເປັນຊັອກ ຫຼື ມີອາການເລືອດອອກຮ້າຍແຮງ ພາໃຫ້ເສຍຊີວິດຢ່າງໄວວາ ຖ້າບໍ່ໄດ້ຮັບການປິ່ນປົວຢ່າງຖືກຕ້ອງ ແລະ ທັນເວລາ ປັດຈຸບັນ ພະຍາດດັ່ງກ່າວສາມາດພົບເຫັນໃນຜູ້ໃຫຍ່ເຊັ່ນດຽວກັນ ເຊິ່ງປີ 2019 ໂດຍອີງໃສ່ສະຖິຕິຕົວເລກສະສົມທົ່ວປະເທດ (ຂໍ້ມູນຈາກສູນວິເຄາະລະບາດວິທະຍາແຫ່ງຊາດຂອງກະຊວງສາທາລະນະສຸກ) ແຕ່ຕົ້ນເດືອນມັງກອນເຖິງປັດຈຸບັນ ທົ່ວປະເທດມີຜູ້ເປັນໄຂ້ຍຸງລາຍ 10.778 ກໍລະນີ ເສຍຊີວິດ 25 ກໍລະນີ ໃນນີ້ ສະເພາະຢູ່ນະຄອນຫຼວງວຽງຈັນ 6 ເດືອນຕົ້ນປີ ມີຕົວເລກສະສົມທັງໝົດ 1.978 ກໍລະນີ ເສຍຊີວິດ 6 ກໍລະນີ.
 |
ຕໍ່ກັບກໍລະນີທີ່ເສຍຊີວິດ ສ່ວນໃຫຍ່ແມ່ນຄົນເຈັບທີ່ເປັນໄຂ້ຊື້ຢາມາກິນເອງ ເມື່ອອາການບໍ່ດີຂຶ້ນ ຫຼື ຮຸນແຮງຈຶ່ງໄປຮັບການຮັກສາຢູ່ໂຮງໝໍ ຈຶ່ງເຮັດໃຫ້ໄດ້ຮັບການຮັກສາບໍ່ທ່ວງທັນ ກໍ່ໃຫ້ເກີດການເສຍຊີວິດເພີ່ມຂຶ້ນ ດັ່ງນັ້ນ ເພື່ອຫຼີກລ່ຽງການເສຍຊີວິດ ເມື່ອເປັນໄຂ້ຄວນໄປພົບແພດທັນທີ ເພື່ອຮັບການປິ່ນປົວຢ່າງຖືກຕ້ອງ ແລະ ທັນການ ປ້ອງກັນການເສຍຊີວິດ ຍ້ອນພະຍາດດັ່ງກ່າວ ແລະ ສິ່ງສຳຄັນທີ່ທຸກຄົນຕ້ອງປະຕິບັດເພື່ອປ້ອງກັນພະຍາດນີ້ ບໍ່ໃຫ້ເກີດຂຶ້ນກັບຕົວທ່ານ ແລະ ຄອບຄົວນັ້ນທຸກຄອບຄົວ ກໍຄື ທຸກຄົນຕ້ອງເປັນເຈົ້າການລົງມືທຳລາຍແຫຼ່ງເພາະພັນໜອນຍຸງ ແລະ ອະນາໄມສິ່ງແວດອ້ອມເຮືອນດ້ວຍຕົນເອງເປັນປະຈຳທຸກໆອາທິດ ແລະ ປ້ອງກັນບໍ່ໃຫ້ຍຸງລາຍກັດ ດ້ວຍການນອນໃນມຸ້ງ ຢາທາກັນຍຸງ ນຸ່ງເຄື່ອງຍາວ ຢູ່ທີ່ໂລ່ງແຈ້ງເພື່ອບໍ່ໃຫ້ຍຸງລາຍກັດ ພ້ອມນັ້ນ ອຳນາດການປົກຄອງທ້ອງຖິ່ນຕ້ອງເປັນເຈົ້າການ ໃນການລົງຕິດຕາມຄວາມໜາແໜ້ນຂອງໜອນຍຸງ ຖ້າຈຸດໃດມີໜອນຍຸງ ກໍຕ້ອງນຳພາປະຊາຊົນສ້າງຂະບວນການອະນາໄມເປັນປະຈຳຈົນໜອນຍຸງ ແລະ ຍຸງລາຍຈະໝົດໄປ. ເພື່ອປິ່ນປົວໃຫ້ທັນການຜູ້ທີ່ມີອາການໄຂ້ບໍ່ໃຫ້ຊື້ຢາກິນເອງໃຫ້ມາໂຮງໝໍ ເພື່ອຮັບການປິ່ນປົວຢ່າງຖືກຕ້ອງ ພ້ອມນັ້ນ ເພື່ອປ້ອງກັນບໍ່ໃຫ້ເກີດໄຂ້ຍຸງລາຍພະຍາບານຢູ່ໃນໂຮງໝໍ ໄດ້ເຮັດໜ້າທີ່ສຸຂະສຶກສາຜູ້ທີ່ມາເຝົ້າຄົນເຈັບນອນຢູ່ໂຮງໝໍ ແລະ ປຸກລະດົມທົ່ວສັງຄົມໃຫ້ມີສ່ວນຮ່ວມປະຕິບັດ 5 ປ ຕື່ມອີກ.
（ຄຳຮຸ່ງ）
