 |
ທ່ານ ຫງ໋ວຽນຊົນຟຸກ ນາຍົກລັດຖະມົນຕີ ສສ ຫວຽດ ໃຫ້ການຕ້ອນຮັບ ທ່ານພົນໂທ ສຸວອນ ຫຼວງບຸນມີ ແລະ ຄະນະນໍາຂັ້ນສຸງ ຂອງກອງທັບປະຊາຊົນລາວ.
ໃນການຕ້ອນຮັບ, ທ່ານ ຫງ໋ວຽນຊົນຟຸກ ນາຍົກລັດຖະມົນຕີ ຊົມເຊີຍຢ່າງສຸດອົກສຸດໃຈ ໃນການມາຢ້ຽມຢາມ ຂອງທ່ານພົນໂທ ສຸວອນ ຫຼວງບຸນມີ ແລະ ຄະນະນໍາຂັ້ນສູງ ຂອງກອງທັບປະຊາຊົນລາວ; ເຊື່ອໝັ້ນວ່າການຢ້ຽມຢາມໃນເທື່ອນີ້ ເປັນການປະກອບສ່ວນເພີ່ມທະວີ ສາຍສຳພັນ ມິດຕະພາບອັນເກົ່າແກ່ ແບບພິເສດ ລະຫວ່າງສອງປະເທດເວົ້າລວມ ແລະ ສາຍພົວພັນຮ່ວມມືກ່ຽວກັບວຽກງານປ້ອງກັນຊາດເວົ້າສະເພາະ, ເພື່ອສິດຜົນປະໂຫຍດປະຊາຊົນສອງຊາດ.
ເນັ້ນຫນັກເຖິງ ສາຍພົວພັນອັນເລິກເຊິ່ງ, ຄວາມຮັກແພງຂອງສະຫາຍ , ອ້າຍນ້ອງ ຂອງ ສອງພັກ, ສອງລັດ, ທະຫານ ແລະ ປະຊາຊົນສອງປະເທດ ຫວຽດນາມ - ລາວ, ທ່ານນາຍົກລັດຖະມົນຕີ ໄດ້ສະແດງໃຫ້ເຫັນຢ່າງຈະແຈ້ງ ໃນປະຫວັດສາດຂອງການກໍ່ສ້າງ ແລະ ປົກປັກຮັກສາປະເທດ, ກອງທັບ ແລະ ປະຊາຊົນ ຫວຽດນາມ ຍາມໃດກໍ່ຢູ່ຄຽງບ່າຄຽງໄລ່, ພ້ອມກັນກ້າວເດີນ ແລະ ແບ່ງປັນ ກັບ ກອງທັບ ແລະ ປະຊາຊົນລາວ ໃນທຸກສະຖານະການ.
ທ່ານ ພົນໂທ ສຸວອນ ຫຼວງບຸນມີ ໄດ້ສະແດງຄວາມຂອບໃຈ ມາຍັງທ່ານ ນາຍົກລັດຖະມົນຕີ ຫງ໋ວຽນຊົນຟຸກ ແລະ ກະຊວງປ້ອງກັນປະເທດ ຫວຽດນາມ ທີ່ໄດ້ໃຫ້ການຕ້ອນຮັບ ຄະນະນໍາຂັ້ນສູງ ຂອງກອງທັບປະຊາຊົນລາວ ຄະນະຜູ້ຕາງຫນ້າລະດັບສູງຂອງກະຊວງປ້ອງກັນປະເທດແຫ່ງ ສປປ ລາວ ດ້ວຍຄວາມຮັກແພງ ແລະ ເຄົາລົບ.
ດ້ວຍຄວາມຍິນດີແຈ້ງໃຫ້ ທ່ານນາຍົກລັດຖະມົນຕີ ຫງ໋ວຽນຊົນຟຸກ ກ່ຽວກັບຜົນສໍາເລັດອັນຈົບງາມຂອງການເຈລະຈາກັບ ທ່ານ ພົນໂທ ຟານວັນຢາງ ,ຫົວໜ້າກົມໃຫຍ່ ເສນາທີການ ກອງທັບປະຊາຊົນຫວຽດນາມ, ຮອງລັດຖະມົນຕີ ປ້ອງກັນປະເທດ ຫວຽດນາມ, ທ່ານ ພົນໂທ ສຸວອນ ຫຼວງບຸນມີ ກ່າວວ່າ: ທັງສອງຝ່າຍໄດ້ປະເມີນຢ່າງ ຮອບດ້ານ ຜົນສຳເລັດໃນການຮ່ວມມືໃນປີ 2017 ແລະ ຕົກລົງເຫັນດີເປັນເອກກະພາບ ກ່ຽວກັບທິດທາງ ການຮ່ວມມືໃນປີ 2018 ແລະ ໃນໄລຍະຕໍ່ໄປ.
ໃນປີ 2017, ກະຊວງ ປ້ອງກັນປະເທດ ຫວຽດນາມ ແລະ ກະຊວງ ປ້ອງກັນປະເທດ ລາວ ໄດ້ເພີ່ມທະວີການຮ່ວມມືໃນທຸກໆຂົງເຂດ. ໂດຍສະເພາະ ແມ່ນ ກະຊວງປ້ອງກັນປະເທດ ຫວຽດນາມ ໄດ້ໃຫ້ການສະຫນັບສະຫນູນຢ່າງຕັ້ງຫນ້າ, ຊ່ວຍເຫຼືອກອງທັບປະຊາຊົນລາວອ້າຍນ້ອງ ໃນການເຄືອນໄຫວປະສານງານ, ກໍ່ສ້າງກອງກໍາລັງ, ປະກອບສ່ວນສຳຄັນເຂົ້າ ໃນການປະຕິບັດເປົ້າຫມາຍພັດທະນາ ເສດຖະກິດ - ສັງຄົມ ຂອງລາວ.
ພິເສດ, ທັງສອງຝ່າຍໄດ້ມີການເຄື່ອໄຫວປະສານງານຫຼາຍຢ່າງ, ສ້າງເງື່ອນໄຂສະດວກໃຫ້ແກ່ການປັບປຸງຊີວິດການເປັນຢູ່, ສ້າງວຽກເຮັດງານທໍາໃຫ້ປະຊາຊົນ ສອງປະເທດທີ່ອາໄສຢູ່ເຂດຊາຍແດນ ລະຫວ່າງ ຫວຽດນາມ-ລາວ. ການເຄື່ອນໄຫວ ດັ່ງກ່າວໄດ້ຮັບການເຫັນດີ, ພ້ອມທັງເປັນການສະຫນັບສະຫນູນຢ່າງແຂງແຮງຂອງປະຊາຊົນສອງຊາດ.
ທ່ານ ພົນໂທ ສຸວອນ ຫຼວງບຸນມີ ໃຫ້ຮູ້ວ່າ ໃນອານາຄົດອັນໄກ້ນີ້, ທັງສອງຝ່າຍໄດ້ເຫັນດີເປັນເອກກະພາບ ເພີ່ມທະວີ ການເຄື່ອນໄຫວຮ່ວມມືກໍ່ສ້າງ ຝຶກອົບຮົມພະນັກງານ; ກໍ່ສ້າງຊາຍແດນລະຫວ່າງ ຫວຽດນາມ -ລາວ ໃຫ້ມີຄວາມຫມັ້ນຄົງ, ພັດທະນາຢ່າງຮອບດ້ານ.
ທ່ານນາຍົກລັດຖະມົນຕີ ຫງ໋ວຽນຊົນຟຸກ ໄດ້ຕີລາຄາສູງຜົນສໍາເລັດຂອງການຮ່ວມມືລະຫວ່າງ ກະຊວງປ້ອງກັນປະເທດຂອງສອງຊາດໃນໄລຍະຜ່ານມາ, ໄດ້ສະເໜີ ທັງສອງຝ່າຍສືບຕໍ່ຢ່າງແຂງຂັນ ຮ່ວມມື, ປະກອບສ່ວນ ຮັກສາ, ເພີ່ມພູນ ນ້ຳໃຈມິດຕະພາບລະຫວ່າງສອງປະເທດນັບມື້ພັດທະນາດີຂື້ນໃນອະນາຄົດ.
ທ່ານນາຍົກລັດຖະມົນຕີ ໄດ້ກ່າວວ່າ: ດ້ວຍຄວາມພິເສດທີ່ມີຊາຍແດນຮ່ວມກັນມາຢ່າງຍາວນານ, ສ່ວນໃຫຍ່ແມ່ນເຂດພູສູງ, ພູດອຍ, ມີຄວາມຫຍຸ້ງຍາກຫຼາຍ, ຫວຽດນາມ ແລະ ລາວ, ຕ້ອງໄດ້ເພີ່ມທະວີຢ່າງແຂງຂັນຕື່ມອີກກ່ຽວກັບ ການປະສານງານລະຫວ່າງກອງກຳລັງ, ກອງທັບ ແລະ ຕໍາຫຼວດ ເພື່ອ ຮັກສາສັນຕິພາບຊາຍແດນ, ມິດຕະພາບ ແລະ ຮັກສາຄວາມເປັນລະບຽບ.
ນອກເຫນືອຈາກຮ່ວມປະສານງານແນໃສ່ການຊ່ວຍເຫຼືອ, ປັບປຸງມາດຕະຖານການດໍາລົງຊີວິດຂອງປະຊາຊົນທີ່ຢູ່ໃນເຂດຊາຍແດນ, ນາຍົກລັດຖະມົນຕີ ໄດ້ຮຽກຮ້ອງໃຫ້ ທະຫານ ຂອງສອງປະເທດ ຈົ່ງເອົາໃຈໃສ່ໃນການເຄື່ອນໄຫວຮ່ວມມືປ້ອງກັນ ອາຊະຍາກໍາ ຕ້ານການຄ້າມະນຸດ, ຂາຍຢາເສບຕິດຂ້າມຊາດ. ນອກຈາກນັ້ນ, ທັງສອງຝ່າຍຍັງຈໍາເປັນຕ້ອງໄດ້ເລັ່ງການປະສານງານໃນການຝຶກອົບຮົມພະນັກງານ, ກໍ່ສ້າງກຳລັງກອງທັບຢ່າງເປັນປົກກະຕິ, ມີຄວາມຫຼັກແຫຼມ.
ທ່ານ ນາຍົກລັດຖະມົນຕີ ສະແດງຄວາມເຊື່ອຫມັ້ນວ່າ ການພົວພັນຮ່ວມມືລະຫວ່າງທະຫານຂອງສອງປະເທດຈະເຂັ້ມແຂງ, ຮັດແໜ້ນກວ່າເກົ່າ ເພື່ອຮັກສາຄວາມໄວ້ວາງໃຈ, ການຮ່ວມມືລະຫວ່າງສອງພັກ, ສອງລັດ, ປະຊາຊົນ ແລະສອງປະເທດ; ເພື່ອຮັບປະກັນສະຖຽນລະພາບ, ຄວາມຫມັ້ນຄົງທາງດ້ານການເມືອງ, ປະກອບສ່ວນເພື່ອຮັກສາສັນຕິພາບ, ຄວາມຫມັ້ນຄົງ ແລະ ການພັດທະນາຂອງທັງສອງປະເທດ.
（ຫັດທະບູນ）
