 |
ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້.
ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ໃຫ້ຮູ້ວ່າ: ໃນຊຸມປີຜ່ານມາ ລັດຖະບານ ແລະ ອົງການປົກຄອງທ້ອງຖິ່ນ ໄດ້ຕັ້ງໜ້າເອົາໃຈໃສ່ໃນການປົກປັກຮັກສາປ່າໄມ້ ແລະ ຊັບພະຍາກອນປ່າໄມ້ໃຫ້ມີຄວາມຍືນຍົງ ດ້ວຍການກຳນົດຍຸດທະສາດ ປະກາດໃຊ້ບັນດາກົດໝາຍ ຄຳສັ່ງ ແລະ ລະບຽບການ ພ້ອມທັງໄດ້ວາງມາດຕະການຄຸ້ມຄອງ ປົກປັກຮັກສາ ພັດທະນາ ແລະ ນຳໃຊ້ປ່າໄມ້ຢ່າງມີແຜນການ ລັດຖະບານໄດ້ມີຍຸດທະສາດປ່າໄມ້ ໂດຍໄດ້ກຳນົດຄາດໝາຍສູ້ຊົນ ໃນປີ 2020 ຈະຍົກລະດັບຄວາມປົກຫຸ້ມປ່າໄມ້ໃຫ້ໄດ້ 70% ຂອງເນື້ອທີ່ທົ່ວປະເທດ ຕາມທິດການພັດທະນາແບບຍືນຍົງ ແລະ ການເຕີບໂຕສີຂຽວຂອງອົງການສະຫະປະຊາຊາດ ຫຼື ເທົ່າກັບ 16,5 ລ້ານເຮັກຕາ ໃນນັ້ນ ປ່າສະຫງວນ 4,7 ລ້ານເຮັກຕາ ປ່າປ້ອງກັນ 8,2 ລ້ານເຮັກຕາ ປ່າຜະລິດ 3,1 ລ້ານເຮັກຕາ ຟື້ນຟູປ່າທຳມະຊາດ 6 ລ້ານເຮັກຕາ ແລະ ປ່າປູກ 5 ແສນເຮັກຕາ ດ້ວຍການສົ່ງເສີມທຸກພາກສ່ວນເສດຖະກິດ ຜູ້ປະກອບການ ແລະ ພາກສ່ວນຕ່າງໆໃນສັງຄົມ ເຂົ້າຮ່ວມປູກຕົ້ນໄມ້ຕາມທ່າແຮງ ແລະ ເງື່ອນໄຂຕົວຈິງ ອີງຕາມມາດຖານປ່າໄມ້ຂອງລາວ ມາຮອດປີ 2017 ມີເນື້ອທີ່ປົກຫຸ້ມໄດ້ 60,4% ແຕ່ຖ້າອີງຕາມມາດຖານສາກົນແມ່ນຮອດ 79% ມີເນື້ອທີ່ໄມ້ທີ່ປູກໄດ້ທັງໝົດ 478.557 ເຮັກຕາ (ເທົ່າກັບ 95,7% ຂອງແຜນການ) ແລະ ຟື້ນຟູປ່າໄມ້ທຳມະຊາດໄດ້ເນື້ອທີ່ທັງໝົດ 3.129.543 ເຮັກຕາ (ເທົ່າກັບ 52.15% ຂອງແຜນການ).
ເພື່ອສ້າງຂະບວນການພ້ອມທັງປູກຈິດສຳນຶກໃຫ້ທົ່ວສັງຄົມ ສະນັ້ນ ເນື່ອງໃນໂອກາດວັນປູກຕົ້ນໄມ້ແຫ່ງຊາດປີນີ້ ກະຊວງກະສິກຳ ແລະ ປ່າໄມ້ ໄດ້ອອກແຈ້ງການໃນນາມໃຫ້ທ້ອງຖິ່ນ ໃນຂອບເຂດທົ່ວປະເທດກະກຽມແຜນການ ແລະ ຂະບວນການປູກໄມ້ຢູ່ທ້ອງຖິ່ນຕົນເອງ ໃຫ້ເປັນຂະບວນຟົດຟື້ນ ແລະ ມີແຜນການ.
3 ແຂວງ ບໍລິຄຳໄຊ, ຄຳມ່ວນ, ສາລະວັນ, ຄາດວ່າຈະປູກຕົ້ນໄມ້ໄດ້ ປະມານ 13.000 ເບ້ຍ ແລະ ປ່ອຍປາອີກຫຼາຍພັນໂຕ.
ທ່ານ ບຸນຈັນ ໄຊປັນຍາ ຫົວໜ້າ ພະແນກກະສິກໍາ ແລະ ປ່າໄມ້ແຂວງຄຳມ່ວນ ໄດ້ໃຫ້ສໍາພາດຕໍ່ສື່ມວນຊົນວ່າ: ສໍາລັບພິທີປູກຕົ້ນໄມ້ໃນວັນທີ 1 ມິຖຸນາ 2018 ນີ້ແຂວງຄໍາມ່ວນ ຈະໄດ້ຈັດພິທີປູກ ໃນ 6 ເມືອງໃນເນື້ອທີ່ 16,93 ເຮັກຕາ, ມີເບ້ຍໄມ້ 7.107 ຕົ້ນ ໃນນັ້ນມີໄມ້ອຸດສາຫະກໍາ 1.798 ຕົ້ນ, ໄມ້ໃຫ້ໝາກ 700 ຕົ້ນ ແລະ ໄມ້ປະດັບ 4.609 ຕົ້ນ. ພາຍຫລັງທີ່ໄດ້ປູກໄມ້ໄປແລ້ວຮັບຮອງວ່າ 90% ຂອງເບ້ຍໄມ້ທີ່ປູກຈະນໍາຄວາມອຸດົມສົມບູນສູ່ທໍາມະຊາດອີກຄັ້ງໜຶ່ງ.
ທ່ານ ສີພອງ ຈັນທະວົງສາ ຫົວໜ້າຂະແໜງປ່າໄມ້ ພະແນກກະສິກຳ-ປ່າໄມ້ແຂວງສາລະວັນ ໄດ້ໃຫ້ຮູ້ວ່າ: ກິດຈະກຳດັ່ງກ່າວຈັດຂຶ້ນ ເພື່ອເປັນການສ້າງຂະບວນ ຂໍ່ານັບຮັບຕ້ອນ ວັນທີ 1 ມິຖຸນາ ວັນປູກຕົ້ນໄມ້ແຫ່ງຊາດ ແລະ ທັງເຮັດໃຫ້ແຫລ່ງທ່ອງທ່ຽວ ມີຄວາມສວຍງາມເຕັມໄປດ້ວຍທຳມະຊາດ ແລະ ພູຜາປ່າໄມ້ມີຄວາມອຸດົມສົມບູນ. ໃນນັ້ນເບ້ຍໄມ້ທີ່ນຳມາປູກ ມີທັງໝົດ 200 ກວ່າເບ້ຍ, ມີ 2 ຊະນິດຄື: ເບ້ຍໄມ້ຄູນ ແລະ ເບ້ຍສະຝາງ. ພ້ອມນັ້ນຍັງໄດ້ ມີການປ່ອຍປາ ຄືນສູ່ທຳມະຊາດ ຈຳນວນ 5 ພັນໂຕ.
ໃນປີ 2018 ນີ້ ໄດ້ມີແຜນການສູ້ຊົນຈະປູກໄມ້ ໃຫ້ໄດ້ໃນທົ່ວແຂວງທັງໝົດ 2 ລ້ານກວ່າເບ້ຍ, ໃນເນື້ອທີ່ 2 ພັນກວ່າເຮັກຕາ ແລະ ມີແຜນປູກເພື່ອຟື້ນຟູປ່າ ໃນຈຳນວນ 3 ປະເພດປ່າ ໃຫ້ໄດ້ 20 ພັນກວ່າເຮັກຕາ, ທັງນີ້ ກໍເພື່ອເຮັດໃຫ້ອັດຕາການປົກຄຸມ ຂອງເນື້ອທີ່ປ່າໄມ້ພາຍໃນແຂວງສາລະວັນ ກໍຄື ເນື້ອທີ່ຂອງປ່າໄມ້ໃນທົ່ວປະເທດ ເພີ່ມຂຶ້ນອີກ. ສຳລັບ ໃນວັນທີ 1 ມິຖຸນາ 2018 ທີ່ຈະມາເຖິງນີ້ ພະແນກກະສິກຳ-ປ່າໄມ້ແຂວງ ຈະໄດ້ສົມທົບກັບອົງການທຽບເທົ່າ ອ້ອມຂ້າງແຂວງ, ເມືອງ ແລະ ຫົວໜ່ວຍທຸລະກິດ, ບໍລິສັດຕ່າງໆ ພາຍໃນແຂວງເຄື່ອນໄຫວປູກຕົ້ນໄມ້ ໃຫ້ໄດ້ທັງໝົດ 47 ພັນກວ່າເບ້ຍ, ມີຈຳນວນ 19 ຈຸດ ໃນເນື້ອທີ 30 ກວ່າເຮັກຕາ, ເບ້ຍໄມ້ທີ່ນຳມາປູກມີ 10 ກວ່າຊະນິດ, ເຊິ່ງປະກອບມີໄມ້ປະດັບ, ໄມ້ກິນໝາກ ແລະ ໄມ້ເສດຖະກິດ.
ທ່ານ ຂັນມີໄຊ ມິພີມວົງ ຮອງຫົວໜ້າ ຂະແໜງປ່າໄມ້, ພະແນກກະສິກຳ ແລະ ປ່າໄມ້ ແຂວງບໍລິຄຳໄຊ ໄດ້ໃຫ້ສຳພາດຕໍ່ສື່ມວນຊົນວ່າ: ສຳລັບການກະກຽມກ້າແກ່ນໄມ້ ທາງແຂວງເກັບແກ່ນໄມ້ໄດ້ 3 ພັນກວ່າກິໂລ ແລະ ພາກເອກະຊົນເກັບແກ່ນໄດ້ 3 ພັນກວ່າກິໂລ, ໃນນັ້ນມີແກ່ນໄມ້ອຸດສາຫະກຳ ແລະ ໄມ້ປະດັບເຊັ່ນ: ໄມ້ດູ, ໄມ້ຂະຍຸງ, ໄມ້ກາກະເລົາ, ໄມ້ຄູນ, ໄມ້ເປືອກບົງ, ໄມ້ຢາງພາລາ ແລະ ໄມ້ຕິ້ວ. ມາຮອດປັດຈຸບັນສາມາດກ້າເບ້ຍໄມ້ໄດ້ແລ້ວ 44 ພັນກວ່າເບ້ຍ ແລະ ພາກເອກະຊົນ 2 ແສນກວ່າເບ້ຍ.
ທ່ານ ຂັນມີໄຊ ມິພີມວົງ ຍັງໃຫ້ຮູ້ອີກວ່າ: ສຳລັບ ພິທີໃຫຍ່ໃນການປູກຕົ້ນໄມ້ແຫ່ງຊາດ ໃນວັນທີ 1 ມິຖຸນາປີນີ້ ແຂວງບໍລິຄຳໄຊ ໄດ້ກຳນົດເອົາເຂດບ້ານຫາງຊິງສະຫວ່າງ ເມືອງປາກຊັນ ເປັນພິທີເປີດ ໂດຍຈະມີການນຳຂັ້ນສູນກາງ, ຂັ້ນແຂວງ, ພະແນກການ ຕະຫລອດຮອດພະນັກງານ, ທະຫານ, ຕຳຫລວດ, ພໍ່ແມ່ປະຊາຊົນ, ນັກຮຽນ, ນັກສຶກສາ, ຊາວໜຸ່ມ, ເຍົາວະຊົນເຂົ້າຮ່ວມ ເພື່ອໃຫ້ເປັນຂະບວນຟົດຟື້ນ ແລະ ມີຄວາມໝາຍ.
（ຫັດທະບູນ）
