 |
ບັນດາທ້ອງຖິ່ນຂອງຫວຽດນາມ ໄດ້ຈັດຕັ້ງການເຄື່ອນໄຫວທີ່ມີຄວາມໝາຍຫຼາຍຢ່າງ.
ຕອນເຊົ້າຂອງວັນທີ 6 ມີນາ, ຢູ່ຮ່າໂນ້ຍ, ສະຫະພັນແມ່ຍິງຫວຽດນາມ ສົມທົບກັບອົງການອົບພະຍົບສາກົນ ຈັດກອງປະຊຸມສຳມະນາເປີດສາກໂຄງການເພີ່ມທະວີກຳລັງຄວາມສາມາດຂອງຫວຽດນາມ ເພື່ອແນໃສ່ໜູນຊ່ວຍການເຊື່ອມຕົວເຂົ້າກັບສັງຄົມແບບຍືນຍົງ ໃຫ້ແກ່ແມ່ຍິງອົບພະຍົມໄດ້ກັບເມືອປະເທດ ແລະ ຄອບຄົວຂອງເຂົາເຈົ້າ. ຢູ່ແຂວງລອງອານ, ການນໍາ ສະຫະພັນແມ່ຍິງຫວຽດນາມ ແຂວງ ລອງອານ ພ້ອມກັບສະຫະພັນແມ່ຍິງຂັ້ນຕ່າງໆ ໄດ້ຈັດຕັ້ງຄະນະໄປຢ້ຽມຢາມ, ມອບຂອງຂວັນໃຫ້ແກ່ພະນັກງານຂອງສະຫະພັນແມ່ຍິງອາຍຸການຕ່າງໆ, ຢ້ຽມຢາມແມ່ຍິງ ຜູ້ເປັນພະຍາດໜັກ, ເດັກນ້ອຍເຈັບປ່ວຍ ແລະ ປະສົບກັບຄວາມຫຍຸ້ງຍາກເປັນພິເສດ. ຢູ່ແຂວງເທື່ອທຽນເຫວ້, ທ່ານ ຟານງອັກເທາະ - ປະທານຄະນະກໍາມະການປະຊາຊົນແຂວງເທື່ອທຽນເຫວ້ ຫາກໍອອກໜັງສືທາງລັດຖະການ ໂດຍໄດ້ຮຽກຮ້ອງໃຫ້ ສູນອະນຸລັກຮັກສາມໍລະດົກກຸງເກົ່າເຫວ້ ຍົກເວ້ັນຄ່າຊື້ປີ້ເຂົ້າຢ້ຽມຊົມເຂດປູຊະນີຍະສະຖານມໍລະດົກກຸງເກົ່າເຫວ້ ສໍາລັບ ແມ່ຍິງໃນທົ່ວປະເທດ ແລະ ສາກົນ ເມື່ອເຂົາເຈົ້ານຸ່ງຊຸດຍາວປະຈໍາຊາດຂອງຫວຽດນາມ.
ຕອນເຊົ້າວັນທີ 6 ມີນາ, ສະຫະພັນແມ່ຍິງນະຄອນເກີນເທີ ໄດ້ຈັດພິທີພົບປະເນື່ອງໃນໂອກາດ ສະເຫຼີມສະຫຼອງວັນແມ່ຍິງສາກົນຄົບຮອບ 110 ປີ (8/3/1910 - 8/3/2020) , ປຸກລະດົມການຕອບສະໜອງເຫດການ “ເສື້ອຍາວ-ມໍລະດົກວັດທະນະທຳຫວຽດນາມ”. ທ່ານນາງ ວໍ້ກີມທວາ, ຮອງປະທານສະຫະພັນແມ່ຍິງນະຄອນເກີນເທີ ປາດຖະໜາວ່າ, ບັນດາພະນັກງານ, ສະມາຊິກແມ່ຍິງໃນບໍລິເວນ ຈະສືບຕໍ່ຍູ້ແຮງຂະບວນການແຂ່ງຂັນຮັກຊາດ, ບັນດາບັ້ນຂົນຂວາຍຂອງສະຫະພັນ….ພິເສດ, ໃນໄລຍະນີ້, ແມ່ນຕັ້ງໜ້າຕອບສະໜອງການປຸລະດົມເຫດການ “ເສື້ອຍາວ-ມໍລະດົກວັດທະນະທຳຫວຽດນາມ” ໃຫ້ສະມາຊິກແມ່ຍິງຂັ້ນຕ່າງໆ, ປະກອບສ່ວນບົດບາດຂອງແມ່ຍິງ ໃນການອະນຸລັກຮັກສາມໍລະດົກວັດທະນະທຳນັບພັນປີຂອງຊາດ.
ຕອນບ່າຍວັນທີ 04 ມີນາ ຢູ່ຮ່າໂນ້ຍ, ທ່ານນາງຮອງປະທານປະເທດຫວຽດນາມ ດັ້ງທິງອັກທິ້ງ ໄດ້ໃຫ້ການຕ້ອນຮັບກຸ່ມແມ່ຍິງປະຊາຄົມອາຊຽນ ໂດຍທ່ານນາງ ເອກອັກຄະລັດຖະທູດ ຫງວຽນຫງວຽດງາ ປະທານກຽດຕິມະສັກກຸ່ມແມ່ຍິງດັ່ງກ່າວ ຢູ່ຮ່າໂນ້ຍ ເປັນຫົວໜ້າຄະນະ ເນື່ອງໃນໂອກາດສະເຫຼີມສະຫຼອງ 110 ປີ ແຫ່ງວັນແມ່ຍິງສາກົນ ຄືວັນທີ 8 ມີນາ. ທີ່ການຕ້ອນຮັບ, ທ່ານນາງຮອງປະທານປະເທດຫວຽດນາມ ດັ້ງທິງອັກທິ້ງ ໄດ້ສະແດງຄວາມຫວັງວ່າ ໃນໄລຍະທີ່ຈະມາເຖິງ ກຸ່ມແມ່ຍິງ ຈະສືບຕໍ່ເອົາໃຈໃສ່ເຖິງການດໍາລົງຊີວິດຂອງປະຊາຊົນເວົ້າລວມ ແລະ ແມ່ຍິງເດັດນ້ອຍເວົ້າສະເພາະ, ພິເສດແມ່ນເອົາໃຈໃສ່ເຖິງແມ່ຍິງ ບັນດາຜູ້ດ້ອຍໂອກາດໃນສັງຄົມ.
（ໄຊພອນ）
