ສະພາແຫ່ງຊາດ ຕີລາຄາການເຄື່ອນໄຫວວຽກງານ-ກະກຽມເລືອກຕັ້ງ

14:15 | 23/09/2019

ຍສໝ - ໃນລະຫວ່າງວັນທີ 18-20 ກັນຍາ 2019, ສະພາແຫ່ງຊາດ ໄດ້ຈັດກອງປະຊຸມຮ່ວມລະຫວ່າງ ຄະນະປະຈຳສະພາແຫ່ງຊາດ ກັບຄະນະສະມາຊິກສະພາແຫ່ງຊາດ ສສຊ ປະຈຳເຂດເລືອກຕັ້ງ ເພື່ອເປັນການສະຫລຸບຕີລາຄາຄືນ ການເຄື່ອນໄຫວວຽກງານ ໃນໄລຍະຜ່ານມາ ເພື່ອເສີມຂະຫຍາຍດ້ານດີ ແລະ ແກ້ໄຂດ້ານອ່ອນຂໍ້ຄົງຄ້າງ; ເພື່ອເພີ່ມທະວີການຊີ້ນຳ-ນຳພາ ຂອງສອງພາກສ່ວນ ໃຫ້ມີປະສິດທິພາບ; ທັງເປັນການປັບປຸງຄືນວິທີການກະກຽມ ແລະ ດຳເນີນກອງປະຊຸມສະພາປະຊາຊົນຂັ້ນແຂວງ; ການປະເມີນບຸກຄະລາກອນ ແລະ ການກະກຽມເບື້ອງຕົ້ນການເລືອກຕັ້ງ ສສຊ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II. ໃຫ້ກຽດເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ.

ສະພາແຫ່ງຊາດ ຕີລາຄາການເຄື່ອນໄຫວວຽກງານ-ກະກຽມເລືອກຕັ້ງ

ພາບປະກອບ

ກອງປະຊຸມ ໄດ້ຮັບຟັງບົດລາຍງານການເຄື່ອນໄຫວ ວຽກງານຂອງຄະນະ ສສຊ ປະຈຳເຂດເລືອກຕັ້ງ, ການກະກຽມ ແລະ ດຳເນີນກອງປະຊຸມ ສພຂ ຊຸດທີ I ໃນປີຜ່ານມາ ໂດຍໄດ້ເຂົ້າຮ່ວມໃນການຄົ້ນຄວ້າ, ປະກອບຄໍາຄິດຄໍາເຫັນ ມີທັງໝົດ 73 ສະບັບ(ສ້າງໃໝ່ 32 ສະບັບ ແລະ ປັບປຸງ 41 ສະບັບ); ສັງລວມສະຖິຕິການພົບປະກັບ ຜູ້ມີສິດເລືອກຕັ້ງທັງໝົດທົ່ວປະເທດ ນັບແຕ່ກອງປະຊຸມ ຄັ້ງປະຖົມມະລືກ ຮອດປັດຈຸ ບັນ ມີຈໍານວນ 6.441 ຈຸດ ມີຜູ້ເຂົ້າຮ່ວມທັງໝົດ 1.118.548 ຄົນ ຍິງ 502.489 ຄົນ; ຄະນະ ສສຊ ປະ ຈຳເຂດເລືອກຕັ້ງ ໄດ້ຕິດຕາມກວດກາຕາມແຜນການຂອງ ຄະນະປະຈຳສະພາແຫ່ງຊາດ ແລະ ກຳມາທິການສະພາແຫ່ງຊາດ ຍັງໄດ້ຕິດຕາມກວດກາ ຄຳຮ້ອງທຸກຂອງປະຊາຊົນ ເປັນຕົ້ນ ໂຄງການທາງດ່ວນ, ໂຄງ ການເສັ້ນທາງລົດໄຟ, ເຂື່ອນໄຟຟ້ານ້ຳຕົກ, ການບຸກລຸກປ່າສະຫງວນ ແລະ ອື່ນໆ.

ພ້ອມນັ້ນ, ຮັບຟັງບົດລາຍງານ ກ່ຽວກັບການປະຕິບັດ ໜ້າທີ່ວຽກງານ ຂອງຄະນະເລຂາທິການສະພາແຫ່ງຊາດ ຕໍ່ວຽກງານເຂດເລືອກຕັ້ງ; ຮັບຟັງການເຜີຍແຜ່, ແນະນໍາກ່ຽວກັບການກະກຽມ ແລະ ດໍາເນີນການປະເມີນຜົນ ຕໍ່ການປະຕິບັດໜ້າທີ່ ຂອງບຸກຄະລາກອນ ດໍາລົງຕໍາແໜ່ງທີ່ ສພຊ, ສພຂ ເລືອກຕັ້ງ ແລະ ຮັບ ຮອງເອົາການແຕ່ງຕັ້ງ.

（ແຫຼ່ງຂໍ້ມູນ： ຂປລ）