 |
ພາບປະກອບ
ກະຊວງປ້ອງກັນຄວາມສະຫງົບ (ປກສ) ແລະ ສຳນັກງານຂໍ້ມູນຕ້ານການຟອກເງິນ (ສຕຟງ) ທະນາຄານແຫ່ງ ສປປ ລາວ ໄດ້ຈັດເຜີຍແຜ່ວຽກງານການຕ້ານ ສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍຂຶ້ນວັນທີ 8 ມັງກອນ 2020 ທີ່ ກະຊວງ ປກສ ເປັນປະທານຂອງທ່ານ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ຮອງປະທານຄະນະກຳມະການແຫ່ງຊາດເພື່ອຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ ມີບັນດານາຍຕຳຫຼວດຈາກກົມກອງວິຊາການທີ່ກ່ຽວຂ້ອງອ້ອມຂ້າງກະຊວງ ພ້ອມທັງຄະນະອະນຸກຳມະການຮັບຜິດຊອບການປະເມີນວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍຂອງລາວ ເຂົ້າຮ່ວມ.
ການຟອກເງິນແມ່ນການປ່ຽນຮູບ ນຳໃຊ້ ເຄື່ອນຍ້າຍ ແລກປ່ຽນ ໄດ້ມາຄອບຄອງ ໂອນກຳມະສິດທີ່ແທ້ຈິງຂອງເງິນ ຫຼື ຊັບສິນອື່ນໆ ທີ່ບຸກຄົນ ນິຕິບຸກຄົນ ຫຼື ການຈັດຕັ້ງ ໂດຍທີ່ຮູ້ ໄດ້ຮູ້ ຫຼື ສົງໄສວ່າ ເງິນ ຫຼື ຊັບສິນນັ້ນມາຈາກການກະທຳຜິດຕົ້ນ ເພື່ອປົກປິດ ຫຼື ຊຸກເຊື່ອງ ຄຸນລັກສະນະ ທີ່ມາຂອງເງິນ ທີ່ຕັ້ງຂອງຊັບສິນ ເພື່ອເຮັດໃຫ້ເງິນ ຫຼື ຊັບສິນດັ່ງກ່າວຖືກຕ້ອງຕາມກົດໝາຍ ແລະ ການກະທຳທີ່ເປັນການຟອກເງິນແມ່ນການປ່ຽນຮູບ ການໂອນເງິນ ຫຼື ຊັບສິນອື່ນໂດຍມີຈຸດປະສົງປົກປິດ ຫຼື ເຊື່ອງອຳຜົນຈາກການກະທຳຜິດຕົ້ນ ໃຫ້ການຊ່ວຍເຫຼືອຜູ້ກະທຳຜິດຕົ້ນເພື່ອຫຼົບຫຼີກຈາກຜົນສະທ້ອນທາງດ້ານກົດໝາຍ ໄພຂົ່ມຂູ່ດ້ານການຟອກເງິນທີ່ເປັນບຸລິມະສິດມີ 7 ລາຍການຈາກການກະທຳຜິດຕົ້ນຈາກ 29 ລາຍການ ໃນນີ້ມີ ການຜະລິດ ແລະ ຄ້າຂາຍຢາເສບຕິດ ການປອມແປງແຊັກ ການນຳໃຊ້ແຊັກ ຫຼື ພັນທະບັດອື່ນໂດຍບໍ່ຖືກຕ້ອງຕາມກົດໝາຍ ອາຊະຍາກຳສິ່ງແວດລ້ອມ ການລັກຊັບພົນລະເມືອງ ການປອມແປງເງິນ ຫຼື ການໃຊ້ເງິນປອມ ການປອມແປງເອກະສານ ຫຼື ການໃຊ້ເອກະສານປອມ ແລະ ການສໍ້ໂກງຊັບພົນລະເມືອງ.
ກອງປະຊຸມຄັ້ງປະຖົມມະລືກຂອງຄະນະສະເພາະກິດຮັບຜິດຊອບການປະເມີນວຽກງານການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ຂອງ ສປປ ລາວ ຄັ້ງທີ 2 (2019-2021) ໄດ້ສໍາເລັດລົງໃນວັນທີ 25 ພະຈິກຜ່ານມາ ທີ່ຫ້ອງປະຊຸມທະນາຄານແຫ່ງ ສປປ ລາວ ໂດຍການເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະ ມົນຕີ ກະຊວງການເງິນ ປະ ທານຄະນະກໍາມະການແຫ່ງ ຊາດ ເພື່ອຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ (ຄຕຟງ). ກອງປະຊຸມໃນຄັ້ງນີ້, ໄດ້ມີການປຶກສາຫາລືຫຼາຍບັນຫາທີ່ມີຄວາມສໍາຄັນຕິດພັນກັບວຽກງານຕ້ານການຟອກເງິນ ແລະ ສະໜອງທຶນໃຫ້ແກ່ການ ກໍ່ການຮ້າຍຂອງ ສປປ ລາວ ໂດຍສະເພາະແມ່ນການກະ ກຽມຄວາມພ້ອມ ເພື່ອປະເມີນຮອບດ້ານຂອງ ສປປ ລາວ ໃນ ປີ 2020-2021.
ຂະນະດຽວ ກັນນັ້ນຍັງໄດ້ຮັບຟັງການລາຍ ງານຄວາມຄືບໜ້າຂອງບັນດາ ອານຸກໍາມະການຂອງ 4 ພາກ ສ່ວນທີ່ຮັບຜິດຊອບການປະເມີນຜົນຮອບດ້ານກ່ຽວກັບການ ຈັດຕັ້ງປະຕິບັດວຽກງານການ ຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍຂອງ ສປປ ລາວ ໃນ ນັ້ນ ປະກອບມີພາກສ່ວນຮັບ ຜິດຊອບວຽກງານເຜີຍແຜ່ ແລະ ເຊື່ອມຊຶມ; ຮັບຜິດຊອບວຽກ ງານນິຕິກໍາ ແລະ ກົນໄກ; ຮັບ ຜິດຊອບວຽກງານຄຸ້ມຄອງ ແລະ ພາກສ່ວນຮັບຜິດຊອບວຽກ ງານດໍາເນີນຄະດີ. ບັນດາພາກສ່ວນດັ່ງກ່າວ ໄດ້ມີການລາຍງານຄວາມຄືບ ໜ້າ ແລະ ແຜນຈັດຕັ້ງປະຕິບັດໃນຕໍ່ໜ້າຂອງຕົນຢ່າງລະອຽດ ໂດຍສຸມໃສ່ສ້າງຄວາມເຂົ້າໃຈ ໃຫ້ບັນດາພາກສ່ວນ ແລະ ອົງ ການທີ່ຕິດພັນກັບວຽກງານ ຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ ການຮ້າຍກ່ຽວກັບພັນທະ ແລະ ຄວາມຮັບຜິດຊອບຂອງຕົນຕໍ່ ກັບວຽກງານດັ່ງກ່າວ ໃນລວງເລິກ, ເຜີຍແຜ່ເຊື່ອມຊຶມໃຫ້ທົ່ວສັງຄົມຮັບຮູ້ ແລະ ເຂົ້າໃຈວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ; ກວດກາຄືນບັນດານິຕິກຳທີ່ກ່ຽວ ຂ້ອງຂອງ ສປປ ລາວ ກັບມາດຖານອົງ ການຕ້ານການຟອກເງິນສາກົນ (FATF) ອັນໃດທີ່ມີແລ້ວ ແລະ ຖືກຈັດຕັ້ງປະຕິບັດແລ້ວ ສ່ວນອັນຄົງຄ້າງຈະຕ້ອງໄດ້ສ້າງ ແລະ ຂຶ້ນແຜນພັດທະນາ.
（ໄຊພອນ）
