 |
ປະທານາທິບໍດີສີ ຈິ້ນຜິງ ຂອງຈີນ ຫາລືກັບປະທານາທິບໍດີ ວະລາດີເມຍ ປູຕິນ ຂອງຣັດເຊຍ.
ປະທານາທິບໍດີສີ ຈິ້ນຜິງ ຂອງຈີນ ຫາລືກັບປະທານາທິບໍດີ ວະລາດີເມຍ ປູຕິນ ຂອງຣັດເຊຍ ນອກຮອບການປະຊຸມເສດຖະກິດຕາເວັນອອກ (Eastern Economic Forum) ທີ່ເມືອງວາລາດິວອສຕອກ ຣັດເຊຍ ທ່ານສີ ຈິ້ນຜິງສະເໜີວ່າ ຈີນກັບຣັດເຊຍຄວນຮ່ວມມືກັນເພື່ອຕໍ່ຕ້ານລັດທິຄຸ້ມຄອງທາງການຄ້າ ແລະ ບັນຫາສະຖານະການໂລກທີ່ກໍາລັງເກີດຂື້ນ ສ່ວນທ່ານປູຕິນກ່າວວ່າ ເສດຖະກິດໂລກກໍາລັງປະເຊີນຄວາມຍາກລໍາບາກຈາກລັດທິການຄຸ້ມຄອງການຄ້າ ເຊິ່ງຖືເປັນຄວາມທ້າທາຍຢ່າງໃຫຍ່ ແລະຫລີກລ່ຽງກ່າວເຖິງຊື່ປະເທດ ແຕ່ຍັງບົ່ງຊີ້ຊັດເຈນວ່າໝາຍເຖິງສະຫະລັດ ທີ່ໃຊ້ນະໂຍບາຍຕັ້ງກໍາແພງພາສີສິນຄ້ານໍາເຂົ້າ ແລະ ກໍາລັງພິຈາລະນາຕັ້ງກໍາແພງສິນຄ້າຈີນອີກຮອບ 200.000 ລ້ານໂດລາສະຫະລັດ ເຊິ່ງຂະນະດຽວກັນ ອົງການການຄ້າໂລກ (WTO) ຈະຫາລືຈີນໃນ 21 ກັນຍາ ຫຼັງຈີນກຽມຂໍອະນຸມັດຂື້ນພາສີສິນຄ້າສະຫະລັດມູນຄ່າ 7,000 ລ້ານໂດລາຕໍ່ປີ ຖານໃຊ້ມາດຕະການຕໍ່ຕ້ານການທຸ່ມຕະຫຼາດແບບຊີໂຣ່ອິງ (Zeroing) ທີ່ຄໍານວນເອົາການຕອບໂຕ້ທຸ່ມຕະຫຼາດ ສູງກວ່າຄວາມເປັນຈິງ.
ທັງນີ້ມູນຄ່າການຄ້າລະຫວ່າງຣັດເຊຍ ກັບຈີນ ໃນແຕ່ລະປີເພີ່ມຂຶ້ນກວ່າ 30%. ສະເພາະແຕ່ໃນ 6 ເດືອນຕົ້ນປີ 2018 ຕົວເລກດັ່ງກ່າວໄດ້ເພີ່ມຂຶ້ນ 50%. ດັ່ງນັ້ນ ປະທານາທິບໍດີ ປູຕິນ ຈຶ່ງຫວັງວ່າ ມູນຄ່າການຄ້າລະຫວ່າງຣັດເຊຍ ກັບຈີນ ຕະຫຼອດທັງປີ 2018 ຈະເພີ່ມຂຶ້ນຢ່າງແຮງ ແລະ ບັນລຸແດນ 100 ຕື້ ໂດລາສະຫະລັດ ໂດຍເປັນການເພີ່ມຂຶ້ນຈາກລະດັບ 87 ຕື້ໂດລາສະຫະລັດ ຂອງປີ 2017.
ດ້ານ ນາຍົກຊິນໂຊະ ອາເບະ ຂອງຍີ່ປຸ່ນ ທີ່ຮ່ວມປະຊຸມດ້ວຍ ເຜີຍຫຼັງຫາລືນອກຮອບກັບ ທ່ານ ສີ ຈິ້ນຜິງ ວ່າ ທັງສອງຝ່າຍເຫັນດີກຽມພ້ອມການຢ້ຽມຢາມຈີນຂອງຕົນໃນເດືອນ ຕຸລາ ຕາມດ້ວຍການເຊີນທ່ານ ສີ ຈິ້ນຜິງ ຢ້ຽມຢາມຍີ່ປຸ່ນເພື່ອກະຊັບຄວາມສໍາພັນກັນ ສ່ວນຂໍ້ພິພາດດິນແດນໝູ່ເກາະຄູຣິລ ທ່ານ ປູຕິນ ຈະລົງນາມຂໍ້ຕົກລົງສັນຕິພາບໂດຍບໍ່ຕັ້ງເງື່ອນໄຂກ່ອນກັບຍີ່ປຸ່ນພາຍໃນສິກນປີນີ້.
（ຫັດທະບູນ）
