 |
ແພດທະຫານລາວ ສຳເລັດການເຂົ້າຮ່ວມກອງປະຊຸມແພດທະຫານອາຊຽນ ທີ່ ມຽນມາ
ຄະນະແພດທະຫານລາວ ນຳໂດຍທ່ານ ພັນໂທ ສີທະວົງ ບຸນປຣະສົງ ຮອງຫົວໜ້າກົມເສນາຮັກ ກົມໃຫຍ່ພະລາທິການ ກະຊວງປ້ອງກັນປະເທດ ໄດ້ສຳເລັດການເຂົ້າຮ່ວມກອງປະຊຸມວາງແຜນຂັ້ນສຸດທ້າຍຂອງໜ່ວຍງານຊ່ຽວຊານແພດທະຫານອາຊຽນບວກ (ປະເທດຄູ່ເຈລະຈາຂອງອາຊຽນ)ໃນລະຫວ່າງວັນທີ 16-21 ກຸມພາ 2019 ທີ່ປະເທດມຽນມາ ເພື່ອກະກຽມໃຫ້ແກ່ການຝຶກຊ້ອມໃຫຍ່ໃນວຽກງານການແພດພາກສະໜາມໃນການກອບກູ້ໄພພິບັດທີ່ຈະຈັດຂຶ້ນຢ່າງເປັນທາງການ ທີ່ປະເທດອິນເດຍ ໃນເດືອນມີນາ 2019, ໂດຍການເປັນປະທານຮ່ວມ ຂອງມຽນມາ ແລະ ອິນເດຍ.
ຜົນສຳເລັດຂອງກອງປະຊຸມວາງແຜນຂັ້ນສຸດທ້າຍຂອງໜ່ວຍງານຊ່ຽວຊານແພດທະຫານອາຊຽນບວກ ໃນເທື່ອນີ້ແມ່ນໄດ້ມີການແລກປ່ຽນບົດຮຽນປະສົບການນຳກັນ, ເຊິ່ງທຸກປະເທດຈະກຽມຄວາມພ້ອມໃນການສົ່ງແພດ ແລະ ພະຍາບານເຂົ້າຮ່ວມຝຶກຊ້ອມພາກສະໜາມຄັ້ງໃຫຍ່ ທີ່ປະເທດອິນເດຍ ທີ່ຈະຈັດຂຶ້ນໃນແຕ່ວັນທີ 8-16 ມີນາ 2019, ສ່ວນສປປ ລາວ ກໍຈະສົ່ງແພດທະຫານເຂົ້າຮ່ວມ 5 ຄົນ. ໃນຕົ້ນເດືອນທັນວາ 2018 ຜ່ານມາ; ກໍ່ມີກອງປະຊຸມໜ່ວຍງານຊ່ຽວຊານແພດທະຫານອາຊຽນ ແລະ ບວກ ຄັ້ງທີ 10 ໂດຍການເປັນປະທານຮ່ວມຂອງປະເທດອິນເດຍ ແລະ ມຽນມາ, ຊຶ່ງມີຄະນະໜ່ວຍງານຜູ້ຊ່ຽວຊານແພດທະຫານອາຊຽນຈາກ 10 ປະເທດສະມາຊິກ ແລະ 8 ປະເທດບວກ ໄດ້ມີການທົບທວນຄືນວຽກງານ ທີ່ໄດ້ປະຕິບັດຜ່ານມາໃນປີ 2017-2018 ແລະ ໄດ້ມີການວາງແຜນການຝຶກຊ້ອມພາກສະໜາມຮ່ວມກັນ ເພື່ອຮັບມືກັບເຫດການສຸກເສີນເປັນຕົ້ນແມ່ນ ໄພພິບັດ, ແຜ່ນດິນໄຫວ ແລະ ກອງປະຊຸມໜ່ວຍງານຊ່ຽວຊານແພດທະຫານອາຊຽນບວກ ເປັນຂໍ້ລິເລີ່ມຂອງກອງປະຊຸມລັດຖະມົນຕີປ້ອງກັນປະເທດອາຊຽນບວກ ໃນປີ 2010 ທີ່ຮາໂນ່ຍ ສສ ຫວຽດນາມ ເຊິ່ງໄດ້ເລີ່ມຕົ້ນ 5 ຂົງເຂດວິຊາການ ໃນການຮ່ວມມືທາງທະຫານນໍາກັນ ຄື: ການຊ່ວຍເຫລືອມະນຸດສະທໍາ-ບັນເທົາທຸກໄພພິບັດ, ການຮັກສາສັນຕິພາບສາກົນ, ຄວາມໝັ້ນຄົງທາງທະເລ, ການຕໍ່ຕ້ານການກໍ່ການຮ້າຍ, ການແພດທະຫານ ແລະ ປັດຈຸບັນໄດ້ມີການຮັບຮອງເພີ່ມອີກ 2 ຂົງເຂດ ຄື: ການທໍາລາຍລະເບີດເພື່ອມະນຸດສະທໍາ ແລະ ຄວາມປອດໄພທາງຄອມພິວເຕີ.
ໂອກາດດັ່ງກ່າວ, ທ່ານ ພັນໂທ ສີທະວົງ ບຸນປຣະສົງ ໄດ້ແຈ້ງໃຫ້ຮູ້ວ່າ: ການເຂົ້າຮ່ວມຂອງຊ່ຽວຊານແພດທະຫານຂອງ ສປປ ລາວ ໃນແຕ່ລະຄັ້ງ, ລ້ວນແຕ່ມີຄວາມສໍາຄັນຍິ່ງ ຕໍ່ພາລະກິດການຊ່ວຍເຫລືອອັນຮີບດ່ວນ ໃນວຽກງານການຊ່ວຍເຫລືອບັນເທົາທຸກໄພພິບັດ, ດ້ານການແພດທະຫານ, ການທໍາລາຍລະເບີດ ເພື່ອມະນຸດສະທໍາ, ຄວາມປອດໄພທາງຄອມພິວເຕີ ແລະ ບັນຫາອື່ນໆ ທີ່ປິ່ນອ້ອມບັນຫາໄພພິບັດ. ການແພດສຸກເສີນ ໃນປັດຈຸບັນ ໄດ້ກາຍເປັນໜ້າທີ່ອັນຮີບດ່ວນ, ຈໍາເປັນ ແລະ ຕ້ອງກຽມຄວາມພ້ອມໃນການຕອບໂຕ້ ແລະ ຊ່ວຍເຫລືອກູ້ໄພທີ່ອາດເກີດຂຶ້ນ ເພາະໃນຂະນະນີ້ ໂລກພວມມີໄພຂົ່ມຂູ່ຈາກການປ່ຽນແປງຂອງດິນຟ້າອາກາດ ທີ່ເລັ່ງທວງໃຫ້ມີຄວາມຮູ້, ມີປະສົບການດ້ານເຕັກນິກ, ເຄື່ອງມືພາຫະນະ, ອຸປະກອນທີ່ມີຄວາມພ້ອມເພື່ອຮັບມື ແລະ ກອບກູ້ເອົາປະຊາຊົນອອກຈາກສະພາບດັ່ງກ່າວໂດຍໄວ ເພາະໄພພິບັດທໍາມະຊາດ ບໍ່ມີຜູ້ໃດ ຫລື ຝ່າຍໃດຮູ້ກອນລ່ວງໜ້າໄດ້ ເມື່ອມັນເກີດຂຶ້ນແລ້ວກໍຈະມີຄວາມເສຍຫາຍຕໍ່ຊີວິດ ແລະ ຊັບສິນຂອງມວນມະນຸດ, ສະນັ້ນມີແຕ່ການກຽມພ້ອມຮັບມືເທົ່ານັ້ນຈະສາມາດຫລຸດຜ່ອນຄວາມສູນເສຍໄດ້ໃນລະດັບໃດໜຶ່ງ.
（ແຫຼ່ງຂໍ້ມູນ： ຂປລ）
