 |
ພາບປະກອບ
ທ່ານ ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາກະຊວງ ສາທາລະນະສຸກໄດ້ໃຫ້ສຳພາດຕໍ່ສື່ມວນຊົນ ເມື່ອວັນທີ 3 ກຸມພາ 2020 ນີ້ ທີ່ນະຄອນຫຼວງວຽງຈັນວ່າ: ປັດຈຸບັນສູນວິເຄາະ ແລະ ລະບາດວິທະຍາມີຄວາມພ້ອມ ໃນການກວດຫາເຊື້ອພະຍາດອັກເສບປອດສາຍພັນ ໃໝ່ ຫຼື ໄວຣັສໂຄໂຣນາ nCov ຊຶ່ງໃນ ໄລຍະຜ່ານມາກໍໄດ້ມີການລະ ບາດຂອງພະຍາດເມີສ ຊຶ່ງພວກ ເຮົາກໍມີຄວາມສາມາດກວດພະ ຍາດນັ້ນໄດ້ ແລະ ໃນໄລຍະ ຕໍ່ມາພວກເຮົາກໍໄດ້ມີລະບົບເຝົ້າລະວັງເຊື້ອໄຂ້ຫວັດ ແລະ ກໍໄດ້ມີການກວດຢ່າງເປັນປະ ຈຳ ແລະ ມີຕົວຢ່າງໃນທົ່ວປະ ເທດສົ່ງມາຕະຫຼອດ ເປັນຕົ້ນ ແມ່ນການກວດໄຂ້ຫວັດກໍຈະມີ H1N1 ຊຶ່ງພວກເຮົາກໍສາມາດ ກວດໄດ້ ແລະ ກໍໄດ້ໃຊ້ເຕັກນິກ ດຽວກັນ ໃນການກວດຫາໄວຣັສໂຄໂຣນານີ້ ຊຶ່ງສູນວິເຄາະ ແລະ ລະບາດວິທະຍາພວກ ເຮົາສາມາດກວດໄດ້ ແລະ ໄດ້ຮັບການຮັບຮອງເປັນສູນໄຂ້ຫວັດ ແຫ່ງຊາດ.
ທ່ານ ພອນປະດິດ ສັງໄຊຍະລາດ ຍັງໃຫ້ຮູ້ຕື່ມວ່າ: ປັດຈຸບັນທາງພວກເຮົາໄດ້ມີແຜນທີ່ຈະຂະຫຍາຍ ແລະ ຈະເອົາເຄື່ອງກວດ Real time PCR ໄປໄວ້ນຳສະຖານທີ່ທີມີຄວາມສ່ຽງ ເປັນຕົ້ນແມ່ນຢູ່ແຂວງທາງພາກເໜືອຄື: ແຂວງຫຼວງພະບາງ, ແຂວງ ຫຼວງນ້ຳທາ ເພື່ອຈະເຮັດໃຫ້ການກວດຫາເຊື້ອໄວຣັສໂຄໂຣນາວ່ອງໄວຂຶ້ນ ຊຶ່ງເຄື່ອງທີ່ຈະເອົາໄປໄວ້ນີ້, ແມ່ນຈະອອກຜົນໄດ້ໄວກວ່າເຄື່ອງທີ່ໃຊ້ໃນປັດຈຸບັນ ຊຶ່ງໃນປະເທດຈີນກໍໄດ້ນຳໃຊ້ເຄື່ອງດັ່ງກ່າວນີ້ ແລະ ການອອກຜົນທັງໝົດແມ່ນຈະມີການຄວບຄຸມຄຸນນະພາບເປັນຢ່າງດີ ຈະບໍ່ໄດ້ອອກຜົນແບບຜູ້ໃດກວດກໍໄດ້ ຊຶ່ງໃຊ້ເວລາປະມານ 4 ຊົ່ວໂມງກໍສາມາດອອກຜົນກວດໄດ້.
ກອງປະຊຸມປຶກສາຫາລືວຽກງານຂອງຄະນະສະເພາະກິດເພື່ອປ້ອງກັນ ຄວບຄຸມພະຍາດ ແລະ ແກ້ໄຂການແຜ່ລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫຼື ໂຄໂຣນາໄວຣັສ (nCov) ຈັດຂຶ້ນໃນວັນທີ 3 ກຸມພາ 2020 ທີ່ສຳນັກງານາຍົກລັດຖະມົນຕີ ເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ທັງເປັນຫົວໜ້າຄະນະສະເພາະກິດ ເພື່ອປ້ອງກັນ ຄວບຄຸມພະຍາດ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະ ໂລກສາຍພັນໃໝ່ ເປັນກຽດເຂົ້າຮ່ວມຊີ້ນຳຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍ ຄະນະສະເພາະກິດດັ່ງກ່າວ ເຂົ້າຮ່ວມ.
ໃນກອງປະຊຸມຄັ້ງນີ້ ທ່ານນາຍົກລັດຖະມົນຕີ ໄດ້ແຕ່ງຕັ້ງຄະນະກຳມະການສະເພາະກິດເຊິ່ງຄະນະດັ່ງກ່າວ ແມ່ນໄດ້ເລີ່ມເຮັດວຽກມາແຕ່ມື້ທີ່ໄດ້ຮັບແຈ້ງການລະບາດຂອງພະຍາດນີ້ຈາກ ສປ ຈີນ ມາແຕ່ຫົວທີແລ້ວ ຄະນະນີ້ມີຫຼາຍຂະແໜງການຈາກກະຊວງໃນຈຳນວນ 11 ທ່ານ ໂດຍແມ່ນທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ເປັນຫົວໜ້າ ທ່ານ ຮສ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ເປັນຮອງຫົວໜ້າ ແລະ ທ່ານ ຮສ ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ເປັນຮອງຫົວໜ້າ ແລະ ຜູ້ປະຈຳການ.
ໃນໂອກາດນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ມີຄວາມເຫັນ ແລະ ແນະນຳໃຫ້ແກ່ຄະນະສະເພາະກິດເອົາໃຈໃສ່ບາງດ້ານ ຕໍ່ການເຝົ້າລະວັງປ້ອງກັນພະຍາດ ເປັນຕົ້ນ ແມ່ນຕ້ອງເອົາໃຈໃສ່ໂຄສະນາປະຊາສຳພັນໃຫ້ປະຊາຊົນ ຮັບຮູ້ວິທີການປ້ອງກັນພະຍາດນີ້ຢ່າງກວ້າງຂວາງ ແລະ ໂຄສະນາການເອົາໃຈໃສ່ຂອງພັກ?ລັດຕໍ່ພະຍາດນີ້ ພ້ອມນີ້ ກໍໃຫ້ຄະນະສະເພາະກິດເອົາໃຈໃສ່ຢ່າງຮັດກຸມກວ່າເກົ່າ ຊອກໃຫ້ເຫັນຄວາມເປັນຈິງໃນກໍລະນີພະຍາດເກີດຂຶ້ນ ກໍໃຫ້ແຈ້ງຢ່າງລະອຽດເພື່ອຮັບມືແກ້ໄຂ ພ້ອມກັນນີ້ກໍເອົາໃຈໃສ່ເຝົ້າລະວັງ ແລະ ກວດກາໃນກໍລະນີທີ່ສົງໄສ ສຳລັບນັກສຶກສາຍັງຢູ່ ສປ ຈີນ ມອບໃຫ້ສະຖານ ທູດ ແລະ ກົງສູນ ໃຫ້ການຊ່ວຍເຫຼືອ ແລະ ເບິ່ງແຍງຢ່າງໃກ້ຊິດ ສະເໜີໃຫ້ໂຮງໝໍມິດຕະພາບ ພາກຂະຫຍາຍ ແລະ ໂຮງໝໍສູນກາງ 103 ເປັນບ່ອນກະກຽມຮອງຮັບປິ່ນປົວ ໃນກໍລະນີທີ່ອາດຈະເກີດຂຶ້ນ.
（ໄຊພອນ）
