 |
| ໝາກພຸກໄດ້ຂາຍຢູ່ອາເມຣິກາ (ພາບ:VOV) |
ຄາດວ່າ, ຮອດທ້າຍປີ 2022, ວົງເງິນສົ່ງອອກອາດຈະບັນລຸ 3,4 ຕື້ USD. ປະຈຸບັນ ມີໝາກໄມ້ສົດຫຼາຍຊະນິດເຊິ່ງແມ່ນສິນຄ້າສົ່ງອອກຕົ້ນຕໍຂອງບັນດາແຂວງພາກໃຕ້ພວມຢູ່ໃນລະດູການເກັບກ່ຽວເປັນຕົ້ນຄື ໝາກກ້ວຍ, ໝາກມັງກອນ, ໝາກມ່ວງ, ໝາກພຸກ, ໝາກມີ້... ດ້ວຍເລື່ອງມີຕະຫຼາດຫຼາຍແຫ່ງເປີດປະຕູໃຫ້ໝາກໄມ້ສົດຫວຽດນາມ, ຄາດວ່າ ໃນລະດູການໃໝ່, ການເຄື່ອນໄຫວສົ່ງອອກໝາກໄມ້ສົດຈະບັນລຸໄດ້ໝາກຜົນດີຫຼາຍຢ່າງ.
ໃນປີ 2022, ບັນດາຜະລິດຕະພັນໝາກໄມ້ສົດຂອງຫວຽດນາມ ຄື ໝາກກ້ວຍ, ໝາກຖົ່ວລຽນ, ໝາກໜອດ... ໄດ້ຖືກສົ່ງອອກໄປຕະຫຼາດຈີນຢ່າງເປັນທາງການ. ນອກຈາກນັ້ນ, ໝາກພຸກ ແລະ ໝາກນາວຂອງຫວຽດນາມ ກໍໄດ້ຮັບການອະນຸຍາດໃຫ້ນຳເຂົ້າຕະຫຼາດ ນິວຊີແລນ; ໝາກລຳໄຍສົດ ໄດ້ຮັບອະນຸຍາດໃຫ້ນຳເຂົ້າຍີ່ປຸ່ນ… ວິສາຫະກິດສົ່ງອອກຜະລິດຕະພັນກະເສດຈຳນວນໜຶ່ງຄາດວ່າ ການເລີ່ມລະດູການສົ່ງອອກໝາກໄມ້, ຜະລິດຕະພັນກະເສດໃນລະດູການໃໝ່ຈະມີຄວາມສະດວກຫຼາຍຂຶ້ນ ເນື່ອງຈາກຄ່າໃຊ້ຈ່າຍໃນການຂົນສົ່ງຫຼຸດລົງ; ຕະຫລາດສົ່ງອອກກໍມີຄວາມປ່ຽນແປງດີຂຶ້ນເມື່ອມີຕະຫຼາດຫຼາຍແຫ່ງໄດ້ເປີດປະຕູໃຫ້ໝາກໄມ້ສົດຂອງຫວຽດນາມ.
ຕາມສະມາຄົມຜັກ ແລະ ໝາກໄມ້ຫວຽດນາມ ແລ້ວ, ໃນຊຸມເດືອນທ້າຍປີ, ການສົ່ງອອກຜັກ ແລະ ໝາກໄມ້ຂອງຫວຽດນາມ ຈະສືບຕໍ່ປ່ຽນແປງດີຂຶ້ນດ້ວຍວົງເງິນສະເລ່ຍປະມານ 250 – 260 ລ້ານ USD/ເດືອນ; ຄາດວ່າ ໃນປີ 2023 ຈະແມ່ນປີຂະຫຍາຍຕົວຂອງຂະແໜງການຜັກ ແລະ ໝາກໄມ້, ດ້ວຍວົງເງິນສົ່ງອອກຄາດວ່າຈະບັນລຸປະມານ 4 ຕື້ USD.
ຫອມມາລາ
