ຫວຽດນາມ: ນະໂຍບາຍເຊື່ອມໂຍງເສດຖະກິດສາກົນຢ່າງຮອບດ້ານ

ທ່ານ ຮອງນາຍົກລັດຖະມົນຕີ ຫວຽດນາມ ເວືອງ ດິ່ງ ເຫວ້.(ພາບ:dantri.com.vn)

ໃນຕອນບ່າຍຂອງວັນທີ 3 ມິຖຸນາ, ທີ່ສໍານັກງານນາຍົກລັດຖະມົນຕີ, ທ່ານ ເວືອງ ດິ່ງ ເຫວ້, ຮອງນາຍົກລັດຖະມົນຕີຫວຽດນາມ ໄດ້ເປັນປະທານກອງປະຊຸມຊີ້ນໍາລະຫວ່າງຂະແໜງເຊື່ອມໂຍງເຂົ້າກັບສາກົນທາງດ້ານເສດຖະກິດເພື່ອຕີລາຄາສະພາບການເສດຖະກິດພາຍໃນປະເທດ ແລະ ສາກົນ. ທີ່ກອງປະຊຸມ, ທ່ານ ເວືອງ ດິ່ງ ເຫວ້ ໄດ້ຖືວ່າ: ຕ້ອງຍົກສູງລະດັບການເຊື່ອມໂຍງເສດຖະກິດສາກົນດ້ວຍຄຸນນະພາບສູງກວ່າ, ຮອບດ້ານ, ເລິກເຊິ່ງກວ້າງຂວາງ, ປ່ຽນແປງໃໝ່ຢ່າງມີຫົວຄິດປະດິດສ້າງ ແລະ ມີປະສິດທິຜົນໃນໄລຍະຈະມາເຖິງ; ພ້ອມທັງສະເໜີບັນດາກະຊວງ, ຂະແໜງການ, ທ້ອງຖິ່ນຖືເປັນສໍາຄັນ, ເພີ່ມທະວີການຄົ້ນຄວ້າ, ຕີລາຄາ, ຄາດຄະເນບັນດາບັນຫາໃໝ່ຂອງການເຊື່ອມໂຍງເສດຖະກິດສາກົນທີ່ສົ່ງຜົນກະທົບເຖິງຫວຽດນາມ; ບັນດາກະຊວງ, ຂະແໜງການ, ທ້ອງຖິ່ນຕ່າງໆ ຈົ່ງຕັ້ງໜ້າປະຕິບັດມະຕິສະບັບເລກທີ 72/2018/QH14 ຂອງສະພາແຫ່ງຊາດ ກ່ຽວກັບການອະນຸມັດຜ່ານສັນຍາການຄ້າ CPTPP ແລະ ຂໍ້ຕົກລົງສະບັບເລກທີ 121/QĐ-TTg ຂອງນາຍົກລັດຖະມົນຕີ ກ່ຽວກັບການອະນຸມັດຜ່ານໂຄງການດໍາເນີນງານຂອງລັດຖະບານໃນການຜັນຂະຫຍາຍມະຕິເລກທີ 72 ຂອງສະພາແຫ່ງຊາດ; ສືບຕໍ່ກວດກາຄືນກົດໝາຍພາຍໃນປະເທດເພື່ອດັດປັບໃຫ້ສອດຄ່ອງກັບບັນດາຄໍາໝັ້ນສັນຍາການຄ້າສາກົນ.

（ໄຊພອນ）