ອາເມລິກາ ຖືເປັນສຳຄັນການພົວພັນຄູ່ຮ່ວມມືຍຸດທະສາດກັບອາຊຽນ

ກອງປະຊຸມທາງອອນລາຍລັດຖະມົນຕີການຕ່າງປະເທດອາຊຽນ - ອາເມລິກາ (ພາບ: TTXVN)

ຕອນເຊົ້າວັນທີ 04 ສິງຫາ, ຈາກຮ່າໂນ້ຍ, ທ່ານລັດຖະມົນຕີກະຊວງການຕ່າງປະເທດຫວຽດນາມ ບຸຍແທັງເຊີນ ໄດ້ເຂົ້າຮ່ວມກອງປະຊຸມທາງອອນລາຍລັດຖະມົນຕີການຕ່າງປະເທດອາຊຽນ - ອາເມລິກາ.

ທີ່ກອງປະຊຸມ, ທ່ານລັດຖະມົນຕີການຕ່າງປະເທດອາເມລິກາ Antony Blinken ຢືນຢັນວ່າ, ອຳນາດການປົກຄອງຂອງທ່ານປະທານາທິບໍດີ Joe Biden ຖືເປັນສຳຄັນການພົວພັນຄູ່ຮ່ວມມືຍຸດທະສາດກັບ ອາຊຽນ, ປາດຖະໜາຢາກຊຸກຍູ້ການພົວພັນກັບອາຊຽນ; ທ່ານຢືນຢັນວ່າ ອາເມລິກາ ຈະສືບຕໍ່ຊຸກຍູ້ການຮ່ວມມືຫຼາຍຝ່າຍໃນການຮັບມືກັບໂລກລະບາດໂຄວິດ-19, ຮັບປະກັນແຫຼ່ງສະໜອງວັກຊິນຢ່າງຄົບຖ້ວນ, ປອດໄພ ແລະ ມີປະສິດທິຜົນ ແລະ ປະກອບສ່ວນເປັນຈຳນວນເງິນ 500.000 USD ໃຫ້ແກ່ກອງທິນ ອາຊຽນ ຮັບມືກັບໂລກລະບາດໂຄວິດ-19.

ອາຊຽນ ແລະ ອາເມລິກາ ໄດ້ເຫັນດີສຸມໃສ່ຍູ້ແຮງການຮ່ວມມືດ້ານການຄ້າ-ການລົງທຶນ, ການຫັນເປັນດີຈີຕອນ, ມອບສິດໃຫ້ແກ່ແມ່ຍິງ, ການປ່ຽນແປງຂອງດິນຟ້າອາກາດ… ພ້ອມກັນນັ້ນ, ສືບຕໍ່ສົມທົບກັນຢ່າງແໜ້ນແຟ້ນໃນການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພຢູ່ພາກພື້ນ, ໃນນັ້ນມີຄວາມໝັ້ນຄົງ ແລະ ຄວາມປອດໄພໃນການເດີນເຮືອຢູ່ທະເລຕາເວັນອອກ.

ກ່າວຄຳເຫັນທີ່ກອງປະຊຸມ, ທ່ານລັດຖະມົນຕີ ບຸຍແທັງເຊີນ ໃຫ້ຮູ້ວ່າ, ອາຊຽນ ພ້ອມແລ້ວທີ່ຈະສ້າງຄວາມສະດວກໃຫ້ແກ່ວິສາຫະກິດອາເມລິກາ ເປີດກວ້າງການລົງທຶນ, ດຳເນີນທຸລະກິດຢູ່ພາກພື້ນ; ສະເໜີໃຫ້ອາເມລິກາ ສືບຕໍ່ໜູນຊ່ວຍອາຊຽນ ຮັດແຄບຊ່ອງຫວ່າງການພັດທະນາ, ຮັບປະກັນການເຕີບໂຕແບບຍືນຍົງຢູ່ບັນດາອະນຸພາກພື້ນອາຊຽນ. ທ່ານລັດຖະມົນຕີປາດຖະໜາວ່າ, ອາເມລິກາ ສືບຕໍ່ສວມບົດບາດໃນການສ້າງ, ສະໜັບສະໜູນບັນດາຄວາມມານະພະຍາຍາມຂອງອາຊຽນ ເພື່ອຮັກສາສັນຕິພາບ, ສະຖຽນລະພາບ, ຄວາມເສລີໃນການເດີນເຮືອ, ການບິນຢູ່ທະເລຕາເວັນອອກ, ກໍຄືຄວາມມານະພະຍາຍາມຂອງອາຊຽນ ໃນການໜູນຊ່ວຍຊອກຫາມາດຕະການເພື່ອຮັບປະກັນສະພາບການຢູ່ ມຽນມາ ໃຫ້ເປັນປົກກະຕິ.