ທີ 19 ທັນວາ, ຢູ່ເມືອງ ດາກຈຶງ, ແຂວງ ເຊກອງ, ບໍລິສັດຫຸ້ນສ່ວນກຸ່ມບໍລິສັດຫວຽດເຟືອງ (VPG) ຈັດຕັ້ງພິທີວາງສີລາລຶກກໍ່ສ້າງໂຄງການ ແລະ ເປີດນໍາໃຊ້ເຂດຫ້ອງການຄຸ້ມຄອງໂຄງການອຸດສາຫະກໍາບົກຊິດ-ອາລູມີນາ ດາກຈຶງ ຄົບວົງຈອນ. ນີ້ແມ່ນໂຄງການທີ່ມີຂອບຂະໜາດໃຫຍ່ດ້ວຍຄວາມສາມາດຂຸດຄົ້ນ ແລະ ປຸງແຕ່ງຄາດຄະເນຂຶ້ນເຖິງ 1 ລ້ານໂຕນ/ປີ.
ພິທີວາງສີລາລຶກ ໂຄງການໃຫຍ່ທີ່ສຸດຂອງຫວຽດນາມ ຢູ່ລາວ.
ໂດຍສະແດງຄວາມປິຕິຊົມຊື່ນເມື່ອເຂົ້າຮ່ວມພິທີວາງສີລາລຶກ ໂຄງການອຸດສາຫະກໍາ ບົກຊິດ-ອາລູມີນາ, ທ່ານ ເຫຼັກໄຫຼ ສີວິໄລ ເລຂາພັກແຂວງ, ເຈົ້າແຂວງເຊກອງ ໄດ້ຊົມເຊີຍ ແລະ ສະແດງຄວາມຍິນດີນຳນັກລົງທຶນທີ່ໄດ້ກະກຽມບັນດາວຽກງານຕາມແຜນການທີ່ໄດ້ວາງອອກເປັນຢ່າງດີ. ທ່ານເນັ້ນໜັກວ່າ ໂຄງການອຸດສາຫະກໍາ ບົກຊິດ-ອາລູມີນາ ຢູ່ເມືອງດາກຈຶງ, ແຂວງເຊກອງ ແມ່ນໜຶ່ງໂຄງການພິເສດ, ຈໍາເປັນສໍາລັບທ້ອງຖິ່ນ, ຖືກຕາມການກໍານົດທິດຂອງພັກ ແລະ ລັດຖະບານລາວ, ຢັ້ງຢືນວ່າ ອໍານາດການປົກຄອງທຸກຂັ້ນແຂວງເຊກອງ ພ້ອມແລ້ວທີ່ຈະໜູນຊ່ວຍ ແລະ ສະໜັບສະໜູນໂຄງການ.
ສະຫາຍ ຫງວຽນບາຮຸ່ງ ເອກອັກຄະລັດຖະທູດຫວຽດນາມ ປະຈໍາ ລາວ ຕີລາຄາວ່າ ນີ້ແມ່ນໂຄງການທີ່ມີຂອບຂະໜາດໃຫຍ່ທີ່ສຸດຂອງວິສາຫະກິດຫວຽດນາມ ຢູ່ລາວ, ແມ່ນຈຸດພົ້ນເດັ່ນສໍາຄັນທີ່ສຸດໃນການຮ່ວມມືລົງທຶນລະຫວ່າງລາວ-ຫວຽດນາມ. ສະຫາຍ ຫງວຽນບາຮຸ່ງ ກໍ່ສະເໜີອໍານາດການປົກຄອງທຸກຂັ້ນຂອງລາວ ຕັ້ງໜ້າໜູນຊ່ວຍເພື່ອໃຫ້ວິສາຫະກິດສໍາເລັດເປົ້າໝາຍໂຄງການ, ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມ ຂອງລາວ ແລະ ທ້ອງຖິ່ນ, ສ້າງຫຼາຍວຽກເຮັດງານທໍາໃຫ້ປະຊາຊົນ, ປະກອບສ່ວນປັບປຸງຊີວິດການເປັນຢູ່ດ້ານວັດຖຸ ແລະ ຈິດໃຈໃຫ້ປະຊາຊົນໃນເຂດໂຄງການ.
ສະຫາຍ ວຽງສະຫວັນ ວິໄລພອນ ຮອງປະທານຄະນະກໍາມະການຮ່ວມມືລາວ-ຫວຽດນາມ ເຊື່ອໝັ້ນວ່າ ເມື່ອໂຄງການໄດ້ຮັບການປະຕິບັດຈະປະກອບສ່ວນສ້າງວຽກເຮັດງານທໍາໃຫ້ປະຊາຊົນໃນທ້ອງຖີ່ນຫຼາຍພັນຄົນ, ສ້າງແຫຼ່ງລາຍຮັບຊ່ວຍພັດທະນາເສດຖະກິດ-ສັງຄົມ ຕິດພັນກັບສອງໂຄງການແຫ່ງຊາດຂອງລັດຖະບານລາວ.
ເນື່ອງໃນໂອກາດນີ້, ບໍລິສັດຫຸ້ນສ່ວນກຸ່ມບໍລິສັດຫວຽດເຟືອງ ກໍ່ຈັດຕັ້ງພິທີເປີດນໍາໃຊ້ເຂດຫ້ອງການຄຸ້ມຄອງໂຄງການ, ເຊິ່ງກໍ່ສ້າງໃນເນື້ອທີ່ 2,5 ເຮັກຕາ.
ບູນມີ
