 |
ທ່ານ ທັນສະໄໝ ກົມມະສິດ ລັດຖະມົນຕີ ກະຊວງ ປທສ.
ໃນໂອກາດດັ່ງກ່າວ, ທ່ານ ທັນສະໄໝ ກົມມະສິດ ກ່າວວ່າ: ງານວາງສະແດງໃນປີນີ້, ຈັດຂຶ້ນພາຍໃຕ້ຄຳຂວັນ “ສ້າງ ແລະ ສົ່ງເສີມການຫັນເປັນດີຈິຕອນໃນລາວ” ການຫັນເປັນດີຈີຕອນ ແມ່ນຂະບວນການປ່ຽນແປງ ທີ່ເກີດຈາກການນຳໃຊ້ ເຕັກໂນໂລຊີດີຈີຕອນ ໃນທຸກຂົງເຂດຂອງສັງຄົມມະນຸດ, ເຊິ່ງມັນໄດ້ສ້າງຄວາມອາດສາມາດອັນໃໝ່, ບໍ່ພຽງແຕ່ເປັນການສະໜັບສະໜູນ ແລະ ເພີມພູນ ວິທີການແບບດັ່ງເດີມ, ແຕ່ຍັງເປັນການສ້າງຮູບແບບໃໝ່ ທີ່ມີລັກສະນະເປັນນະວັດຕະກຳ ແລະ ສ້າງສັນຢ່າງຊັດເຈນ. ໃນປັດຈຸບັນ ຂະບວນການຫັນເປັນດີຈີຕອນ ໄດ້ຖືກຮັບຮອງ ແລະ ເປັນກຳລັງຂັບເຄື່ອນ ຢູ່ໃນຫລາຍຂົງເຂດຂອງອຸດສາຫະກຳ ຢູ່ໃນທຸກພູມີພາກຂອງໂລກ ຍ້ອນວິວັດທະນາການຂອງດີຈີຕອນ ຈຶ່ງພາໃຫ້ເກີດຍຸກອຸດສາຫະກຳ 4.0 ໃນໄລຍະອັນສັ້ນ. ງານໄອຊີທີ 2019 ນີ້, ຍັງເປັນເວທີ ທີ່ສຳຄັນໃນການສ້າງໂອກາດໃຫ້ຜູ້ປະກອບການ, ຜູ້ຜະລິດ, ຜູ້ບໍລິການ, ຜູ້ຊົມໃຊ້ ແລະ ຜູ້ຄຸ້ມຄອງເຕັກໂນໂລຊີ ສື່ສານຂໍ້ມູນຂ່າວສານ ໄດ້ມາພົບປະແລກປ່ຽນບົດຮຽນ, ຄວາມຮູ້, ຄວາມເຂົ້າໃຈ ແລະ ສ້າງການພົວພັນຮ່ວມມື ທາງດ້ານການຄ້າ ແລະ ການພັດທະນາຮ່ວມກັນ.
ພາຍໃນງານດັ່ງກ່າວ, ຈະປະກອບມີ ການວາງສະແດງເຕັກໂນໂລຊີດີຈີຕອນ, ການຂາຍສິນຄ້າຜະລິດຕະພັນໄອຊີທີ ທີ່ເປັນຮາດແວ ແລະ ຊອບແວ. ພ້ອມນີ້, ຍັງມີກອງປະຊຸມສົນທະນາສາກົນ ວ່າດ້ວຍການຫັນເປັນດີຈີຕອນ. ໂດຍນັກຊ່ຽວຊານຈາກຕ່າງປະເທດ ຈະມານຳສະເໜີ ກ່ຽວກັບສະພາບ ແລະ ຜົນສຳເລັດ ໃນການຫັນເປັນດີຈີຕອນ ຢູ່ບັນດາປະເທດຕ່າງໆ ແລະ ກອງປະຊຸມເປີດກວ້າງວ່າດ້ວຍການສົ່ງເສີມການນຳໃຊ້ໄອຊີທີ ຢູ່ ສປປ ລາວ. ພ້ອມນີ້, ຍັງຈະມີງານປະກວດລາງວັນລາວໄອຊີທີ 2019 ເພື່ອເປັນຕົວແທນຂອງ ສປປລາວ ສົ່ງເຂົ້າແຂ່ງຂັນກັບບັນດາປະເທດອາຊຽນ ເພື່ອຊີງລາງວັນ ASEAN ICT Award 2019.
（ແຫຼ່ງຂໍ້ມູນ： ສົມຫວັງ/ຂປລ）
