 |
ທ່ານ ນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ ຮອງປະທານຄະນະກຳມາທິການແຫ່ງຊາດ.(ພາບ: vientianemai.net)
ເມື່ອຮ່່າງກົດໝາຍສະບັບນີ້ຖືກຮັບຮອງ ແລະ ປະກາດໃຊ້ ຈະເປັນເຄື່ອງມືສຳຄັນ ໃນການດັດປັບສາຍພົວພັນສັງຄົມ ກ່ຽວກັບຄວາມສະເໝີພາບ ຍິງ-ຊາຍ ເປັນຕົ້ນ ການຍົກສູງຄວາມຮັບຮູ້ ຄວາມເຂົ້າໃຈ ສະຕິ ແລະ ຄວາມເປັນເຈົ້າການ ໃນການຈັດຕັ້ງປະຕິບັດວຽກງານຄວາມສະເໝີພາບ ຍິງ-ຊາຍ ໃນຄອບຄົວທົ່ວສັງຄົມ ຍົກສູງຄວາມເປັນເຈົ້າການຂອງເພດຍິງໃຫ້ຮັບຮູ້ສິດທິຂອງຕົນ ແລະ ສ້າງຄວາມເຂັ້ມແຂງ ແລະ ຄວາມຮັບຜິດຊອບໃຫ້ຍິງ-ຊາຍ ຄອບຄົວ ຊຸມຊົນ ສັງຄົມ ແລະ ການຈັດຕັ້ງມີຈິດສຳນຶກ ແລະ ເອົາໃຈໃສ່ປະຕິບັດວຽກງານຄວາມສະ ເໝີພາບ ຍິງ-ຊາຍ ຢ່າງເຂັ້ມງວດ ພ້ອມທັງເປັນບ່ອນອີງໃຫ້ບັນດາອົງການຈັດຕັ້ງຕ່າງໆ ໃນການໂຄສະນາເຜີຍແຜ່ ສຶກສາອົບຮົມ ຄຸ້ມຄອງ ກວດກາ ແລະ ຈັດຕັ້ງປະຕິບັດໃຫ້ມີຄວາມເປັນເອກະພາບ.
ພາຍຫຼັງ ສສຊ ໄດ້ປະກອບຄຳເຫັນແລ້ວ ອານຸກຳມະການຮ່າງກົດໝາຍ ກໍໄດ້ອະທິບາຍໃຫ້ຄວາມກະຈ່າງແຈ້ງ ໃນບາງຄຳເຫັນທີ່ ສສຊ ສະເໜີ ແລະ ເຫັນດີຕໍ່ຄຳຄິດເຫັນຕ່າງໆທີ່ປະກອບສ່ວນ ເຮັດໃຫ້ເນື້ອໃນຂອງຮ່າງກົດໝາຍສະບັບນີ້ມີຄວາມອະອຽດ ຈະແຈ້ງ ແລະ ສົມບູນຍິ່ງຂຶ້ນ ຈາກນັ້ນ ປະທານກອງປະຊຸມໄດ້ສະຫຼຸບສັງ ລວມຄຳຄິດເຫັນ ແລະ ສະເໜີໃຫ້ ສສຊ ລົງຄະແນນສຽງ ຮັບຮອງເອົາຮ່າງກົດໝາຍ ວ່າດ້ວຍຄວາມສະເໝີພາບຍິງ-ຊາຍ (ສ້າງໃໝ່) ດ້ວຍຄະແນນສຽງສ່ວນຫຼາຍ.
ຮ່າງກົດໝາຍວ່າດ້ວຍຮູບເງົາ ສະບັບສ້າງໃໝ່ ປະກອບມີ 10 ພາກ 12 ໝວດ 71 ມາດຕາ ໃນຊຸມປີຜ່ານມາແຫ່ງການຕໍ່ສູ້ປົດປ່ອຍຊາດ ລວມທັງໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ຮູບເງົາລາວມີມູນເຊື້ອມາຈາກຮູບເງົາປະຕິວັດ ເຊິ່ງໄດ້ຮັບການສ້າງຕັ້ງຂຶ້ນເປັນທາງການ ໃນປີ 1958 ໂດຍມີຊື່ເອີ້ນເບື້ອງຕົ້ນວ່າ “ພະແນກຮູບເງົາສາລະຄະດີແນວລາວຮັກຊາດ” ສ້າງຕັ້ງຂຶ້ນໃນເຂດປົດປ່ອຍ ແຂວງຫົວພັນ ມີບົດບາດສຳຄັນໃນການຜະລິດຮູບເງົາຂ່າວ ແລະ ສາລະຄະດີ ເພື່ອໂຄສະນາແນວທາງອັນຖືກຕ້ອງຂອງຝ່າຍກຳລັງປະຕິວັດ ພ້ອມນີ້ ກໍໄດ້ໂຄສະນາໃຫ້ປະຊາຊົນບັນດາເຜົ່າໄດ້ຮູ້ເຖິງຄວາມໂຫດຮ້າຍປ່າເຖື່ອນໄຮ້ມະນຸດສະທຳຂອງຝ່າຍກຳລັງປະຕິການ ແລະ ເຮັດໃຫ້ປະຊາຊົນບັນ ດາເຜົ່າ ເຫັນໄດ້ການນຳພາອັນຖືກຕ້ອງສະຫຼາດສ່ອງໃສຂອງພັກປະຊາຊົນ ປະຕິວັດລາວ ຕະຫຼອດ 60 ປີ ຜ່ານມາ ຮູບເງົາໄດ້ສະແດງບົດບາດທີ່ສຳຄັນຄຽງຄູ່ກັບສື່ມວນຊົນຂະແໜງອື່ນໆຂອງພັກ-ລັດ ໃນການປຸກລະ ດົມຂົນຂວາຍປະຊາຊົນບັນດາເຜົ່າ ລຸກຮືຂຶ້ນຕໍ່ສູ່ຕ້ານຈັກກະພັດຕ່າງດ້າວ ຈົນສາມາດຍາດເອົາເອກະລາດ ແລະ ຜືນແຜ່ນດິນອັນຄົບຖ້ວນມາສູ່ປະຊາຊົນຢ່າງສົມບູນ ໃນປີ 1975 ຫຼັງຈາກປະເທດຊາດໄດ້ຮັບການປົດປ່ອຍ ຮູບເງົາຍັງສືບຕໍ່ປະຕິບັດພາລະບົດບາດຢ່າງສະເໝີຕົ້ນສະເໝີປາຍ ໃນການໂຄສະນາສຶກສາອົບຮົມປະ ຊາຊົນລາວບັນດາເຜົ່າ ໃຫ້ເຫັນໄດ້ຜົນຮ້າຍຂອງສົງຄາມ ແລະ ພ້ອມກັນປົກປັກຮັກສາໝາກຜົນ ແລະ ມູນ ເຊື້ອຂອງການປະຕິວັດ ຕັ້ງໜ້າປະກອບສ່ວນໃນການສ້າງສາພັດທະນາປະເທດຊາດ ຮູບເງົາຍັງເປັນແຫຼ່ງບັນ ເທີງທີ່ສຳຄັນ ແລະ ໄດ້ຮັບຄວາມນິຍົມສູງ ທີ່ສາມາດສ້າງອາລົມຈິດ ແຫຼ່ງຄວາມເບີກບານມ່ວນຊື່ນໃຫ້ຜູ້ຊົມໄດ້ທຸກລົດຊາດ ທັງພາບ ແລະ ສຽງ ນອກນີ້ ຮູບເງົາລາວຍັງເປັນເວທີແຫ່ງການສະແດງອອກເຖິງແນວທາງນະໂຍບາຍຂອງພັກ-ລັດ ກໍຄື ວັດທະນະທຳຮີດຄອງປະເພນີອັນດີງາມຂອງຊາດລາວໃຫ້ຊາວໂລກໄດ້ຮູ້ ແລະ ໄດ້ເຫັນ.
ເມື່ອຮ່າງກົດໝາຍວ່າດ້ວຍຮູບເງົາຖືກຮັບຮອງ ແລະ ປະກາດນຳໃຊ້ ຈະມີເຄື່ອງມືດ້ານນິຕິກຳໃຫ້ຂະແໜງການ ແລະ ພາກສ່ວນກ່ຽວຂ້ອງ ໃນການຄຸ້ມຄອງວຽກງານຮູບເງົາໃຫ້ມີຄວາມເປັນເອກະພາບ ເຊັ່ນ: ການກວດກາເນື້ອໃນ ການອະນຸຍາດ ການອະນຸມັດສ້າງຕັ້ງຫົວໜ່ວຍທຸລະກິດຮູບເງົາ ການແບ່ງຂັ້ນຄຸ້ມຄອງລະຫວ່າງ ສູນກາງ ແລະ ທ້ອງຖິ່ນ ເປັນບ່ອນອີງໃຫ້ນັກສ້າງຮູບເງົາພາຍໃນ ແລະ ຕ່າງປະເທດໄດ້ຮັບຮູ້ ເຂົ້າໃຈເຖິງຂໍ້ຫ້າມ ແລະ ຂໍອະນຸຍາດໃນການເຄື່ອນໄຫວວຽກງານຮູບເງົາ ເປັນການຊຸກຍູ້ໃຫ້ນັກສ້າງຮູບເງົາພາຍໃນ ແລະ ຕ່າງປະເທດ ຜະລິດຮູບເງົາຢູ່ລາວຫຼາຍຂຶ້ນ ເປັນບ່ອນອີງໃນການແກ້ໄຂຂໍ້ຂັດແຍ່ງຕ່າງໆດ້ານຮູບເງົາ ເປັນບ່ອນອີງໃນການຮ່ວມມື ແລະ ແລກປ່ຽນບົດຮຽນກັບຕ່າງປະເທດດ້ານຮູບເງົາ.
（ໄຊພອນ）
