 |
ສົງຄາມການຄ້າ ລະຫວ່າງ ອາເມລິກາ ແລະ ຈີນ ເພີ່ມທະວີຄວາມຮຸນແຮງຂື້ນສັກໄຊ້.
ວັນທີ 17 ກັນຍາ, ຄວາມເຄັ່ງຕຶງດ້ານການຄ້າ ລະຫວ່າງສອງ ຍັກໃຫຍ່ ເສດຖະກິດ ໂລກ, ປະທານາທິບໍດີ ອາເມລິກາ Donald Trump ປະກາດຂື້ນອັດຕາພາສີ ອີກ 10% ສຳລັບສິນຄ້ານຳເຂົ້າ ຈາກປະເທດຈີນ ທີ່ມີມູນຄ່າເຖິງ 200 ຕື້ USD ເລີ່ມຕັ້ງແຕ່ວັນທີ 24 ກັນຍາເປັນຕົ້ນໄປ ແລະ ຈະເພີ່ມຂື້ນຮອດ 25% ໃນຕົ້ນປີ 2019. ອີງຕາມການແຈ້ງການຂອງທຳນຽບຂາວໃຫ້ຮູ້ວ່າ: ຂໍ້ຕົກລົງ ສະບັບນີ້ ຂອງລັດຖະບານ ອາເມລິກາ ໄດ້ຍົກໃຫ້ເຫັນ ໂດຍອີງໃສ່ຜົນຂອງການສຳຫຼວດທີ່ສະແດງໃຫ້ເຫັນວ່າ: ຈີນ ໄດ້ມີບັນດານະໂຍບາຍ ກໍ່ຄືການເຄື່ອນໄຫວ ບໍ່ຍຸຕິທຳ ກ່ຽວຂ້ອງເຖິງຊັບສິນທາງປັນຍາ ແລະ ເຕັກໂນໂລຊີ ຂອງ ອາເມລິກາ. ທ່ານປະທານາທິບໍດີ Donald Trump ກໍ່ກ່າວເຕືອນວ່າ: ຖ້າຫາກ ຈີນ ມີພຶດຕິກຳໂຕ້ຕອບທີ່ແນໃສ່ກຳມະກອນ ແລະ ບັນດາຂະແໜງອຸດສາຫະກຳອື່ນໆຂອງອາເມລິກາ, ອາເມລິກາ ຈະດຳເນີນໄລຍະ 3 ໃນເພີ່ມອັດຕາພາສີ ສຳລັບ ສິນຄ້ານຳເຂົ້າ ຈາກ ປະເທດຈີນອາດມີມູນຄ່າເຖິງ 267 ຕື້ USD ໃນທັນທີ.
ກ່ອນໜ້ານີ້, ໃນວັນທີ 16 ກັນຍາ, ເຈົ້າໜ້າທີ່ ຈີນ ທ່ານໜຶ່ງໃຫ້ຮູ້ວ່າ: ລັດຖະບານ ຈີນ ອາດຈະປະຕິເສດເຂົ້າຮ່ວມການເຈລະຈາດ້ານການຄ້າໃໝ່ກັບ ອາເມລິກາ ເຊິ່ງຄາດວ່າຈະດຳເນີນໃນທ້າຍເດືອນກັນຍານີ້ ຖ້າຫາກອຳນາດການປົກຄອງຂອງທ່ານປະທານາທິບໍດີ Donald Trump ສືບຕໍ່ຈັດວາງອັດຕາພາສີເພີ່ມເຕີມສຳລັບບັນດາປະເພດສິນຄ້າຂອງຈີນ.
（ຫັດທະບູນ）
