 |
ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ ແລະ ທ່ານ ປະທານາທິບໍດີ ລັດເຊຍ V.V. Pu-tin (ພາບ: TTXVN)
ສອງຝ່າຍໄດ້ຕີລາຄາສູງໝາກຜົນຂອງການຮ່ວມມືໃນໄລຍະທີ່ຜ່ານມາ ເປັນຕົ້ນການຜັນຂະຫຍາຍສົນທິສັນຍາການຄ້າເສລີ ລະຫວ່າງ ຫວຽດນາມ - ສະຫະພັນ ເສດຖະກິດ ອາຊີ - ເອີລົບຢ່າງມີປະສິດທິຜົນ, ສະແດງໃຫ້ເຫັນຄວາມພ້ອມສືບຕໍ່ແກ້ໄຂບັນດາຮົ້ວກີດຂວາງດ້ານການຄ້າ, ພິເສດແມ່ນຜະລິດຕະພັນກະເສດ, ຜະລິດຕະພັນຈາກການປະມົງ ຂອງສອງປະເທດ. ການນຳສອງປະເທດຖືວ່າ ຫວຽດນາມ ແລະ ລັດເຊຍ ຍັງມີຄວາມສາມາດບົ່ມຊ້ອນອັນໃຫຍ່ຫຼວງ ເພື່ອຊຸກຍູ້ການຮ່ວມມື, ສູ້ຊົນບັນລຸເປົ້າໝາຍຍົກວົງເງິນການຄ້າສອງສົ້ນໃຫ້ຂຶ້ນ ເປັນ 10 ຕື້ USD ໃນປີ 2020. ພ້ອມທັງຢັ້ງຢືນເຖິງຄວາມສຳຄັນຂອງການຮ່ວມມືດ້ານພະລັງງານ ແລະ ນ້ຳມັນເຊື້ອໄຟ, ຕໍ່ກັບການພົວພັນ ຫວຽດນາມ - ລັດເຊຍ ທັງສອງເຫັນດີເປັນເອກະພາບສືບຕໍ່ສົ່ງເສີມ ແລະ ສ້າງເງື່ອນໄຂສະດວກໃຫ້ແກ່ການເຄື່ອນໄຫວຂອງບັນດາວິສາຫະກິດນ້ຳມັນອາຍແກັດຢູ່ ຫວຽດນາມ ແລະ ລັດເຊຍ ກໍ່ຄືຊຸກຍູ້ການຜັນຂະຫຍາຍໂຄງການສູນຄົ້ນຄ້ວາວິທະຍາສາດ ແລະ ເຕັກໂນໂລຢີ ຢູ່ ຫວຽດນາມ, ຖືວ່ານີ້ແມ່ນຂົງເຂດຂອງການຮ່ວມມືທີ່ມີຄວາມໜ້າເປັນໄປໄດ້.
ບົນເນື້ອໃນຈິດໃຈການພົວພັນທີ່ມີຄວາມໄວ້ເນື້ອເຊື່ອໃຈດ້ານການເມືອງສູງ, ການພົວພັນທີ່ເປັນມູນເຊື່ອມິດຕະພາບອັນເລິກເຊິ່ງ, ທ່ານນາຍົກລັດຖະມົນຕີ ຫງວຽນ ຊົນ ຟຸກ ແລະ ທ່ານ V.V. Pu-tin ປະທານາທິບໍດີລັດເຊຍ ໄດ້ປຶກສາຫາລືຫຼາຍບັນຫາ ສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ, ເຫັນດີເປັນເອກະພາບສືບຕໍ່ສົບທົບກັນຢ່າງແໜ້ນແຟ້ນແລະ ສະໜັບສະໜູນເຊິ່ງກັນ ແລະ ກັນ ຢູ່ບົນເວທີປາໄສຫຼາຍຝ່າຍ. ທ່ານປະທານາທິບໍດີ V.V. Pu-tin ຢັ້ງຢືນວ່າ: ລັດເຊຍ ຈະສະໜັບສະໜູນການແກ້ໄຂການຂັດແຍ່ງກັນ ຢູ່ ທະເລຕາເວັນອອກໂດຍສັນຕິວິທີ, ສອດຄ່ອງກັບກົດໝາຍສາກົນ ລວມມີ: ສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982, ປະຕິບັດ DOC ໃຫ້ຄົບຖ້ວນ ແລະ ສ້າງ COC ໃຫ້ສຳເລັດໂດຍໄວ.
ໃນວັນດຽວກັນນີ້, ທ່ານນາຍົກລັດຖະມົນຕີຫວຽດນາມ ຫງວຽນ ຊົນ ຟຸກ ພ້ອມພັນລະຍາ ແລະ ຄະນະຜູ້ແທນຂັ້ນສູງຫວຽດນາມ ໄດ້ໄປວາງພວງມາລາ ຢູ່ ສຸສານ Vladimir Ilich Lenin - ການນໍາຂອງຊົນຊັ້ນກໍາມະຊີບ ແລະ ເປັນເພື່ອນຂອງປະຊາຊົນຊາວຜູ້ອອກແຮງງານທົ່ວໂລກ.
（ແຫຼ່ງຂໍ້ມູນ： VOVWORLD）
