ທ່ານ ນາງ ບຸນພາມາ ໂພທິສານ ຮອງຫົວໜ້າຫ້ອງການ ກອງທຶນປົກປັກຮັກ ສາສິ່ງແວດລ້ອມ. (ພາບ:ເກດສະໜາ)

ໂອກາດດັ່ງກ່າວ, ທ່ານ ນາງ ບຸນພາມາ ໂພທິສານ ຮອງຫົວໜ້າຫ້ອງການ ກອງທຶນປົກປັກຮັກ ສາສິ່ງແວດລ້ອມ ກ່າວວ່າ: ການຈັດກິດຈະກຳໃນຄັ້ງນີ້, ເປັນການປະກອບສ່ວນເຮັດໃຫ້ສັງຄົມ ກໍຄື ມວນຊົນທັງພາຍໃນ ແລະ ຕ່າງປະເທດ ເຫັນໄດ້ຄວາມສຳຄັນ ໃນການປົກປັກຮັກສາສິ່ງແວດລ້ອມ, ຫລຸດຜ່ອນມົນລະຜິດ, ຫລຸດຜ່ອນການໃຊ້ຖົງປຼາສະຕິກ ແລະ ປູກຈິດສຳນຶກໃຫ້ທຸກຄົນ ໃນສັງຄົມ ມີສ່ວນຮ່ວມຊ່ວຍກັນ ກິນແລ້ວເກັບ, ກິນແລ້ວມ້ຽນ, ບໍ່ຖີ້ມຂີ້ເຫຍື້ອຊະຊາຍ ແນໃສ່ປົກປັກຮັກສາສິ່ງ ແວດລ້ອມ ໃຫ້ມີຄວາມສະອາດງາມຕາ ທັງເປັນການຈັດຕັ້ງປະຕິບັດ 6 ສ ຂອງນະຄອນຫລວງວຽງຈັນ ວາງອອກ ໂດຍສະເພາະ ສ ສະອາດ ແລະ ສ ສີຂຽວ ໃຫ້ປະກົດຜົນເປັນຈິງເທື່ອລະກ້າວ.

ທ່ານ ນາງ ບຸນພາມາ ໂພທິສານ ໃຫ້ຮູ້ຕື່ມວ່າ: ອົງການສະຫະປະຊາຊາດ ໄດ້ຈັດກອງປະຊຸມສຸດຍອດໂລກ ກ່ຽວກັບສິ່ງແວດລ້ອມຂອງມະນຸດ ໃນປີ 1972 ແລະ ໄດ້ຮັບຮອງເອົາວັນທີ 5 ມິຖຸນາ ເປັນວັນສິ່ງແວດລ້ອມໂລກ ຈົນມາຮອດປັດຈຸບັນ, ສປປ ລາວ ກໍໄດ້ຖືເອົາວຽກງານປົກປັກຮັກສາສິ່ງແວດລ້ອມ ເປັນວຽກງານບູລິມະສິດລະດັບຊາດ ແລະ ໄດ້ລະບຸໃນກົດໝາຍວ່າດ້ວຍການປົກປັກຮັກ ສາສິ່ງແວດລ້ອມ ແລະ ຖືເອົາວັນທີ 5 ມິຖຸນາ ເປັນວັນສິ່ງແວດລ້ອມແຫ່ງຊາດ.

（ແຫຼ່ງ​ຂໍ້​ມູນ​： ທະນູທອງ /ຂ​ປ​ລ）