ສົ່ງເສີມອຳນາດອ່ອນ, ຍົກສູງຊື່ສຽງ ແລະ ຖານະບົດບາດຂອງຫວຽດນາມ

ຫັນປ່ຽນທ່າໄດ້ປຽບດ້ານການພັດທະນາໃຫ້ກາຍເປັນຊື່ສຽງໃນເວທີສາກົນ

ຕາມການປະເມີນຂອງຜູ້ຊ່ຽວຊານສາກົນຫຼາຍທ່ານ, ສະພາບແວດລ້ອມທີ່ມີສັນຕິພາບ, ຄວາມໝັ້ນຄົງ, ບັນດາຜົນສຳເລັດດ້ານການພັດທະນາເສດຖະກິດ - ສັງຄົມ ພ້ອມທັງການຂະຫຍາຍສາຍພົວພັນການຕ່າງປະເທດ ແລະ ການຮ່ວມມືສາກົນ ແມ່ນບັນດາປັດໄຈສຳຄັນທີ່ປະກອບສ່ວນສ້າງພາບລັກ ແລະ ຍົກສູງຖານະບົດບາດຂອງຫວຽດນາມ.

ຄຸນຄ່າຂອງຄວາມໝັ້ນຄົງບໍ່ພຽງແຕ່ສະແດງອອກຜ່ານຄວາມສາມາດໃນການຮັກສາຄວາມເປັນລະບຽບຮຽບຮ້ອຍຂອງສັງຄົມເທົ່ານັ້ນ, ແຕ່ຍັງສະແດງອອກໃນຄວາມຕໍ່ເນື່ອງ, ຄວາມສອດຄ່ອງຂອງນະໂຍບາຍ ແລະ ຄວາມສາມາດໃນການປັບຕົວຢ່າງເປັນເຈົ້າການຕໍ່ຄວາມຜັນຜວນຂອງສະພາບແວດລ້ອມສາກົນ.

ພ້ອມກັນນັ້ນ, ການເຂົ້າຮ່ວມບັນດາສັນຍາການຄ້າເສລີ, ການດຶງດູດແຫຼ່ງທຶນລົງທຶນຈາກຕ່າງປະເທດ, ການຂະຫຍາຍສາຍພົວພັນທາງເສດຖະກິດ ແລະ ການເພີ່ມທະວີການເຊື່ອມຕໍ່ກັບບັນດາສູນກາງເສດຖະກິດໃຫຍ່ ໄດ້ຊ່ວຍໃຫ້ຫວຽດນາມນັບມື້ນັບເຊື່ອມໂຍງເຂົ້າກັບເສດຖະກິດໂລກຢ່າງເລິກເຊິ່ງ ແລະ ກວ້າງຂວາງ.

ນອກຈາກບັນດາຜົນສຳເລັດດ້ານການພັດທະນາແລ້ວ, ຄຸນຄ່າທາງຈິດໃຈເຊັ່ນ ຄວາມຮັກຊາດ, ມູນເຊື້ອແຫ່ງຄວາມເມດຕາກະລຸນາ, ເຈດຈຳນົງແຫ່ງເອກະລາດ, ຄວາມສາມາດໃນການປັບຕົວ ແລະ ຄວາມປາຖະໜາສັນຕິພາບ ກໍປະກອບສ່ວນສ້າງຄວາມເຫັນອົກເຫັນໃຈ ແລະ ຄວາມຮູ້ສຶກທີ່ດີໃນປະຊາຄົມສາກົນ.

ບັນດາຄຸນຄ່າເຫຼົ່ານັ້ນ ເມື່ອປະສົມປະສານກັບມໍລະດົກວັດທະນະທຳອັນອຸດົມສົມບູນ, ຊີວິດສັງຄົມທີ່ຫຼາກຫຼາຍ, ອາຫານການກິນ, ການທ່ອງທ່ຽວ ແລະ ບັນດາຜະລິດຕະພັນສ້າງສັນ ໄດ້ກໍ່ຮ່າງສ້າງລັກສະນະພິເສດສະເພາະຂອງຫວຽດນາມໃນການຮັບຮູ້ຂອງເພື່ອນມິດທົ່ວໂລກ.

ພາບລວມຂອງນະຄອນໂຮ່ຈີມິນ ຈາກມຸມມອງທາງອາກາດ.

ໂດຍສະເພາະ, ແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາ ພ້ອມທັງນະໂຍບາຍຫັນສາຍພົວພັນເປັນຫຼາຍຝ່າຍ ແລະ ຫຼາກຫຼາຍຮູບແບບ ໄດ້ສ້າງພື້ນຖານໃຫ້ຫວຽດນາມສ້າງພາບລັກຂອງຄູ່ຮ່ວມມືທີ່ຫ້າວຫັນ, ເປັນເຈົ້າການ ແລະ ມີຄວາມຮັບຜິດຊອບ.

ມະຕິກອງປະຊຸມໃຫຍ່ຄັ້ງທີ XIV ຂອງພັກ ສືບຕໍ່ກຳນົດຄວາມຈຳເປັນໃນການດຳເນີນວຽກງານການຕ່າງປະເທດຢ່າງຄົບຊຸດ ແລະ ສ້າງສັນ; ຊຸກຍູ້ການເຊື່ອມໂຍງສາກົນຢ່າງເລິກເຊິ່ງ, ຮອບດ້ານ ແລະ ມີປະສິດທິຜົນ; ເປັນເຈົ້າການປະກອບສ່ວນເຂົ້າໃນສັນຕິພາບ, ການຮ່ວມມື ແລະ ການພັດທະນາທີ່ຍືນຍົງ ບົນພື້ນຖານການເຄົາລົບກົດໝາຍສາກົນ, ຄວາມສະເໝີພາບ ແລະ ຜົນປະໂຫຍດຮ່ວມກັນ.

ໃນປີ 2025, ຫວຽດນາມໄດ້ດຳເນີນຫຼາຍໜ້າທີ່ສຳຄັນກ່ຽວກັບການປັບປຸງລະບົບສະຖາບັນ, ການຈັດລຽງໂຄງປະກອບກົງຈັກ, ການປະຕິຮູບຂັ້ນຕອນບໍລິຫານ ແລະ ການຫັນປ່ຽນເປັນດິຈິຕອນ. ພ້ອມກັນນັ້ນ, ມະຕິຍຸດທະສາດຫຼາຍສະບັບໄດ້ຖືກປະກາດໃຊ້, ໂດຍສຸມໃສ່ວິທະຍາສາດ - ເຕັກໂນໂລຊີ, ການເຊື່ອມໂຍງສາກົນ, ການສ້າງ ແລະ ບັງຄັບໃຊ້ກົດໝາຍ, ການພັດທະນາເສດຖະກິດເອກະຊົນ, ການສຶກສາ ແລະ ການດູແລສຸຂະພາບປະຊາຊົນ.

ຂະບວນການປັບປຸງກົງຈັກໃຫ້ກະທັດຮັດ, ຊຸກຍູ້ການກະຈາຍອຳນາດ ແລະ ການມອບອຳນາດ ໄດ້ວາງຂໍ້ຮຽກຮ້ອງໃຫ້ປ່ຽນແປງໃໝ່ວິທີການຄຸ້ມຄອງ, ຈາກການໃຫ້ຄວາມສຳຄັນກັບຂັ້ນຕອນ ໄປສູ່ການເນັ້ນໜັກຄວາມຮັບຜິດຊອບ, ປະສິດທິຜົນການດຳເນີນງານ ແລະ ຜົນການປະຕິບັດ.

ສຳລັບບັນດາຄູ່ຮ່ວມມືສາກົນ, ຄຸນນະພາບຂອງການປະຕິຮູບບໍ່ໄດ້ຖືກປະເມີນພຽງແຕ່ຜ່ານຂະໜາດຂອງໂຄງປະກອບກົງຈັກເທົ່ານັ້ນ, ແຕ່ຍັງສະແດງອອກຜ່ານຄວາມສາມາດໃນການແກ້ໄຂວຽກງານຢ່າງວ່ອງໄວ, ໂປ່ງໃສ, ສອດຄ່ອງ ແລະ ສາມາດຄາດຄະເນໄດ້.

ໃນດ້ານການຕ່າງປະເທດ, ການສືບຕໍ່ຂະຫຍາຍ ແລະ ເຮັດໃຫ້ສາຍພົວພັນກັບບັນດາຄູ່ຮ່ວມມືເລິກເຊິ່ງຍິ່ງຂຶ້ນ, ການເຂົ້າຮ່ວມກົນໄກຫຼາຍຝ່າຍຢ່າງຫ້າວຫັນ ແລະ ການເພີ່ມທະວີການຮ່ວມມືໃນບັນດາຂົງເຂດທີ່ມີຄວາມສົນໃຈຮ່ວມກັນ ໄດ້ປະກອບສ່ວນຂະຫຍາຍພື້ນທີ່ແຫ່ງການພັດທະນາຂອງປະເທດ.

ຫວຽດນາມສືບຕໍ່ຍົກລະດັບສາຍພົວພັນກັບຫຼາຍປະເທດ, ເຂົ້າຮ່ວມ ແລະ ຈັດບັນດາເຫດການສາກົນທີ່ສຳຄັນ, ຜ່ານນັ້ນຈຶ່ງເສີມສ້າງເຄືອຂ່າຍການເຊື່ອມຕໍ່ ແລະ ຍົກສູງບົດບາດໃນການແກ້ໄຂບັນດາບັນຫາລະດັບພາກພື້ນ ແລະ ທົ່ວໂລກ.

ບັນດາຜົນສຳເລັດເຫຼົ່ານີ້ປະກອບສ່ວນເພີ່ມທະວີອຳນາດອ່ອນໃນສອງທິດທາງ. ກ່ອນອື່ນໝົດ, ສາຍພົວພັນຄູ່ຮ່ວມມືທີ່ນັບມື້ນັບຂະຫຍາຍກວ້າງຂວາງ ໄດ້ສ້າງເງື່ອນໄຂໃຫ້ພາບລັກ, ຄຸນຄ່າ ແລະ ຜົນສຳເລັດຂອງຫວຽດນາມເປັນທີ່ຮູ້ຈັກຫຼາຍຂຶ້ນໃນໂລກ. ພ້ອມກັນນັ້ນ, ການເຂົ້າຮ່ວມບັນດາກົນໄກການຮ່ວມມື ແລະ ການປະຕິບັດຄຳໝັ້ນສັນຍາສາກົນ ໄດ້ຊ່ວຍໃຫ້ຫວຽດນາມສະແດງຄວາມສາມາດໃນການສົນທະນາ, ຈິດໃຈແຫ່ງຄວາມຮັບຜິດຊອບ ແລະ ຄວາມສາມາດໃນການປະກອບສ່ວນເຂົ້າໃນບັນດາບັນຫາຮ່ວມກັນ.

ສາມາດເຫັນໄດ້ວ່າ ຫວຽດນາມໄດ້ສ້າງບັນດາເງື່ອນໄຂອັນສະດວກຫຼາຍປະການເພື່ອຍົກສູງຄວາມດຶງດູດຂອງປະເທດ, ນັບແຕ່ຄວາມໝັ້ນຄົງ, ຜົນສຳເລັດດ້ານການພັດທະນາ ຈົນເຖິງເຄືອຂ່າຍສາຍພົວພັນການຕ່າງປະເທດທີ່ກວ້າງຂວາງ.

ແນວໃດກໍຕາມ, ເພື່ອໃຫ້ບັນດາທ່າໄດ້ປຽບເຫຼົ່ານີ້ກາຍເປັນແຫຼ່ງກຳລັງຂອງອຳນາດອ່ອນທີ່ຍືນຍົງ, ປັດໄຈຕັດສິນຍັງຄົງແມ່ນຄຸນນະພາບຂອງການປະຕິບັດນະໂຍບາຍ, ປະສິດທິຜົນການດຳເນີນງານຂອງລະບົບສະຖາບັນ ແລະ ຄວາມສາມາດໃນການຫັນບັນດາທິດທາງການພັດທະນາໃຫ້ກາຍເປັນຜົນສຳເລັດທີ່ເປັນຮູບປະທຳໃນພາກປະຕິບັດ.

ຍົກສູງຄຸນນະພາບການບໍລິຫານປົກຄອງ, ສົ່ງເສີມພະລັງຂອງວັດທະນະທຳ ແລະ ການຕ່າງປະເທດ

ມະຕິກອງປະຊຸມໃຫຍ່ຄັ້ງທີ XIV ຂອງພັກ ໄດ້ກຳນົດບັນດາທິດທາງສຳຄັນກ່ຽວກັບການພັດທະນາຢ່າງວ່ອງໄວ ແລະ ຍືນຍົງ, ການປັບປຸງລະບົບສະຖາບັນ, ການສົ່ງເສີມຄຸນຄ່າວັດທະນະທຳ ແລະ ຄົນຫວຽດນາມ, ພ້ອມທັງຊຸກຍູ້ວຽກງານການຕ່າງປະເທດ ແລະ ການເຊື່ອມໂຍງສາກົນຢ່າງຮອບດ້ານ, ເລິກເຊິ່ງ ແລະ ມີປະສິດທິຜົນ.

ບົນພື້ນຖານນັ້ນ, ລະບົບສະຖາບັນມີບົດບາດເປັນພື້ນຖານໃນການຍົກສູງຄຸນນະພາບການບໍລິຫານປົກຄອງປະເທດ, ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການລະດົມ, ຈັດສັນ ແລະ ນຳໃຊ້ບັນດາຊັບພະຍາກອນເພື່ອການພັດທະນາຢ່າງມີປະສິດທິຜົນ.

ລະບົບສະຖາບັນທີ່ຄົບຊຸດ, ໂປ່ງໃສ, ໝັ້ນຄົງ ແລະ ສາມາດປັບຕົວໄດ້ ບໍ່ພຽງແຕ່ປະກອບສ່ວນແກ້ໄຂບັນດາຂໍ້ຕິດຂັດພາຍໃນປະເທດເທົ່ານັ້ນ, ແຕ່ຍັງເພີ່ມທະວີຄວາມເຊື່ອໝັ້ນຂອງປະຊາຄົມສາກົນຕໍ່ຫວຽດນາມ.

ມະຕິເລກທີ 66-NQ/TW ລົງວັນທີ 30/4/2025 ຂອງກົມການເມືອງ ວ່າດ້ວຍການປ່ຽນແປງໃໝ່ວຽກງານສ້າງ ແລະ ບັງຄັບໃຊ້ກົດໝາຍ ໄດ້ເນັ້ນໜັກຄວາມຈຳເປັນໃນການຫັນລະບົບສະຖາບັນ ແລະ ກົດໝາຍໃຫ້ກາຍເປັນທ່າໄດ້ປຽບໃນການແຂ່ງຂັນ, ຍົກສູງປະສິດທິຜົນການປະຕິບັດ ແລະ ຮັບປະກັນໃຫ້ກົດໝາຍຖືກນຳໃຊ້ຢ່າງເຂັ້ມງວດ ແລະ ສອດຄ່ອງກັນ.

ຕາມນັ້ນ, ຂະບວນການກະຈາຍອຳນາດ ແລະ ມອບອຳນາດ ຕ້ອງຕິດພັນກັບການກຳນົດຄວາມຮັບຜິດຊອບຢ່າງລະອຽດ, ຍົກສູງຄວາມສາມາດຂອງຖັນແຖວພະນັກງານຜູ້ປະຕິບັດ ແລະ ເພີ່ມທະວີການຄວບຄຸມອຳນາດ.

ຄວາມໜ້າເຊື່ອຖືຂອງນະໂຍບາຍບໍ່ພຽງແຕ່ມາຈາກເປົ້າໝາຍທີ່ໄດ້ປະກາດເທົ່ານັ້ນ, ແຕ່ຍັງຂຶ້ນກັບການດຳເນີນງານທີ່ຖືກຕ້ອງຕາມທິດທາງ, ຮັບປະກັນຄວາມສອດຄ່ອງ ແລະ ສ້າງຜົນສຳເລັດທີ່ສາມາດກວດສອບໄດ້.

ຄຸນນະພາບການບໍລິຫານປົກຄອງປະເທດຍັງສະແດງອອກໂດຍກົງຜ່ານປະສິດທິຜົນການດຳເນີນງານຂອງບັນດາອົງການລັດ ແລະ ປະສົບການຕົວຈິງຂອງປະຊາຊົນ ແລະ ວິສາຫະກິດໃນການເຂົ້າເຖິງການບໍລິການສາທາລະນະ.

ມະຕິເລກທີ 57-NQ/TW ລົງວັນທີ 22/12/2024 ຂອງກົມການເມືອງ ໄດ້ກຳນົດວ່າ ການພັດທະນາຢ່າງກ້າວກະໂດດຂອງວິທະຍາສາດ, ເຕັກໂນໂລຊີ, ນະວັດຕະກຳ ແລະ ການຫັນປ່ຽນເປັນດິຈິຕອນແຫ່ງຊາດ ແມ່ນແຮງຂັບເຄື່ອນສຳຄັນຕໍ່ການເຕີບໂຕທາງເສດຖະກິດ - ສັງຄົມ ແລະ ການປ່ຽນແປງໃໝ່ການບໍລິຫານປົກຄອງ.

ສິ່ງນີ້ຮຽກຮ້ອງໃຫ້ຂະບວນການຫັນປ່ຽນເປັນດິຈິຕອນບໍ່ພຽງແຕ່ຢຸດຢູ່ການນຳເຕັກໂນໂລຊີເຂົ້າມາໃຊ້ໃນຂັ້ນຕອນທີ່ມີຢູ່ເທົ່ານັ້ນ, ແຕ່ຕ້ອງປັບປຸງວິທີການຄຸ້ມຄອງ, ຍົກສູງຄວາມສາມາດໃນການປະຕິບັດ ແລະ ຄຸນນະພາບການບໍລິການໄປພ້ອມກັນ.

ຄຽງຄູ່ກັບການປັບປຸງໂຄງປະກອບກົງຈັກໃຫ້ກະທັດຮັດ, ຈຳເປັນຕ້ອງປັບປຸງປະສິດທິຜົນການປະສານງານລະຫວ່າງບັນດາອົງການ ແລະ ຫົວໜ່ວຍ, ຮັບປະກັນໃຫ້ການສະໜອງບໍລິການສາທາລະນະດຳເນີນໄປຢ່າງຕໍ່ເນື່ອງ ແລະ ຄ່ອງຕົວ.

ດັ່ງນັ້ນ, ການສ້າງພາບລັກຂອງຫວຽດນາມທີ່ໝັ້ນຄົງ, ໜ້າເຊື່ອຖື ແລະ ມີຄວາມດຶງດູດໃນເວທີສາກົນ ຈຶ່ງບໍ່ສາມາດອາໄສພຽງແຕ່ວຽກງານຂໍ້ມູນຂ່າວສານ ແລະ ການໂຄສະນາເຜີຍແຜ່. ພື້ນຖານທີ່ສຳຄັນກວ່າແມ່ນຄຸນນະພາບການບໍລິຫານປົກຄອງ, ປະສິດທິຜົນການພັດທະນາ ແລະ ຄວາມເປັນເອກະພາບລະຫວ່າງບັນດາຄຳໝັ້ນສັນຍາທີ່ໄດ້ໃຫ້ໄວ້ກັບການກະທຳຕົວຈິງ.

ອີກປັດໄຈໜຶ່ງທີ່ມີຄວາມໝາຍໃນໄລຍະຍາວແມ່ນການເສີມສ້າງຄວາມເຊື່ອໝັ້ນໃນສັງຄົມ. ທັດສະນະຖືປະຊາຊົນເປັນຮາກຖານ ສືບຕໍ່ໄດ້ຮັບການສະແດງອອກໃນບັນດາທິດທາງພັດທະນາປະເທດຂອງພັກ, ຕິດພັນກັບຄວາມຈຳເປັນໃນການສົ່ງເສີມພະລັງຂອງວັດທະນະທຳ ແລະ ຄົນຫວຽດນາມ, ປຸກລະດົມຄວາມປາຖະໜາໃນການສ້າງປະເທດໃຫ້ຮັ່ງມີ, ສີວິໄລ ແລະ ມີຄວາມສຸກ.

ເພື່ອປະຕິບັດຂໍ້ຮຽກຮ້ອງດັ່ງກ່າວ, ຈຳເປັນຕ້ອງເພີ່ມທະວີຄວາມເປີດເຜີຍ ແລະ ໂປ່ງໃສໃນການຄຸ້ມຄອງ ແລະ ນຳໃຊ້ຊັບພະຍາກອນສາທາລະນະ; ສົ່ງເສີມບົດບາດການຕິດຕາມກວດກາ ແລະ ການວິພາກວິຈານທາງສັງຄົມຂອງແນວໂຮມປິຕຸພູມຫວຽດນາມ ແລະ ບັນດາອົງການທີ່ກ່ຽວຂ້ອງ; ພ້ອມທັງເນັ້ນໜັກຄວາມຮັບຜິດຊອບໃນການຊີ້ແຈງຂອງບັນດາອົງການລັດ.

ຄວາມເຊື່ອໝັ້ນໃນສັງຄົມຈຳເປັນຕ້ອງຖືກສ້າງຂຶ້ນຈາກປະສົບການຕົວຈິງກ່ຽວກັບຄວາມເປັນທຳ, ຄວາມໂປ່ງໃສ ແລະ ປະສິດທິຜົນການຄຸ້ມຄອງ, ແທນທີ່ຈະອາໄສພຽງແຕ່ບັນດາກິດຈະກຳໂຄສະນາ ແລະ ຂົນຂວາຍ.

ນອກຈາກລະບົບສະຖາບັນ ແລະ ການບໍລິຫານປົກຄອງແລ້ວ, ວັດທະນະທຳຍັງເປັນແຫຼ່ງກຳລັງສຳຄັນທີ່ສ້າງອຳນາດອ່ອນຂອງຊາດ ດ້ວຍຄວາມສາມາດໃນການກະຕຸ້ນຄວາມເຫັນອົກເຫັນໃຈ, ຄວາມຮູ້ສຶກທີ່ດີ ແລະ ການເຊື່ອມໂຍງລະຫວ່າງບັນດາປະຊາຄົມ.

ມະຕິເລກທີ 80-NQ/TW ລົງວັນທີ 7/1/2026 ຂອງກົມການເມືອງ ວ່າດ້ວຍການພັດທະນາວັດທະນະທຳຫວຽດນາມ ໄດ້ກຳນົດວ່າ ວັດທະນະທຳ ແລະ ຄົນແມ່ນພື້ນຖານ, ແຮງຂັບເຄື່ອນ ແລະ ແຫຼ່ງກຳລັງສຳຄັນຂອງການພັດທະນາທີ່ຍືນຍົງ.

ຈາກທິດທາງນີ້, ການອະນຸລັກ ແລະ ສົ່ງເສີມຄຸນຄ່າທາງປະຫວັດສາດ, ວັດທະນະທຳ, ມໍລະດົກ ແລະ ເອກະລັກຂອງຊາດ ຈຳເປັນຕ້ອງປະສົມປະສານກັບການປ່ຽນແປງໃໝ່ວິທີການແນະນຳ, ຖ່າຍທອດ ແລະ ເຂົ້າເຖິງສາທາລະນະຊົນສາກົນ.

ຄຽງຄູ່ກັບການສົ່ງເສີມພະລັງຂອງວັດທະນະທຳ, ຫວຽດນາມຈຳເປັນຕ້ອງສືບຕໍ່ຍົກສູງປະສິດທິຜົນວຽກງານການຕ່າງປະເທດ ແລະ ການເຊື່ອມໂຍງສາກົນ, ຄ່ອຍໆ ຫັນປ່ຽນຊື່ສຽງ ແລະ ຖານະບົດບາດໃຫ້ກາຍເປັນທ່າໄດ້ປຽບໃນການຮ່ວມມື ແລະ ການພັດທະນາ.

ມະຕິເລກທີ 59-NQ/TW ລົງວັນທີ 24/1/2025 ຂອງກົມການເມືອງ ວ່າດ້ວຍການເຊື່ອມໂຍງສາກົນໃນສະພາບການໃໝ່ ໄດ້ກຳນົດວ່າ ການເຊື່ອມໂຍງສາກົນແມ່ນແຮງຂັບເຄື່ອນທາງຍຸດທະສາດຂອງການພັດທະນາປະເທດ, ພ້ອມທັງເນັ້ນໜັກຄວາມຈຳເປັນໃນການຍົກສູງຄຸນນະພາບ, ປະສິດທິຜົນ ແລະ ຄວາມຄົບຊຸດໃນການດຳເນີນງານ.

ຕາມນັ້ນ, ຈຳເປັນຕ້ອງເສີມສ້າງຄວາມໜ້າເຊື່ອຖືໃນການປະຕິບັດບັນດາຄຳໝັ້ນສັນຍາສາກົນ; ຮັບປະກັນຄວາມສອດຄ່ອງລະຫວ່າງແນວທາງ, ຖະແຫຼງການ ແລະ ການກະທຳ; ເປັນເຈົ້າການທົບທວນບັນດາພັນທະທີ່ໄດ້ໃຫ້ຄຳໝັ້ນສັນຍາໄວ້ ແລະ ເພີ່ມທະວີການປະສານງານລະຫວ່າງບັນດາອົງການໃນການຈັດຕັ້ງປະຕິບັດ.

ຫວຽດນາມຍັງຈຳເປັນຕ້ອງສືບຕໍ່ສົ່ງເສີມບົດບາດໃນການປະກອບສ່ວນແກ້ໄຂບັນດາບັນຫາຮ່ວມກັນຂອງພາກພື້ນ ແລະ ໂລກ, ໂດຍສະເພາະການພັດທະນາທີ່ຍືນຍົງ, ການຮັບມືກັບການປ່ຽນແປງດິນຟ້າອາກາດ, ການປົກປ້ອງສິ່ງແວດລ້ອມ, ການຮັບປະກັນຄວາມໝັ້ນຄົງຂອງມະນຸດ ແລະ ການແກ້ໄຂບັນດາສິ່ງທ້າທາຍຂ້າມຊາດ.

ໃນຂົງເຂດການສື່ສານຕ່າງປະເທດ, ຂໍ້ຕົກລົງເລກທີ 173/QĐ-TTg ລົງວັນທີ 27/1/2026 ຂອງນາຍົກລັດຖະມົນຕີ ວ່າດ້ວຍການອະນຸມັດຍຸດທະສາດການສື່ສານເພື່ອໂຄສະນາເຜີຍແຜ່ພາບລັກຂອງຫວຽດນາມສູ່ຕ່າງປະເທດ ໄລຍະ 2026–2030, ວິໄສທັດເຖິງປີ 2045 ໄດ້ກຳນົດເປົ້າໝາຍຍົກສູງການຮັບຮູ້, ຄວາມຮູ້ສຶກທີ່ດີ ແລະ ຄວາມເຊື່ອໝັ້ນຂອງປະຊາຄົມສາກົນຕໍ່ປະເທດຊາດ, ຜູ້ຄົນ, ວັດທະນະທຳ ແລະ ບັນດາຜົນສຳເລັດດ້ານການພັດທະນາຂອງຫວຽດນາມ.

ຍຸດທະສາດດັ່ງກ່າວຍັງມຸ່ງໄປສູ່ການຢືນຢັນຖານະບົດບາດ, ຊື່ສຽງ, ເອກະລັກ ແລະ ຍົກສູງຄວາມສາມາດໃນການແຂ່ງຂັນຂອງປະເທດ.

ເພື່ອປະຕິບັດບັນດາເປົ້າໝາຍນີ້ຢ່າງມີປະສິດທິຜົນ, ກິດຈະກຳໂຄສະນາເຜີຍແຜ່ພາບລັກຂອງປະເທດຈຳເປັນຕ້ອງຕິດພັນກັບບັນດາຜົນສຳເລັດທີ່ເປັນຮູບປະທຳໃນການບໍລິຫານປົກຄອງ, ການພັດທະນາເສດຖະກິດ - ສັງຄົມ ແລະ ການປະຕິບັດຄຳໝັ້ນສັນຍາສາກົນ.

ດັ່ງນັ້ນ, ການສົ່ງເສີມອຳນາດອ່ອນຈຶ່ງແມ່ນຂະບວນການໄລຍະຍາວ, ຮຽກຮ້ອງໃຫ້ມີການປະສົມປະສານລະຫວ່າງການປ່ຽນແປງໃໝ່ການບໍລິຫານປົກຄອງປະເທດ, ການຍົກສູງພະລັງລວມ ແລະ ການສົ່ງເສີມຄຸນຄ່າທີ່ມີຢູ່ໃຫ້ເກີດປະສິດທິຜົນ.

ຄວາມດຶງດູດທີ່ຍືນຍົງຂອງຫວຽດນາມບໍ່ພຽງແຕ່ຖືກກຳນົດໂດຍບັນດາທ່າໄດ້ປຽບດ້ານຄວາມໝັ້ນຄົງທາງການເມືອງ - ສັງຄົມ, ວັດທະນະທຳ ຫຼື ຜົນສຳເລັດດ້ານການພັດທະນາເທົ່ານັ້ນ, ແຕ່ຍັງຂຶ້ນກັບວິທີການຫັນບັນດາທ່າໄດ້ປຽບເຫຼົ່ານັ້ນໃຫ້ກາຍເປັນຜົນສຳເລັດຕົວຈິງ, ສ້າງຄວາມເຊື່ອໝັ້ນ ແລະ ສະແດງຄວາມຮັບຜິດຊອບຕໍ່ປະຊາຄົມສາກົນ.

ເພີ່ມທະວີການເຊື່ອມໂຍງ ແລະ ຊ່ວຍເຫຼືອແມ່ຍິງ ແລະ ເດັກນ້ອຍຫວຽດນາມຢູ່ຍີ່ປຸ່ນ ຍສໝ - ວັນທີ 22/10, ທີ່ໂອຊາກາ (ຍີ່ປຸ່ນ), ທ່ານ ຫງວຽນ ເຈື່ອງ ເຊີນ, ກົງສຸນໃຫຍ່ຫວຽດນາມ ໄດ້ຕ້ອນຮັບຄະນະຜູ້ແທນສູນຊ່ວຍເຫຼືອແມ່ຍິງເພື່ອການພັດທະນາ, ແລກປ່ຽນບັນດາມາດຕະການເພື່ອເພີ່ມທະວີການປະສານສົມທົບໃນການປົກປ້ອງແມ່ຍິງ ແລະ ເດັກນ້ອຍຫວຽດນາມ, ປ້ອງກັນ ແລະ ຕ້ານການຄ້າມະນຸດ ແລະ ຊຸກຍູ້ການຍົກຍ້າຍຖິ່ນຖານຢ່າງປອດໄພ.

ນ້ຳໃຈຂອງທະຫານຜູ້ຄົ້ນຫາ ແລະ ເຕົ້າໂຮມອັດຖິວິລະຊົນຢູ່ດິນແດນລາວ ຍສໝ - ໃນຂະບວນການຄົ້ນຫາ ແລະ ເຕົ້າໂຮມອັດຖິວິລະຊົນທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດຢູ່ລາວ, ບັນດາພະນັກງານ ແລະ ທະຫານຂອງກອງຄົ້ນຫາ ແລະ ເຕົ້າໂຮມອັດຖິວິລະຊົນ ຂຶ້ນກັບກອງບັນຊາການທະຫານແຂວງແທງຮວ໋າ ຍັງໄດ້ເປັນເຈົ້າການຊ່ວຍເຫຼືອປະຊາຊົນປະເທດເພື່ອນມິດ. ນັບແຕ່ການກວດ ແລະ ປິ່ນປົວພະຍາດ, ແຈກຢາປິ່ນປົວ ຈົນເຖິງການຊ່ວຍເຫຼືອເຄື່ອງອຸປະໂພກບໍລິໂພກທີ່ຈຳເປັນ, ສ້ອມແປງເຮືອນຊານ, ໂຮງຮຽນ ແລະ ອະນາໄມສິ່ງແວດລ້ອມ, ບັນດາການກະທຳທີ່ເປັນຮູບປະທຳເຫຼົ່ານີ້ໄດ້ປະກອບສ່ວນທະນຸຖະໜອມຄວາມສາມັກຄີພິເສດຫວຽດນາມ - ລາວ.