ນັກຂ່າວ: ທ່ານເອກອັກຄະລັດຖະທູດ ຕີລາຄາຄືແນວໃດກ່ຽວກັບຄວາມຄືບໜ້າໃນການພົວພັນສອງຝ່າຍ ຫວຽດນາມ-ຝຣັ່ງ ໃນໄລຍະຜ່ານມາ?
ທ່ານເອກອັກຄະລັດຖະທູດ Olivier Brochet: ໃນປີ 2024, ມີຫຼາຍເຫດການພົ້ນເດັ່ນທີ່ມີຄວາມໝາຍສຳຄັນໃນການພົວພັນສອງຝ່າຍ. ທີໜຶ່ງ, ນັ້ນແມ່ນເຫດການທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ເຂົ້າຮ່ວມກອງປະຊຸມສຸດຍອດຝຣັ່ງໂກໂຟນີ ຄັ້ງທີ 19 ແລະຢ້ຽມຢາມຝຣັ່ງ ຢ່າງເປັນທາງການໃນເດືອນຕຸລາ ຜ່ານມາ. ທ່ານເລຂາທິການໃຫຍ່, ປະທານປະເທດ ໂຕເລິມ ແລະທ່ານປະທານາທິບໍດີ ຝຣັ່ງ Emmanuel Macron ໄດ້ມີການພົບປະເຈລະຈາຢ່າງເປັນທາງການຄັ້ງທຳອິດ. ເນື່ອງໃນໂອກາດນີ້, ສອງຝ່າຍໄດ້ອອກຖະແຫຼງການຮ່ວມຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ. ສິ່ງດັ່ງກ່າວສະແດງໃຫ້ເຫັນການພົວພັນມິດຕະພາບ ກໍ່ຄືຄວາມເຊື່ອໝັ້ນລະຫວ່າງສອງຝ່າຍ. ການຍົກລະດັບການພົວພັນຄູ່ຮ່ວມມືຍຸດທະສາດຮອບດ້ານກໍ່ສະແດງໃຫ້ເຫັນຄໍາໝັ້ນສັນຍາຂອງ ຝຣັ່ງ ໃນການຮ່ວມເດີນທາງ, ໜູນຊ່ວຍຫວຽດນາມ ພັດທະນາ ແລະຜ່ານຜ່າສິ່ງທ້າທາຍທີ່ກ່ຽວຂ້ອງເຖິງບັນຫາທີ່ມີລັກສະນະທົ່ວໂລກ, ຄື: ການປ່ຽນແປງຂອງດິນຟ້າອາກາດ, ຊ່ວຍຫວຽດນາມ ສາມາດພັດທະນາຢ່າງແຮງ, ວ່ອງໄວ ແລະຍືນຍົງ.
 |
| ທ່ານ Olivier Brochet ເອກອັກຄະລັດຖະທູດ ຝຣັ່ງ ປະຈໍາ ຫວຽດນາມ. ພາບ: |
ເຫດການທີ 2 ແມ່ນ ຫວຽດນາມ ຈັດຕັ້ງພິທີສະເຫຼີມສະຫຼອງ 70 ປີແຫ່ງວັນໄຊຊະນະດ້ຽນບຽນຝູ (1954-2024). ລັດຖະບານ ຝຣັ່ງ ໄດ້ຈັດໃຫ້ທ່ານ Sébastien Lecornu ລັດຖະມົນຕີກອງທັບ ແລະທ່ານ Patricia Miralles ຮອງລັດຖະມົນຕີນັກຮົບເກົ່າ ແລະຄວາມຊົງຈໍາສົງຄາມ ຝຣັ່ງ ເຂົ້າຮ່ວມເຫດການພິເສດນີ້. ສິ່ງດັ່ງກ່າວສະແດງໃຫ້ເຫັນວ່າ ທັງ ຝຣັ່ງ ແລະຫວຽດນາມ ຫວນຄືນສິ່ງທີ່ເກີດຂຶ້ນໃນອະດີດຕະການເພື່ອຈາກນັ້ນກ້າວໄປເຖິງອະນາຄົດທີ່ດີກວ່າ ແລະອະດີດຍາມໃດກໍ່ແມ່ນພາກສ່ວນໜຶ່ງໃນຄວາມຊົງຈຳຂອງພວກເຮົາ. ພ້ອມທັງສົ່ງສານ, ບໍ່ພຽງແຕ່ເຖິງປະຊາຊົນສອງປະເທດເທົ່ານັ້ນຫາກຍັງເຖິງປະຊາຄົມໂລກທີ່ວ່າ: ບັນດາປະເທດທີ່ໄດ້ປະເຊີນໜ້າກັນໃນອະນາຄົດນັ້ນ, ປະຈຸບັນສາມາດຮ່ວມມືນໍາກັນໄດ້.
ສຸດທ້າຍແມ່ນເຫດການເປີດນໍາໃຊ້ເສັ້ນທາງລົດໄຟໃນຕົວເມືອງເລກ 3 ຂອງນະຄອນຮ່າໂນ້ຍ. ນີ້ແມ່ນໂຄງການທີ່ເປັນສັນຍາລັກໃຫ້ການພົວພັນຮ່ວມມື ຝຣັ່ງ-ຫວຽດນາມ, ດ້ວຍທຶນອຸປະຖໍາຈາກ ຝຣັ່ງ ແມ່ນກວ່າ 500 ລ້ານເອີໂຣ. ບັນດາວິສາຫະກິດຝຣັ່ງ ໄດ້ຕັ້ງໜ້າເຂົ້າຮ່ວມໂຄງການນີ້ ແລະນຳເອົາເຕັກໂນໂລຢີດີທີ່ສຸດມາໃຫ້ຫວຽດນາມ. ໃນເບື້ອງຕົ້ນ, ເສັ້ນທາງລົດໄຟໃນຕົວເມືອງນີ້, ໄດ້ຮັບການຕອບສະໜອງຄວາມຕ້ອງການຈາກທຸກຂັ້ນ ແລະປະຊາຊົນນະຄອນຫຼວງຮ່າໂນ້ຍ ຢ່າງກວ້າງຂວາງ. ສິ່ງດັ່ງກ່າວພິສູດໃຫ້ເຫັນ ຝຣັ່ງ ຢາກຮ່ວມມື, ຮ່ວມເດີນທາງກັບຫວຽດນາມ ເພື່ອພັດທະນາແບບຍືນຍົງ.
ນັກຂ່າວ: ຂໍຮຽນທ່ານເອກອັກຄະລັດຖະທູດ ທ່ານສາມາດແບ່ງປັນບັນດາບຸລິມະສິດໃນການຮ່ວມມື ຫວຽດນາມ-ຝຣັ່ງ ໃນໄລຍະຈະມາເຖິງ, ໃນສະພາບການສິ່ງທ້າທາຍທົ່ວໂລກກ່ຽວກັບການປ່ຽນແປງຂອງດິນຟ້າອາກາດ ແລະການຫັນເປັນດີຈີຕອນ?
ທ່ານເອກອັກຄະລັດຖະທູດ Olivier Brochet: ປີ 2025, ຝຣັ່ງ ເປັນເຈົ້າພາບຈັດຫຼາຍກອງປະຊຸມສາກົນທີ່ສໍາຄັນ, ຄື: ກອງປະຊຸມກ່ຽວກັບປັນຍາປະດິດ, ການປ່ຽນແປງຂອງດິນຟ້າອາກາດ ແລະກອງປະຊຸມສຸດຍອດຂອງສະຫະປະຊາຊາດກ່ຽວກັບມະຫາສະໝຸດ. ພວກຂ້າພະເຈົ້າ ຫວັງວ່າ ຈະສືບຕໍ່ພ້ອມກັບຫວຽດນາມ ຮ່ວມມື ແລະເຂົ້າຮ່ວມຂະບວນການສ້າງຫຼັກເກນ, ມາດຕະຖານສາກົນຮັບໃຊ້ການພັດທະນາແບບຍືນຍົງ.
ກ່ຽວກັບການຮ່ວມມືສອງຝ່າຍ, ໃນຂົງເຂດພະລັງງານ, ຝຣັ່ງ ຢາກຮ່ວມເດີນທາງກັບວິວັດການຫັນປ່ຽນພະລັງງານ ແລະພັດທະນາຂອງຫວຽດນາມ ໃນໄລຍະຈະມາເຖິງເພື່ອທັງຮັບປະກັນການເຕີບໂຕຂອງຫວຽດນາມ ທັງຮັບປະກັນຄວາມຮຽກຮ້ອງກ່ຽວກັບຜົນກະທົບຂອງສິ່ງແວດລ້ອມ. ຝຣັ່ງ ກໍ່ພ້ອມແລ້ວທີ່ຈະເຂົ້າຮ່ວມການໜູນຊ່ວຍຫວຽດນາມ ພັດທະນາໂຮງງານໄຟຟ້ານິວເຄຼຍ. ຍ້ອນວ່າ ຝຣັ່ງ ແມ່ນປະເທດມະຫາອຳນາດດ້ານໄຟຟ້ານິວເຄຼຍ ແລະມີປະສົບການໃນຂົງເຂດນີ້ຫຼາຍກວ່າ 60 ປີ.
 |
| ພາບປະກອບ, |
ພວກຂ້າພະເຈົ້າ ກໍ່ເອົາໃຈໃສ່ທີ່ສຸດເຖິງການຮ່ວມມືໃນຂົງເຂດຄົມມະນາຄົມທາງລົດໄຟ ແລະກະສິກຳກັບຫວຽດນາມ. ພວກເພື່ອນ ພວມເຕື້ອງເຖິງການກໍ່ສ້າງທາງລົດໄຟຄວາມໄວສູງເໜືອ-ໃຕ້ຫວຽດນາມ. ຝຣັ່ງ ໄດ້ນໍາໃຊ້ລະບົບທາງລົດໄຟຄວາມໄວສູງ TGV ເປັນເວລາປະມານ 40 ປີ, ເຊື່ອມຕໍ່ບັນດານະຄອນໃນທົ່ວປະເທດ ແລະສົ່ງອອກເຕັກໂນໂລຢີລົດໄຟຄວາມໄວສູງໄປຫຼາຍປະເທດໃນໂລກ. ພວກຂ້າພະເຈົ້າ ປາດຖະໜາຢາກຊຸກຍູ້ການຮ່ວມມືກັບຫວຽດນາມ ໃນຂົງເຂດພັດທະນາກະສິກຳ, ກະສິກໍາຊີວະພາບເພື່ອຮັບປະກັນລັກສະນະຍືນຍົງ.
ໃນໄລຍະຢ້ຽມຢາມຝຣັ່ງ, ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ຍົກຄຳສຸພາສິດຂອງ ຝຣັ່ງ ທີ່ວ່າ: “ເມື່ອຢາກ, ເຮົາຈະສາມາດ, ເມື່ອມີຄວາມສາມາດ, ເຮົາຕ້ອງເຮັດໃຫ້ໄດ້” ດ້ວຍເຈດຈຳນົງ ແລະຄວາມຕັດສິນໃຈເພື່ອແນໃສ່ນໍາການພົວພັນສອງປະເທດໃຫ້ນັບມື້ນັບເຂົ້າສູ່ລວງເລິກ, ແທດຈິງ. ທັງ ຝຣັ່ງ ແລະຫວຽດນາມ ລ້ວນແຕ່ປາດຖະໜາຢາກໃຫ້ໂລກພັດທະນາຕາມທິດເຄົາລົບກົດໝາຍສາກົນ, ເຄົາລົບສິດເສລີໃນການເດີນທະເລ, ເຄົາລົບຄຸນຄ່າ, ຮັບປະກັນສັນຕິພາບ ແລະສະຖຽນລະພາບໃນໂລກ. ເຂົ້າຮ່ວມ, ສົມທົບກັນໃນກົນໄກຫຼາຍຝ່າຍ, ປະກອບສ່ວນຮັບປະກັນສັນຕິພາບ ແລະສະຖຽນລະພາບໃນໂລກ, ຂ້າພະເຈົ້າ ຖືວ່າ ນີ້ແມ່ນຂົງເຂດຮ່ວມມືສາກົນເຊິ່ງ ຝຣັ່ງ ແລະຫວຽດນາມ ມີຄວາມສາມາດບົ່ມຊ້ອນຫຼາຍຢ່າງເພື່ອເພີ່ມທະວີ.
ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!
