 |
ອົງການຈັດຕັ້ງສາກົນ ໄດ້ລົງໄປຢ້ຽມຍາມການປະຕິບັດວຽກງານຂອງ ເຈົ້າ ໜ້າທີ່ລາວຢູ່ທີ່ດ່ານສາກົນຂົວມິດຕະພາບ ລາວ-ໄທ ແຫ່ງທີ່ໜຶ່ງ. (ພາບ: Lao's Army News)
ທ່ານ Jean-Bernard Carrasco, ເອກອັກ ຄະລັດຖະທູດອົດສະຕຣາລີ ປະຈໍາ ສປປ ລາວ ໄດ້ກ່າວວ່າ: ໃນຂະນະທີ່ພວກເຮົາສະເຫຼີມສະຫຼອງຄົບຮອບ 25 ປີ ຂອງຂົວມິດຕະພາບແຫ່ງທໍາອິດເຊິ່ງປຽບດັ່ງຂອງຂວັນທີ່ປະເທດອົດສະຕຣາລີມອບໃຫ້ ປະຊາຊົນລາວ ແລະ ປະຊາຊົນ ໄທ. ຂົວແຫ່ງນີ້ແມ່ນໂຄງສ້າງພື້ນຖານທີ່ສຳຄັນ ໃນການເຊື່ອມຕໍ່ປະຊາຊົນ ແລະ ເສດຖະກິດ ຂອງລາວ ແລະ ໄທ ລວມໄປເຖິງພາກພື້ນ, ເພື່ອຊ່ວຍໃຫ້ປະເທດລາວ ທີ່ບໍ່ມີຊາຍແດນຕິດກັບທະເລໄດ້ບັນລຸເປົ້າໝາຍຂອງຕົນ ທີ່ຈະເປັນດິນແດນເຊື່ອມໂຍງໃນອະນາຄົດ.
ນອກຈາກນັ້ນ, ຜູ້ເຂົ້າຮ່ວມໄດ້ເຫັນການເຮັດວຽກຂອງໜ່ວຍງານຄວບຄຸມຫີບສິນຄ້າ ແລະ ການຄວບຄຸມການເຄື່ອນຍ້າຍຂອງສິນຄ້າ ເຊິ່ງໂຄງການຄວບຄຸມຫີບສິນຄ້າລະດັບໂລກນີ້ ແມ່ນເປັນການຮ່ວມມືກັນຂອງ ອົງການ UNODC ແລະ ອົງການພາສີໂລກ ສ້າງຂຶ້ນ, ໜຶ່ງໃນເປົ້າໝາຍການສ້າງຕັ້້ງກໍ່ເພື່ອຢຸດຕິການລັກລອບສິ່ງທີ່ຜິດກົດໝາຍ ໂດຍສະເພາະແມ່ນຢາ ເສບຕິດ. ອີງຕາມຂໍ້ມູນຫຼ້າສຸດຂອງອົງການ UNODC ປີ 2015 ໃຫ້ເຫັນວ່າ: ລາວມີເນື້ອທີ່ທັງໝົດໃນການປູກຝິ່ນ ປະມານ 5,900 ເຮັກຕາ.
ການນໍາໃຊ້ຢາເສບຕິດຍັງມີການເພີ່ມຂຶ້ນ, ສວ່ນໃຫຍ່ແມ່ນຢາປະເພດ opiate, amphetamine, ປະເພດຂອງສານເສບຕິດ ແລະ ສານຕັ້ງຕົ້ນ. ຕໍ່ບັນຫາ ແລະ ສິ່ງທ້າທາຍ ດັ່ງກ່າວໄດ້ສ້າງແຜນແມ່ບົດເພື່ອຄວບຄຸມຢາເສບຕິດຢູ່ ສປປ ລາວໃນໄລຍະປີ 2016 ຫາປີ 2020 ເຊິ່ງໄດ້ກໍານົດບາງຂົງເຂດບູລິມະສິດລວມທັງ ການສ້າງ ແລະ ປັບປຸງເຄື່ອງມືທາງກົດໝາຍທີ່ ກ່ຽວຂ້ອງກັບບັນຫາຢາເສບຕິດ ເຊັ່ນ: ການເກັບກໍາຂໍ້ມູນແລະການວິເຄາະ, ການສຶກສາ, ການຝຶກອົບຮົມ, ການເຜີຍແຜ່ກົດຫມາຍ ແລະ ຜົນສະທ້ອນທາງລົບຈາກການໃຊ້ຢາເສບຕິດ, ການປິນປົວ ແລະ ການຝຶກອົບຮົມດ້ານວິຊາຊີບ ສໍາລັບຜູ້ຕິດຢາເສບຕິດ, ການພັດທະນາ ທາງເລືອກ, ການປ່ຽນແທນການປູກຝິ່ນ, ການບັງຄັບໃຊ້ກົດໝາຍ, ການຄວບຄຸມ ສານຕັ້ງຕົ້ນ, ການວິເຄາະ ແລະ ການທົດສອບການນໍາໃຊ້ຢາເສບຕິດ, ການຮ່ວມມື ລະຫວ່າງປະເທດ ແລະ ປັບປຸງກົງຈັກອົງ ການຈັດຕັ້ງຂອງຄະນະກໍາມະການແຫ່ງຊາດເພື່ອກວດກາ ແລະ ຄວບຄຸມຢາເສບຕິດ ຢູ່ຂັ້ນສູນ ກາງ ແລະ ຂັ້ນທ້ອງຖິ່ນ.
（ໜັງສືພິມວຽງຈັນທາຍ）
