1. ທະຫານລຸງໂຮ່ ແມ່ນຊື່ເອີ້ນທີ່ເຕັມໄປດ້ວຍຄວາມຮັກແພງທີ່ປະຊາຊົນຕັ້ງໃຫ້ພະນັກງານ, ນັກຮົບກອງທັບປະຊາຊົນຫວຽດນາມ. ໃນຕະຫຼອດຊີວິດແຫ່ງການເຄື່ອນໄຫວປະຕິວັດຂອງຕົນ, ປະທານ ໂຮ່ຈີມິນ ແມ່ນຜູ້ມີຄຸນງາມຄວາມດີໃນການສ້າງຕັ້ງ, ຈັດຕັ້ງ, ສຶກສາອົບຮົມກອງທັບປະຊາຊົນຫວຽດນາມ. ຍາມໃດ ເພິ່ນ ກໍ່ເອົາໃຈໃສ່ສ້າງກອງທັບໃຫ້ເປັນກຳລັງທີ່ຈົ່ງຮັກພັກດີ ແລະໄວ້ເນື້ອເຊື່ອໃຈຂອງພັກ, ປະເທດຊາດ ແລະປະຊາຊົນ. ຍ້ອນສາຍສຳພັນເລືອດເນື້ອນັ້ນ ໄດ້ສ້າງພື້ນຖານໃຫ້ແກ່ການກຳເນີດຂອງນາມມະຍົດອັນສູງສົ່ງທະຫານລຸງໂຮ່. ຊື່ເອີ້ນ ທະຫານລຸງໂຮ່ ໄດ້ເວົ້າເຖິງຄຸນຄ່າອັນສູງສົ່ງ ແລະສັກສິດຂອງກອງທັບປະຕິວັດຫວຽດນາມ.
ທະຫານລຸງໂຮ່ ໄດ້ເຕົ້າໂຮມເອົາທາດແທ້ຄຸນສົມບັດ, ວັດທະນະທຳອັນດີງາມຂອງຊາວຫວຽດນາມ ໃນຍຸກສະໄໝໃໝ່. ນາມມະຍົດທະຫານລຸງໂຮ່ ກໍ່ແມ່ນຈຸດວັດທະນະທຳການທະຫານທີ່ເປັນເອກະລັກສະເພາະ, ໂດດເດັ່ນ ປະກອບສ່ວນເສີມຂະຫຍາຍຄຸນຄ່າວັດທະນະທຳຂອງຊາດຫວຽດນາມ ໃນຕະຫຼອດ 8 ທົດສະວັດຜ່ານມາ ໃຫ້ອຸດົມສົມບູນຂຶ້ນຕື່ມ.
 |
ທ່ານພົນໂທ ຈິ້ງວັນກວຽດ ຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ ແລະຄະນະຜູ້ແທນພະນັກງານການເມືອງຂັ້ນສູງກອງທັບປະຊາຊົນຫວຽດນາມ ໄປຢ້ຽມຢາມ ແລະມອບຂອງຂວັນໃຫ້ກອງພົນລົດຕັງ 1011, ກະຊວງບັນດາກໍາລັງປະກອບອາວຸດປະຕິວັດກູບາ, ເດືອນຕຸລາ 2024. ພາບ: ກວາງຖັ໊ງ |
80 ປີທີ່ຜ່ານມາ, ພາຍໃຕ້ການນຳພາເດັດຂາດ, ໂດຍກົງ ແລະຮອບດ້ານຂອງພັກກອມມູນິດຫວຽດນາມ, ການຄຸ້ມຄອງຢ່າງມີຈຸດສຸມ, ເຫັນດີເປັນເອກະພາບຂອງລັດ, ການສົມທົບກັນຢ່າງແໜ້ນແຟ້ນ ແລະມີປະສິດທິຜົນຈາກຂັ້ນສູນກາງລົງຮອດທ້ອງຖິ່ນ ແລະການສະໜັບສະໜູນຂອງລັດຖະບານ, ປະຊາຊົນ ແລະກອງທັບປະຊາຊົນຫວຽດນາມ ຍາມໃດກໍ່ຮັກສາທາດແທ້ປະຕິວັດໃນຕະຫຼອດຂະບວນວິວັດການກໍ່ສ້າງ, ສູ້ຮົບ, ເຕີບໃຫຍ່ຂະຫຍາຍຕົວ, ຍາດໄດ້ໄຊຊະນະທີ່ສຳຄັນ. ໃນທຸກເງື່ອນໄຂ, ສະພາບການ, ຕໍ່ໜ້າຄວາມຫຍຸ້ງຍາກ ແລະການເສຍສະຫຼະຢ່າງໃຫຍ່ຫຼວງ, ກອງທັບປະຊາຊົນຫວຽດນາມ ຍາມໃດກໍ່ຈົ່ງຮັກພັກດີ ແລະ ເຊື່ອໝັ້ນໃນການນຳພາຂອງພັກ, ພ້ອມທັງເສີມຂະຫຍາຍມູນເຊື້ອຮັກຊາດ ແລະລັດທິວິລະຊົນປະຕິວັດ, ດ້ວຍກົດລະບຽບທີ່ເຄັ່ງຄັດເຂັ້ມງວດ, ເປັນເຈົ້າການ, ມີຫົວຄິດປະດິດສ້າງ, ກ້າຫານ, ຕັດສິນໃຈ ແລະມີຄວາມຜູກພັນຢ່າງໃກ້ຊິດກັບປະຊາຊົນ. ພະນັກງານ, ນັກຮົບກອງທັບລຸ້ນຕ່າງໆໄດ້ມີການປະກອບສ່ວນອັນໃຫຍ່ຫຼວງເຂົ້າໃນພາລະກິດປົດປ່ອຍຊາດ, ທ້ອນໂຮມປະເທດຊາດເປັນເອກະພາບ, ສ້າງສາ ແລະປົກປັກຮັກສາປະເທດຊາດ. ປະທານ ໂຮ່ຈີມິນ ໄດ້ຍ້ອງຍໍຊົມເຊີຍກອງທັບປະຊາຊົນຫວຽດນາມ ວ່າ ຍາມໃດກໍ່ “ຈົ່ງຮັກພັກດີຕໍ່ພັກ, ກະຕັນຍູຕໍ່ປະຊາຊົນ, ພ້ອມແລ້ວທີ່ຈະຕໍ່ສູ້ ຍອມເສຍສະຫຼະຊີວິດເພື່ອເອກະລາດ, ອິດສະຫຼະພາບຂອງປະເທດຊາດ, ເພື່ອສັງຄົມນິຍົມ”. ໜ້າທີ່ໃດກໍ່ປະຕິບັດສໍາເລັດ, ຄວາມຫຍຸ້ງຍາກໃດກໍ່ຜ່ານມາ, ສັດຕູໂຕໃດກໍ່ຕີເອົາຊະນະ” ສາມາດເວົ້າໄດ້ວ່າ, ກອງທັບປະຊາຊົນຫວຽດນາມ ຍາມໃດກໍ່ສົມກັບນາມມະຍົດອັນສູງສົ່ງຂອງທະຫານລຸງໂຮ່.
2. ໃນສະໄໝສັນຕິພາບ, ກອງທັບປະຊາຊົນຫວຽດນາມ ໄດ້ຮັກສາຈິດໃຈມີສະຕິລະວັງຕົວຕໍ່ການປະຕິວັດສູງ, ຕັ້ງໜ້າຕໍ່ສູ້ຕ້ານການກະທຳຂອງອິດທິກຳລັງປໍລະປັກ. ຜັນຂະຫຍາຍບັນດາໂຄງການພັດທະນາເສດຖະກິດ-ສັງຄົມ ທີ່ມີຄວາມສໍາຄັນຍຸດທະສາດຂອງປະເທດຊາດຢ່າງມີປະສິດທິຜົນ. ພ້ອມກັນນັ້ນ, ກອງທັບກໍ່ໄດ້ຕັ້ງໜ້າເຂົ້າຮ່ວມການຫຼຸດຜ່ອນຄວາມທຸກຍາກ, ເຮັດໃຫ້ຊົນນະບົດໃໝ່ເປັນທັນສະໄໝ ແລະກໍ່ສ້າງລະບົບການເມືອງ, ຊີວິດດ້ານວັດທະນະທຳຢູ່ຮາກຖານ. ດ້ວຍວິທີນີ້, ກອງທັບ ໄດ້ປະກອບສ່ວນສຳຄັນເຂົ້າໃນການປັບປຸງ ແລະເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ, ທ່າສະໜາມປ້ອງກັນຊາດຢ່າງໝັ້ນຄົງເຂັ້ມແຂງ ໂດຍອີງໃສ່ການສະໜັບສະໜູນຂອງປະຊາຊົນ. ສິ່ງດັ່ງກ່າວຍິ່ງສະແດງໃຫ້ເຫັນຢ່າງຈະແຈ້ງເຖິງຈິດໃຈຂອງທະຫານລຸງໂຮ່ ຍາມໃດກໍ່ຢູ່ໃນທ່າກຽມພ້ອມຮັບໃຊ້ປະຊາຊົນ ແລະປະເທດຊາດ ໂດຍບໍ່ມີເງື່ອນໄຂຫຍັງ.
3. ດ້ວຍຄວາມເປັນກຽດທີ່ໄດ້ມາປະຕິບັດງານຢູ່ ຫວຽດນາມ, ຂ້າພະເຈົ້າ ຢາກແບ່ງປັນວ່າ ປີນີ້ ຫວຽດນາມ ແລະກູບາ ສະເຫຼີມສະຫຼອງ 64 ປີແຫ່ງວັນສ້າງຕັ້ງການພົວພັນທາງການທູດຢ່າງເປັນທາງການ. ໃນກວ່າ 6 ທົດສະວັດຜ່ານມາ, ການພົວພັນມິດຕະພາບແບບພິເສດທີ່ເປັນມູນເຊື້ອລະຫວ່າງ ກູບາ ແລະຫວຽດນາມ ໄດ້ເສີມຂະຫຍາຍຢ່າງບໍ່ຢຸດຢັ້ງ ແລະ ພັດທະນາຢ່າງຮອບດ້ານໃນທຸກຂົງເຂດ, ເປັນສັນຍາລັກແຫ່ງຄວາມສາມັກຄີ, ຄວາມຮັກແພງອ້າຍນ້ອງລະຫວ່າງສອງປະເທດ, ສອງຊາດ.
ດ້ວຍປະຫວັດສາດທີ່ຍາວນານ 64 ປີ, ຫວຽດນາມ ແລະກູບາ, ສອງຊາດໃນສອງເຄິ່ງຟາກຕາເວັນອອກ ແລະຟາກຕາເວັນຕົກຂອງໜ່ວຍໂລກ ໄດ້ຕິດພັນກັນກ່ຽວກັບອຸດົມການປະຕິວັດອັນສູງສົ່ງ ແລະສວຍງາມ, ຕໍ່ສູ້ເພື່ອເອກະລາດ ແລະອິດສະຫຼະພາບ ໄດ້ສ້າງຄວາມເຫັນອົກເຫັນໃຈ, ຄວາມເຂົ້າໃຈ ແລະແບ່ງປັນ. ກູບາ ເຄີຍມີນ້ຳໃຈຄວາມຮັກແພງທີ່ຊອບທຳ ແລະຈິງໃຈ “ທັງໝົດເພື່ອຫວຽດນາມ”. ເມື່ອ ຫວຽດນາມ ພວມຢູ່ໃນການຕໍ່ສູ້ຕ້ານອາເມລິກາ, ກູ້ຊາດ ແລະຢູ່ໃນໄລຍະທີ່ຫວຽດນາມ ປະສົບກັບຄວາມຫຍຸ້ງຍາກທີ່ສຸດ, ກູບາ ຍາມໃດກໍ່ນຳໜ້າໃນຂະບວນການສາກົນສະໜັບສະໜູນ ຫວຽດນາມ. ຜູ້ນຳ Fidel Castro ເຄີຍຢືນຢັນຢ່າງກ້າຫານ ວ່າ: “ເພື່ອຫວຽດນາມ, ກູບາ ຍອມເສຍສະຫຼະເລືອດເນື້ອຂອງຕົນ!”.
ນັ້ນແມ່ນນ້ຳໃຈຄວາມຮັກແພງພິເສດຂອງກູບາ ທີ່ມີຕໍ່ຫວຽດນາມ. ສ່ວນ ຫວຽດນາມ ຍາມໃດກໍ່ສະແດງໃຫ້ເຫັນຄວາມສາມັກຄີ, ມິດຕະພາບແບບພິເສດ ແລະການຮ່ວມມືຢ່າງຈິງໃຈຕໍ່ກັບກູບາ. ປະທານ ໂຮ່ຈີມິນ ເຄີຍເວົ້າວ່າ: “ຫວຽດນາມ ແລະກູບາ ຢູ່ຫ່າງໄກກັນຫຼາຍພັນກິໂລແມັດ, ແຕ່ຈິດໃຈຂອງປະຊາຊົນ 2 ປະເທດມີຄວາມໃກ້ຊິດສະໜິດສະໜົມຄືອ້າຍນ້ອງໃນຄອບຄົວດຽວກັນ”.
ປະຈຸບັນ, ສາມາດເຫັນໄດ້ວ່າ ການພົວພັນລະຫວ່າງສອງພັກ, ສອງລັດ, ສອງລັດຖະບານ ແລະກຳລັງປະກອບອາວຸດຂອງສອງປະເທດ ນັບມື້ນັບແໜ້ນແຟ້ນກວ່າອີກ. ໃນສະພາບການລວມທີ່ດີງາມຂອງການພົວພັນລະຫວ່າງສອງປະເທດ, ໄປຄຽງຄູ່ກັບບັນດາຂົງເຂດຮ່ວມມືຕ່າງໆແລ້ວ, ການຮ່ວມມືດ້ານປ້ອງກັນຊາດ ຫວຽດນາມ - ກູບາ ກໍ່ພັດທະນາຢ່າງບໍ່ຢຸດຢັ້ງຕາມທິດເລິກເຊິ່ງ, ກວ້າງຂວາງ. ການຮ່ວມມືດ້ານປ້ອງກັນຊາດ ໂດຍການນຳຮຸ່ນຕ່າງໆຂອງສອງປະເທດ ໄດ້ເອົາໃຈໃສ່, ສົມເປັນໜຶ່ງໃນບັນດາເສົາຄ້ຳສຳຄັນໃນການພົວພັນສອງປະເທດ, ປະກອບສ່ວນຮັກສາຜົນງານການປະຕິວັດ, ສອດຄ່ອງກັບຄວາມຕ້ອງການ ແລະກຳລັງແຮງຂອງແຕ່ລະປະເທດ. ພວກເຮົາສາມາດຮັບປະກັນໄດ້ວ່າ ສາຍພົວພັນນີ້ໄດ້ຮັບການເພີ່ມທະວີຂຶ້ນໃນທຸກໆມື້, ທັງສອງຝ່າຍລ້ວນແຕ່ເພີ່ມທະວີການກຽມພ້ອມ ແລະຮັບມືໃນທຸກຂົງເຂດ. ພວກເຮົາ ເປັນປະເທດທີ່ບໍ່ມີເນື້ອທີ່ກວ້າງໃຫຍ່, ແຕ່ມີມູນເຊື້ອການຕໍ່ສູ້ອັນຍາວນານ, ອົງອາດກ້າແກ່ນ, ໂດຍມີກອງທັບທີ່ເຂັ້ມແຂງ ເພາະວ່າພວກເຮົາ ຮູ້ຈັກອີງໃສ່ກໍາລັງທີ່ຍິ່ງໃຫຍ່ທີ່ສຸດຂອງພວກເຮົາ ນັ້ນແມ່ນປະຊາຊົນ.
ປີນີ້ ພວກເຮົາ ສະເຫຼີມສະຫຼອງ 40 ປີແຫ່ງວັນລົງນາມຂໍ້ຕົກລົງຮ່ວມມືທາງການທະຫານ ຫວຽດນາມ - ກູບາ, ແມ່ນພື້ນຖານໃຫ້ແກ່ການພັດທະນາຢ່າງເຂັ້ມແຂງຂອງການພົວພັນສອງຝ່າຍໃນຂົງເຂດປ້ອງກັນຊາດ, ສະນັ້ນ ການແບ່ງປັນນີ້ ແມ່ນແນໃສ່ຮັບຮູ້ ແລະຍົກໃຫ້ເຫັນການປະກອບສ່ວນອັນລ້ຳຄ່າຂອງທະຫານລຸງໂຮ່ ບໍ່ພຽງແຕ່ໃຫ້ແກ່ຫວຽດນາມ ເທົ່ານັ້ນ, ຫາກຍັງແມ່ນປະສົບການໃຫ້ແກ່ກຳລັງປະກອບອາວຸດກູບາ ອີກດ້ວຍ. ພວກຂ້າພະເຈົ້າ ເຊື່ອໝັ້ນວ່າ ທະຫານລຸງໂຮ່ ຈະສືບຕໍ່ເຕີບໃຫຍ່ຂະຫຍາຍຕົວ ແລະຍາມໃດກໍ່ໄດ້ຮັບຄວາມໄວ້ເນື້ອເຊື່ອໃຈ, ຮັກແພງຈາກພັກ, ລັດ ແລະປະຊາຊົນ ຫວຽດນາມ ຍ້ອນມີການປະກອບສ່ວນເຂົ້າໃນການພັດທະນາ ແລະປົກປັກຮັກສາອະທິປະໄຕຂອງປະເທດຊາດ. ທະຫານລຸງໂຮ່ ກໍ່ແມ່ນນາມມະຍົດອັນສູງສົ່ງ ເຊິ່ງ ປະຊາຊົນ ແລະບັນດາກຳລັງປະກອບອາວຸດຂອງກູບາ ຮັກແພງ ແລະນິຍົມນັບຖື.
