 |
ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດ ຫວຽດນາມ. ພາບ: baoquocte.vn
ທ່ານນາງ ເລທິທູຮັ່ງ ໃຫ້ຮູ້ວ່າ: ກະຊວງການຕ່າງປະເທດ ແລະ ບັນດາອົງການທີ່ຕ່າງໜ້າ ຫວຽດນາມ ໃນຊຸມມື້ຜ່ານມາໄດ້ສືບຕໍ່ເປັນເຈົ້າການ, ຕັ້ງໜ້າຜັນຂະຫຍາຍຫລາຍມາດຕະການ ເພື່ອໜູນຊ່ວຍ ແລະ ປົກປ້ອງພົນລະເມືອງ ຫວຽດນາມ ທີ່ພວມດຳລົງຊີວິດ, ຮ່ຳຮຽນ, ເຮັດວຽກ ແລະ ທ່ອງທ່ຽວຢູ່ຕ່າງປະເທດ. ພິເສດແມ່ນເຂດທີ່ເກີດໂລກລະບາດ Covid-19; ບັນດາອົງການທີ່ຕ່າງໜ້າ ຫວຽດນາມ ທີ່ປະຈຳຢູ່ຕ່າງປະເທດ ໄດ້ສ້າງໂທລະສັບສາຍດ່ວນ ເພື່ອປົກປ້ອງພົນລະເມືອງ ຫວຽດນາມ ໃນຕະຫລອດ 24 ຊົ່ວໂມງ. ປົກປ້ອງພົນລະເມືອງຢູ່ເຂດຖືກຜົນສະທ້ອນຈາກເຊື້ອພະຍາດ Covid-19 ແມ່ນໜຶ່ງໃນບັນດາບຸລິມະສິດແຖວໜ້າຂອງ ຫວຽດນາມ” ນີ້ແມ່ນຄຳຢືນຢັນຂອງທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດ ຫວຽດນາມ ທີ່ການຖະແຫຼງຂ່າວນັດສາມັນຂອງກະຊວງການຕ່າງປະເທດ ຫວຽດນາມ ໃນຕອນບ່າຍວັນທີ 5 ມີນາ ຢູ່ ຮ່າໂນ້ຍ.
ວັນທີ 5 ມີນາ, ກະຊວງສາທາລະນະສຸກ ຫວຽດນາມ ໄດ້ສົມທົບກັບກຸ່ມບໍລິສັດ VMED ເປີດຕົວສູນຄຸ້ມຄອງ, ບໍລິຫານການໜູນຊ່ວຍການກວດ, ປິ່ນປົວ ພະຍາດ Covid – 19 ທາງອອນລາຍ. ສູນດັ່ງກ່າວ ໄດ້ຮັບການຜັນຂະຫຍາຍດ້ວຍເປົ້າໝາຍນຳໃຊ້ຈຸດພົ້ນເດັ່ນຂອງມາດຕະການທາງການແພດດີຈີຕອນໃນວຽກງານຄວບຄຸມໂລກລະບາດ Covid – 19 ແລະ ໜູນໃຊ້ການຄວບຄຸມໂລກລະບາດໃນອະນາຄົດ, ອະນຸຍາດໃຫ້ນັກຊ່ຽວຊານ, ນັກຄຸ້ມຄອງ ໃຫ້ຄຳປຶກສາດ້ານວິຊາການ ແລະ ຊີ້ນຳບໍລິຫານໃຫ້ຂັ້ນລຸ່ມໄດ້ຢ່າງວ່ອງໄວ ແລະ ມີປະສິດທິຜົນທີ່ສຸດ, ປະກອບສ່ວນຍົກສູງຄຸນນະພາບໃນການກວດ ແລະ ປິ່ນປົວ. ສູນສາມາດເຊື່ອມຕໍ່ ສະຖານທີ່ຈຸດສຸມປ້ອງກັນຄວບຄຸມເຊື້ອພະຍາດໄດ້ 23 ແຫ່ງ ແລະ ໂຮງໝໍໃນທົ່ວປະເທດ ກ່ວາ 1.400 ແຫ່ງ. ສູນມີບົດບາດໜ້າທີ່ຄຸ້ມຄອງ, ບໍລິຫານ ແຫຼ່ງກຳລັງ ແລະ ການເຄື່ອນໄຫວທາງດ້ານວິຊາການ, ວິຊາສະເພາະ ເພື່ອແນໃສ່ໜູນຊ່ວຍບັນດາຮາກຖານ ກວດ, ປິ່ນປົວ ພະຍາດຢູ່ບ່ອນຕ້ອນຮັບ, ແຍກຕົວ, ກວດ ແລະ ປິ່ນປົວ ຜູ້ຕິດພະຍາດ Covid – 19.
ທີ່ກອງປະຊຸມຂອງຄະນະປະຈຳລັດຖະບານ ຫວຽດນາມ ກ່ຽວກັບມາດຕະການປ້ອງກັນ, ຄວບຄຸມ Covid-19 ໃນວັນທີ 05 ມີນາ, ຢູ່ສຳນັກງານ ລັດຖະບານ, ຄະນະຊີ້ນຳແຫ່ງຊາດກ່ຽວກັບການປ້ອງກັນ, ຄວບຄຸມໂລກລະບາດ Covid-19 ໄດ້ປະກາດວ່າ ປັດຈຸບັນ, ໂລກລະບາດ Covid-19 ໄດ້ເກີດຂຶ້ນຢູ່ 84 ປະເທດ ແລະ ເຂດແຄ້ວນໃນໂລກ. ທ່ານນາຍົກລັດຖະມົນຕີ ຫງວຽນຊວັນຟຸກ ໄດ້ຕັກເຕືອນອີກຄັ້ງໜຶ່ງ ກ່ຽວກັບຄວາມຕັດສິນໃຈປະຕິບັດ 2 ເປົ້າໝາຍຂອງລັດຖະບານໃນປີນີ້; ພ້ອມທັງໃຫ້ຮູ້ວ່າ: ລັດຖະບານໄດ້ປຶກສາຫາລືຢ່າງລອບຄອບຖີ່ຖ້ວນ ແລະ ຈະຍົກອອກບັນດາມາດຕະການ, ລວມມີທັງບັນດານະໂຍບາຍປີງົບປະມານ, ເງິນຕາ, ບັນດາມາດຕະການຊຸກຍູ້ການຜະລິດດຳເນີນທຸລະກິດ.
（ໄຊພອນ）
