 |
ພາບປະກອບ
ຄວາມຕ້ອງການ ນໍາໃຊ້ພະລັງງານໄຟຟ້າພາຍໃນ ສປປ ລາວ ໃນຊຸມປີຜ່ານມາແມ່ນນັບມື້ນັບຂະຫຍາຍຕົວຂຶ້ນ ຍ້ອນມີການຂະຫຍາຍຕົວຂອງພົນລະເຮືອນ ແລະ ໂຮງຈັກໂຮງງານ ສະເພາະ ປີ 2019 ການຊົມ ໃຊ້ໄຟຟ້າພາຍໃນປະເທດແມ່ນ 1.222 ເມກາວັດ, ແຕ່ກະຊວງ ພະລັງງານ ແລະ ບໍ່ແຮ່ ຍັງໃຫ້ຮູ້ຕື່ມວ່າ ປະລິມານການຊົມໃຊ້ພະລັງງານໄຟຟ້າພາຍໃນ ຈະເພີ່ມຂຶ້ນເຖິງ 1.800 ເມກາວັດ ໃນລະຫວ່າງ ປີ 2020-2025. ໃນປີ 2019 ການຊົມໃຊ້ໄຟຟ້າພາຍໃນປະເທດມີພຽງແຕ່ 1.222 ເມກາວັດ ແລະ ຄາດຄະເນວ່າຄວາມຕ້ອງການພະລັງ ງານໄຟຟ້າຢູ່ພາຍໃນຈະເພີ່ມຂຶ້ນເຖິງ 1.800 ເມກາວັດ ໃນປີ 2020-2025.
ນອກຈາກການສະໜອງໄຟຟ້າຢູ່ພາຍໃນ ໃຫ້ພຽງພໍກັບຄວາມຕ້ອງການຕົວຈິງແລ້ວ ພະລັງງານໄຟຟ້າຍັງເປັນທ່າແຮງບົມຊ້ອນ ຂອງ ສປປ ລາວ ໃນການສົ່ງອອກ ໄປຍັງບັນດາ ປະເທດທີ່ມີຊາຍແດນຕິດຈອດ ເຊັ່ນ: ໄທ, ສສ ຫວຽດນາມ, ກໍາປູເຈຍ ແລະ ມຽນມາ ນອກນັ້ນ ຍັງສົ່ງອອກໄປຍັງປະເທດມາເລເຊຍ ແລະ ສິງກາໂປ ໂດຍການເຊື່ອມໂຍງ ລະບົບສາຍສົ່ງຮ່ວມກັນໃນການຊື້-ຂາຍ ແລະ ແລກປ່ຽນພະລັງງານໄຟຟ້າ. ການເຊື່ອມໂຍງລະບົບສາຍສົ່ງໄຟຟ້າກັບປະເທດເພື່ອນບ້ານ ແມ່ນບາດກ້າວທີ່ສໍາຄັນ ແລະ ມີຄວາມໝາຍຕໍ່ ສປປ ລາວ ໃນການສົ່ງອອກກະແສໄຟຟ້າ ໂດຍຜ່ານປະເທດທີ່ສອງໄປປະເທດທີ່ສາມ ເຊິ່ງ ສປປ ລາວ ເປັນປະເທດທຳອິດ ໃນກຸ່ມປະເທດອາຊຽນ ທີ່ໄດ້ລິເລີ່ມຈັດຕັ້ງປະຕິບັດ. ໃນໄລຍະແຕ່ ປີ 2020-2030 ສປປ ລາວ ຈະສາມາດສົ່ງອອກໄຟຟ້າ ປະມານ 20.000 ເມກາວັດ, ປີ 2020-2030 ຄາດຄະເນລັດຖະບານໄທ ຕ້ອງການນໍາເຂົ້າໄຟຟ້າ ຈາກ ສປປ ລາວ ປະມານ 9.000 ເມກາວັດ, ກໍາປູເຈຍ 6.000 ເມກາວັດ, ສສ.ຫວຽດນາມ 5.000 ເມກາວັດ, ມຽນມາ 300 ເມກາວັດ ແລະ ມາເລເຊຍ 300 ເມກາວັດ, ສໍາລັບປະເທດສິງກາໂປ ແມ່ນຢູ່ໃນໄລຍະເຈລະຈາຊື້-ຂາຍ.
ໂດຍສືບຕໍ່ປະຕິບັດນະໂຍບາຍແລກປ່ຽນພະລັງງານ ທີ່ມີຜົນປະໂຫຍດສູງສຸດໃຫ້ແກ່ລາວ, ລັດຖະບານ ລາວ ໄດ້ດຳເນີນການເຈລະຈາກັບຄູ່ຮ່ວມພັດທະນາທາງດ້ານກົນໄກຮ່ວມມື ຈົນກ້າວໄປເຖິງການເຊັນສັນຍາຊື້-ຂາຍໄຟຟ້າ ຢ່າງເປັນຮູບປະທຳ ດ້ວຍລາຄາທີ່ເໝາະສົມ-ຕາມທ່າແຮງ ໄດ້ປຽບດ້ານການພັດທະນາພະລັງງານຂອງປະເທດລາວເຊັ່ນ: ຈຳໜ່າຍໄປໄທ ມີ 8 ໂຄງການ ມີກຳລັງຕິດຕັ້ງ 5.620 ເມກາວັດ. ສຳລັບການຈຳໜ່າຍພະລັງງານໄຟຟ້າ, ເຊິ່ງລວມມີພະລັງງານໄຟຟ້າຈາກນ້ຳ ແລະ ພະລັງງານຄວາມຮ້ອນຈາກຖ່ານຫີນໄປຍັງກຳປູເຈຍ ຄາດວ່າໃຫ້ໄດ້ 6.000 ເມກາວັດ ໃນປີ 2019-2027. ສ່ວນປະເທດຫວຽດນາມ ໄດ້ສົ່ງອອກແລ້ວ 572 ເມກາວັດ ໃນ 2 ໂຄງການ ຄື ໂຄງການເຂື່ອນໄຟຟ້າເຊກະໝານ 1 ແລະ ເຊກະໝານ 3 ແລະ ຄາດວ່າຈະສົ່ງພະລັງງານໄຟຟ້າໃຫ້ໄດ້ 5.000 ເມກາວັດ. ປະເທດມຽນມາ ໄດ້ເຊັນສັນຍາຊື້ຂາຍໄຟຟ້າ ຮອດປີ 2025 ໃຫ້ໄດ້ 300 ເມກາວັດ ປັດຈຸບັນ ສົ່ງອອກແລ້ວ 10 ເມກາວັດ.
（ໄຊພອນ）
