 |
ນາຍົກລັດຖະມົນຕີ ທ່ານ ທອງລຸນ ສີສຸລິດ ກ່າວຄຳປາໄສໃນກອງປະຊຸມ. ( ພາບ: ຂປລ)
ໃນວາລະດຳເນີນກອງປະຊຸມ ເຜີຍແຜ່ ແນະນຳການຜັນຂະຫຍາຍຈັດຕັ້ງປະຕິບັດດຳ ລັດເລກທີ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ໃນລະຫວ່າງວັນທີ 16-17 ກໍລະກົດ 2018, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຂຶ້ນມີຄຳເຫັນໂອ້ລົມ ໂດຍເນັ້ນໃຫ້ ກະຊວງກະສິກຳ ແລະ ປ່າໄມ້ ກໍຄື ຂະແໜງກະສິກຳ ແລະ ປ່າໄມ້ ໃນຂອບເຂດທົ່ວປະເທດ ສືບຕໍ່ສຸມໃສ່ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໃຫ້ໄດ້ຮັບການພັດທະນາ ແລະ ມີຊີວິດການເປັນຢູ່ດີຂຶ້ນ ເທື່ອລະກ້າວ ແນໃສ່ປະກອບ ສ່ວນເຮັດໃຫ້ ສປປ ລາວ ຫລຸດພົ້ນອອກຈາກ ປະເທດດ້ອຍພັດທະນາ.
ທ່ານນາຍົກລັດຖະມົນຕີ ໄດ້ຮັບຟັງການລາຍງານ ກ່ຽວກັບ ສະພາບການດໍາເນີນກອງປະຊຸມ ໄລຍະ 2 ວັນທີ່ ຜ່ານມາລວມທັງ ສະພາບການຈັດຕັງປະຕິບັດວຽກງານພັດທະນາຊົນນະບົດ ແລະ ລົບລ້າງຄວາມທຸກຍາກ ໃນໄລຍະ 2 ປີຜ່ານມາ ຈາກທ່ານລັດຖະມົນຕີກະຊວງ ກະສິກໍາ ແລະ ປ່າໄມ້ ເຊິ່ງເຫັນວ່າ: ເປົ້າໝາຍຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່ເນື້ອໃນ ຂອງດໍາລັດ 348/ລບ ແລະ ບົດແນະນໍາ 0830/ ກປ, ໃຫ້ບັນດາກະຊວງ, ອົງການທຽບເທົ່າ ແລະ ອົງການປົກຄອງທ້ອງຖິ່ນ ຮັບຮູ້ເຂົ້າໃຈເປັນເອກະພາບ ແລະ ດໍາເນີນການຈັດຕັ້ງຜັນຂະຫຍາຍ ຕາມພາລະບົດບາດໜ້າທີ່ ຂອງຕົນ; ເຮັດໃຫ້ບັນດາເປົ້າໝາຍຈັດຕັ້ງປະຕິບັດ, ນັບແຕ່ບັນດາຂະແໜງການ ອົງການທຽບເທົ່າຂັ້ນສູນກາງ ມີບ່ອນອີງສໍາລັບປັບປຸງມາດຕະຖານຂອງຕົນ, ບັນດາທ້ອງຖີ່ນ ແລະ ຮາກຖານ ມີເນື້ອໃນພື້ນຖານ ເພື່ອກະກຽມໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງທ້ອງຖິ່ນ. ສໍາລັບຜົນສໍາເລັດທີ່ ສາມາດປະຕິບັດໄດ້ອັນພົ້ນເດັ່ນແມ່ນ: ພື້ນຖານໂຄງລ່າງ ແລະ ການບໍລິການຢູ່ຊົນນະບົດ ໂດຍສະເພາະ ເສັ້ນທາງສາມາດທຽວ ໄດ້ຕະຫຼອດປີເພີ່ມຂຶ້ນຈາກຈໍານວນ 7,158 ບ້ານ ໃນປີ2015 ເປັນ 7,230 ບ້ານ ກວມເອົາ 85.27% ຂອງຈໍານວນບ້ານທັງໝົດ; ຈໍານວນບ້ານທີ່ ມີ ໄຟຟ້າໃຊ້ເພີ່ມຂຶ້ນ ຈາກ 6,722 ບ້ານ ໃນປີ2015 ເປັນ 6,802 ບ້ານ ກວມເອົາ 79.36% ຂອງຈໍານວນບ້ານທັງໝົດ; ພະນັກງານຫັຼກແຫຼ່ງຢູ່ກຸ່ມ ບ້ານ ແລະ ຂັ້ນບ້ານ ຫຼາຍກວ່າ 7,500 ຄົນ ໄດ້ຮັບການເຝິກອົບຮົມວຽກງານນໍາພາ, ບໍລິຫານ ແລະ ການຄຸ້ມຄອງໂຄງການ ຢູ່ພາຍໃນ ແລະ ຕ່າງ ປະເທດ, ຄອບຄົວທຸກຍາກຫຼຸດລົງຕື່ ມ 1.25%, ບ້ານທຸກຍາກຫຼຸດລົງ 2.37%. ປັດຈຸບັນ ໃນທົ່ວປະເທດ ຍັງເຫືຼອຄອບຄົວທຸກຍາກ ກວມ 5.34% ແລະ ບ້ານທຸກຍາກ ກວມ 18.13%.
ໃນໂອກາດດຽວກັນ, ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ກໍ່ໄດ້ຂຶ້ນມີຄຳເຫັນ ໂດຍທ່ານຊີ້ໃຫ້ເຫັນວ່າ: ໃນໄລຍະຜ່ານມາພວກເຮົາໄດ້ມີຜົນສຳເລັດໃນການຜັນຂະຫຍາຍວຽກງານສາມສ້າງຢ່າງກວ້າງຂວາງໃນທົ່ວປະເທດ,ເຮັດໃຫ້ລະບົບການເມືອງຢູ່ທ້ອງຖິ່ນຮາກຖານໄດ້ຮັບການປັບປຸງໃຫ້ເຂັ້ມແຂງໜັກແໜ້ນຂຶ້ນເທື່ອລະກ້າວ, ເປັນພື້ນຖານໃຫ້ແກ່ການສູ້ຊົນ ບັນລຸຄາດໜາຍດ້ານການພັດທະນາຊົນນະບົດ ແລະ ລືບລ້າງຄວາມທຸກຍາກທີ່ວາງອອກ, ໄດ້ເຮັດໃຫ້ຄອບຄົວທຸກຍາກຫລຸດລົງຕື່ມອີກ ຈຳນວນ 12.011 ຄອບຄົວ. ປັດຈຸບັນ ຍັງມີຄອບຄົວທຸກຍາກ ຈຳນວນ 64.593 ຄອບຄົວ, ບ້ານທຸກຍາກຫລຸດລົງຕື່ມອີກ 200 ບ້ານ, ເຊິ່ງໃນປັດຈຸບັນບ້ານທຸກຍາກ ມີ 1.536 ບ້ານ. ໃນໄລຍະເຄິ່ງສະໄໝມານີ້ ໄດ້ມີບ້ານພັດທະນາເພີ່ມຂຶ້ນ ຈຳນວນ 561 ບ້ານ, ປັດຈຸບັນ ທົ່ວປະເທດ ມີບ້ານພັດທະນາຈຳນວນ 4.138 ບ້ານ ແລະ ມີບ້ານໃຫຍ່ກາຍເປັນຕົວເມືອງນ້ອຍ ໃນຊົນນະບົດເພີ່ມຂຶ້ນ ຈາກ 45 ບ້ານ ເປັນ 56 ບ້ານ.
ປະຊາຊົນບໍ່ຕ້ອງການພະນັກງານ ທີ່ເຕັມໄປດ້ວຍພະຍາດອາດຍາສິດ, ບໍ່ຮູ້ເລື່ອງໃນວຽກງານ ແລະ ມີແຕ່ຄໍາສັ່ງຊີ້ນໍາ.
ຜ່ານການລາຍງານຂອງບັນດາການນຳຂອງຂະແໜງການທີ່ກ່ຽວຂ້ອງ ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ຕໍ່ຜົນງານທີ່ກະຊວງກະສິກຳ ແລະ ປ່າໄມ້ ກໍຄື ຂະແໜງກະສິກຳ ແລະ ປ່າໄມ້ ໃນຂອບເຂດທົ່ວປະເທດ ຍາດມາໄດ້ ຕະຫລອດໄລຍະຜ່ານມາ ໂດຍສະເພາະ ວຽກງານການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນ ເຊິ່ງໃນຊຸມປີຜ່ານມາ ໄດ້ເຮັດໃຫ້ຊົນນະບົດມີການປ່ຽນແປງ ຢ່າງຕັ້ງໜ້າຫລາຍປະການ, ປະກອບສ່ວນອັນສຳ ຄັນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ, ເຮັດໃຫ້ຊົນນະບົດມີໃບໜ້າໃໝ່, ຊີວິດການເປັນຢູ່ດ້ານວັດຖຸ ແລະ ຈິດໃຈ ຂອງຊາວຊົນນະບົດໄດ້ຮັບການປັບປຸງດີຂຶ້ນເທື່ອລະກ້າວ.
ໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ ່ ຜູ້ເຂົ້າຮ່ວມກອງປະຊຸມ ໂດຍໄດ້ກ່າວຍ້ອງຍໍຊົມເຊີຍຕໍ່ ຜົນສໍາເລັດ ທີ່ ຂະແໜງການກ່ຽວຂ້ອງ ສາມາດປະຕິບັດໄດ້ໃນໄລຍະທີ່ຜ່ານມາ. ພ້ອມກັນນັ້ນ ທ່ານກໍ່ຍົກໃຫ້ເຫັນທີ່ຕັ້ງ, ຄວາມໝາຍຄວາມສໍາຄັນ ຂອງວຽກງານການ ພັດທະນາຊົນນະບົດ ກໍ່ຄືການແກ້ໄຂຄວາມທຸກຍາກປະຊາຊົນບັນດາເຜົ່າ ທີ່ດໍາລົງຊີວິດຢູ່ເຂດຊົນນະບົດຫ່າງໄກສອກຫີຼກ ແລະ ໃຫ້ທັດສະນະ ຕໍ່ກັບ ການນໍາເອົາປະເທດຊາດ ຫຼຸດພົ້ນອອກຈາກສະຖານະພາບຄວາມດ້ອຍພັດທະນາ ກັບການພັດທະນາຊົນນະບົດ ແລະ ລົບລ້າງຄວາມທຸກຍາກ; ຜົນປະໂຫຍດໃນການເປັນປະເທດດ້ອຍພັດທະນາ; ສິ່ງທ້າທາຍ ແລະ ຄວນເອົາໃຈໃສ່ ພາຍຫັຼງຫຼຸດພົ້ນອອກຈາກປະເທດດ້ອຍພັດທະນາໃໝ່; ການພົວພັນລະຫວ່າງ ວຽກງານກະສິກໍາ ກັບ ຊົນນະບົດ, ເນື້ອໃນຂອງຊົນນະບົດໃໝ່, ສິ່ງທ້າທາຍ ໃນການຈັດຕັ້ງຜັນຂະຫຍາຍ ບັນດານິຕິກໍາຂອງພັກ ແລະ ລັດຖະບານ. ອັນສໍາຄັນ, ທ່ານນາຍົກລັດຖະມົນຕີ ໄດ້ຍົກເອົາບາງບັນຫາ ເພື່ອແລກປ່ຽນແນວຄວາມຄິດກັບຜູ້ເຂົ້າຮ່ວມ ເປັນຕົ້ນພວກເຮົາ ຈະຂຸດຄົ້ນ ແລະ ນໍາໃຊ້ທ່າແຮງ ຄວາມອຸດົມສົມບູນ ແລະ ຮັ່ງມີຂອງປະເທດ ໃຫ້ເກີດປະໂຫດສູງສຸດຕໍ່ ປະເທດຊາດ ແລະ ປະຊາຊົນຄືແນວໃດ?; ເຖິງ ເວລາແລ້ວບໍ່ພວກເຮົາຕ້ອງຫັນປ່ຽນ: ຈິນຕະນາການ, ວິຖີດໍາລົງຊີວິດ-ການທໍາມາຫາກິນ, ການປະຢັດມັດທະຍັດ, ການປົກປັກຮັກສາ ຊັບພະຍາກອນທໍາມະຊາດ ແລະ ສິ່ງແວດລ້ອມ...? ຄຽງຄູ່ກັບການນໍາພາປະຊາຊົນຜະລິດເປັນສິນຄ້າ ໃນເມື່ອພວກເຮົາມີຫຼາຍຕົວແບບແລ້ວ ໃຫ້ພ້ອມກັນເສີມຂະຫຍາຍໃຫ້ກວ້າງອອກ, ຜູ້ນໍາພາປະຊາຊົນເຮັດ ບໍ່ແມ່ນເອົາພະນັກງານ ທີ່ເຕັມໄປດ້ວຍພະຍາດອາດຍາສິດ, ບໍ່ຮູ້ເລື່ອງໃນວຽກງານ ແລະ ມີແຕ່ຄໍາສັ່ງຊີ້ນໍາ, ບໍ່ພາເຮັດ ອັນນີ້ປະຊາຊົນບໍ່ຕ້ອງການ; ພວກເຮົາຕ້ອງເຮັດໃຫ້ປະຊາຊົນເປັນເຈົ້ານັບມື້ຫຼາຍຂຶ້ນ ແລະ ນັບມື້ດີຂຶ້ນ; ຕ້ອງສົ່ງເສີມໃຫ້ປະຊາຊົນເປັນເຈົ້າຕົນເອງ ໃນການນໍາໃຊ້ຊັບພະຍາກອນທໍາມະຊາດ, ທີ່ດິນ, ເປັນເຈົ້າວາງແຜນ, ເປັນເຈົ້າການຊອກຕະຫຼາດ, ບັນດາບົດຮຽນອັນດີເລີດ ຈາກທ້ອງຖິ່ນ ແມ່ນຂະຫຍາຍໃຫ້ກວ້າງອອກເລື້ອຍໆ”.
（ຫັດທະບູນ）
