 |
ບັນດາສະມາຊິກ ສະພາແຫ່ງຊາດ (ສສຊ) ໄດ້ພ້ອມກັນສືບຕໍ່ສຸມໃສ່ປະກອບຄຳຄິດຄຳເຫັນໃສ່ບົດລາຍງານການເມືອງຂອງລັດຖະບານ ໂດຍ ໄດ້ເໜີໃຫ້ລັດຖະບານ ກໍຄື ບັນດາກະຊວງກ່ຽວຂ້ອງແກ້ໄຂບາງບັນຫາ ໂດຍສະເພາະແມ່ນການຜະລິດເຂົ້ານາແຊງຍັງບໍ່ທັນສອດຄ່ອງ, ການປັບປຸງ-ກໍ່ສ້າງ ລະບົບ ຊົນລະປະທານ ຍັງບໍ່ທັນສອດຄ່ອງກັບ ນະໂຍບາຍວາງອອກ, ການສົ່ງອອກ-ນຳເຂົ້າໄຟຟ້າ ຄວນແຈ້ງ ຕົວເລກໃຫ້ລະອຽດເພາະການນໍາເຂົ້າກະແສໄຟຟ້າຂອງປະເທດລາວຍັງມີຫລາຍຢູ່, ບັນຫາປ້າຍລົດງາມທີ່ມີລາຄາແພງ ແລະ ການພັດທະນາການທ່ອງທ່ຽວ. ພ້ອມນີ້, ບັນຫາຫລັກສູດການຮຽນ-ການສອນ IT ສອນແຕ່ທິດສະດີເພາະຍັງຂາດອຸປະກອນເຊັ່ນຄອມພິວເຕີ ແລະ ຂອດປະສານງານຕ່າງໆ ໂດຍສະເພາະການອອກວີຊາ.
ທ່ານ ທອງດີ ຈັນທະວົງ ສສຊ ເຂດ 4 ແຂວງ ສາລະວັນ ໄດ້ສະແດງຄວາມຄິດເຫັນວ່າ: ພວກເຮົາໄດ້ສຸມທຶນຮອນໃສ່ການພັດທະນາລະບົບໂຄງລ່າງຊົນລະປະທານ, ເຊິ່ງຍຸດທະສາດຂອງກະຊວງກະສິກຳ ເວົ້າວ່າ: ການຂະຫຍາຍລະບົບປ້ຳນ້ຳຊົນລະປະທານເນັ້ນໃສ່ການຂະຫຍາຍ ແບບ ນ້ຳໄຫລເຂົ້າເອງ ແລະ ສ້າງອ່າງເກັບນ້ຳ, ແຕ່ໃນຕົວຈິງ ແມ່ນພວກເຮົາພຽງສຸມໃສ່ ແຕ່ລະບົບໄຟຟ້າ ຫລື ຈັກສູບນ້ຳ ອັນນີ້ເປັນຈຸດໜຶ່ງທີ່ຄວນມີການປັບປຸງເພື່ອໃຫ້ມັນໄປຕາມນະໂຍບາຍ ແລະ ຍຸດທະສາດທີ່ໄດ້ວາງໄວ້. ນອກຈາກນີ້, ບັນຫາຫາງສຽງຈາກປະຊາຊົນ ໄດ້ສະເໜີມາໂດຍສະເພາະການເກັບລາຍຮັບຈາກປ້າຍລົດງາມລາຄາກໍແພງລວມທັງປ້າຍລົດຟ້າທີ່ເປັນຂອງລັດເຊິ່ງເຮົາໄດ້ເອົາ ເຂົ້າງົບປະມານຂອງລັດ ຫລື ບໍ່. ພ້ອມນີ້, ຢູ່ບັນດາໂຮງຮຽນໄດ້ມີຫລັກສູດ ການຮຽນ-ການສອນໄອທີ, ເຊິ່ງມັນບໍ່ໄປຕາມແຜນ ເພາະສອນ ແຕ່ທິດສະດີ ຍ້ອນຂາດອຸປະກອນ ເປັນຕົ້ນ ຄອມພິວເຕີ. ສະນັ້ນ, ຂ້າພະເຈົ້າ ຈຶ່ງຂໍສະເໜີໃຫ້ລັດຖະບານ ຄວນສະໜອງງົບປະມານ ໃຫ້ແກ່ກະຊວງ ທີ່ກ່ຽວຂ້ອງ ສະໜອງ ອຸປະກອນໄອທີ ໃຫ້ມັນພຽງພໍ ເພື່ອການພັດທະນາ ບຸກຄະລາກອນ ໃຫ້ທັນກັບ ຍຸກສະໄໝໃໝ່ນີ້.
ທ່ານ ວົງສະຫວັນ ໄຊຍະວົງ ສສຊ ເຂດ 4 ແຂວງອຸດົມໄຊ ໄດ້ມີບາງຄຳເຫັນສະເໜີຕໍ່ລັດຖະບານກ່ຽວກັບແກ້ໄຂບັນຫາການທ່ອງທ່ຽວ, ເຊິ່ງທ່ານກ່າວວ່າ: ຕົ້ນຕໍ ທີ່ນັກທ່ອງທ່ຽວ ເຂົ້າມາລາວນີ້ ແມ່ນໄດ້ເລັ່ງໃສ່ ອາກາດ ເພາະການ ມາຢ້ຽມລາວ ເຂົາເຈົ້າແມ່ນຢາກມາສຳພັດກັບອາກາດສົດ, ກິນອາຫານທີ່ປອດສານເຄມີ, ແຕ່ວ່າປັດຈຸເຫັນວ່າປະເທດລາວ ໄດ້ພົບກັບ ບັນຫາມົນລະພິດ, ໝອກຄວັນທີ່ເປັນໄລຍະ ມີນັກທ່ອງທ່ຽວເຂົ້າມາທ່ຽວຫລາຍ ແລະ ນີ້ກໍເປັນບັນໜຶ່ງ ທີ່ເຮັດໃຫ້ອາກາດບໍ່ສົດ, ມີສານເຄມີຕົກຄ້າງໃນອາຫານການກິນຕ່າງໆທີ່ພວກເຮົາ ຍັງຄຸ້ມຄອງ ບໍ່ທັນໄດ້. ສະນັ້ນ, ຈະແກ້ແນວໃດເພື່ອເຮັດໃຫ້ປະເທດລາວເປັນປະເທດທີ່ສະອາດ, ປາສະຈາກມົນລະພິດ, ອາຫານປອດສານເຄມີ ແລະ ໃຫ້ມີນັກທ່ອງທ່ຽວເຂົ້າມາທ່ອງທ່ຽວໃຫ້ຫລາຍຂຶ້ນເພື່ອໃຫ້ບັນລຸຕາມຄາດໝາຍທີ່ລັດຖະບານວາງໄວ້.
（ແຫຼ່ງຂໍ້ມູນ： ຂປລ）
