| ແມ່ຍິງຫວຽດນາມຢູ່ໂຮນລັງ ເຜີຍແຜ່ວັດທະນະທຳບ້ານເກີດເມືອງນອນ ຫາຍຟ່ອງ ສົ່ງເສີມແຫຼ່ງຊັບພະຍາກອນຈາກຊາວຫວຽດນາມຢູ່ຕ່າງປະເທດ ເພື່ອພັດທະນາບ້ານເກີດເມືອງນອນ |
ຂໍຮຽນທ່ານເອກອັກຄະລັດຖະທູດ, ວັນບຸນມະຫາສາມັກຄີແຫ່ງຊາດຫວຽດນາມຢູ່ເອີຣົບ ໄດ້ຈັດຂຶ້ນເປັນຄັ້ງທຳອິດທີ່ນະຄອນຫຼວງ Prague ຂອງເຊັກ. ທ່ານມີຄວາມເຫັນແນວໃດກ່ຽວກັບສານທີ່ຕ້ອງການສື່ ແລະ ຄວາມໝາຍຂອງເຫດການຄັ້ງນີ້?
ການຈັດວັນບຸນມະຫາສາມັກຄີແຫ່ງຊາດຫວຽດນາມຢູ່ເອີຣົບ ເປັນຄັ້ງທຳອິດທີ່ນະຄອນຫຼວງ Prague ມີຄວາມໝາຍພິເສດຕໍ່ປະຊາຄົມຊາວຫວຽດນາມຢູ່ພາກພື້ນນີ້, ພ້ອມທັງປະກອບສ່ວນເສີມສ້າງຄວາມມະຫາສາມັກຄີຂອງທົ່ວປວງຊົນໃນຊາດ, ຢືນຢັນຖານະ ແລະ ບັນດາການປະກອບສ່ວນຂອງຊາວຫວຽດນາມຢູ່ຕ່າງປະເທດ, ເພີ່ມທະວີສາຍພົວພັນມິດຕະພາບລະຫວ່າງຫວຽດນາມກັບບັນດາປະເທດເອີຣົບ, ໃນນັ້ນມີເຊັກ.
ສານສຳຄັນທີ່ສື່ຜ່ານວັນບຸນຄັ້ງນີ້ແມ່ນ ຈິດໃຈສາມັກຄີ, ຄວາມຜູກພັນກັບຮາກເຫງົ້າ ແລະ ການຮ່ວມແຮງຮ່ວມໃຈສ້າງອະນາຄົດ. ບໍ່ວ່າຈະຮ່ຳຮຽນ, ເຮັດວຽກ ຫຼື ດຳລົງຊີວິດຢູ່ປະເທດໃດກໍຕາມ, ຊາວຫວຽດນາມຢູ່ຕ່າງປະເທດຍັງຄົງເປັນພາກສ່ວນໜຶ່ງທີ່ບໍ່ສາມາດແຍກອອກຈາກຊາດຫວຽດນາມໄດ້. ຄວາມຮັກບ້ານເກີດເມືອງນອນ, ຈິດສຳນຶກໃນການຮັກສາພາສາຫວຽດນາມ, ເອກະລັກວັດທະນະທຳ ແລະ ປະເພນີຄອບຄົວ ແມ່ນບັນດາປັດໄຈທີ່ເຊື່ອມໂຍງຊາວຫວຽດນາມຫຼາຍຮຸ່ນຄົນກັບປະເທດຊາດ.
ວັນບຸນຍັງເປີດໂອກາດໃຫ້ບັນດາສະມາຄົມ ແລະ ປະຊາຄົມຊາວຫວຽດນາມຢູ່ເອີຣົບໄດ້ພົບປະ, ແລກປ່ຽນປະສົບການ, ເພີ່ມທະວີການປະສານສົມທົບ ແລະ ສົ່ງເສີມກຳລັງຮ່ວມຂອງຊຸມຊົນໃນບັນດາກິດຈະກຳທີ່ມຸ່ງສູ່ບ້ານເກີດເມືອງນອນ.
ໃນສະພາບການທີ່ສະຖານະການໂລກມີຄວາມຜັນຜວນຫຼາຍດ້ານ, ຄວາມສາມັກຄີຍິ່ງມີຄວາມຈຳເປັນ, ຊ່ວຍໃຫ້ປະຊາຄົມສາມາດຊ່ວຍເຫຼືອເຊິ່ງກັນ ແລະ ກັນ, ເຊື່ອມເຂົ້າກັບສັງຄົມປະເທດເຈົ້າພາບໄດ້ຢ່າງດີ ແລະ ປະກອບສ່ວນຢ່າງຕັ້ງໜ້າຕໍ່ສາຍພົວພັນຮ່ວມມືລະຫວ່າງຫວຽດນາມກັບບັນດາປະເທດ.
ການເລືອກນະຄອນ Prague ເປັນສະຖານທີ່ຈັດວັນບຸນຄັ້ງທຳອິດກໍມີຄວາມໝາຍຫຼາຍດ້ານ. ເຊັກມີປະຊາຄົມຊາວຫວຽດນາມຈຳນວນຫຼາຍ, ມີຄວາມຫ້າວຫັນ, ເຊື່ອມເຂົ້າກັບສັງຄົມໄດ້ດີ ແລະ ເປັນໜຶ່ງໃນບັນດາຄູ່ຮ່ວມມືຍຸດທະສາດທີ່ມີສາຍພົວພັນມິດຕະພາບມູນເຊື້ອອັນສຳຄັນກັບຫວຽດນາມຢູ່ເອີຣົບ.
ຜ່ານຫຼາຍຮຸ່ນຄົນ, ປະຊາຄົມຊາວຫວຽດນາມຢູ່ເຊັກໄດ້ສົ່ງເສີມບົດບາດເປັນຂົວເຊື່ອມລະຫວ່າງປະຊາຊົນສອງປະເທດ, ປະກອບສ່ວນຊຸກຍູ້ການແລກປ່ຽນປະຊາຊົນ, ການຮ່ວມມືດ້ານເສດຖະກິດ ແລະ ແນະນຳພາບລັກຂອງຫວຽດນາມສູ່ໝູ່ເພື່ອນໃນປະເທດເຈົ້າພາບ.
ຂ້າພະເຈົ້າຫວັງວ່າ ວັນບຸນຄັ້ງນີ້ຈະບໍ່ພຽງແຕ່ເປັນໂອກາດໃຫ້ໄດ້ພົບປະກັນເທົ່ານັ້ນ, ແຕ່ຍັງຈະສ້າງແຮງຂັບເຄື່ອນໃໝ່ໃນການເຊື່ອມໂຍງຊາວຫວຽດນາມຫຼາຍຮຸ່ນຄົນຢູ່ເອີຣົບ, ໂດຍສະເພາະຄົນຮຸ່ນໜຸ່ມ. ຜ່ານນັ້ນ, ແຕ່ລະຄົນຈະຍິ່ງມີຄວາມພາກພູມໃຈໃນຮາກເຫງົ້າຂອງຕົນ, ເປັນເຈົ້າການຮັກສາບັນດາຄຸນຄ່າວັດທະນະທຳມູນເຊື້ອ ແລະ ປະກອບສ່ວນຢ່າງເປັນຮູບປະທຳໃຫ້ແກ່ບ້ານເກີດເມືອງນອນ ກໍຄືປະເທດທີ່ຕົນພວມດຳລົງຊີວິດ.
ມະຫາສາມັກຄີແມ່ນແຫຼ່ງກຳລັງຂອງຊາດຫວຽດນາມສະເໝີມາ. ເມື່ອທຸກຄົນມີຮາກເຫງົ້າຮ່ວມກັນ, ມີຄວາມຮັບຜິດຊອບ ແລະ ຄວາມປາຖະໜາໃນການພັດທະນາຮ່ວມກັນ, ໄລຍະຫ່າງທາງພູມສາດກໍບໍ່ອາດເຮັດໃຫ້ຄວາມຮັກແພງຂອງຄົນຮ່ວມຊາດຈືດຈາງລົງໄດ້.
ຂ້າພະເຈົ້າເຊື່ອໝັ້ນວ່າ ຈິດໃຈຂອງວັນບຸນຈະສືບຕໍ່ແຜ່ຂະຫຍາຍ, ປະກອບສ່ວນສ້າງປະຊາຄົມຊາວຫວຽດນາມຢູ່ເອີຣົບໃຫ້ນັບມື້ນັບສາມັກຄີ, ເຂັ້ມແຂງ, ເຊື່ອມເຂົ້າກັບສັງຄົມຢ່າງເລິກເຊິ່ງ ແລະ ຜູກພັນກັບປິຕຸພູມຢູ່ສະເໝີ.
ຂໍຮຽນທ່ານເອກອັກຄະລັດຖະທູດ, ຄຽງຄູ່ກັບການປ່ຽນແປງຂອງປະຊາຄົມຊາວຫວຽດນາມຢູ່ເຊັກໂດຍສະເພາະ ແລະ ເອີຣົບໂດຍລວມ, ທ່ານຕີລາຄາແນວໃດກ່ຽວກັບຈຸດເດັ່ນຂອງສະຫະພັນສະມາຄົມຊາວຫວຽດນາມຢູ່ເອີຣົບໃນໄລຍະຜ່ານມາ?
ໃນໄລຍະກວ່າໜຶ່ງທົດສະວັດຜ່ານມາ, ສະຫະພັນສະມາຄົມຊາວຫວຽດນາມຢູ່ເອີຣົບ ໄດ້ຄ່ອຍໆສົ່ງເສີມບົດບາດເປັນສູນກາງປະສານງານທີ່ສຳຄັນ ໃນການເຊື່ອມໂຍງບັນດາປະຊາຄົມຊາວຫວຽດນາມຢູ່ຫຼາຍປະເທດໃນພາກພື້ນ.
ໜຶ່ງໃນບັນດາການປະກອບສ່ວນທີ່ໂດດເດັ່ນຂອງສະຫະພັນສະມາຄົມ ແມ່ນການສ້າງເງື່ອນໄຂໃຫ້ບັນດາສະມາຄົມເພີ່ມທະວີການແລກປ່ຽນ, ປະສານສົມທົບຈັດກິດຈະກຳ, ແບ່ງປັນປະສົບການດ້ານການຈັດຕັ້ງ ແລະ ຮ່ວມກັນຮັກສາພາສາຫວຽດນາມ, ເອກະລັກວັດທະນະທຳ ແລະ ປະເພນີຂອງຊາດ.
 |
| ທ່ານ ເຢືອງ ຮວ່າຍ ນາມ, ເອກອັກຄະລັດຖະທູດຫວຽດນາມປະຈຳເຊັກ. (ພາບ: ສະຖານເອກອັກຄະລັດຖະທູດຫວຽດນາມປະຈຳເຊັກ) |
ສະຫະພັນສະມາຄົມຍັງໄດ້ຕັ້ງໜ້າຈັດຕັ້ງ ແລະ ເຂົ້າຮ່ວມບັນດາໂຄງການທີ່ມຸ່ງສູ່ບ້ານເກີດເມືອງນອນ, ຊ່ວຍເຫຼືອພີ່ນ້ອງຮ່ວມຊາດຢູ່ພາຍໃນປະເທດ, ໂຄສະນາພາບລັກຂອງປະເທດ ແລະ ປະຊາຊົນຫວຽດນາມ ພ້ອມທັງຊຸກຍູ້ການແລກປ່ຽນກັບປະຊາຊົນຂອງບັນດາປະເທດເຈົ້າພາບ.
ບັນດາກິດຈະກຳດັ່ງກ່າວສະແດງເຖິງຄວາມຮັກແພງຜູກພັນ ແລະ ຄວາມຮັບຜິດຊອບຂອງປະຊາຄົມຊາວຫວຽດນາມຢູ່ຕ່າງປະເທດ ຕໍ່ບ້ານເກີດເມືອງນອນ ແລະ ປະເທດຊາດ.
ຕາມຂ້າພະເຈົ້າແລ້ວ, ຄຸນຄ່າຂອງສະຫະພັນສະມາຄົມບໍ່ພຽງແຕ່ສະແດງອອກຜ່ານຈຳນວນໂຄງການ ຫຼື ຂະໜາດຂອງການຈັດຕັ້ງເທົ່ານັ້ນ, ແຕ່ສິ່ງທີ່ສຳຄັນກວ່າແມ່ນຄວາມສາມາດໃນການເຊື່ອມໂຍງຜູ້ຄົນ, ເສີມສ້າງຄວາມເຊື່ອໝັ້ນ, ປຸກລະດົມຄວາມຮັກແພງຂອງຄົນຮ່ວມຊາດ ແລະ ຫັນປ່ຽນຄວາມຮັກທີ່ມີຕໍ່ບ້ານເກີດເມືອງນອນ ໃຫ້ກາຍເປັນການກະທຳທີ່ເປັນຮູບປະທຳ.
ປັດຈຸບັນ, ປະຊາຄົມຊາວຫວຽດນາມຢູ່ເອີຣົບມີຄວາມຫຼາກຫຼາຍນັບມື້ນັບຫຼາຍຂຶ້ນ ທັງດ້ານຮຸ່ນຄົນ, ອາຊີບ, ສະພາບການດຳລົງຊີວິດ ແລະ ລະດັບການເຊື່ອມເຂົ້າກັບສັງຄົມ. ດັ່ງນັ້ນ, ບົດບາດໃນການເຕົ້າໂຮມ ແລະ ເຊື່ອມໂຍງຂອງສະຫະພັນສະມາຄົມຈຶ່ງຍິ່ງມີຄວາມໝາຍໃນທາງປະຕິບັດ ເພື່ອສ້າງຄວາມຜູກພັນ ແລະ ສົ່ງເສີມກຳລັງຮ່ວມຂອງປະຊາຄົມ.
ຂໍຮຽນທ່ານເອກອັກຄະລັດຖະທູດ, ຈະເນັ້ນໃສ່ບັນດາວິທີແກ້ໄຂໃດແດ່ ເພື່ອສືບຕໍ່ເສີມສ້າງຄວາມມະຫາສາມັກຄີໃນປະຊາຄົມຊາວຫວຽດນາມຢູ່ເອີຣົບ, ໂດຍສະເພາະຢູ່ເຊັກ, ທັງໃນການເຊື່ອມໂຍງຄົນຮຸ່ນໜຸ່ມ ແລະ ຊາວຫວຽດນາມທີ່ເກີດ ແລະ ເຕີບໃຫຍ່ຢູ່ທີ່ນີ້ ກັບບ້ານເກີດເມືອງນອນ ແລະ ປະເທດຊາດ?
ເພື່ອສືບຕໍ່ເສີມສ້າງຈິດໃຈມະຫາສາມັກຄີໃນປະຊາຄົມຊາວຫວຽດນາມຢູ່ເອີຣົບໂດຍລວມ ແລະ ເຊັກໂດຍສະເພາະ, ຕາມຂ້າພະເຈົ້າແລ້ວ, ຄວນເອົາໃຈໃສ່ 4 ທິດທາງດັ່ງນີ້.
ທິດທາງທຳອິດ, ສ້າງຄວາມສາມັກຄີບົນພື້ນຖານການເຄົາລົບຄວາມແຕກຕ່າງ ແລະ ປະສານຜົນປະໂຫຍດໃຫ້ກົມກຽວກັນ.
ບັນດາສະມາຄົມຄວນຮັກສາການສົນທະນາ, ເພີ່ມທະວີການປະສານສົມທົບ, ແລກປ່ຽນປະສົບການ ແລະ ສົ່ງເສີມບົດບາດຂອງບັນດາບຸກຄົນທີ່ມີບາລະມີໃນປະຊາຄົມ. ພ້ອມກັນນັ້ນ, ຄວນສ້າງເງື່ອນໄຂໃຫ້ບັນດາກຸ່ມຄົນທີ່ແຕກຕ່າງກັນ ສາມາດເຂົ້າຮ່ວມກິດຈະກຳຮ່ວມກັນໄດ້.
ຄວາມສາມັກຄີບໍ່ໄດ້ໝາຍຄວາມວ່າ ທຸກຄົນຕ້ອງມີຄວາມຄິດ ຫຼື ວິທີການເຮັດວຽກຄືກັນ. ສິ່ງສຳຄັນແມ່ນການມີຄຸນຄ່າພື້ນຖານຮ່ວມກັນ ເຊັ່ນ ຄວາມຮັກແພງຂອງຄົນຮ່ວມຊາດ, ຄວາມເຄົາລົບ, ຈິດສຳນຶກໃນການຮັກສາເອກະລັກວັດທະນະທຳຫວຽດນາມ ແລະ ຄວາມປາຖະໜາຢາກປະກອບສ່ວນໃຫ້ແກ່ບ້ານເກີດເມືອງນອນ.
ທິດທາງທີສອງ, ສົ່ງເສີມບົດບາດໃຈກາງຂອງຄົນຮຸ່ນໜຸ່ມໃນບັນດາກິດຈະກຳເຊື່ອມໂຍງປະຊາຄົມ.
ຊາວຫວຽດນາມທີ່ເກີດ ແລະ ເຕີບໃຫຍ່ຢູ່ເຊັກ ແລະ ບັນດາປະເທດເອີຣົບ ມີຈຸດໄດ້ປຽບດ້ານພາສາຕ່າງປະເທດ, ຄວາມຮູ້, ເຕັກໂນໂລຊີ ແລະ ຄວາມສາມາດໃນການເຊື່ອມຕໍ່ສາກົນ.
ຄວນສ້າງໂອກາດເພີ່ມເຕີມໃຫ້ຊາວໜຸ່ມໄດ້ເຂົ້າຮ່ວມກິດຈະກຳຂອງສະມາຄົມໂດຍກົງ, ຮັບບົດບາດໃນການຈັດຕັ້ງ, ນຳພາ ແລະ ຜັນຂະຫຍາຍບັນດາໂຄງການດ້ານວັດທະນະທຳ, ການສຶກສາ, ການກຸສົນ ແລະ ການແລກປ່ຽນຊາວໜຸ່ມ.
ໂດຍສະເພາະ, ບັນດາອົງການປະຊາຄົມຄວນເອົາໃຈໃສ່ຮັບຟັງຄວາມຄິດເຫັນ, ຄວາມຕ້ອງການ ແລະ ວິທີການເຂົ້າຫາບັນຫາແບບໃໝ່ຂອງຄົນຮຸ່ນໜຸ່ມ, ແທນທີ່ຈະພຽງແຕ່ຄາດຫວັງໃຫ້ພວກເຂົາສືບຕໍ່ປະຕິບັດຮູບແບບການເຄື່ອນໄຫວຂອງຄົນຮຸ່ນກ່ອນໂດຍບໍ່ມີການປ່ຽນແປງ.
ທິດທາງທີສາມ, ເພີ່ມທະວີການເຊື່ອມໂຍງຄົນຮຸ່ນໜຸ່ມກັບບ້ານເກີດເມືອງນອນ ຜ່ານປະສົບການຕົວຈິງ.
ການສອນ ແລະ ການຮຽນພາສາຫວຽດນາມຄວນເຊື່ອມໂຍງກັບບັນດາກິດຈະກຳທີ່ໃກ້ຊິດ ແລະ ດຶງດູດໃຈ ເຊັ່ນ ຄ້າຍລະດູຮ້ອນ, ໂຄງການກັບຄືນສູ່ຮາກເຫງົ້າ, ການສຶກສາຄົ້ນຄວ້າປະຫວັດສາດ, ວັດທະນະທຳ, ອາຫານຫວຽດນາມ ແລະ ການແລກປ່ຽນກັບຊາວໜຸ່ມພາຍໃນປະເທດ.
ນອກຈາກນັ້ນ, ຄວນຂະຫຍາຍບັນດາໂຄງການຮ່ວມມື ແລະ ເຊື່ອມໂຍງໃນດ້ານການສຶກສາ, ວິທະຍາສາດ, ເຕັກໂນໂລຊີ, ການເລີ່ມຕົ້ນທຸລະກິດ ແລະ ນະວັດຕະກຳ, ສ້າງເງື່ອນໄຂໃຫ້ຊາວໜຸ່ມຫວຽດນາມຢູ່ຕ່າງປະເທດສາມາດປະກອບສ່ວນດ້ວຍຄວາມຮູ້, ທັກສະ ແລະ ຈຸດແຂງສະເພາະຂອງຕົນ.
ຄວາມຮັກທີ່ມີຕໍ່ບ້ານເກີດເມືອງນອນຈະໄດ້ຮັບການຫຼໍ່ຫຼອມຢ່າງໝັ້ນຄົງຍືນຍົງຍິ່ງຂຶ້ນ ເມື່ອຊາວໜຸ່ມມີໂອກາດສຶກສາຄົ້ນຄວ້າ, ສຳຜັດປະສົບການ ແລະ ເຂົ້າຮ່ວມກິດຈະກຳທີ່ມີຄວາມໝາຍໂດຍກົງ.
ທິດທາງທີສີ່, ເພີ່ມທະວີການປະສານສົມທົບລະຫວ່າງບັນດາສະມາຄົມ, ອົງການຕາງໜ້າຫວຽດນາມ ແລະ ອົງການປະຊາຄົມຢູ່ເອີຣົບ.
ຢູ່ເຊັກ, ສະຖານເອກອັກຄະລັດຖະທູດຫວຽດນາມ ໄດ້ຕີລາຄາສູງຕໍ່ບົດບາດຂອງປະຊາຄົມຊາວຫວຽດນາມໃນການສ້າງສາສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດຢູ່ສະເໝີ.
ພວກເຮົາປາຖະໜາທີ່ຈະສືບຕໍ່ຮ່ວມເດີນທາງ ແລະ ສະໜັບສະໜູນບັນດາຂໍ້ລິເລີ່ມທີ່ເປັນຮູບປະທຳ, ຊຸກຍູ້ການແລກປ່ຽນລະຫວ່າງຮຸ່ນຄົນ ແລະ ສ້າງເງື່ອນໄຂໃຫ້ປະຊາຄົມສົ່ງເສີມບົດບາດເປັນຂົວເຊື່ອມໃນດ້ານເສດຖະກິດ, ວັດທະນະທຳ, ການສຶກສາ ແລະ ການແລກປ່ຽນປະຊາຊົນ.
ຊາວຫວຽດນາມແຕ່ລະຮຸ່ນຄົນຢູ່ຕ່າງປະເທດລ້ວນແຕ່ມີວິທີການສະເພາະຂອງຕົນໃນການສະແດງຄວາມຮັກຕໍ່ບ້ານເກີດເມືອງນອນ. ຖ້າຫາກຄົນຮຸ່ນກ່ອນໄດ້ສ້າງປະຊາຄົມດ້ວຍຄວາມດຸໝັ່ນ, ຄວາມມຸ່ງມັ່ນພະຍາຍາມກ້າວຂຶ້ນ ແລະ ຈິດໃຈຊ່ວຍເຫຼືອເຊິ່ງກັນ ແລະ ກັນ, ຄົນຮຸ່ນໜຸ່ມໃນປັດຈຸບັນກໍສາມາດສືບທອດດ້ວຍຄວາມຮູ້, ຄວາມຄິດສ້າງສັນ ແລະ ຄວາມສາມາດໃນການເຊື່ອມເຂົ້າກັບສາກົນ.
ສິ່ງທີ່ຈຳເປັນແມ່ນການສ້າງຄວາມເຊື່ອມໂຍງລະຫວ່າງປະສົບການຂອງຄົນຮຸ່ນກ່ອນ ກັບຄວາມປາຖະໜາ ແລະ ຄວາມສາມາດຂອງຄົນຮຸ່ນສືບທອດ.
ມະຫາສາມັກຄີແຫ່ງຊາດບໍ່ພຽງແຕ່ແມ່ນຄວາມຜູກພັນກັບບັນດາຄຸນຄ່າໃນອະດີດເທົ່ານັ້ນ, ແຕ່ຍັງແມ່ນຄວາມຮັບຜິດຊອບໃນການຮ່ວມກັນສ້າງອະນາຄົດ.
ຂ້າພະເຈົ້າຫວັງວ່າ ຊາວຫວຽດນາມທຸກຄົນຢູ່ເຊັກ ແລະ ທົ່ວເອີຣົບ, ບໍ່ວ່າຈະເປັນຄົນຮຸ່ນໃດ, ປະກອບອາຊີບຫຍັງ ຫຼື ດຳລົງຊີວິດຢູ່ໃສກໍຕາມ, ລ້ວນແຕ່ຮູ້ສຶກເຖິງຄວາມຜູກພັນກັບບ້ານຫຼັງໃຫຍ່ຮ່ວມກັນ ນັ້ນກໍຄືຊາດຫວຽດນາມ, ມີໂອກາດປະກອບສ່ວນໃຫ້ແກ່ປະຊາຄົມ ແລະ ໄດ້ຮັບການຕ້ອນຮັບຢູ່ສະເໝີເມື່ອຫວນຄືນສູ່ບ້ານເກີດເມືອງນອນ.
ຂໍຮຽນທ່ານເອກອັກຄະລັດຖະທູດ, ຈາກຂີດໝາຍພິເສດຄັ້ງນີ້, ທ່ານຢາກຝາກສານຫຍັງເຖິງປະຊາຄົມຊາວຫວຽດນາມຢູ່ເຊັກ ແລະ ທົ່ວເອີຣົບ ກ່ຽວກັບຈິດໃຈສາມັກຄີ, ຄວາມຮັບຜິດຊອບໃນການເຊື່ອມເຂົ້າກັບສັງຄົມ ແລະ ຄວາມຜູກພັນກັບບ້ານເກີດເມືອງນອນ, ປະເທດຊາດ?
ໃນໂອກາດນີ້, ຂ້າພະເຈົ້າຢາກສົ່ງສານເຖິງປະຊາຄົມຊາວຫວຽດນາມຢູ່ເຊັກ ແລະ ທົ່ວເອີຣົບວ່າ ບໍ່ວ່າຈະດຳລົງຊີວິດຢູ່ໃສ, ເປັນຄົນຮຸ່ນໃດ ຫຼື ປະກອບອາຊີບຫຍັງກໍຕາມ, ຄວາມຮັກແພງຂອງຄົນຮ່ວມຊາດ ແລະ ຮາກເຫງົ້າຂອງຊາດ ຍັງຄົງເປັນສາຍໃຍທີ່ເຊື່ອມໂຍງກັນຢ່າງແໜ້ນແຟ້ນສະເໝີ.
ຄວາມສາມັກຄີສ້າງກຳລັງ, ການເຊື່ອມເຂົ້າກັບສັງຄົມເປີດໂອກາດພັດທະນາ, ສ່ວນຄວາມຮັກ ແລະ ຄວາມຮັບຜິດຊອບທີ່ມຸ່ງສູ່ບ້ານເກີດເມືອງນອນ ແລະ ປະເທດຊາດ ແມ່ນບັນດາຄຸນຄ່າອັນສັກສິດຂອງຊາວຫວຽດນາມແຕ່ລະຄົນ.
ປະການທຳອິດ, ຂ້າພະເຈົ້າຫວັງວ່າ ພີ່ນ້ອງຈະສືບຕໍ່ຮັກສາ ແລະ ສົ່ງເສີມປະເພນີສາມັກຄີ, ຄວາມຮັກແພງເອື້ອອາທອນ, ເອົາໃຈໃສ່ຊ່ວຍເຫຼືອກັນໃນຊີວິດປະຈຳວັນ, ການເຮັດວຽກ ແລະ ການຮ່ຳຮຽນ.
ປະຊາຄົມຊາວຫວຽດນາມຢູ່ເຊັກໄດ້ຜ່ານຂະບວນການສ້າງຕັ້ງ ແລະ ພັດທະນາມາຢ່າງຍາວນານ, ຄ່ອຍໆຢືນຢັນຖານະຂອງຕົນໃນສັງຄົມປະເທດເຈົ້າພາບ. ບັນດາຜົນສຳເລັດເຫຼົ່ານັ້ນເກີດຂຶ້ນຈາກຈິດໃຈດຸໝັ່ນ, ຄວາມມຸ່ງມັ່ນຜ່ານຜ່າຄວາມຫຍຸ້ງຍາກ ແລະ ການເກື້ອກູນ, ຄວາມຜູກພັນຂອງຫຼາຍຮຸ່ນຄົນ.
ພວກເຮົາຄວນສືບຕໍ່ໃຫ້ຄວາມສຳຄັນຕໍ່ບັນດາຄຸນຄ່າເຫຼົ່ານັ້ນ, ພ້ອມທັງຍົກສູງຈິດໃຈການສົນທະນາ, ເຄົາລົບຄວາມແຕກຕ່າງ, ຮ່ວມກັນສ້າງປະຊາຄົມໃຫ້ນັບມື້ນັບເຂັ້ມແຂງ, ມີອາລະຍະທຳ ແລະ ມີຄວາມເມດຕາກະລຸນາ.
ປະການທີສອງ, ຂ້າພະເຈົ້າຫວັງວ່າ ພີ່ນ້ອງຈະສືບຕໍ່ເປັນເຈົ້າການເຊື່ອມເຂົ້າກັບສັງຄົມຢ່າງເລິກເຊິ່ງ, ປະຕິບັດກົດໝາຍຂອງປະເທດເຈົ້າພາບຢ່າງເຂັ້ມງວດ, ສົ່ງເສີມຄວາມສາມາດຂອງຕົນ ແລະ ປະກອບສ່ວນຢ່າງຕັ້ງໜ້າໃຫ້ແກ່ສັງຄົມທີ່ຕົນພວມດຳລົງຊີວິດ.
ການເຊື່ອມເຂົ້າກັບສັງຄົມບໍ່ໄດ້ໝາຍຄວາມວ່າ ຈະຕ້ອງສູນເສຍເອກະລັກວັດທະນະທຳຂອງຊາດ. ກົງກັນຂ້າມ, ເມື່ອຊາວຫວຽດນາມແຕ່ລະຄົນຮ່ຳຮຽນ, ເຮັດວຽກ, ດຳເນີນທຸລະກິດຢ່າງມີປະສິດທິຜົນ ແລະ ມີການປະກອບສ່ວນຢ່າງຕັ້ງໜ້າ, ພາບລັກຂອງຫວຽດນາມທີ່ມີຄວາມຫ້າວຫັນ, ເປັນມິດ, ມີຄວາມຮັບຜິດຊອບ ແລະ ໜ້າເຊື່ອຖື ກໍຈະໄດ້ຮັບການເຜີຍແຜ່ຢ່າງກວ້າງຂວາງ.
ສຳລັບປະຊາຄົມຊາວຫວຽດນາມຢູ່ເຊັກ, ບັນດາການປະກອບສ່ວນດັ່ງກ່າວຍັງມີຄວາມໝາຍໃນທາງປະຕິບັດ ຕໍ່ການເສີມສ້າງສາຍພົວພັນມິດຕະພາບມູນເຊື້ອ ແລະ ຂອບການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ.
ປະການທີສາມ, ຂ້າພະເຈົ້າຫວັງເປັນຢ່າງຍິ່ງວ່າ ຄົນຮຸ່ນໜຸ່ມຊາວຫວຽດນາມຢູ່ເອີຣົບ, ໂດຍສະເພາະຜູ້ທີ່ເກີດ ແລະ ເຕີບໃຫຍ່ຢູ່ທີ່ນີ້, ຈະສືບຕໍ່ຮຽນຮູ້, ຮັກສາ ແລະ ພາກພູມໃຈໃນຮາກເຫງົ້າຫວຽດນາມຂອງຕົນ.
ຊາວໜຸ່ມອາດຈະມີສັນຊາດທີ່ແຕກຕ່າງກັນ, ໃຊ້ຫຼາຍພາສາ ແລະ ເຕີບໃຫຍ່ໃນສະພາບແວດລ້ອມວັດທະນະທຳທີ່ຫຼາກຫຼາຍ. ແນວໃດກໍດີ, ສິ່ງເຫຼົ່ານັ້ນບໍ່ໄດ້ຂັດຂວາງການຮັກສາພາສາຫວຽດນາມ, ການຮຽນຮູ້ປະຫວັດສາດຂອງຊາດ, ການໃຫ້ຄຸນຄ່າຕໍ່ຄວາມຮັກແພງໃນຄອບຄົວ ແລະ ບັນດາປະເພນີອັນດີງາມຂອງບັນພະບຸລຸດ.
ຂ້າພະເຈົ້າຍັງຫວັງວ່າ ຊາວໜຸ່ມຈະສົ່ງເສີມຄວາມຮູ້, ພອນສະຫວັນ ແລະ ຄວາມສາມາດສ້າງສັນຂອງຕົນ ເພື່ອກາຍເປັນຂົວເຊື່ອມລະຫວ່າງຫວຽດນາມ ແລະ ເອີຣົບ, ປະກອບສ່ວນຢ່າງເປັນຮູບປະທຳໃຫ້ແກ່ປະຊາຄົມ ແລະ ສັງຄົມ.
ສຳລັບຝ່າຍບ້ານເກີດເມືອງນອນ, ພັກ ແລະ ລັດ ໄດ້ເອົາໃຈໃສ່ ແລະ ມອບຄວາມຮັກແພງເປັນພິເສດໃຫ້ແກ່ພີ່ນ້ອງຮ່ວມຊາດຫວຽດນາມຢູ່ຕ່າງປະເທດຢູ່ສະເໝີ, ພ້ອມທັງສືບຕໍ່ປັບປຸງບັນດາກົນໄກເຊື່ອມໂຍງ ເພື່ອໃຫ້ຊາວຫວຽດນາມຢູ່ຕ່າງປະເທດສາມາດເຂົ້າຮ່ວມປະກອບຄຳຄິດຄຳເຫັນ, ແບ່ງປັນປະສົບການ, ລົງທຶນ ແລະ ຮ່ວມມືໃນດ້ານວິທະຍາສາດ - ເຕັກໂນໂລຊີ, ການສຶກສາ ແລະ ນະວັດຕະກຳ.
ຊາວຫວຽດນາມແຕ່ລະຄົນຢູ່ຕ່າງປະເທດ ລ້ວນແຕ່ສາມາດປະກອບສ່ວນໃຫ້ແກ່ປະເທດຊາດດ້ວຍວິທີການທີ່ເໝາະສົມກັບເງື່ອນໄຂຂອງຕົນ, ນັບແຕ່ຂໍ້ລິເລີ່ມໜຶ່ງ, ໂຄງການຮ່ວມມືໜຶ່ງ ໄປຈົນເຖິງການສອນພາສາຫວຽດນາມໃຫ້ແກ່ຄົນຮຸ່ນໜຸ່ມ ຫຼື ການເຜີຍແຜ່ບັນດາຄຸນຄ່າວັດທະນະທຳອັນດີງາມຂອງຊາດ.
ສຳລັບຂ້າພະເຈົ້າ, ບ້ານເກີດເມືອງນອນບໍ່ພຽງແຕ່ແມ່ນສະຖານທີ່ທີ່ແຕ່ລະຄົນໄດ້ເກີດມາເທົ່ານັ້ນ, ແຕ່ຍັງແມ່ນບ່ອນເກັບຮັກສາຄວາມຊົງຈຳ, ຮາກເຫງົ້າ ແລະ ບັນດາຄຸນຄ່າທີ່ສ້າງເປັນເອກະລັກສະເພາະຂອງຕົນ.
ບໍ່ວ່າໄລຍະຫ່າງທາງພູມສາດຈະໄກພຽງໃດກໍຕາມ, ຄວາມຮັກ ແລະ ຄວາມຮັບຜິດຊອບຕໍ່ປິຕຸພູມ ຍັງຄົງຢູ່ໃນຄວາມຄິດ ແລະ ຫົວໃຈຂອງຊາວຫວຽດນາມແຕ່ລະຄົນສະເໝີ.
ຂ້າພະເຈົ້າຫວັງວ່າ ຈາກຂີດໝາຍການຈັດວັນບຸນມະຫາສາມັກຄີແຫ່ງຊາດຫວຽດນາມຢູ່ເອີຣົບເປັນຄັ້ງທຳອິດນີ້, ຈິດໃຈສາມັກຄີຈະສືບຕໍ່ແຜ່ຂະຫຍາຍໃນປະຊາຄົມຊາວຫວຽດນາມຢູ່ເຊັກ ແລະ ບັນດາປະເທດເອີຣົບ.
ຜ່ານນັ້ນ, ຊາວຫວຽດນາມຢູ່ຕ່າງປະເທດຫຼາຍຮຸ່ນຄົນ ຈະບໍ່ພຽງແຕ່ສືບຕໍ່ພາກພູມໃຈໃນບັນດາຜົນສຳເລັດທີ່ໄດ້ຮັບເທົ່ານັ້ນ, ແຕ່ຍັງຈະຮ່ວມກັນສ້າງຜົນສຳເລັດໃໝ່ໆ, ປະກອບສ່ວນໃຫ້ແກ່ການພັດທະນາຂອງປະເທດຊາດ ແລະ ສັງຄົມປະເທດເຈົ້າພາບ.
ສາມັກຄີເພື່ອຄວາມເຂັ້ມແຂງ, ເຊື່ອມເຂົ້າກັບສັງຄົມເພື່ອການພັດທະນາ, ຮັກສາຮາກເຫງົ້າເພື່ອບໍ່ໃຫ້ສູນເສຍເອກະລັກຂອງຕົນ. ນັ້ນແມ່ນສານທີ່ຂ້າພະເຈົ້າຢາກຝາກເຖິງພີ່ນ້ອງຮ່ວມຊາດຫວຽດນາມທົ່ວເອີຣົບ.
 ເຊື່ອມໂຍງເຍົາວະຊົນ ຫວຽດນາມ ຢູ່ຕ່າງປະເທດ ກັບທະເລ, ໝູເກາະ ບ້ານເກີດເມືອງນອນ ຍສໝ - ວັນທີ 23/7, 100 ເຍົາວະຊົນ, ນັກສຶກສາ ຫວຽດນາມ ຢູ່ຕ່າງປະເທດ ທີ່ດີເລີ່ມ ເຂົ້າຮ່ວມ ຄ້າຍຮ້ອນ ຫວຽດນາມ 2026 ໄດ້ມາຢ້ຽມຢາມ, ແລກປ່ຽນ ຢູ່ທີ່ ສະຖາບັນກອງທັບເຮືອ, ແຂວງ ແຄັງຮວ່າ. |
 ໄວໜຸ່ມ ຫວຽດນາມ ຢ່າງມັ້ນໃຈ ໂຄສະນາບ້ານເກີດເມືອງນອນ ຢູ່ທີ່ງານມະໂຫລານເຍົາວະຊົນລະຫວ່າງຊາດ ຍສໝ - ບໍ່ພຽງແຕ່ຢືນຢັນຈິດໃຈການເຊື່ອມໂຍງທົ່ວໂລກ, ຄະນະຜູ້ຕາງໜ້າ ຫວຽດນາມ ຢູ່ທີ່ ງານມະໂຫລານເຍົາວະຊົນລະຫວ່າງຊາດ 2026 ຍັງໄດ້ສ້າງຄວາມປະທັບໃຈຢ່າງເລິກເຊິ່ງ ເມື່ອເປັນເຈົ້າການສ້າງການກະຈາຍ, ແນະນຳພາບພົດອັນສົດງາມ ກ່ຽວກັບວັດທະນະທຳ ແລະ ຄົນ ຫວຽດນາມ ມາສູ່ເພື່ອນມິດໃນທົ່ວໂລກ. |
ດວງດີ
