ຊີວິດການເປັນຢູ່ດີຂຶ້ນ
ສອງບ້ານແມ່ນ ບ້ານ ລາໄລອາຊອຍ (ເມືອງສະໝ້ວຍ, ແຂວງ ສາລະວັນ, ລາວ) ແລະ ລາໄລ (ຕາແສງ ອາງໍ, ເມືອງ ດາກຣົງ, ແຂວງ ກວາງຈີ້) ມີທີ່ຕັ້ງຢູ່ກົງກັນຂ້າມ, ຕິດກັບສອງຟາກຂອງເສັ້ນຊາຍແດນເຊິ່ງມີຄວາມຍາວກວ່າ 10 ກິໂລແມັດ.
ທ່ານ ໂຮ່ວັນຖຸຍ, ນາຍບ້ານ ລາໄລ, ຕາແສງ ອາງໍ, ເມືອງ ດາກຣົງ ໃຫ້ຮູ້ວ່າ ພາຍຫຼັງການແຮກສ່ຽວ ໃນປີ 2007, 15 ປີຜ່ານມາ ສອງບ້ານໄດ້ຊ່ວຍເຫຼືອເຊິ່ງກັນ ແລະ ກັນເປັນປະຈຳໃນການພັດທະນາເສດຖະກິດ - ສັງຄົມ. ສອງຝ່າຍໄດ້ມອບເບ້ຍໄມ້, ແນວພັນ, ຊ່ວຍເຫຼືອເຊິ່ງກັນ ແລະ ກັນໃນດ້ານເຕັກນິກລ້ຽງປູກ... ພິເສດແມ່ນພາຍໃຕ້ການໜູນຊ່ວຍຂອງກໍາລັງທະຫານປ້ອງກັນຊາຍແດນ, ສອງຝ່າຍໄດ້ຕັ້ງໜ້າຈັດຕັ້ງບັນດາການກິດຈະກໍາ ໂຄສະນາເພື່ອໃຫ້ປະຊາຊົນປະຕິບັດກ່ຽວກັບຄວາມເປັນລະບຽບຮຽບຮ້ອຍຢູ່ໃນບ້ານໃຫ້ຢ່າງດີ; ເຂົ້າຮ່ວມການເຄື່ອນໄຫວປົກປັກຮັກສາເສັ້ນຊາຍແດນ, ຫຼັກໝາຍຊາຍແດນ; ຈັດຕັ້ງການລວມມອບວຽກເພື່ອແຈ້ງສະພາບການ; ຊ່ວຍເຫຼືອເຊິ່ງກັນ ແລະ ກັນ ໃນເວລາທີ່ຫຍຸ້ງຍາກ… ຍ້ອນແນວນັ້ນ, ຊີວິດການເປັນຢູ່ຂອງປະຊາຊົນຢູ່ທັງສອງຟາກກໍນັບມື້ນັບໄດ້ດີຂຶ້ນ.
 |
ພະນັກງານກຸ່ມຢຸຍເຕີນ, ເທສະບານເມືອງ ລາວບາວ ແລະ ພະນັກງານຄ້າຍທະຫານປ້ອງກັນຊາຍແດນດ່ານສາກົນ ລາວບາວ ແນະນຳເຕັກນິກການປູກຕົ້ນໄມ້ກິນໝາກ ໃຫ້ປະຊາຊົນບ້ານ ເຟື່ອງ. (ພາບ: ແທ່ງຟູ) |
ວັນທີ 29 ພະຈິກ 2012, ໝູ່ ຢຸຍເຕີນ ແລະ ບ້ານ ເຟື່ອງ (ເມືອງ ເຊໂປນ, ແຂວງ ສະຫວັນນະເຂດ, ລາວ) ໄດ້ແຮກສ່ຽວລະຫວ່າງບ້ານຕໍ່ບ້ານ, ເຫັນດີເປັນເອກະພາບຮັບຮອງເອົາຂໍ້ກຳນົດການເຄື່ອນໄຫວຂອງການແຮກສ່ຽວ ດ້ວຍ 12 ເນື້ອໃນ, ຖືກກັບສັນຍາຂໍ້ກຳນົດເຂດຊາຍແດນ ຫວຽດນາມ - ລາວ, ກົດໝາຍຂອງແຕ່ລະປະເທດ ແລະ ສອດຄ່ອງກັບຮີດຄອງປະເພນີຂອງຊົນເຜົ່າຢູ່ສອງຟາກຂອງຊາຍແດນ.
ໃນ 10 ປີຜ່ານມາ, ໂດຍໄດ້ຮັບຄວາມເອົາໃຈໃສ່ຈາກພັກ ແລະ ລັດກ່ຽວກັບນະໂຍບາຍບຸລິມະສິດຢູ່ເຂດເສດຖະກິດ - ການຄ້າພິເສດ ລາວບ໊າວ; ເຂດເສດຖະກິດ ແດນສະຫວັນ, ປະຊາຊົນຢູ່ສອງຝ່າຍກໍໄດ້ສົມທົບກັນໃນການພັດທະນາບັນດາການບໍລິການຄ້າຂາຍຂະໜາດນ້ອຍ-ຍ່ອຍ, ໄປມາເປັນປະຈໍາເພື່ອຊ່ວຍເຫຼືອເຊິ່ງກັນ ແລະ ກັນໃນການພັດທະນາເສດຖະກິດ, ການຫຼຸດຜ່ອນຄວາມທຸກຍາກ ແລະ ສ້າງຮູບແບບເສດຖະກິດຢ່າງມີປະສິດທິຜົນ, ຈາກນັ້ນ ຊີວິດການດປັນຢູ່ດ້ານວັດຖຸ ແລະ ຈິດໃຈຂອງຄຸ້ມ ຢຸຍເຕີນ ແລະ ບ້ານ ເຟື່ອງ ກໍນັບມື້ນັບດີຂຶ້ນ.
 |
ໂດຍການແບ່ງປັນທີ່ພິທີສະຫຼຸບເບື້ອງຕົ້ນ 10 ປີແຫ່ງວັນແຮກສ່ຽວກຸ່ມພົນລະເມືອງຢູ່ສອງຟາກຂອງເຂດຊາຍແດນ ລະຫວ່າງໝູ່ ຢຸຍເຕີນ ແລະ ບ້ານ ເຟື່ອງ, ຜູ້ເຖົ້າຜູ້ແກ່ບ້ານ ເຟື່ອງ ລຸງ ຄຳຂອງ ໃຫ້ຮູ້ວ່າ ໂດຍຜ່ານຂໍ້ກຳນົດການແຮກສ່ຽວລະຫວ່າງບ້ານຕໍ່ບ້ານ, ການພົວພັນແບບຮັກແພງຊ່ວຍເຫຼືອເຊິ່ງກັນ ແລະ ກັນລະຫວ່າງສອງຟາກໄດ້ເພີ່ມທະວີກວ່າອີກ. ເວລາປະຊາຊົນບ້ານ ເຟື່ອງ ປະສົບໄພທຳມະຊາດ, ອຳນາດການປົກຄອງ, ປະຊາຊົນ, ກໍາລັງທະຫານປ້ອງກັນຊາຍແດນທີ່ຕັ້ງທັບຢູ່ບໍລິເວນເມືອງ ເຮື໋ອງຮ໋ວາ ກໍໄດ້ຊ່ວຍເຫຼືອເຂົ້າສານເປັນສິບໆໂຕນ, ເຄື່ອງນຸ່ງຫົ່ມ, ຜ້າຫົ່ມ, ມຸ້ງ; ລະດົມກຳມະກອນນັບຮ້ອຍຄົນໄປປຸກເຮືອນ, ສົ່ງແຜ່ນມຸງຫຼັງຄາເຮືອນ, ຊ່ວຍເຫຼືອບັນດາຄອບຄົວໃນການກໍ່ສ້າງເຮືອນຢູ່ຄືນໃໝ່. ເວລາພໍ່ແມ່ພີ່ນ້ອງຂອງຄຸ້ມ ຢຸຍເຕີນ ຖືກຜົນສະທ້ອນຈາກໄພທຳມະຊາດ, ປະຊາຊົນບ້ານ ເຟື່ອງ ກໍໄດ້ໜູນຊ່ວຍດ້ານວັດຖຸ ແລະ ແຮງງານ.
ການແຮກສ່ຽວລະຫວ່າງບ້ານຕໍ່ບ້ານ ກໍຊ່ວຍໃຫ້ການໂຄສະນາເຜີຍແຜ່, ຂົນຂວາຍປະຊາຊົນຢູ່ສອງຟາກ, ໂດຍສະເພາະແມ່ນລຸ້ນໜຸ່ມເຂົ້າໃຈໄດ້ມູນເຊື້ອວັດທະນະທໍາ, ສາຍພົວພັນມິດຕະພາບລະຫວ່າງສອງປະເທດ ຫວຽດນາມ - ລາວ; ສາຍພົວພັນແບບພີ່ນ້ອງໃນຕະກຸນດຽວລະຫວ່າງບັນດາໝູ່ບ້ານຕັ້ງຢູ່ລຽບຕາມເຂດຊາຍແດນ, ຜ່ານນັ້ນ ກໍໄດ້ສ້າງສະຕິຄວາມຮັບຜິດຊອບໃຫ້ລຸ້ນໜຸ່ມໃນປະຈຸບັນໃນການປົກປັກຮັກສາ ແລະ ການສ້າງເສັ້ນຊາຍແດນແຫ່ງຄວາມສະຫງົບສຸກ, ມິດຕະພາບ.
ໂດຍແບ່ງປັນກັບບັນດານັກຂ່າວກ່ຽວກັບຄວາມຊົງຈຳໃນທຸກຄັ້ງທີ່ເຂົ້າຮ່ວມການລວມມອບວຽກ ການເຄື່ອນໄຫວການແຮກສ່ຽວ ລະຫວ່າງບ້ານ ເຟື່ອງ ແລະ ຄຸ້ມ ຢຸຍເຕີນ, ນາຍບ້ານ ເຟື່ອງ ໄດ້ເລົ່າວ່າ:
“ໂດຍສາມເດືອນເທື່ອໜຶ່ງ, ພວກຂ້າພະເຈົ້າ ຈະພົບກັນຢູ່ບ້ານ ເຟື່ອງ, ບາງທີກໍຢູ່ຄຸ້ມ ຢຸຍເຕີນ ເພື່ອຕີລາຄາໝາກຜົນທີ່ບັນລຸໄດ້, ຜັນຂະຫຍາຍການເຄື່ອນໄຫວແຮກສ່ຽວ. ອາດຈະຍາກທີ່ຈະພັນລະນາໄດ້ເຖິງນໍ້າໃຈ, ການແບ່ງປັນລະຫວ່າງປະຊາຊົນຂອງສອງບ້ານໃນການຜະລິດ ແລະ ການດໍາລົງຊີວິດ ກໍຄືການເຂົ້າຮ່ວມຢ່າງຕັ້ງໜ້າໃນການປົກປັກຮັກສາເສັ້ນຊາຍແດນ, ຫຼັກແດນ, ຄວາມໝັ້ນຄົງ ແລະ ຄວາມເປັນລະບຽບຮຽບຮ້ອຍຢູ່ເຂດຊາຍແດນ. ເລື່ອງທີ່ດີໃຈທີ່ສຸດແມ່ນໂດຍຜ່ານການເຄື່ອນໄຫວການແຮກສ່ຽວ, ປະຊາຊົນບ້ານ ເຟື່ອງ ເປັນຈໍານວນຫຼາຍໄດ້ມີສະຕິໃນການປະຕິບັດຕາມຂໍ້ກໍານົດກົດຫມາຍ ແລະ ຍັງມີວິທີການໃນການຜະລິດ, ເຮັດທຸລະກິດຢ່າງເຫມາະສົມເພື່ອເພີ່ມລາຍຮັບ".
ທະວີຄູນຮູບແບບການແຮກສ່ຽວລະຫວ່າງບ້ານຕໍ່ບ້ານ
ແຂວງ ກວາງຈີ້ (ຫວຽດນາມ) ມີເສັ້ນຊາຍແດນຮ່ວມກັບສອງແຂວງ ສະຫວັນນະເຂດ ແລະ ແຂວງ ສາລະວັນ (ລາວ) ເຊິ່ງມີຄວາມຍາວແມ່ນ 179,345 ກິໂລແມັດ. ຈາກຮູບແບບການແຮກສ່ຽວລະຫວ່າງບ້ານຕໍ່ບ້ານ ທໍາອິດແມ່ນລະຫວ່າງຄຸ້ມ ກະຕັງ (ເທດສະບານ ລາວບ໊າວ, ເມືອງ ເຮື໋ອງຮ໋ວາ, ແຂວງ ກວາງຈີ້) ກັບ ບ້ານ ແດນສະຫວັນ (ເມືອງເຊໂປນ, ແຂວງ ສະຫວັນນະເຂດ) ໃນວັນທີ 28 ເມສາ 2005, ຮອດເດືອນ ພະຈິກ 2012 ເຊິ່ງມີ 24 ຄູ່ບ້ານທີ່ຢູ່ກົງກັນຂ້າມຂອງສອງຟາກຂອງເຂດຊາຍແດນ ໄດ້ຈັດຕັ້ງການແຮກສ່ຽວ.
ແຕ່ລະປີ, ແຂວງ ກວາງຈີ້ ໄດ້ນຳໃຊ້ງົບປະມານທ້ອງຖິ່ນເພື່ອໜູນຊ່ວຍການກໍ່ສ້າງໂຄງການຈໍານວນໜຶ່ງຄື ໂຮງຮຽນ; ສຸກສາລາ; ໂຄງການໄຟຟ້າ ແລະ ນ້ຳປະປາ; ສະໜອງເບັ້ຍໄມ້, ແນວພັນ; ສໍາຫຼວດບັນດາໂຄງການປູກປ່າ, ປູກຕົ້ນໄມ້ອຸດສາຫະກໍານານປີຄື ກາເຟ, ຢາງພາລາ, ໝາກພິກໄທ ແລະ ບາງໂຄງການໃນຂົງເຂດໄອທີ; ຈັດຊຸດຮຽນພາສາຫວຽດໃຫ້ແມ່ຍິງລາວຢູ່ບ້ານທີ່ຕິດກັບຊາຍແດນ.
 |
ບັນດາຄູ່ບ້ານທີ່ແຮກສ່ຽວ, ບັນດາຄະນະ, ຊະແໜງການ, ອົງການຈັດຕັ້ງຂອງສອງຝ່າຍ ກໍໄດ້ແລກປ່ຽນປະສົບການດ້ານການຜະລິດຢ່າງເປັນປະຈໍາ, ໜູນຊ່ວຍບັນດາແນວພັນພືດ ແລະ ສັດ, ແນະນຳວິທີກຳຈັດແມງໄມ້, ແລກປ່ຽນປະສົບການໃນການດຳເນີນທຸລະກິດ, ນຳໃຊ້ຄວາມກ້າວໜ້າທາງວິທະຍາສາດເຕັກນິກເຂົ້າໃນການຜະລິດ; ສ້າງເງື່ອນໄຂສະດວກໃຫ້ການຈະລາຈອນຜະລິດຕະພັນກາຍເປັນສິນຄ້າແລກປ່ຽນຢູ່ຕະຫລາດ.
ທ່ານ ພັນເອກ ເລວັນເຟືອງ, ຫົວໜ້າກອງບັນຊາການທະຫານປ້ອງກັນຊາຍແດນແຂວງ ກວາງຈີ້ ໃຫ້ຮູ້ວ່າ, ການຈັດຕັ້ງການແຮກສ່ຽວກຸ່ມພົນລະເມືອງຢູ່ສອງຟາກຂອງເຂດຊາຍແດນແມ່ນນະໂຍບາຍທີ່ຖືກຕ້ອງ, ສະແດງໃຫ້ເຫັນຄວາມເປັນເອກະພາບສູງຂອງການນຳແຂວງ ກວາງຈີ້ ກັບ ສອງແຂວງ ສະຫວັນນະເຂດ ແລະ ສາລະວັນ. ຜ່ານນັ້ນ ຢືນຢັນທີ່ຕັ້ງ ແລະ ບົດບາດອັນໃຫຍ່ຫຼວງຂອງມະຫາຊົນໃນພາລະກິດສ້າງສາ ແລະ ປົກປັກຮັກສາອະທິປະໄຕ ແລະ ຄວາມສະຫງົບຢູ່ເຂດຊາຍຂອງສອງປະເທດ ຫວຽດນາມ - ລາວ.
ໝາກຜົນຂອງຮູບແບບການແຮກສ່ຽວໄດ້ປະກອບສ່ວນເຂົ້າໃນການຮັກສາສະຖຽນລະພາບດ້ານການເມືອງຢູ່ເຂດຊາຍແດນ, ເພີ່ມທະວີການພົວພັນສາມັກຄີລະຫວ່າງສອງປະເທດ, ປະຊາຊົນບັນດາເຜົ່າທີ່ມີເສັ້ນຊາຍແດນຮ່ວມກັນ, ຮັບໃຊ້ໃຫ້ຄວາມຮຽກຮ້ອງຕ້ອງການຂອງການພັດທະນາເສດຖະກິດ ແລະ ສັງຄົມ, ຍົກສູງລະດັບຄວາມຮູ້ຂອງປະຊາຊົນ, ຫຼຸດຜ່ອນຄວາມທຸກຍາກລໍາບາກ, ປັບປຸງຊີວິດການເປັນຢູ່ຂອງປະຊາຊົນຢູ່ສອງຟາກຂອງຊາຍແດນ. ພ້ອມກັນນັ້ນ, ກໍຕັ້ງໜ້າໃນການສະກັດກັ້ນ, ຄົ້ນພົບ ແລະ ແກ້ໄຂຫຼາຍບັນຫາທີ່ເກີດຂຶ້ນຢູ່ເຂດຊາຍແດນ...
ໃນໄລຍະຈະມາເຖິງ, ຮູບແບບການແຮກສ່ຽວລະຫວ່າງບ້ານຕໍ່ບ້ານ ຈະສືບຕໍ່ໄດ້ຮັບການຮັກສາ ແລະ ຍົກສູງປະສິດທິຜົນ; ໂດຍສະເພາະແມ່ນການຊຸກຍູ້ວຽກງານໜູນຊ່ວຍປະຊາຊົນຂອງບັນດາບ້ານທີ່ໄດ້ແຮກສ່ຽວຂອງລາວໃນການພັດທະນາເສດຖະກິດຄອບຄົວ ແລະ ທ້ອງຖິ່ນ. ພ້ອມກັນນັ້ນ, ກໍຍູ້ແຮງວຽກງານໂຄສະນາໃຫ້ປະຊາຊົນຢູ່ສອງຟາກຂອງຊາຍແດນປະຕິບັດກົດໝາຍວ່າດ້ວຍຄວາມໝັ້ນຄົງເຂດຊາຍແດນ ກໍຄືຍົກສູງສະຕິໃນການປົກປັກຮັກສາອະທິປະໄຕຂອງປະເທດຊາດໃຫ້ເປັນຢ່າງດີ, ປະກອບສ່ວນເຂົ້າໃນການສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະ ພັດທະນາ.
ບູນມີ
