ຕາມອົງການອະນາໄມໂລກ (WHO) ແລ້ວ, ຊັບສິນໃຫຍ່ທີ່ສຸດຂອງມະນຸດໃນການຕໍ່ສູ້ຕ້ານເຊື້ອພະຍາດ Covid-19 ໃນປະຈຸບັນຕົວຈິງແມ່ນຈິດປັນຍາ ແລະຄວາມສາມັກຄີ. ການຕໍ່ສູ້ຕ້ານເຊື້ອພະຍາດ Covid-19 ບໍ່ແມ່ນການຕໍ່ສູ້ສະເພາະຂອງໃຜມັນ ຫຼື ຂອງປະເທດໃດປະເທດໜຶ່ງ, ສະນັ້ນບັນດາປະເທດຕ່າງໆຄວນເພີ່ມທະວີການແລກປ່ຽນຂໍ້ມູນຂ່າວສານ ແລະໜູນຊ່ວຍເຊິ່ງກັນ ແລະກັນດ້ວຍຄວາມຕິດສິນໃຈພ້ອມກັນເອົາຊະນະເຊື້ອພະຍາດນີ້ໃຫ້ໄດ້.
 |
ບັນດາປະເທດໃນໂລກລ້ວນແຕ່ພວມຍູ້ແຮງວຽກງານປ້ອງກັນ, ຕ້ານເຊື້ອພະຍາດ Covid-19, ຮັບປະກັນຄວາມປອດໄພໃຫ້ແກ່ປະຊາຊົນ. (ພາບປະກອບຄັດຈາກ:baodanang.vn)
ໜຶ່ງໃນບັນດາປະເທດຖືກຜົນສະທ້ອນຢ່າງໜັກໜ່ວງທີ່ສຸດຈາກເຊື້ອພະຍາດ Covid-19, ສ.ເກົາຫຼີ ໄດ້ເຫັນກັບຕາຈໍານວນຄົນຕິດເຊື້ອພະຍາດຄ່ອຍໆຫຼຸດລົງໃນຊຸມວັນມ່ໍໆມານີ້. ສິ່ງເຫຼົ່ານີ້ໄດ້ຖືວ່າແມ່ນເລີ່ມຕົ້ນມາຈາກຫຼາຍປັດໄຈ, ລວມມີການວິເຄາະເລືອດເປັນຈໍານວນຫຼວງຫຼາຍ, ປັບປຸງການເຊື່ອມຕໍ່ກັບປະຊາຊົນ ແລະແອບພີເຄຊັ່ນເຕັກໂນໂລຢີ.
ທ່ານ Joko Widodo ປະທານາທິບໍດີອິນໂດເນເຊຍ ໄດ້ສະເໜີໃຫ້ປະຊາຊົນຮັກສາໄລຍະຫ່າງການສໍາຜັດຍ້ອນວ່າການກະທໍານີ້ແມ່ນສິ່ງສໍາຄັນທີ່ສຸດຕ້ອງໄດ້ເຮັດໃນປະຈຸບັນນີ້. ໃນຂະນະນັ້ນ, ທ່ານ Samdech Techo Hun Sen ນາຍົກລັດຖະມົນຕີກໍາປູເຈຍ ກໍ່ຮຽກຮ້ອງໃຫ້ປະຊາຊົນປະເທດນີ້ຈົ່ງມີຄວາມທຸ່ນທ່ຽງ ແລະໝູນໃຊ້ບັນດາມາດຕະການທຳຄວາມສະອາດຢ່າງປະຈໍາເພື່ອສຸຂະພາບຂອງຕົນເອງ ແລະຂອງສະມາຊິກໃນຄອບຄົວ.
ສຳລັບອີຣານ, ທ່ານພົນຈັດຕະວາ, Mohammad Baqeri ປະທານສະພາເສນາທິການບັນດາກໍາລັງປະກອບອາວຸດອີຣານ ໃຫ້ຮູ້ວ່າ, ໃນຮອບເວລານັບແຕ່ 7 ເຖິງ 10 ວັນຈະມາເຖິງນີ້, ທົ່ວປະເທດຈະໄດ້ຕິດຕາມກວດກາຜ່ານເຄືອຂ່າຍອິນເຕີແນັດ, ດ້ວຍໂທລະສັບມືຖື ແລະຖ້າມີຄວາມຈໍາເປັນນັ້ນແມ່ນລະດົມຄົນເພື່ອຄົ້ນພົບບັນດາກໍລະນີຖືກສົງໄສຕິດເຊື້ອພະຍາດ. ນອກຈາກນັ້ນ, ກອງທັບອີຣານ ຈະສ້າງຕັ້ງ 1.000 ຮາກຖານການກວດ, ປິ່ນປົວພະຍາດໃຫ້ແກ່ບັນດາຄົນເຈັບທີ່ຕິດເຊື້ອພະຍາດ Covid-19.
ໂດຍເປັນປະທານກອງປະຊຸມຂອງຄະນະຊີ້ນຳແຫ່ງຊາດກ່ຽວກັບການປ້ອງກັນ, ສະກັດກັ້ນໂລກລະບາດ Covid – 19 ຢູ່ສຳນັກງານລັດຖະບານ, ຕອນເຊົ້າວັນທີ 16 ມີນາ, ທ່ານ ຫວູດຶກດາມຮອງນາຍົກລັດຖະມົນຕີ ຫວຽດນາມ, ຫົວໜ້າຄະນະຊີ້ນຳໄດ້ຢັ້ງຢືນວ່າ ຫວຽດນາມສືບຕໍ່ສະກັດກັ້ນໂລກລະບາດຢ່າງແຮງ ແລະ ຂ້ຽວຂາດ ເພື່ອຮັບມືກັບການຜັນແປຢ່າງສັບສົນຂອງໂລກລະບາດ Covid – 19ໃນຂອບເຂດທົ່ວໂລກ. ທີ່ກອງປະຊຸມ, ບັນດາສະມາຊິກຄະນະຊີ້ນຳໄດ້ໃຫ້ຂໍ້ສັງເກດວ່າ ສະພາບການຂອງໂລກລະບາດ Covid – 19 ໃນທົ່ວໂລກພວມມີການຜັນແປຢ່າງສັບສົນ. ດັ່ງນັ້ນ ຫວຽດນາມຕ້ອງຢຶດໝັ້ນບັນດາມາດຕະການຕິດຕາມກວດກາພົນລະເມືອງຕ່າງປະເທດເຂົ້າເມືອງຫວຽດນາມຢ່າງເຄັ່ງຄັດ.
（ໄຊພອນ）
