 |
ພາບປະກອບ
ກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ ໄດ້ກໍານົດວ່າ: “ກໍ່ສ້າງກອງທັບປະຊາຊົນ ແລະຕຳຫຼວດປະຊາຊົນປະຕິວັດ, ເປັນກຳລັງຫຼວງ, ຍອດຢ້ຽມ, ທັນສະໄໝເທື່ອລະກ້າວ, ມີຈຳນວນເໝາະສົມ, ມີຄຸນນະພາບສັງລວມ ແລະກຳລັງສູ້ຮົບສູງ”. ກອງທັບປະຊາຊົນຫວຽດນາມ ໄດ້ຮັບການກໍ່ສ້າງດ້ວຍກຳລັງແຮງສັງລວມຂອງທົ່ວພັກ, ທົ່ວປະຊາຊົນ ແລະການຊ່ວຍເຫຼືອຂອງເພື່ອນມິດສາກົນ. ຕ້ອງຮັບຮູ້ຢ່າງເລິກເຊິ່ງວ່າ, ກຳລັງສັງລວມໄດ້ທ້ອນໂຮມດ້ວຍຫຼາຍປັດໄຈ, ລວມມີກຳລັງແຮງດ້ານວັດຖຸ, ກຳລັງແຮງດ້ານຈິດໃຈ, ກຳລັງແຮງຂອງປະເທດຊາດ, ຊົນຊາດ ແລະກຳລັງແຮງຂອງຍຸກສະໄໝ. ກຳລັງແຮງສັງລວມຕ້ອງຄົງຕົວຢ່າງພາວະວິໄສທີ່ມີຢູ່ແລ້ວ, ແຕ່ວ່າການລະດົມກຳລັງແຮງສັງລວມພັດຂຶ້ນກັບເຈດຈຳນົງອັດຕະວິໄສ, ແຜນນະໂຍບາຍ, ແນວທາງ, ທັດສະນະຂອງແຕ່ລະຊົນຊັ້ນ, ລະບອບ, ໃນບັນດາໄລຍະທາງປະຫວັດສາດທີ່ແຕກຕ່າງກັນ.
ໃນຍຸກສະໄໝການປະຕິວັດອຸດສາຫະກຳ 4.0 ປະຈຸບັນ, ຮຽກຮ້ອງໃຫ້ກອງທັບປະຊາຊົນຫວຽດນາມ ຕ້ອງກ້າວຂຶ້ນເປັນກຳລັງຫຼວງ, ຍອດຢ້ຽມ ແລະທັນສະໄໝເທື່ອລະກ້າວຈຶ່ງສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງໜ້າທີ່ປົກປັກຮັກສາປະເທດຊາດຫວຽດນາມ ສັງຄົມນິຍົມ. ການລົງທຶນໃຫ້ວິວັດທະນາການນີ້ຮຽກຮ້ອງຕ້ອງມີການປະກອບສ່ວນຂອງທຸກຂັ້ນ, ທຸກຂະແໜງການ ແລະຂອງທົ່ວປວງຊົນທັງຊາດ, ສົມທົບກັບການຊ່ວຍເຫຼືອຂອງເພື່ອນມິດສາກົນ. ຢາກລະດົມກຳລັງແຮງສັງລວມໃຫ້ໄດ້ເພື່ອກໍ່ສ້າງກອງທັບປະຊາຊົນຫວຽດນາມ ປະຕິວັດ, ເປັນກຳລັງຫຼວງ, ຍອດຢ້ຽມ, ທັນສະໄໝເທື່ອລະກ້າວ, ກ່ອນອື່ນໝົດແມ່ນຕ້ອງເປັນເອກະພາບກ່ຽວກັບຄວາມຮັບຮູ້ໃນທົ່ວພັກ, ທົ່ວປວງຊົນ. ເພາະສະນັ້ນ, ຕ້ອງເພີ່ມທະວີບັນດາມາດຕະການໂຄສະນາ, ສຶກສາໃຫ້ທົ່ວພັກ, ທົ່ວປວງຊົນໃຫ້ມີຄວາມຮັບຮູ້ຢ່າງຈະແຈ້ງ, ກໍ່ສ້າງກອງທັບປະຊາຊົນຫວຽດນາມ ແມ່ນສິດ, ຜົນປະໂຫຍດ ແລະພັນທະຂອງປະຊາຊົນຫວຽດນາມ ແຕ່ລະຄົນ.
ຕ້ອງສຸມໃສ່ການລະດົມທຸກຄວາມສາມາດບົ່ມຊ້ອນກ່ຽວກັບເສດຖະກິດ, ວິທະຍາສາດ-ເຕັກໂນໂລຢີຂອງປະເທດຊາດ ແລະສາກົນ ເພື່ອກໍ່ສ້າງກອງທັບ. ພັກ, ລັດຕ້ອງກໍ່ສ້າງບັນດາແຜນນະໂຍບາຍ, ນະໂຍບາຍ, ກົດໝາຍທີ່ເໝາະສົມ ເພື່ອລະດົມກຳລັງບົ່ມຊ້ອນ, ກຳລັງພາຍໃນຂອງພື້ນຖານເສດຖະກິດ, ວິທະຍາສາດເຕັກໂນໂລຢີທີ່ມີຢູ່ແລ້ວຂອງປະເທດ, ສົມທົບກັນຢ່າງແໜ້ນແຟ້ນລະຫວ່າງເສດຖະກິດກັບການປ້ອງກັນຊາດ, ການປ້ອງກັນຊາດກັບເສດຖະກິດ, ຮັບໃຊ້ໜ້າທີ່ກໍ່ສ້າງກອງທັບ, ກໍ່ສ້າງພື້ນຖານທົ່ວປວງຊົນປ້ອງກັນຊາດ, ຮັບປະກັນວ່າກອງທັບປະຊາຊົນຫວຽດນາມ ມີຈຳນວນເໝາະສົມ, ດ້ວຍຄຸນນະພາບສັງລວມ ແລະກຳລັງສູ້ຮົບສູງ, ພື້ນຖານທົ່ວປວງຊົນປ້ອງກັນຊາດນັບມື້ນັບໝັ້ນຄົງເຂັ້ມແຂງ. ພ້ອມທັງຕ້ອງເພີ່ມທະວີການຮ່ວມມືສາກົນກ່ຽວກັບການປ້ອງກັນຊາດກັບບັນດາປະເທດຢູ່ພາກພື້ນ ແລະໃນໂລກເພື່ອແນໃສ່ຮັບເອົາບັນດາຜົນງານວິທະຍາສາດເຕັກໂນໂລຢີທີ່ທັນສະໄໝ, ປະກອບສ່ວນປະຕິບັດເປົ້າໝາຍຫັນກອງທັບປະຊາຊົນໃຫ້ທັນສະໄໝເປັນເທື່ອລະກ້າວ.
（ໄຊພອນ）
