 |
ລາວ-ໄທ ຮ່ວມມືດ້ານວິຊາການປິ່ນປົວ ພະຍາດຫຼອດເລືອດສະໝອງ
ຈຸດປະສົງເພື່ອສ້າງລະບົບເຄືອຄ່າຍ ແລກປ່ຽນບົດຮຽນເຊິ່ງກັນ ແລະ ກັນລະຫວ່າງໂຮງໝໍລະດັບສູນກາງເວົ້າລວມ ເວົ້າສະເພາະໂຮງໝໍເຊດຖາທິຣາດກັບມະຫາວິທະຍາໄລຂອນແກ່ນໃນການປິ່ນປົວ ການບໍລິການຄົນເຈັບທີ່ມາໃຊ້ບໍລິການໃນໂຮງໝໍໃຫ້ຮັບປະກັນຄວາມວ່ອງໄວທັນສະພາບການ ແລະ ມີຄວາມປອດໄພຕໍ່ຄົນເຈັບ ເພື່ອພັດທະນາຄຸນນະພາບທາງດ້ານວິຊາການຂອງບັນດາແພດໝໍ-ພະຍາບານໃຫ້ມີຄວາມເຂັ້ມແຂງ ເປັນການປະຕິບັດວຽກງານການບໍລິການຄຸນະພາບ 5 ດີ 1 ພໍໃຈ ຂອງກະຊວງສາທາລະນະສຸກໃຫ້ປາກົດຜົນເປັນຈິງ.
ທ່ານ ພູທອນ ເມືອງປາກ ໄດ້ກ່າວວ່າ: ພະຍາດຫຼອດເລືອດສະໝອງ (ເສັ້ນເລືອດສະໝອງຕີບ ຫຼື ອຸດຕັນ) ເປັນບັນຫາສຳຄັນໃນຜູ້ອາຍຸສູງ ແລະ ເປັນຕົ້ນເຫດໜຶ່ງຂອງການເປັນອຳມະພາດຖາວອນຂອງຄົນທົ່ວໂລກ ນອກຈາກທີ່ຈະສົ່ງຜົນສະທ້ອນທາງດ້ານອາລົມ ຄວາມຮູ້ສຶກ ການເປັນຢູ່ໃນສັງຄົມຂອງຄົນເຈັບ ແລະ ຄອບຄົວແລ້ວ ສຳຄັນມັນໄດ້ສົ່ງຜົນສະທ້ອນເຖິງລະບົບການປິ່ນປົວດ້ານສາທາລະນະສຸກ ປັດຈຸບັນໃນປະເທດລາວເຫັນໄດ້ວ່າມີຄົນເຈັບທີ່ເປັນພະຍາດນີ້ນັບມື້ເພີ່ມຂຶ້ນ ແລະ ເຮັດໃຫ້ຄົນທີ່ເປັນພະຍາດກາຍເປັນອຳມະພາດບໍ່ສາມາດຊ່ວຍເຫຼືອຕົນເອງໄດ້ ແລະ ບາງກໍລະນີທີ່ມີຄວາມຮຸນແຮງ ກໍພາໃຫ້ເສຍຊີວິດກະທັນຫັນໄດ້ ດັ່ງນັ້ນ ກະຊວງສາທາລະນະສຸກ ຈຶ່ງມີຄວາມຈຳເປັນຕ້ອງໄດ້ມີການພັດທະນາດ້ານການແພດໃຫ້ມີຄວາມທັນສະໄໝ ເພື່ອຕອບສະໜອງແກ່ການບໍລິການປິ່ນປົວສຸຂະພາບຂອງຄົນເຈັບໃຫ້ມີຄວາມວ່ອງໄວ ແລະ ທັນກັບສະພາບການໃນປັດຈຸບັນ ແລະ ການຮ່ວມມືກັບຕ່າງປະເທດຄັ້ງນີ້ກໍເປັນບາດກ້າວໜຶ່ງທີ່ຈະນຳໄປສູ່ຜົນສຳເລັດ.
（ແຫຼ່ງຂໍ້ມູນ： vientianemai.net）
