 |
| ທ່ານປະທານປະເທດ ຫວຽດນາມ ຫງວຽນຊວນຟຸກ ແລະ ທ່ານນາຍົກລັດຖະມົນຕີ ກຳປູເຈຍ Samdech Techo Hun Sen (ພາບ: TTXVN) |
ນີ້ແມ່ນການຢ້ຽມຢາມຄັ້ງທຳອິດຂອງຜູ້ນຳໜ້າລັດ ຫວຽດນາມ ໄປຍັງ ກຳປູເຈຍ ພາຍຫຼັງບູລະນະກົງຈັກການນຳຂັ້ນສູງ ຫຼັງກອງປະຊຸມໃຫຍ່ຄັ້ງທີ 13 ຂອງພັກກອມມູນິດ. ສຳລັບລາຊະອານາຈັກກຳປູເຈຍແລ້ວ, ນີ້ແມ່ນການຢ້ຽມຢາມຄັ້ງທຳອິດຂອງປະມຸກລັດຕ່າງປະເທດ ຢູ່ລາຊະອານາຈັກກຳປູເຈຍ ໃນປີ 2021.
ການຢ້ຽມຢາມເພື່ອແນໃສ່ປະຕິບັດແນວທາງການຕ່າງປະເທດຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 13 ຂອງພັກ, ສະແດງໃຫ້ເຫັນການຖືເປັນສຳຄັນ ແລະ ພັດທະນາການພົວພັນກັບບັນດາປະເທດບ້ານໃກ້ເຮືອນຄຽງ; ເຫດການດັ່ງກ່າວໄດ້ດຳເນີນໄປໃນສະພາບການທີ່ສາຍພົວພັນບ້ານໃກ້ເຮືອນຄຽງ, ຄວາມສາມັກຄີ, ມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງ ຫວຽດນາມ - ກຳປູເຈຍ ສືບຕໍ່ພັດທະນາຢ່າງດີງາມ.
ການຢ້ຽມຢາມຍັງແມ່ນໜຶ່ງໃນບັນດາການເຄື່ອນໄຫວທຳອິດເພື່ອເລີ່ມດຳເນີນບັນດາການເຄື່ອນໄຫວສະເຫຼີມສະຫຼອງ “ປີມິດຕະພາບ ຫວຽດນາມ - ກຳປູເຈຍ, ກຳປູເຈຍ - ຫວຽດນາມ” ແລະ ຄົບຮອບ 55 ປີແຫ່ງວັນສ້າງສາຍພົວພັນທາງການທູດລະຫວ່າງ 2 ປະເທດ (ວັນທີ 24 ມິຖຸນາ 1967 – ວັນທີ 24 ມິຖຸນາ 2022).
ໃນຊຸມປີມໍ່ໆມານີ້, ການພົວພັນລະຫວ່າງຫວຽດນາມ - ກຳປູເຈຍ ໄດ້ພັດທະນາໃນຫລາຍດ້ານເປັນຢ່າງດີ. ກ່ຽວກັບດ້ານການເມືອງ, ການນຳສອງຝ່າຍ ຈັດຕັ້ງການໂອ້ລົມທາງໂທລະສັບ, ການສົນທະນາແບບໄກເປັນປະຈຳ. ສອງຝ່າຍໄດ້ສົມທົບກັນ ເພື່ອຈັດຕັ້ງບັນດາກົນໄກຮ່ວມມືທີ່ສຳຄັນຂອງສອງປະເທດຢ່າງສຳເລັດຜົນ. ພົ້ນເດັ່ນຂຶ້ນແມ່ນ ເລື່ອງທ່ານປະທານພັກປະຊາຊົນກຳປູເຈຍ, ນາຍົກລັດຖະມົນຕີ Hunsen ໄປຢ້ຽມຢາມຫວຽດນາມ ເພື່ອເຂົ້າຮ່ວມການພົບປະກັບທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ທ່ານເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ທອງລຸນ ສີສຸລິດ (ຮ່າໂນ້ຍ, 26 ກັນຍາ 2021) ແລະ ມີການພົບປະກັບທ່ານປະທານປະເທດ ແລະ ທ່ານນາຍົກລັດຖະມົນຕີ.
ການຮ່ວມມືດ້ານປ້ອງກັນຊາດ ແລະ ປ້ອງກັນຄວາມສະຫງົບ ສືບຕໍ່ໄດ້ຮັບການສົມທົບກັນຢ່າງແໜ້ນແຟ້ນ. 2 ປະເທດໄດ້ປະຕິບັດສຳເລັດການປັກຫຼັກໝາຍຊາຍແດນທາງບົກປະມານ 84% ແລະ ໄດ້ລົງນາມໃນເອກະສານນິຕິກຳ 2 ສະບັບໃນວັນທີ 5 ຕຸລາ 2019 ໂດຍຮັບຮູ້ຜົນສຳເລັດຂອງການປັກຫຼັກໝາຍທີ່ບັນລຸໄດ້ນັ້ນ. ວັນທີ 22 ທັນວາ 2020, ສອງປະເທດໄດ້ສົມທົບກັນຈັດຕັ້ງພິທີແລກປ່ຽນເອກະສານສັດຕະຍະບັນຕາມຮູບແບບທາງໄກເພື່ອໃຫ້ເອກະສານນິຕິກຳສອງສະບັບກ່ຽວກັບຊາຍແດນມີຜົນສັກສິດຢ່າງເປັນທາງການ.
ການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດໄດ້ຮັບການພັດທະນາເປັນຢ່າງດີເຖິງແມ່ນວ່າປະສົບກັບຄວາມຫຍຸ້ງຍາກຍ້ອນໂລກລະບາດກໍ່ຕາມ, ແຕ່ການຄ້າລະຫວ່າງສອງປະເທດຍັງມີການເຕີບໂຕຢ່າງແຮງ. ໃນ 10 ເດືອນຕົ້ນປີ 2021, ວົງເງິນການສົ່ງອອກສິນຄ້າລະຫວ່າງ 2 ປະເທດບັນລຸ 7,87 ຕື້ USD, ເພີ່ມຂຶ້ນ 87,5% ເມື່ອທຽບໃສ່ໄລຍະດຽວກັນຂອງປີ 2020. ຫວຽດນາມ ມີ 188 ໂຄງການລົງທຶນທີ່ຍັງມີຜົນສັກສິດຢູ່ກຳປູເຈຍ ດ້ວຍຍອດຈຳນວນທຶນຈົດທະບຽນ 2,88 ຕື້ USD, ຢືນຢູ່ອັນດັບທີ 5 ຂອງບັນດາປະເທດທີ່ມາລົງທຶນຢູ່ກຳປູເຈຍ.
ກ່ຽວກັບການຮ່ວມມືປ້ອງກັນພະຍາດໂຄວິດ-19, ໃນປີ 2020, ຫວຽດນາມ ໄດ້ໜູນຊ່ວຍທັງເງິນ ແລະ ອຸປະກອນການແພດ ໃຫ້ແກ່ລັດຖະບານ ແລະ ປະຊາຊົນກຳປູເຈຍ ຢ່າງຮີບດ່ວນ, ໃນນັ້ນມີອຸປະກອນ, ຊຸດກວດ PCR ເປັນມູນຄ່າປະມານ 300.000 USD. ໃນປີ 2021, ຫວຽດນາມ ໄດ້ສືບຕໍ່ໃຫ້ການຊ່ວຍເຫຼືອສຸກເສີນໃຫ້ກຳປູເຈຍ ດ້ວຍເງິນເປັນຈຳນວນ 500.000 USD ແລະ ເຄື່ອງອຸປະກອນການແພດຫຼາຍຢ່າງຄື: ເຄື່ອງຊ່ວຍຫາຍໃຈ 800 ເຄື່ອງ, ຜ້າອັດປາກອັດດັງການແພດ 2 ລ້ານອັນ, ຜ້າອັດປາກອັດດັງ N95 300.000 ອັນທີ່ມີມູນຄ່າປະມານ 10 ລ້ານ USD ເພື່ອປະກອບສ່ວນຢ່າງແທດຈິງ ແລະ ມີປະສິດທິຜົນເຂົ້າໃນຄວາມມານະພະຍາຍາມປ້ອງກັນ, ຕ້ານໂລກລະບາດໂຄວິດ - 19 ຂອງ ລັດຖະບານ ແລະ ປະຊາຊົນກຳປູເຈຍ.
ບັນດາກະຊວງ, ຂະແໜງການ, ອົງການຈັດຕັ້ງມະຫາຊົນ ແລະ ທ້ອງຖິ່ນຂອງຫວຽດນາມ ມີຫຼາຍຮູບການໜູນຊ່ວຍໂດຍກົງໃຫ້ແກ່ບັນດາຄູ່ຮ່ວມມື ກຳປູເຈຍ, ສະແດງໃຫ້ເຫັນຮີດຄອງປະເພນີນ້ຳໃຈແບ່ງປັນ ແລະ ໜູນຊ່ວຍເພື່ອນມິດໃນໄລຍະປະສົບກັບຄວາມຫຍຸ້ງຍາກ, ປະກອບສ່ວນເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ.
ສະພາກາແດງກຳປູເຈຍ, ສະມາຄົມມິດຕະພາບ ກຳປູເຈຍ - ຫວຽດນາມ ແລະ ປະຊາຊົນກຳປູເຈຍ ໄດ້ມອບຢາວັກຊີນ Sinopharm ຈໍານວນ 200.000 ໂດສ ໃຫ້ແກ່ຫວຽດນາມ, ຜ້າອັດປາກອັດດັງການແພດ 1 ລ້ານອັນ, ຜ້າອັດປາກອັດດັງ N95 100.000 ອັນ, ເຄື່ອງຜະລິດອົກຊີເຈນ 100 ໜ່ວຍ ແລະ ເງິນ 350.000 ໂດລາ...
ຕາມທ່ານເອກອັກຄະລັດຖະທູດ ກຳປູເຈຍ ປະຈຳຫວຽດນາມ Chay Navuth ແລ້ວ, ການຢ້ຽມຢາມ ກຳປູເຈຍ ຂອງທ່ານປະທານປະເທດ ຫງວຽນຊວນຟຸກ ສະແດງໃຫ້ເຫັນຢ່າງຈະແຈ້ງເຖິງສາຍພົວພັນມິດຕະພາບທີ່ເປັນມູນເຊື້ອລະຫວ່າງ ກຳປູເຈຍ - ຫວຽດນາມ, ພ້ອມກັນນັ້ນ ກໍ່ເປັນການສະແດງໃຫ້ເຫັນເຖິງສາຍພົວພັນມິດຕະພາບລະຫວ່າງ 2 ປະເທດ.
ບຸນຄົງ
