 |
ສະມາຊິກສະພາສູງ ອາເມລິກາ John McCain.
ທ່ານ John McCain ເກີດປີ 1936 ແມ່ນອະດີດສະມາຊິກສະພາສູງຂອງອາເມລິກາມາເປັນເວລາຫລາຍປີ ແລະ ໄດ້ຮັບການສະເຫນີຈາກພັກ ສາທາລະນະມາ ອອກສະຫມັກຮັບເລືອກຕັ້ງເປັນປະທານາທິບໍດີ ອາເມລິກາ ໃນການເລືອກຕັ້ງປະທານາທິບໍດີ ເມື່ອປີ 2008.
ກ່ອນທີ່ກາຍເປັນສະມາຊິກສະພາສູງ, ທ່ານJohn McCain ໄດ້ຮັບໃຊ້ໃນກອງທັບເປັນເວລາຫລາຍປີ ແລະ ເຂົ້າຮ່ວມສົງຄາມຫວຽດນາມ ໂດຍກົງ. ເດືອນ ຕຸລາປີ 1967 ໃນບັ້ນຮົບບຸກໂຈມຕີທາງອາກາດຢູ່ ນະຄອນຫລວງຮ່າໂນ້ຍ, ທ່ານ John McCain ເວລານັ້ນ ແມ່ນພັນຈັດຕະວາກອງທັບອາກາດ ຖືກທະຫານຫວຽດນາມ ຈັບຕົວ. ປີ 1973 ທ່ານໄດ້ປ່ອຍຕົວໃນກໍລະນີຝ່າຍຫວຽດນາມ ໄດ້ມອບສົ່ງຊະເລີຍເສີກໃຫ້ອາເມລິກາ. ພາຍຫລັງກັບຄືນເມືອ ອາເມລິກາ ທ່ານ ໄດ້ຕັ້ງຫນ້າເຂົ້າຮ່ວມເວທີການເມືອງ ກາຍເປັນຜູ້ນຳຫນ້າໃນການຂົນຂວາຍສ້າງການພົວພັນລະຫວ່າງຫວຽດນາມ ແລະ ອາເມລິກາ ໃຫ້ເປັນປົກກະຕິ. ປີ 1994 ສະພາສູງ ອາເມລິກາ ໄດ້ຮັບຮອງເອົາມາດຕະການ ໂດຍທ່ານ John McCain ເປັນຜູ້ຮ່ວມໃນການປົກປ້ອງ, ຮຽກຮ້ອງຢຸດຕິການຂວ້ຳບາດເສດຖະກິດຕ້ານ ຫວຽດນາມ, ກະກຽມໃຫ້ເລື່ອງສ້າງການພົວພັນເປັນປົກກະຕິລະຫວ່າງສອງປະເທດຫລັງຈາກນັ້ນຫນຶ່ງປີ. ເນື່ອງໃນໂອກາດນີ້ ທ່ານເອກອັກຄະລັດຖະທູດຫວຽດນາມ ປະຈຳ ອາເມລິກາ ຮ່າກີມງອກ ໄດ້ເນັ້ນຫນັກວ່າ:
“ຂ້າພະເຈົ້າຄິດວ່າ ທ່ານສະມາຊິກສະພາສູງ John McCain ແມ່ນຜູ້ພະຍານປະຫວັດສາດ. ອາດຈະເວົ້າໄດ້ວ່າ ທ່ານແມ່ນສັນຍາລັກແຫ່ງວິວັດການໄກ່ເກ່ຍປອງດອງຂອງການພົວພັນລະຫວ່າງ ຫວຽດນາມ ແລະ ອາເມລິກາ. ທ່ານກໍ່ແມ່ນຫນຶ່ງໃນບັນດາຜູ້ນຳຫນ້າໃນວິວັດທະນາການສ້າງການພົວພັນລະຫວ່າງສອງປະເທດໃຫ້ເປັນປົກກະຕິ ແລະຊຸກຍູ້ການພົວພັນມິດຕະພາບ ແລະ ການຮ່ວມມື ຫວຽດນາມ - ອາເມລິກາ.”
ບໍ່ພຽງແຕ່ປະກອບສ່ວນຢ່າງຕັ້ງຫນ້າໃຫ້ແກ່ການພົວພັນລະຫວ່າງຫວຽດນາມ ແລະ ອາເມລິກາ ໃນແງ່ມູມລັດຖະບານເທົ່ານັ້ນ ຫາກສະມາຊິກສະພາສູງJohn McCain ຍັງແມ່ນເພື່ອນສະຫນິດສະຫນົມຂອງຫວຽດນາມ ອີກດ້ວຍ .
（ແຫຼ່ງຂໍ້ມູນ： vov5）
